Святого апостола Павла послание к Коринфянам второе

Послание написано в 57 году в Македонии (2Кор. 7:5), куда Павел бежал из охваченного мятежом Эфеса. По сведениям из Деяний Апостолов (Деян. 20:1) Павел в 57 году путешествовал по Македонии, затем посетил Ахайю, в том числе Коринф и затем праздновал Пасху 58 года в македонском городе Филиппах. Послание написано вскоре после 1-го послания, но до второго посещения Коринфа. Написанию послание предшествовало путешествие Тита в Коринф (2Кор. 7:7), который и сообщил Павлу реакцию на 1-е послание.

Разве можно заставить умолкнуть проповедника? Всех апостолов, кроме одного, убили, но их проповедь еще больше расцветала и усиливалась, присоединяя множество душ к нашей Церкви.

Второе к Коринфянам, 1

• Пáвелъ, послáн­никъ Иисýсъ Христóвъ вóлею Бóжiею, и тимоѳéй брáтъ, цéркви Бóжiей сýщей въ кори́нѳѣ, со святы́ми всѣ́ми сýщими во всéй Ахáiи:

• благодáть вáмъ и ми́ръ от­ Бóга Отцá нá­шего, и Гóспода Иисýса Христá.

• Благословéнъ Бóгъ и Отéцъ Гóспода нá­шего Иисýса Христá, Отéцъ щедрóтъ и Бóгъ вся́кiя утѣ́хи,

• утѣшáяй нáсъ о вся́цѣй скóрби нá­шей, я́ко воз­мощи́ нáмъ утѣ́шити сýщыя во вся́цѣй скóрби, утѣшéнiемъ, и́мже утѣшáемся сáми от­ Бóга.

• Занé я́коже избы́точе­ст­вуютъ страдáнiя Христóва въ нáсъ, тáко Христóмъ избы́точе­ст­вуетъ и утѣшéнiе нá­ше.

• А́ще ли же скорби́мъ, о вá­шемъ утѣшéнiи и спасéнiи, дѣ́й­ст­ву­ю­щемся въ терпѣ́нiи тѣ́хже страдáнiй, я́же и мы́ стрáждемъ:

• и уповáнiе нá­ше извѣ́стно о вáсъ. А́ще ли утѣшáемся, о вá­шемъ утѣшéнiи и спасéнiи, вѣ́дяще, занé я́коже о́бщницы естé страстéмъ нáшымъ, тáкожде и утѣшéнiю.

• Не бó хóщемъ вáсъ, брáтiе, не вѣ́дѣти о скóрби нá­шей бы́в­шей нáмъ во Асíи, я́ко по премнóгу [и] пáче си́лы отяготи́хомся, я́ко не надѣ́ятися нáмъ и жи́ти.

• Но сáми въ себѣ́ осуждéнiе смéрти имѣ́хомъ, да не надѣ́ющеся бýдемъ на ся́, но на Бóга воз­ставля́ющаго мéртвыя,

• и́же от­ толи́кiя смéрти избáвилъ ны́ éсть и избавля́етъ, нáньже и уповáхомъ, я́ко и ещé избáвитъ,

• споспѣше­ст­вýющымъ и вáмъ по нáсъ моли́твою, да от­ мнóгихъ ли́цъ, éже въ нáсъ даровáнiе, мнóгими благодари́т­ся о вáсъ {въ нѣ́кiихъ: о нáсъ}.

• Похвалéнiе бо нá­ше сié éсть, свидѣ́тел­ст­во сóвѣсти нá­шея, я́ко въ простотѣ́ и чи́стотѣ́ Бóжiей, [а] не въ мýдрости плóти, но благодáтiю Бóжiею жи́хомъ въ мíрѣ, мнóжае же у вáсъ.

• Не инáя бо пи́шемъ вáмъ, но я́же чтетé и разумѣвáете: уповáю же, я́ко и до концá уразумѣ́ете,

• я́коже и разумѣ́сте нáсъ от­ чáсти, я́ко похвалéнiе вáмъ есмы́, я́коже и вы́ нáмъ, въ дéнь Гóспода нá­шего Иисýса Христá.

• И си́мъ уповáнiемъ хотѣ́хъ къ вáмъ прiити́ прéжде, да вторýю благодáть и́мате,

• и вáми про­ити́ въ македóнiю, и пáки от­ македóнiи прiити́ къ вáмъ, и вáми проводи́тися во Иудéю.

• Сié же хотя́, едá чтó ýбо легкотóю дѣ́яхъ? Или́ я́же совѣщавáю, по плóти совѣщавáю, да бýдетъ у менé éже éй, éй, и éже ни́, ни́.

• Вѣ́ренъ же Бóгъ, я́ко слóво нá­ше, éже къ вáмъ, не бы́сть éй и ни́.

• И́бо Бóжiй Сы́нъ Иисýсъ Христóсъ, и́же у вáсъ нáми проповѣ́дан­ный, мнóю и Силуáномъ и тимоѳéемъ, не бы́сть éй и ни́, но въ нéмъ самѣ́мъ éй бы́сть:

• ели́ка бо обѣтовáнiя Бóжiя, въ тóмъ éй и въ тóмъ ами́нь: Бóгу къ слáвѣ нáми.

• Извѣ­ст­вýяй же нáсъ съ вáми во Христá и помáзавый нáсъ, Бóгъ,

• и́же и запечатлѣ́ нáсъ, и дадé обручéнiе Дýха въ сердцá нáша.

• А́зъ же свидѣ́теля Бóга при­­зывáю на мою́ дýшу, я́ко щадя́ вáсъ, ктомý не прiидóхъ въ кори́нѳъ,

• не я́ко обладáемъ вѣ́рою вá­шею, но [я́ко] споспѣ́шницы есмы́ вá­шей рáдости: вѣ́рою бо сто­итé.

Второе к Коринфянам, 2

• Суди́хъ же въ себѣ́ сié, не пáки скóрбiю къ вáмъ прiити́.

• А́ще бо áзъ скóрбь творю́ вáмъ, тó ктó éсть веселя́яй мя́, тóчiю прiéмляй скóрбь от­ менé?

• И писáхъ вáмъ сié и́стое, да не при­­шéдъ скóрбь на скóрбь прiимý, о ни́хже подобá­ше ми́ рáдоватися, надѣ́яся на вся́ вы́, я́ко моя́ рáдость всѣ́хъ вáсъ éсть.

• От печáли бо мнóгiя и туги́ сéрдца написáхъ вáмъ мнóгими слезáми, не я́ко да оскорби́теся, но любо­́вь да познáете, ю́же и́мамъ изоби́лно къ вáмъ.

• А́ще ли ктó оскорби́лъ [менé], не менé оскорби́, но от­ чáсти, да не отягчý, всѣ́хъ вáсъ.

• Довóлно [бо] таковóму запрещéнiе сié, éже от­ мнóгихъ:

• тѣ́мже сопроти́вное пáче вы́ да дáруете и утѣ́шите, да не кáко мнóгою скóрбiю пожéртъ бýдетъ таковы́й:

• тѣ́мже молю́ вы́, утверди́те къ немý любо­́вь.

• На сié бо и писáхъ, да разумѣ́ю искýс­ст­во вá­ше, áще во всéмъ послушли́ви естé.

• Емýже áще чтó дáруете, и áзъ: и́бо áзъ áще чтó даровáхъ, емýже даровáхъ, вáсъ рáди, о лицы́ Иисýсъ Христóвѣ,

• да не оби́дими бýдемъ от­ сатаны́: не не разумѣвáемъ бо умышлéнiй егó.

• Пришéдъ же въ троáду во благовѣ́стiе Христóво, и двéри от­вéрзенѣ ми́ бы́в­шей о Гóсподѣ,

• не имѣ́хъ покóя дýху мо­емý, не обрѣ́тшу ми́ ти́та брáта мо­егó: но от­рéкся и́мъ {цѣловáвъ и́хъ}, изыдóхъ въ македóнiю.

• Бóгу же благодарéнiе, всегдá побѣди́тели нáсъ творя́щему о Христѣ́ Иисýсѣ и воню́ рáзума егó явля́ющу нáми во вся́цѣмъ мѣ́стѣ.

• Я́ко Христóво благо­ухáнiе есмы́ богови въ спасáемыхъ и въ погибáющихъ.

• О́вѣмъ ýбо вóня смéртная въ смéрть, о́вѣмъ же вóня живóтная въ живóтъ. И къ си́мъ ктó довóленъ?

• Нѣ́смы бо, я́коже мнóзи, нечи́сто проповѣ́да­ю­щiи слóво Бóжiе, но я́ко от­ чи́стоты́, но я́ко от­ Бóга, предъ Бóгомъ, во Христѣ́ глагóлемъ.

Второе к Коринфянам, 3

• Зачинáемъ ли пáки нáсъ самѣ́хъ извѣщавáти вáмъ? Или́ трéбуемъ, я́коже нѣ́цыи, извѣщавáтелныхъ послáнiй къ вáмъ, или́ от­ вáсъ извѣсти́телныхъ?

• Послáнiе [бо] нá­ше вы́ естé, напи́саное въ сердцáхъ нáшихъ, знáемое и прочитáемое от­ всѣ́хъ человѣ́къ:

• явля́еми, я́ко естé послáнiе Христóво слýженое нáми, напи́сано не черни́ломъ, но Дýхомъ Бóга жи́ва, не на скрижáлехъ кáмен­ныхъ, но на скрижáлехъ сéрдца плóтяныхъ.

• Надѣ́янiе же таковó и́мамы Христóмъ къ Бóгу,

• не я́ко довóлни есмы́ от­ себé помы́слити чтó, я́ко от­ себé, но довóл­ст­во нá­ше от­ Бóга:

• и́же и удовóли нáсъ служи́тели бы́ти нóву завѣ́ту, не пи́смени, но дýху: писмя́ бо убивáетъ, а дýхъ животвори́тъ.

• А́ще ли служéнiе смéрти писмены́, образовáно въ кáменехъ, бы́сть въ слáву, я́ко не мощи́ взирáти сынóмъ Изрáилевымъ на лицé Моисéово, слáвы рáди лицá егó престаю́щiя:

• кáко не мнóжае пáче служéнiе дýха бýдетъ въ слáвѣ?

• А́ще бо служéнiе осуждéнiя, слáва, мнóго пáче избы́точе­ст­вуетъ служéнiе прáвды въ слáвѣ.

• И́бо не прослáвися прослáвлен­ное въ чáсти сéй, за превосходя́щую слáву.

• А́ще бо престаю́щее, слáвою: мнóго пáче пребывáющее, въ слáвѣ.

• Имýще ýбо таковó уповáнiе, мнóгимъ дерзновéнiемъ дѣ́й­ст­вуемъ,

• и не я́коже Моисéй полагá­ше покрывáло на лицы́ сво­éмъ, за éже не мощи́ взирáти сынóмъ Изрáилевымъ на конéцъ престаю́щаго.

• Но ослѣпи́шася помышлéнiя и́хъ: дáже бо до сегó днé тóжде покрывáло во чтéнiи вéтхаго завѣ́та пребывáетъ не от­кровéно, занé о Христѣ́ престаéтъ.

• Но дáже до днéсь, внегдá чтéт­ся Моисéй, покрывáло на сéрдцѣ и́хъ лежи́тъ:

• внегдá же обратя́т­ся ко Гóсподу, взимáет­ся покрывáло.

• Госпóдь же Дýхъ éсть: а идѣ́же Дýхъ Госпóдень, тý свобóда.

• Мы́ же вси́ от­кровéн­нымъ лицéмъ слáву Госпóдню взирáюще, въ тóйже о́бразъ преобразýемся от­ слáвы въ слáву, я́коже от­ Госпóдня Дýха.

Второе к Коринфянам, 4

• Сегó рáди имýще служéнiе сié, я́коже поми́ловани бы́хомъ, не стужáемъ си́:

• но от­рекóхомся тáйныхъ срáма, не въ лукáв­ст­вiи ходя́ще, ни льстя́ще словесé Бóжiя, но явлéнiемъ и́стины представля́юще себé ко вся́цѣй сóвѣсти человѣ́честѣй, предъ Бóгомъ.

• А́ще ли же éсть покровéно благовѣ­ст­вовáнiе нá­ше, въ ги́бнущихъ éсть покровéно,

• въ ни́хже бóгъ вѣ́ка сегó ослѣпи́ рáзумы невѣ́рныхъ, во éже не воз­сiя́ти и́мъ свѣ́ту благовѣ­ст­вовáнiя слáвы Христóвы, и́же éсть о́бразъ Бóга неви́димаго.

• Не себé бо проповѣ́даемъ, но Христá Иисýса Гóспода: себé же самѣ́хъ рабóвъ вáмъ Иисýса [Гóспода] рáди:

• я́ко Бóгъ рекíй изъ тмы́ свѣ́ту воз­сiя́ти, и́же воз­сiя́ въ сердцáхъ нáшихъ, къ просвѣщéнiю рáзума слáвы Бóжiя о лицы́ Иисýсъ Христóвѣ.

• И́мамы же сокрóвище сié въ скудéльныхъ сосýдѣхъ, да премнóже­с­т­во си́лы бýдетъ Бóжiя, а не от­ нáсъ:

• во всéмъ скорбя́ще, но не стужáюще си́: нечáеми, но не от­чаявáеми:

• гони́ми, но не оставля́еми: низлагáеми, но не погибáюще:

• всегдá мéртвость Гóспода Иисýса въ тѣ́лѣ нося́ще, да и живóтъ Иисýсовъ въ тѣ́лѣ нá­шемъ яви́т­ся.

• Присно бо мы́ живíи въ смéрть предаéмся Иисýса рáди, да и живóтъ Иисýсовъ яви́т­ся въ мéртвен­нѣй плóти нá­шей:

• тѣ́мже смéрть ýбо въ нáсъ дѣ́й­ст­вуетъ, а живóтъ въ вáсъ.

• Имýще же тóйже Дýхъ вѣ́ры, по пи́сан­ному: вѣ́ровахъ, тѣ́мже воз­глагóлахъ: и мы́ вѣ́руемъ, тѣ́мже и глагóлемъ,

• вѣ́дяще, я́ко воз­дви́гiй Гóспода Иисýса, и нáсъ со Иисýсомъ воз­дви́гнетъ, и предпостáвитъ съ вáми.

• Вся́ бо вáсъ рáди, да благодáть умнóжив­шаяся, мнóжайшими благодарéнiи избы́точе­с­т­витъ въ слáву Бóжiю.

• Тѣ́мже не стужáемъ си́: но áще и внѣ́шнiй нáшъ человѣ́къ тлѣ́етъ, обáче внýтрен­нiй обновля́ет­ся по вся́ дни́.

• Е́же бо ны́нѣ лéгкое печáли нá­шея, по пре­умножéнiю въ преспѣ́янiе тяготý вѣ́чныя слáвы содѣ́ловаетъ нáмъ,

• не смотря́ющымъ нáмъ ви́димыхъ, но неви́димыхъ: ви́димая бо врéмен­на, неви́димая же вѣ́чна.

Второе к Коринфянам, 5

• Вѣ́мы бо, я́ко áще земнáя нáша хрáмина тѣ́ла разори́т­ся, создáнiе от­ Бóга и́мамы, хрáмину нерукотворéну, вѣ́чну на небесѣ́хъ.

• И́бо о сéмъ воз­дыхáемъ, въ жили́ще нá­ше небéсное облещи́ся желáюще:

• áще тóчiю и облéкшеся, не нáзи обря́щемся.

• И́бо сýщiи въ тѣ́лѣ сéмъ воз­дыхáемъ отягчáеми, понéже не хóщемъ совлещи́ся, но пооблещи́ся, да пожéрто бýдетъ мéртвен­ное животóмъ.

• Сотвори́вый же нáсъ въ сié и́стое Бóгъ, и́же и дадé нáмъ обручéнiе Дýха.

• Дерзáюще ýбо всегдá и вѣ́дяще, я́ко живýще въ тѣ́лѣ от­хóдимъ от­ Гóспода:

• вѣ́рою бо хóдимъ, а не видѣ́нiемъ:

• дерзáемъ же и благоволи́мъ пáче от­ити́ от­ тѣ́ла и вни́ти ко Гóсподу:

• тѣ́мже и тщи́мся, áще входя́ще, áще от­ходя́ще, благо­угóдни емý бы́ти:

• всѣ́мъ бо яви́тися нáмъ подобáетъ предъ суди́щемъ Христóвымъ, да прiи́метъ кíйждо, я́же съ тѣ́ломъ содѣ́ла, или́ блáга, или́ злá.

• Вѣ́дуще ýбо стрáхъ Госпóдень, человѣ́ки увѣщавáемъ, богови же явлéни есмы́: уповáемъ же, я́ко и въ сóвѣстехъ вáшихъ явлéни есмы́.

• Не пáки бо себé хвáлимъ предъ вáми, но винý даéмъ вáмъ похвалéнiю о нáсъ, да и́мате къ хваля́щымся въ лицы́, а не въ сéрдцы.

• А́ще бо изуми́хомся, богови: áще ли цѣломýдр­ст­вуемъ, вáмъ.

• И́бо любы́ Бóжiя обдержи́тъ нáсъ сýждшихъ сié: я́ко áще еди́нъ за всѣ́хъ ýмре, тó ýбо вси́ умрóша.

• Христóсъ же за всѣ́хъ ýмре, да живýщiи не ктомý себѣ́ живýтъ, но умéршему за ни́хъ и воскрéсшему.

• Тѣ́мже и мы́ от­ны́нѣ ни еди́наго вѣ́мы по плóти: áще же и разумѣ́хомъ по плóти Христá, но ны́нѣ ктомý не разумѣ́емъ.

• Тѣ́мже áще ктó во Христѣ́, новá твáрь: дрéвняя мимо­идóша, сé бы́ша вся́ новá:

• вся́ческая же от­ Бóга, при­­мири́в­шаго нáсъ себѣ́ Иисýсъ Христóмъ и дáв­шаго нáмъ служéнiе при­­мирéнiя:

• занé Бóгъ бѣ́ во Христѣ́ мíръ при­­миря́я себѣ́, не вмѣня́я и́мъ согрѣшéнiй и́хъ и положи́въ въ нáсъ слóво при­­мирéнiя.

• По Христѣ́ ýбо мóлимъ {посóл­ст­вуемъ}, я́ко Бóгу моля́щу нáми, мóлимъ по Христѣ́: при­­мири́теся съ Бóгомъ.

• Не вѣ́дѣв­шаго бо грѣхá по нáсъ грѣ́хъ сотвори́, да мы́ бýдемъ прáвда Бóжiя о нéмъ.

Второе к Коринфянам, 6

• Споспѣ́ше­ст­ву­ю­ще же и мóлимъ, не вотщé благодáть Бóжiю прiя́ти вáмъ.

• Глагóлетъ бо: во врéмя прiя́тно послýшахъ тебé, и въ дéнь спасéнiя помогóхъ ти́. Сé ны́нѣ врéмя благопрiя́тно, сé ны́нѣ дéнь спасéнiя.

• Ни еди́но ни въ чéмже даю́ще претыкáнiе, да служéнiе безпорóчно бýдетъ,

• но во всéмъ представля́юще себé я́коже Бóжiя слуги́, въ терпѣ́нiи мнóзѣ, въ скóрбехъ, въ бѣдáхъ, въ тѣснотáхъ,

• въ рáнахъ, въ темни́цахъ, въ нестро­éнiихъ, въ трудѣ́хъ, во бдѣ́нiихъ, въ пощéнiихъ,

• во очищéнiи, въ рáзумѣ, въ долготерпѣ́нiи, въ блáгости, въ Дýсѣ святѣ, въ любви́ нелицемѣ́рнѣ,

• въ словеси́ и́стины, въ си́лѣ Бóжiей, орýжiи прáвды десны́ми и шýими,

• слáвою и безчéстiемъ, гаждéнiемъ и благохвалéнiемъ: я́ко лестцы́, и и́стин­ни:

• я́ко незнáеми, и познавáеми: я́ко умирáюще, и сé жи́ви есмы́: я́ко наказýеми, а не умерщвля́еми:

• я́ко скорбя́ще, при́сно же рáду­ю­щеся: я́ко ни́щи, а мнóги богатя́ще: я́ко ничтóже имýще, а вся́ содержáще.

• Устá нáша от­верзóшася къ вáмъ, кори́нѳяне, сéрдце нá­ше распространи́ся.

• Не тѣ́сно вмѣщáетеся въ нáсъ, утѣсня́етеся же во утрóбахъ вáшихъ.

• Тóжде же воз­мéздiе, я́коже чáдомъ глагóлю, распространи́теся и вы́.

• Не бывáйте [удóбь] прелóжни ко инóму ярмý, я́коже невѣ́рнiи {не бывáйте прелóжни ко инóму ярмý невѣ́рныхъ}. Кóе бо при­­чáстiе прáвдѣ къ беззакóнiю? Или́ кóе общéнiе свѣ́ту ко тмѣ́?

• Кóе же соглáсiе Христóви съ велiáромъ? Или́ кáя чáсть вѣ́рну съ невѣ́рнымъ?

• Или́ кóе сложéнiе цéркви Бóжiей со и́долы? [Зач. 182Б.] Вы́ бо естé цéркви Бóга жи́ва, я́коже речé Бóгъ: я́ко вселю́ся въ ни́хъ и похождý, и бýду и́мъ Бóгъ, и тíи бýдутъ мнѣ́ лю́дiе.

• Тѣ́мже изыди́те от­ среды́ и́хъ и от­лучи́теся, глагóлетъ Госпóдь, и нечистотѣ́ не при­­касáйтеся, и áзъ прiимý вы́:

• и бýду вáмъ во Отцá, и вы́ бýдете мнѣ́ въ сы́ны и дщéри, глагóлетъ Госпóдь вседержи́тель.

Второе к Коринфянам, 7

• Сицевá ýбо имýще обѣтовáнiя, о, воз­лю́блен­нiи, очи́стимъ себé от­ вся́кiя сквéрны плóти и дýха, творя́ще святы́ню въ стрáсѣ Бóжiи.

• Вмѣсти́те ны́: ни еди́наго оби́дѣхомъ, ни еди́наго истли́хомъ, ни еди́наго лихо­и́м­ст­вовахомъ.

• Не на осуждéнiе глагóлю: прéжде бо рѣ́хъ, я́ко въ сердцáхъ нáшихъ естé, во éже умрéти съ вáми и сожи́ти.

• Мнóго ми́ дерзновéнiе къ вáмъ, мнóга ми́ похвалá о вáсъ: испóлнихся утѣ́хи, преизбы́точе­ст­вую рáдостiю о вся́цѣй печáли нá­шей.

• И́бо при­­шéдшымъ нáмъ въ македóнiю, ни еди́наго имѣ́ покóя плóть нáша, но во всéмъ скорбя́ще: внѣýду брáни, внутрьýду боя́зни.

• Но утѣшáяй смирéн­ныя, утѣ́ши нáсъ Бóгъ при­­шé­ст­вiемъ ти́товымъ,

• не тóкмо же при­­шé­ст­вiемъ егó, но и утѣшéнiемъ, и́мже утѣ́шися о вáсъ, повѣ́дая нáмъ вá­ше желáнiе, вá­ше рыдáнiе, вáшу рéвность по мнѣ́, я́ко ми́ пáче воз­рáдоватися.

• Я́ко áще и оскорби́хъ вáсъ послáнiемъ, не раскáюся, áще и раскáялъ бы́хъ ся́: ви́жду бó, я́ко послáнiе óно, áще и къ часý, оскорби́ вáсъ.

• Ны́нѣ рáдуюся, не я́ко скóрбни бы́сте, но я́ко оскорби́стеся въ покая́нiе: оскорбѣ́сте бó по Бóзѣ, дá ни въ чéмже отщетитéся от­ нáсъ.

• Печáль бó, я́же по Бóзѣ, покая́нiе нераскáян­но во спасéнiе содѣ́ловаетъ, а [сегó] мíра печáль смéрть содѣ́ловаетъ.

• Сé бо сié сáмое, éже по Бóзѣ оскорби́тися вáмъ, коли́ко содѣ́ла въ вáсъ тщáнiе? но от­вѣ́тъ? но негодовáнiе, но стрáхъ, но вожделѣ́нiе, но рéвность, но от­мщéнiе? Во всéмъ предстáвисте себé чи́сты бы́ти въ вéщи.

• А́ще бо и писáхъ вáмъ, не оби́дѣв­шаго рáди, нижé оби́димаго рáди, но за éже яви́тися въ вáсъ тщáнiю нá­шему, éже о вáсъ предъ Бóгомъ.

• Сегó рáди утѣ́шихомся о утѣшéнiи вá­шемъ: ли́шше же пáче воз­рáдовахомся о рáдости ти́товѣ, я́ко покóися дýхъ егó от­ всѣ́хъ вáсъ:

• я́ко áще чтó емý о вáсъ похвали́хся, не посрами́хся: но я́ко вся́ во­и́стин­ну глагóлахомъ вáмъ, тáко и похвалéнiе нá­ше, éже къ ти́ту, и́стин­но бы́сть:

• и утрóба егó и́злиха къ вáмъ éсть, воспоминáющаго всѣ́хъ вáсъ послушáнiе, я́ко со стрáхомъ и трéпетомъ прiя́сте егó.

• Рáдуюся ýбо, я́ко во всéмъ дерзáю въ вáсъ.

Второе к Коринфянам, 8

• Сказýемъ же вáмъ, брáтiе, благодáть Бóжiю, дáн­ную въ цéрквахъ македóнскихъ:

• я́ко во мнóзѣмъ искушéнiи скорбéй избы́токъ рáдости и́хъ, и я́же во глубинѣ́ нищетá и́хъ избы́точе­с­т­вова въ богáт­ст­во простоты́ и́хъ:

• я́ко по си́лѣ и́хъ, свидѣ́тел­ст­вую, и пáче си́лы доброхóтни,

• со мнóгимъ молéнiемъ моля́ще нáсъ, благодáть и общéнiе служéнiя, éже ко святы́мъ, прiя́ти нáмъ:

• и не я́коже надѣ́яхомся, но себé вдáша пéрвѣе Гóсподеви, и нáмъ вóлею Бóжiею:

• во éже умоли́ти нáмъ ти́та, да я́коже прéжде начáтъ, тáкожде и скончáетъ въ вáсъ и благодáть сiю́.

• Но я́коже во всéмъ избы́точе­ст­вуете, вѣ́рою и слóвомъ, и рáзумомъ, и вся́цѣмъ тщáнiемъ, и любо­́вiю, я́же от­ вáсъ къ нáмъ, да и въ сéй благодáти избы́точе­ст­вуете.

• Не по повелѣ́нiю глагóлю, но за ины́хъ тщáнiе и вá­шея любвé и́стин­ное искушáя.

• Вѣ́сте бо благодáть Гóспода нá­шего Иисýса Христá, я́ко вáсъ рáди обнищá богáтъ сы́й, да вы́ нищетóю егó обогатитéся.

• И совѣ́тъ даю́ о сéмъ: сé бо вáмъ éсть на пóльзу, и́же не тóчiю, éже твори́ти, но и éже хотѣ́ти, прéжде начáсте от­ прешéдшаго лѣ́та.

• Ны́нѣ же и сié твори́ти скончáйте, да я́коже бы́сть усéрдiе хотѣ́ти, тáко бýдетъ и испóлнити от­ [сегó,] éже и́мате.

• А́ще бо усéрдiе предлежи́тъ, по ели́ку áще ктó и́мать, благопрiя́тенъ éсть, а не по ели́ку не и́мать.

• Не бó да ины́мъ ýбо от­рáда, вáмъ же скóрбь: но по изравнéнiю.

• Въ ны́нѣшнее врéмя вá­ше избы́точе­ст­вiе во óнѣхъ лишéнiе, да и óнѣхъ избы́токъ бýдетъ въ вá­ше лишéнiе, я́ко да бýдетъ рáвен­ство,

• я́коже éсть пи́сано: и́же мнóгое, не пре­умнóжилъ éсть: и и́же мáлое, не умáлилъ {не преизбы́точе­с­т­вова, и́же мнóго: и и́же мáло, не мнѣ́е прiя́тъ}.

• Благодарéнiе же богови, дáв­шему тóжде тщáнiе о вáсъ въ сéрдце ти́тово:

• я́ко молéнiе ýбо прiя́тъ, тщали́вѣйшiй же сы́й, сво­éю вóлею изы́де къ вáмъ.

• Послáхомъ же съ ни́мъ [и] брáта, егóже похвалá во евáнгелiи по всѣ́мъ цéрквамъ:

• не тóчiю же, но и освящéнъ от­ церквéй съ нáми ходи́ти, со благодáтiю сéю, служи́мою нáми къ самогó Гóспода слáвѣ и усéрдiю вá­шему:

• блюдýщеся тогó, да не ктó нáсъ поречéтъ во оби́лiи сéмъ служи́мѣмъ нáми:

• промышля́юще дóбрая не тóкмо предъ Бóгомъ, но и предъ человѣ́ки.

• Послáхомъ же съ ни́ми [и] брáта нá­шего, егóже искуси́хомъ во мнóгихъ мнóгащи встáнлива {мнóгажды тщáтелна} сýща, ны́нѣ же зѣлó встанли́вѣйша {мнóжае тщáтелнѣйша}, надѣ́янiемъ мнóгимъ на вáсъ.

• А́ще ли же о ти́тѣ, óбщникъ мнѣ́ и къ вáмъ споспѣ́шникъ: áще ли брáтiя нáша, послáн­ницы церквéй, слáва Христóва.

• Показáнiе ýбо любвé вá­шея и нá­шего хвалéнiя о вáсъ, къ ни́мъ покажи́те, и въ лицé церквéй.

Второе к Коринфянам, 9

• О слýжбѣ бо, я́же ко святы́мъ, ли́шше ми́ éсть писáти вáмъ,

• вѣ́мъ бо усéрдiе вá­ше, и́мже о вáсъ хвалю́ся македóняномъ, я́ко Ахáiа при­­готóвися от­ мимошéдшаго лѣ́та: и я́же от­ вáсъ рéвность раздражи́ мнóжайшихъ.

• Послáхъ же брáтiю, да не похвалéнiе нá­ше, éже о вáсъ, испраздни́т­ся въ чáсти сéй, но да, я́коже глагóлахъ, при­­готóвани бýдете:

• да не кáко, áще прiи́дутъ со мнóю македóняне и обря́щутъ вáсъ неприготóван­ныхъ, постыди́мся мы́, да не глагóлемъ вы́, въ чáсти сéй похвалéнiя.

• Потрéбно ýбо умы́слихъ умоли́ти брáтiю, да прéжде прiи́дутъ къ вáмъ и предуготóвятъ прéжде воз­вѣщéн­ное благословéнiе вá­ше, сié готóво бы́ти тáко, я́коже благословéнiе, а не я́ко лихо­и́м­ст­во.

• Сé же глагóлю: сѣ́яй скýдостiю, скýдостiю и пóжнетъ: а сѣ́яй о благословéнiи, о благословéнiи и пóжнетъ.

• Кíйждо я́коже изволéнiе и́мать сéрдцемъ, не от­ скóрби, ни от­ нýжды: доброхóтна бо дáтеля лю́битъ Бóгъ.

• Си́ленъ же Бóгъ вся́ку благодáть изоби́ловати въ вáсъ, да о всéмъ всегдá вся́ко довóл­ст­во имýще, избы́точе­ст­вуете во вся́ко дѣ́ло благо,

• я́коже éсть пи́сано: расточи́, дадé убóгимъ: прáвда егó пребывáетъ во вѣ́къ вѣ́ка.

• Дая́й же сѣ́мя сѣ́ющему и хлѣ́бъ въ снѣ́дь, да подáстъ и умнóжитъ сѣ́мя вá­ше, и да воз­расти́тъ жи́та прáвды вá­шея,

• да о всéмъ богатя́щеся во вся́ку простотý, я́же содѣвáетъ нáми благодарéнiе Бóгу.

• Я́ко рабóта сегó служéнiя не тóкмо éсть исполня́ющая лишéнiя святы́хъ, но и избы́точе­ст­ву­ю­щая мнóгими благодарéньми богови:

• искушéнiемъ служéнiя сегó слáвяще Бóга о покорéнiи исповѣ́данiя вá­шего въ благовѣ­ст­вовáнiи Христóвѣ, и о простотѣ́ сообщéнiя къ ни́мъ и ко всѣ́мъ,

• и о тѣ́хъ моли́твѣ о вáсъ, воз­желѣ́ющихъ вáсъ за премнóгую благодáть Бóжiю на вáсъ.

• Благодарéнiе же богови о неисповѣди́мѣмъ егó дáрѣ.

Второе к Коринфянам, 10

• Сáмъ же áзъ пáвелъ молю́ вы крóтостiю и ти́хостiю Христóвою, и́же въ лицé ýбо смирéнъ въ вáсъ, не сы́й же у вáсъ дерзáю въ вáсъ.

• Молю́ же, да не при­­сýщъ дерзáю надѣ́янiемъ, и́мже помышля́ю смѣ́ти на нѣ́кiя непщýющыя нáсъ я́ко по плóти ходя́щихъ.

• Во плóти бо ходя́ще, не по плóти во­и́н­ствуемъ:

• орýжiя бо вóин­ства нá­шего не плотскáя, но си́льна Бóгомъ на разорéнiе твéрдемъ: помышлéнiя низлагáюще,

• и вся́ко воз­ношéнiе взимáющееся на рáзумъ Бóжiй, и плѣня́юще вся́къ рáзумъ въ послушáнiе Христóво,

• и въ готóвости имýще от­мсти́ти вся́ко преслушáнiе, егдá испóлнит­ся вá­ше послушáнiе.

• Я́же ли предъ лицéмъ, зритé? А́ще ктó надѣ́ет­ся себé Христóва бы́ти, да помышля́етъ пáки от­ себé, занé, я́коже óнъ Христóвъ, тáкожде и мы́ Христóвы.

• А́ще бо и ли́шше чтó похвалю́ся о влáсти нá­шей, ю́же дадé нáмъ Госпóдь въ создáнiе, а не на разорéнiе вá­ше, не постыжýся.

• [Но] да не явлю́ся, я́ко страшя́ вáсъ послáньми.

• Я́ко послáнiя ýбо, речé, тя́жка и крѣ́пка, а при­­шé­ст­вiе тѣ́ла нéмощно, и слóво уничижéн­но:

• сié да помышля́етъ таковы́й, я́ко я́цы же есмы́ слóвомъ послáнiй, от­стоя́ще, таковíи и тý сýще есмы́ дѣ́ломъ.

• Не смѣ́емъ бо суди́ти {присовокупля́ти}, или́ при­­клáдовати себé ины́мъ хвáлящымъ себé самѣ́хъ: но сáми въ себѣ́ себé измѣря́юще, и при­­лагáюще себé сами́мъ себѣ́, не разумѣвáютъ.

• Мы́ же не въ безмѣ́рная похвáлимся, но по мѣ́рѣ прáвила, егóже раздѣли́ нáмъ Бóгъ мѣ́ру, достизáти дáже и до вáсъ.

• Не я́ко бо не дося́жуще до вáсъ, пáче простирáемъ себé, дáже бо и до вáсъ достигóхомъ благовѣ́стiемъ Христóвымъ:

• не въ безмѣ́рная хвáлящеся въ чужди́хъ трудѣ́хъ, уповáнiе же имýще, растýщей вѣ́рѣ вá­шей, въ вáсъ величáтися по прáвилу нá­шему изоби́лно,

• во éже и въ дáльшихъ вáсъ [странáхъ] благовѣсти́ти, не чужи́мъ прáвиломъ въ готóвыхъ похвали́тися.

• Хваля́йся же, о Гóсподѣ да хвáлит­ся:

• не хваля́й бо себé сéй искýсенъ, но егóже Бóгъ восхваля́етъ.

Второе к Коринфянам, 11

• О, да бы́сте мáло потерпѣ́ли безýмiю мо­емý! Но и потерпи́те мя́.

• Ревнýю бо по вáсъ Бóжiею рéвностiю: обручи́хъ бо вáсъ еди́ному мýжу дѣ́ву чи́сту предстáвити Христóви.

• Бою́ся же, да не кáко, я́коже змíй Е́ву прельсти́ лукáв­ст­вомъ сво­и́мъ, тáко истлѣ́ютъ [и] рáзумы вáши от­ простоты́, я́же о Христѣ́.

• А́ще бо гряды́й инáго Иисýса проповѣ́даетъ, егóже не проповѣ́дахомъ, или́ дýха инáго прiéмлете, егóже не прiя́сте, или́ благовѣ­ст­вовáнiе и́но, éже не прiя́сте, дóбрѣ бы́сте потерпѣ́ли.

• Непщýю бо ничи́мже лиши́тися прéднихъ апóстолъ:

• áще бо и невѣ́жда слóвомъ, но не рáзумомъ: но вездѣ́ я́вльшеся о всéмъ въ вáсъ {нó во всéмъ явлéн­ни есмы́ во всѣ́хъ къ вáмъ}.

• Или́ грѣ́хъ сотвори́хъ себé смиря́я, да вы́ воз­несéтеся, я́ко тýне Бóжiе благовѣ­ст­вовáнiе благовѣсти́хъ вáмъ?

• От ины́хъ церквéй уя́хъ, прiи́мъ обрóкъ къ вá­шему служéнiю: и при­­шéдъ къ вáмъ, и въ скýдости бы́въ, не стужи́хъ ни еди́ному:

• скýдость бо мою́ испóлниша брáтiя, при­­шéдше от­ македóнiи: и во всéмъ безъ стужéнiя вáмъ себé соблюдóхъ и соблюдý.

• Е́сть и́стина Христóва вó мнѣ́, я́ко похвалéнiе сié не загради́т­ся о мнѣ́ въ странáхъ Ахáйскихъ.

• Почтó? занé не люблю́ ли вáсъ? Бóгъ вѣ́сть. А éже творю́, и сотворю́,

• да от­сѣкý винý хотя́щымъ вины́, да, о нéмже хвáлят­ся, обря́щут­ся я́коже и мы́.

• Таковíи бо лжи́ви апóстоли, дѣ́лателе льсти́вiи, преобразýющеся во апóстолы Христóвы.

• И не ди́вно: сáмъ бо сатанá преобразýет­ся во áнгела свѣ́тла:

• не вéлiе ýбо, áще и служи́телiе егó преобразýют­ся я́ко служи́тели прáвды: и́мже кончи́на бýдетъ по дѣлóмъ и́хъ.

• Пáки глагóлю: да никтóже мни́тъ мя́ безýмна бы́ти: áще ли ни́, понé я́ко безýмна прiими́те мя́, да и áзъ мáло чтó похвалю́ся.

• А éже глагóлю, не глагóлю по Гóсподѣ, но я́ко въ безýмiи въ сéй чáсти похвалы́:

• понéже мнóзи хвáлят­ся по плóти, и áзъ похвалю́ся.

• Любéзно бо прiéмлете безýмныя, мýдри сýще:

• прiéмлете бо, áще ктó вáсъ порабощáетъ, áще ктó поядáетъ, áще ктó [не влѣ́поту] протóритъ {от­éмлетъ}, áще ктó по лицý бiéтъ вы́, áще ктó величáет­ся.

• По досаждéнiю глагóлю, занé áки мы́ изнемогóхомъ. О нéмже áще дерзáетъ ктó, несмы́слен­но глагóлю, дерзáю и áзъ.

• Еврéе ли́ сýть? и áзъ. Изрáили́те ли сýть? и áзъ. Сѣ́мя Авраáмле ли сýть? и áзъ.

• Служи́телiе ли Христóвы сýть? не въ мýдрости глагóлю, пáче áзъ. Въ трудѣ́хъ мнóжае, въ рáнахъ пребóлѣ, въ темни́цахъ и́злиха, въ смéртехъ мнóгащи.

• От иудéй пя́ть крáты четы́редесять рáзвѣ еди́ныя прiя́хъ:

• три́щи пáлицами бiéнъ бы́хъ, еди́ною кáменьми намéтанъ бы́хъ, трикрáты корáбль опровéржеся со мнóю: нóщь и дéнь вó глубинѣ́ сотвори́хъ:

• въ пýтныхъ шé­ст­вiихъ мнóжицею: бѣды́ въ рѣкáхъ, бѣды́ от­ разбóйникъ, бѣды́ от­ срóдникъ, бѣды́ от­ язы́къ, бѣды́ во градѣ́хъ, бѣды́ въ пусты́ни, бѣды́ въ мóри, бѣды́ во лжебрáтiи:

• въ трудѣ́ и пóдвизѣ, во бдѣ́нiихъ мнóжицею, во áлчбѣ и жáжди, въ пощéнiихъ мнóгащи, въ зимѣ́ и наготѣ́.

• Кромѣ́ внѣ́шнихъ, нападéнiе éже по вся́ дни́, [и] попечéнiе всѣ́хъ церквéй.

• Ктó изнемогáетъ, и не изнемогáю? Ктó соблазня́ет­ся, и áзъ не разжизáюся?

• А́ще хвали́тися [ми́] подобáетъ, о нéмощи мо­éй похвалю́ся.

• Бóгъ и Отéцъ Гóспода нá­шего Иисýса Христá вѣ́сть, сы́й благословéнъ во вѣ́ки, я́ко не лгý.

• Въ дамáсцѣ язы́ческiй кня́зь Арéѳы царя́ стрежá­ше Дамáскъ грáдъ, я́ти мя́ хотя́: *и окóнцемъ въ кошни́цѣ свѣ́шенъ бы́хъ по стѣнѣ́, и избѣгóхъ изъ рукý егó.

. . . . . . .

#ДаниилСысоев #миссия #СвященноеПисание