Святого апостола Павла послание к Коринфянам первое

Послание написано в 57 году в Македонии. Многие фрагменты 1-го послания к Коринфянам играют важнейшую роль для христианского богословия. В последних главах апостол Павел разбирает такие важные темы как: “Женщины в церкви, О Евхаристии и достойном участии в ней, Церковь — тело Христово, О христианской любви, О даре пророчества и даре языков, О вере в воскресение мёртвых, распоряжения и увещевания”.

После отъезда Павла в Коринфе проповедовал Аполлос, который внес некоторую сумятицу в жизнь общины, в результате чего церковь раскололась на приверженцев апостола Петра, апостола Павла и Аполлоса. В Послании содержится намерение Павла вторично отправиться в Коринф и упомянут Тимофей, который должен предварить апостола.

Первое к Коринфянам, 1

• Пáвелъ, звáнъ апóстолъ Иисýсъ Христóвъ вóлею Бóжiею, и сосѳéнъ брáтъ,

• цéркви Бóжiей сýщей въ кори́нѳѣ, освящéн­нымъ о Христѣ́ Иисýсѣ, звáн­нымъ святы́мъ, со всѣ́ми при­­зывáющими и́мя Гóспода нá­шего Иисýса Христá, во вся́цѣмъ мѣ́стѣ, тѣ́хъ же и нá­шемъ:

• благодáть вáмъ и ми́ръ от­ Бóга Отцá нá­шего и Гóспода Иисýса Христá.

• Благодарю́ Бóга мо­егó всегдá о вáсъ, о благодáти Бóжiей дáн­нѣй вáмъ о Христѣ́ Иисýсѣ,

• я́ко во всéмъ обогати́стеся о нéмъ, во вся́цѣмъ слóвѣ и вся́цѣмъ рáзумѣ,

• я́коже свидѣ́тел­ст­во Христóво извѣсти́ся въ вáсъ:

• я́ко вáмъ не лиши́тися ни во еди́нѣмъ даровáнiи, чáющымъ от­кровéнiя Гóспода нá­шего Иисýса Христá,

• и́же и утверди́тъ вáсъ дáже до концá непови́н­ныхъ въ дéнь Гóспода нá­шего Иисýса Христá.

• Вѣ́ренъ Бóгъ, и́мже звáни бы́сте во общéнiе Сы́на егó Иисýса Христá, Гóспода нá­шего.

• Молю́ же вы́, брáтiе, и́менемъ Гóспода нá­шего Иисýса Христá, да тóжде глагóлете вси́, и да не бýдутъ въ вáсъ рáспри, да бýдете же утверждéни въ тóмже разумѣ́нiи и въ тóйже мы́сли.

• Возвѣсти́ся бо ми́ о вáсъ, брáтiе моя́, [пóслан­нымъ] от­ хлóиса {от­ домáшнихъ хлóиса}, я́ко рвéнiя въ вáсъ сýть.

• Глагóлю же сé, я́ко кíйждо вáсъ глагóлетъ: áзъ ýбо éсмь пáвловъ, áзъ же аполлóсовъ, áзъ же ки́финъ, áзъ же Христóвъ.

• Едá раздѣли́ся Христóсъ, едá пáвелъ распя́т­ся по вáсъ? или́ во и́мя пáвлово крести́стеся?

• Благодарю́ Бóга, я́ко ни еди́наго от­ вáсъ крести́хъ, тóчiю кри́спа и гáiа,

• да не ктó речéтъ, я́ко въ моé и́мя крести́хъ.

• Крести́хъ же и стефани́новъ дóмъ: прóчее не вѣ́мъ, áще когó инóго крести́хъ.

• Не послá бо менé Христóсъ крести́ти, но благовѣсти́ти, не въ премýдрости слóва, да не испраздни́т­ся крéстъ Христóвъ.

• Слóво бо крéстное погибáющымъ ýбо юрóд­ст­во éсть, а спасáемымъ нáмъ си́ла Бóжiя éсть.

• Пи́сано бо éсть: погублю́ премýдрость премýдрыхъ, и рáзумъ разýмныхъ от­вéргу.

• Гдѣ́ премýдръ? гдѣ́ кни́жникъ? гдѣ́ совопрóсникъ вѣ́ка сегó? Не обуи́ ли Бóгъ премýдрость мíра сегó?

• Понéже бо въ премýдрости Бóжiей не разумѣ́ мíръ премýдростiю Бóга, благо­извóлилъ Бóгъ бýй­ст­вомъ прóповѣди спасти́ вѣ́ру­ю­щихъ.

• Понéже и Иудéе знáменiя прóсятъ, и éллини премýдрости и́щутъ:

• мы́ же проповѣ́дуемъ Христá рáспята, Иудéемъ ýбо соблáзнъ, éллиномъ же безýмiе,

• самѣ́мъ же звáн­нымъ Иудéемъ же и éллиномъ Христá, Бóжiю си́лу и Бóжiю премýдрость:

• занé бýее Бóжiе премýдрѣе человѣ́къ éсть, и немощнóе Бóжiе крѣпчáе человѣ́къ éсть.

• Ви́дите бо звáнiе вá­ше, брáтiе, я́ко не мнóзи премýдри по плóти, не мнóзи си́льни, не мнóзи благорóдни:

• но бýяя мíра избрá Бóгъ, да премýдрыя посрами́тъ, и нéмощная мíра избрá Бóгъ, да посрами́тъ крѣ́пкая:

• и худорóдная мíра и уничижéн­ная избрá Бóгъ, и не сýщая, да сýщая упраздни́тъ,

• я́ко да не похвáлит­ся вся́ка плóть предъ Бóгомъ.

• Изъ негóже вы́ естé о Христѣ́ Иисýсѣ, и́же бы́сть нáмъ премýдрость от­ Бóга, прáвда же и освящéнiе и избавлéнiе,

• да, я́коже пи́шет­ся: хваля́йся, о Гóсподѣ да хвáлит­ся.

Первое к Коринфянам, 2

• И áзъ при­­шéдъ къ вáмъ, брáтiе, прiидóхъ не по превосхóдному словеси́ или́ премýдрости воз­вѣщáя вáмъ свидѣ́тел­ст­во Бóжiе:

• не суди́хъ бо вѣ́дѣти чтó въ вáсъ, тóчiю Иисýса Христá, и сегó рáспята:

• и áзъ въ нéмощи и стрáсѣ и трéпетѣ мнóзѣ бы́хъ въ вáсъ.

• И слóво моé и прóповѣдь моя́ не въ препрѣ́телныхъ человѣ́ческiя премýдрости словесѣ́хъ, но въ явлéнiи дýха и си́лы,

• да вѣ́ра вáша не въ мýдрости человѣ́честѣй, но въ си́лѣ Бóжiей бýдетъ.

• Премýдрость же глагóлемъ въ совершéн­ныхъ, премýдрость же не вѣ́ка сегó, ни князéй вѣ́ка сегó престаю́щихъ,

• но глагóлемъ премýдрость Бóжiю, въ тáйнѣ сокровéн­ную, ю́же предустáви Бóгъ прéжде вѣ́къ въ слáву нáшу,

• ю́же никтóже от­ князéй вѣ́ка сегó разумѣ́: áще бо бы́ша разумѣ́ли, не бы́ша Гóспода слáвы рáспяли.

• Но я́коже éсть пи́сано: и́хже óко не ви́дѣ, и ýхо не слы́ша, и на сéрдце человѣ́ку не взыдóша, я́же уготóва Бóгъ лю́бящымъ егó.

• Нáмъ же Бóгъ от­кры́лъ éсть Дýхомъ сво­и́мъ: Дýхъ бо вся́ испытýетъ, и глубины́ Бóжiя.

• Ктó бо вѣ́сть от­ человѣ́къ, я́же въ человѣ́цѣ, тóчiю дýхъ человѣ́ка, живýщiй въ нéмъ? Тáкожде и Бóжiя никтóже вѣ́сть, тóчiю Дýхъ Бóжiй.

• Мы́ же не дýха мíра сегó прiя́хомъ, но Дýха и́же от­ Бóга, да вѣ́мы я́же от­ Бóга даровáн­ная нáмъ,

• я́же и глагóлемъ не въ научéныхъ человѣ́ческiя премýдрости словесѣ́хъ, но въ научéныхъ Дýха святáго, духóвная духóвными сразсуждáюще.

• Душéвенъ же человѣ́къ не прiéмлетъ я́же Дýха Бóжiя: юрóд­ст­во бо емý éсть, и не мóжетъ разумѣ́ти, занé духóвнѣ востязýет­ся.

• Духóвный же востязýетъ ýбо вся́, а сáмъ тóй ни от­ еди́наго востязýет­ся.

• Ктó бо разумѣ́ ýмъ Госпóдень, и́же изъясни́тъ и́? Мы́ же ýмъ Христóвъ и́мамы.

Первое к Коринфянам, 3

• И áзъ, брáтiе, не могóхъ вáмъ глагóлати я́ко духóвнымъ, но я́ко плóтянымъ, я́ко младéнцемъ о Христѣ́.

• Млекóмъ вы́ напо­и́хъ, а не брáшномъ: и́бо не ý можáсте, но нижé ещé мóжете ны́нѣ,

• ещé бо плóтстiи естé. Идѣ́же бо въ вáсъ зáвисти и рвéнiя и рáспри, не плóтстiи ли естé и по человѣ́ку хóдите?

• Егдá бо глагóлетъ ктó: áзъ ýбо éсмь пáвловъ, другíй же: áзъ аполлóсовъ: не плóтстiи ли естé?

• Ктó ýбо éсть пáвелъ? ктó же ли аполлóсъ? Но тóчiю служи́телiе, и́миже вѣ́ровасте, и комýждо я́коже Госпóдь дадé.

• А́зъ насади́хъ, аполлóсъ напо­и́, Бóгъ же воз­расти́:

• тѣ́мже ни насаждáяй éсть чтó, ни напая́яй, но воз­ращáяй Бóгъ.

• Насаждáяй же и напая́яй еди́но естá: кíйждо же свою́ мздý прiи́метъ по сво­емý трудý.

• Бóгу бо есмы́ споспѣ́шницы: Бóжiе тяжáнiе, Бóжiе здáнiе естé.

• По благодáти Бóжiей дáн­нѣй мнѣ́, я́ко премýдръ архитéктонъ основáнiе положи́хъ, и́нъ же назидáетъ: кíйждо же да блюдéтъ, кáко назидáетъ.

• Основáнiя бо инáго никтóже мóжетъ положи́ти пáче лежáщаго, éже éсть Иисýсъ Христóсъ.

• А́ще ли ктó назидáетъ на основáнiи сéмъ злáто, сребрó, кáменiе честнóе, дровá, сѣ́но, трóстiе,

• когóждо дѣ́ло явлéно бýдетъ: дéнь бо яви́тъ, занé огнéмъ от­крывáет­ся: и когóждо дѣ́ло, яковóже éсть, óгнь искýситъ.

• [И] егóже áще дѣ́ло пребýдетъ, éже наздá, мздý прiи́метъ:

• [а] егóже дѣ́ло сгори́тъ, отщети́т­ся: сáмъ же спасéт­ся, тáкожде я́коже огнéмъ.

• Не вѣ́сте ли, я́ко хрáмъ Бóжiй естé, и Дýхъ Бóжiй живéтъ въ вáсъ?

• А́ще ктó Бóжiй хрáмъ растли́тъ, растли́тъ сегó Бóгъ: хрáмъ бо Бóжiй свя́тъ éсть, и́же естé вы́.

• Никтóже себé да прельщáетъ: áще ктó мни́т­ся мýдръ бы́ти въ вáсъ въ вѣ́цѣ сéмъ, бýй да бывáетъ, я́ко да премýдръ бýдетъ.

• Премýдрость бо мíра сегó бýй­ст­во у Бóга éсть, пи́сано бо éсть: запинáяй премýдрымъ въ ковáр­ст­вѣ и́хъ.

• И пáки: Госпóдь вѣ́сть помышлéнiя человѣ́ческа {мýдрыхъ}, я́ко сýть сýетна.

• Тѣ́мже никтóже да хвáлит­ся въ человѣ́цѣхъ, вся́ бо вáша сýть:

• áще пáвелъ, или́ аполлóсъ, или́ ки́фа, или́ мíръ, или́ живóтъ, или́ смéрть, или́ настоя́щая, или́ бýдущая, вся́ вáша сýть:

• вы́ же Христóвы, Христóсъ же Бóжiй.

Первое к Коринфянам, 4

• Тáко нáсъ да непщýетъ человѣ́къ, я́ко слýгъ Христóвыхъ и стро­и́телей тáинъ Бóжiихъ:

• а éже прóчее и́щет­ся въ стро­и́телехъ, да вѣ́ренъ ктó обря́щет­ся.

• Мнѣ́ же не вели́ко éсть, да от­ вáсъ истяжýся, или́ от­ человѣ́ческаго днé {судá}: но ни сáмъ себé востязýю.

• Ничесóже бо въ себѣ́ свѣ́мъ, но ни о сéмъ оправдáюся: востязýяй же мя́ Госпóдь éсть.

• Тѣ́мже прéжде врéмене ничтóже суди́те, дóндеже прiи́детъ Госпóдь, и́же во свѣ́тѣ при­­ведéтъ тáйная тмы́ и объяви́тъ совѣ́ты сердéчныя, и тогдá похвалá бýдетъ комýждо от­ Бóга.

• Сiя́ же, брáтiе [моя́], преобрази́хъ на себé и аполлóса вáсъ рáди, да от­ нáю научитéся не пáче напи́сан­ныхъ мýдр­ст­вовати, да не еди́нъ по еди́ному гордитéся на другáго.

• Ктó бо тя́ разсуждáетъ? Чтó же и́маши, егóже нѣ́си прiя́лъ? А́ще же и прiя́лъ еси́, чтó хвáлишися я́ко не прiéмъ?

• Сé, сы́ти естé, сé, обогати́стеся, безъ нáсъ воцари́стеся: и о, дабы́ воцари́лися естé, да и мы́ бы́хомъ съ вáми цáр­ст­вовали.

• Мню́ бо, я́ко Бóгъ ны́ послáн­ники послѣ́днiя яви́, я́ко насмéртники: занé позóръ бы́хомъ мíру и áнгеломъ и человѣ́комъ.

• Мы́ [ýбо] бýи Христá рáди, вы́ же мýдри о Христѣ́: мы́ нéмощни, вы́ же крѣ́пцы: вы́ слáвни, мы́ же безчéстни.

• До ны́нѣшняго часá и áлчемъ, и жáждемъ, и наготýемъ, и стрáждемъ, и скитáемся,

• и труждáемся, дѣ́ла­ю­ще сво­и́ми рукáми. Укоря́еми, благословля́емъ: гони́ми, терпи́мъ:

• хýлими, утѣшáемся {мóлимъ}: я́коже отрéби мíру бы́хомъ, всѣ́мъ попрáнiе досéлѣ.

• Не срамля́я вáсъ сiя́ пишý, но я́коже чáда моя́ воз­лю́блен­ная наказýю.

• А́ще бо [и] мнóги пѣ́стуны и́мате о Христѣ́, но не мнóги отцы́: о Христѣ́ бо Иисýсѣ благовѣ­ст­вовáнiемъ áзъ вы́ роди́хъ.

• Молю́ же вáсъ: подóбни мнѣ́ бывáйте, я́коже áзъ Христý.

• Сегó рáди послáхъ къ вáмъ тимоѳéа, и́же ми́ éсть чáдо воз­лю́блено и вѣ́рно о Гóсподѣ, и́же вáмъ воспомя́нетъ пути́ моя́, я́же о Христѣ́ Иисýсѣ, я́коже вездѣ́ и во вся́цѣй цéркви учý.

• Я́ко не грядýщу ми́ къ вáмъ, разгордѣ́шася нѣ́цыи:

• прiидý же скóро къ вáмъ, áще Госпóдь восхóщетъ, и уразумѣ́ю не слóво разгордѣ́в­шихся, но си́лу:

• не въ словеси́ бо цáр­ст­во Бóжiе, но въ си́лѣ.

• Чтó хóщете? съ пáлицею ли прiидý къ вáмъ, или́ съ любо­́вiю и дýхомъ крóтости?

Первое к Коринфянам, 5

• Отню́дъ слы́шит­ся въ вáсъ блужéнiе, и таковó блужéнiе, яковóже ни во язы́цѣхъ именýет­ся, я́ко нѣ́ко­ему имѣ́ти женý óтчую.

• И вы́ разгордѣ́сте, и не пáче плáкасте, да и́змет­ся от­ среды́ вáсъ содѣ́явый дѣ́ло сié.

• Занé áзъ ýбо áще не у вáсъ сы́й тѣ́ломъ, тý же живы́й дýхомъ, ужé суди́хъ, я́ко тáмо сы́й: содѣ́яв­шаго си́це сié,

• о и́мени Гóспода нá­шего Иисýса Христá собрáв­шымся вáмъ и мо­емý дýху, съ си́лою Гóспода нá­шего Иисýса Христá,

• предáти таковáго сатанѣ́ во измождéнiе плóти, да дýхъ спасéт­ся въ дéнь Гóспода нá­шего Иисýса Христá.

• Не добрá похвалá вáша. Не вѣ́сте ли, я́ко мáлъ квáсъ всé смѣшéнiе квáситъ?

• Очи́стите ýбо вéтхiй квáсъ, да бýдете нóво смѣшéнiе, я́коже естé безквáсни: и́бо пáсха нáша за ны́ пожрéнъ бы́сть Христóсъ.

• Тѣ́мже да прáзднуемъ не въ квáсѣ вéтсѣ, ни въ квáсѣ злóбы и лукáв­ст­ва, но въ безквáсiихъ чи́стоты́ и и́стины.

• Писáхъ вáмъ въ послáнiи не при­­мѣшáтися блудникóмъ:

• и не вся́ко блудникóмъ мíра сегó, или́ лихо­и́мцемъ, или́ хи́щникомъ, или́ идолослужи́телемъ, понéже ýбо дóлжни бы естé бы́ли от­ мíра [сегó] изы́ти:

• ны́нѣ же писáхъ вáмъ не при­­мѣшáтися, áще нѣ́кiй, брáтъ именýемь, бýдетъ блудни́къ, или́ лихо­и́мецъ, или́ идолослужи́тель, или́ досади́тель, или́ пiя́ница, или́ хи́щникъ: съ таковы́мъ нижé я́сти.

• Чтó бо ми́ и внѣ́шнихъ суди́ти? Не внýтрен­нихъ ли вы́ сýдите?

• Внѣ́шнихъ же Бóгъ сýдитъ. И изми́те злáго от­ вáсъ самѣ́хъ.

Первое к Коринфянам, 6

• Смѣ́етъ ли ктó от­ вáсъ, вéщь имѣ́я ко инóму, суди́тися от­ непрáведныхъ, а не от­ святы́хъ?

• Не вѣ́сте ли, я́ко святíи мíрови и́мутъ суди́ти? и áще вáми сýдъ прiи́метъ мíръ, недостóйни естé суди́щемъ худы́мъ?

• Не вѣ́сте ли, я́ко áггеловъ суди́ти и́мамы, а не тóчiю житéйскихъ?

• Житéйская бо суди́ща áще и́мате, уничижéн­ныхъ въ цéркви, си́хъ посаждáете.

• Къ срáму вáмъ глагóлю: тáко ли нѣ́сть въ вáсъ мýдръ ни еди́нъ, и́же мóжетъ разсуди́ти междý брáтiй сво­и́хъ?

• Но брáтъ съ брáтомъ сýдит­ся, и тó предъ невѣ́рными.

• Ужé ýбо от­ню́дъ вáмъ срáмъ éсть, я́ко тяжбы́ и́мате междý собóю. Почтó не пáче оби́дими естé? почтó не пáче лишéни бывáете?

• Но вы́ [сáми] оби́дите и лишáете, да ещé брáтiю.

• Или́ не вѣ́сте, я́ко непрáведницы цáр­ст­вiя Бóжiя не наслѣ́дятъ? Не льсти́те себé: ни блудницы́, ни идолослужи́теле, ни прелюбо­дѣ́е, [ни скверни́теле,] ни малакíи, ни мужелóжницы,

• ни лихо­и́мцы, ни тáтiе, ни пiя́ницы, ни досади́теле, ни хи́щницы цáр­ст­вiя Бóжiя не наслѣ́дятъ.

• И си́ми [ýбо] нѣ́цыи бѣ́сте, но омы́стеся, но освяти́стеся, но оправди́стеся и́менемъ Гóспода нá­шего Иисýса Христá и Дýхомъ Бóга нá­шего.

• Вся́ ми́ лѣ́ть сýть, но не вся́ на пóльзу: вся́ ми́ лѣ́ть сýть, но не áзъ обладáнъ бýду от­ чегó.

• Брáшна чрéву, и чрéво брáшномъ: Бóгъ же и сié и сiя́ упраздни́тъ. Тѣ́ло же не блужéнiю, но Гóсподеви, и Госпóдь тѣ́лу.

• Бóгъ же и Гóспода воз­дви́же, и нáсъ воз­дви́гнетъ си́лою сво­éю.

• Не вѣ́сте ли, я́ко тѣлесá вáша ýдове Христóвы сýть? Взéмь ли ýбо ýды Христóвы, сотворю́ ýды блудни́чи? Да не бýдетъ.

• Или́ не вѣ́сте, я́ко при­­лѣпля́яйся сквернодѣ́йцѣ еди́но тѣ́ло éсть [съ блудодѣ́йцею]? бýдета бо, речé, óба въ плóть еди́ну.

• Прилѣпля́яйся же Гóсподеви еди́нъ дýхъ éсть [съ Гóсподемъ].

• Бѣ́гайте блудодѣя́нiя: вся́къ [бо] грѣ́хъ, егóже áще сотвори́тъ человѣ́къ, кромѣ́ тѣ́ла éсть: а блудя́й во своé тѣ́ло согрѣшáетъ.

• Или́ не вѣ́сте, я́ко тѣлесá вáша хрáмъ живýщаго въ вáсъ святáго Дýха сýть, егóже и́мате от­ Бóга, и нѣ́сте сво­и́?

• кýплени бо естé цѣнóю. Прослáвите ýбо Бóга въ тѣлесѣ́хъ вáшихъ и въ душáхъ вáшихъ, я́же сýть Бóжiя.

Первое к Коринфянам, 7

• А о ни́хже писáсте ми́, добрó человѣ́ку женѣ́ не при­­касáтися.

• Но блудодѣя́нiя рáди кíйждо свою́ женý да и́мать, и кáяждо [женá] сво­егó мýжа да и́мать.

• Женѣ́ мýжъ дóлжную любо­́вь да воз­даéтъ: тáкожде и женá мýжу.

• Женá сво­и́мъ тѣ́ломъ не владѣ́етъ, но мýжъ: тáкожде и мýжъ сво­и́мъ тѣ́ломъ не владѣ́етъ, но женá.

• Не лишáйте себé дрýгъ дрýга, тóчiю по соглáсiю до врéмене, да пребывáете въ постѣ́ и моли́твѣ, и пáки вкýпѣ собирáйтеся, да не искушáетъ вáсъ сатанá невоз­держáнiемъ вáшимъ.

• Сié же глагóлю по совѣ́ту, [а] не по повелѣ́нiю.

• Хощý бо, да вси́ человѣ́цы бýдутъ, я́коже и áзъ: но кíйждо своé даровáнiе и́мать от­ Бóга, óвъ ýбо си́це, óвъ же си́це.

• Глагóлю же безбрáчнымъ и вдови́цамъ: добрó и́мъ éсть, áще пребýдутъ я́коже и áзъ:

• áще ли не удержáт­ся, да посягáютъ: лýчше бо éсть жени́тися, нéжели разжизáтися.

• А ожени́в­шымся завѣщавáю не áзъ, но Госпóдь: женѣ́ от­ мýжа не разлучáтися:

• áще ли же и разлучи́т­ся, да пребывáетъ безбрáчна, или́ да смири́т­ся съ мýжемъ [сво­и́мъ]: и мýжу жены́ не от­пущáти.

• Прóчымъ же áзъ глагóлю, [а] не Госпóдь: áще котóрый брáтъ женý и́мать невѣ́рну, и тá благоволи́тъ жи́ти съ ни́мъ, да не оставля́етъ ея́:

• и женá áще и́мать мýжа невѣ́рна, и тóй благоволи́тъ жи́ти съ нéю, да не оставля́етъ егó:

• святи́т­ся бо мýжъ невѣ́ренъ о женѣ́ вѣ́рнѣ, и святи́т­ся женá невѣ́рна о мýжи вѣ́рнѣ: инáче бо чáда вáша нечи́ста бы́ли бы, ны́нѣ же свя́та сýть.

• А́ще ли невѣ́рный от­лучáет­ся, да разлучи́т­ся: не порабóтися [бо] брáтъ или́ сестрá въ таковы́хъ: въ ми́ръ бо при­­звá нáсъ [Госпóдь] Бóгъ.

• Чтó бо вѣ́си, жéно, áще мýжа спасéши? Или́ чтó вѣ́си, мýжу, áще женý спасéши?

• Тóчiю ко­емýждо я́коже раздѣли́лъ éсть Бóгъ, кíйждо я́коже при́званъ бы́сть Гóсподемъ, тáко да хóдитъ: и тáко во всѣ́хъ цéрквахъ повелѣвáю.

• Во обрѣ́занiи ли ктó при́званъ бы́сть? да не от­тóргнет­ся {да не твори́тъ себѣ́ необрѣ́занiя}: въ необрѣ́занiи ли ктó при́званъ бы́сть? да не обрѣ́зует­ся.

• Обрѣ́занiе ничтóже éсть, и необрѣ́занiе ничтóже éсть, но соблюдéнiе зáповѣдiй Бóжiихъ.

• Кíйждо въ звáнiи, въ нéмже при́званъ бы́сть, въ тóмъ да пребывáетъ.

• Рáбъ ли при́званъ бы́лъ еси́? да не неради́ши {да не печáлишися}: но áще и мóжеши свобóденъ бы́ти, бóлше порабóти себé.

• При́зван­ный бо о Гóсподѣ рáбъ, свобóдникъ Госпóдень éсть: тáкожде и при́зван­ный свобóдникъ, рáбъ éсть Христóвъ.

• Цѣнóю кýплени естé: не бýдите раби́ человѣ́комъ.

• Кíйждо, въ нéмже при́званъ бы́сть, брáтiе, въ тóмъ да пребывáетъ предъ Бóгомъ.

• О дѣ́вахъ же повелѣ́нiя Госпóдня не и́мамъ, совѣ́тъ же даю́, я́ко поми́лованъ от­ Гóспода вѣ́ренъ бы́ти.

• Мню́ ýбо сié добрó бы́ти за настоя́щую нýжду, я́ко добрó человѣ́ку тáко бы́ти.

• Привязáл­ся ли еси́ женѣ́? не ищи́ разрѣшéнiя. Отрѣши́л­ся ли еси́ жены́? не ищи́ жены́.

• А́ще ли же и ожéнишися, не согрѣши́лъ еси́: и áще пося́гнетъ дѣ́ва, не согрѣши́ла éсть. Скóрбь же плóти имѣ́ти бýдутъ таковíи: áзъ же вы́ щаждý.

• Сié же глагóлю, брáтiе, я́ко врéмя прекращéно éсть прóчее, да и имýщiи жены́, я́коже не имýщiи бýдутъ:

• и плáчущiися, я́коже не плáчущiи: и рáду­ю­щiися, я́коже не рáду­ю­щеся: и купýющiи, я́ко не содержáще:

• и трéбу­ю­щiи мíра сегó, я́ко не трéбу­ю­ще: прехóдитъ бо о́бразъ мíра сегó.

• Хощý же вáсъ безпечáльныхъ бы́ти. Не ожени́выйся печéт­ся о Госпóднихъ, кáко угоди́ти Гóсподеви:

• а ожени́выйся печéт­ся о мiрски́хъ, кáко угоди́ти женѣ́. Раздѣли́ся женá и дѣ́ва:

• непося́гшая печéт­ся о Госпóднихъ, кáко угоди́ти Гóсподеви, да бýдетъ свя́тá и тѣ́ломъ и дýхомъ: а пося́гшая печéт­ся о мiрски́хъ, кáко угоди́ти мýжу.

• Сié же на пóльзу вáмъ самѣ́мъ глагóлю: не да силó вáмъ наложý, но къ благообрáзiю и благоприступáнiю Гóсподеви безмóлвну.

• А́ще ли же ктó безобрази́ти о дѣ́вѣ сво­éй непщýетъ, áще éсть превоз­рáстна, и тáко должнá éсть бы́ти: éже хóщетъ, да твори́тъ: не согрѣшáетъ, áще пося́гнетъ.

• А и́же сто­и́тъ твéрдо сéрдцемъ, не имы́й нýжды, влáсть же и́мать о сво­éй вóли, и сé разсуди́лъ éсть въ сéрдцы сво­éмъ блюсти́ дѣ́ву свою́, дóбрѣ твори́тъ.

• Тѣ́мже и вдая́й брáку свою́ дѣ́ву дóбрѣ твори́тъ: и не вдая́й лýчше твори́тъ.

• Женá при­­вя́зана éсть закóномъ, въ ели́ко врéмя живéтъ мýжъ ея́: áще же ýмретъ мýжъ ея́, свобóдна éсть, за негóже хóщетъ, пося́гнути, тóчiю о Гóсподѣ.

• Блажéн­нѣйша же éсть, áще тáко пребýдетъ, по мо­емý совѣ́ту: мню́ся бо и áзъ Дýха Бóжiя имѣ́ти.

Первое к Коринфянам, 8

• О идоложéртвен­ныхъ же вѣ́мы: я́ко вси́ рáзумъ и́мамы. Рáзумъ [ýбо] кичи́тъ, а любы́ созидáетъ.

• А́ще ли ктó мни́т­ся вѣ́дѣти чтó, не ý чтó разумѣ́, я́коже подобáетъ разумѣ́ти:

• áще же ктó лю́битъ Бóга, сéй познáнъ бы́сть от­ негó.

• О ядéнiи же идоложéртвен­ныхъ вѣ́мы, я́ко и́долъ ничтóже éсть въ мíрѣ, и я́ко никтóже Бóгъ и́нъ, тóкмо еди́нъ.

• А́ще бо и сýть глагóлемiи бóзи, или́ на небеси́, или́ на земли́: я́коже сýть бóзи мнóзи и госпóдiе мнóзи:

• но нáмъ еди́нъ Бóгъ Отéцъ, изъ негóже вся́, и мы́ у негó, и еди́нъ Госпóдь Иисýсъ Христóсъ, и́мже вся́, и мы́ тѣ́мъ.

• Но не во всѣ́хъ рáзумъ: нѣ́цыи же сóвѣстiю и́долскою дáже досéлѣ я́коже идоложéртвен­ное ядя́тъ, и сóвѣсть и́хъ, немощнá сýщи, скверни́т­ся.

• Брáшно же нáсъ не поставля́етъ предъ Бóгомъ: нижé бо áще я́мы, избы́точе­ст­вуемъ: нижé áще не я́мы, лишáемся.

• Блюди́те же, да не кáко влáсть вáша сiя́ преткновéнiе бýдетъ немощны́мъ.

• А́ще бо ктó ви́дитъ тя́, имýща рáзумъ, въ трéбищи воз­лежáща, не сóвѣсть ли егó немощнá сýщи сози́ждет­ся идоложéртвен­ная я́сти?

• И поги́бнетъ немощны́й брáтъ въ тво­éмъ рáзумѣ, егóже рáди Христóсъ ýмре.

• Тáкожде согрѣшáюще въ брáтiю и бiю́ще и́хъ сóвѣсть нéмощну сýщу, во Христá согрѣшáете.

• Тѣ́мже áще брáшно соблазня́етъ брáта мо­егó, не и́мамъ я́сти мя́са во вѣ́ки, да не соблазню́ брáта мо­егó.

Первое к Коринфянам, 9

• Нѣ́смь ли апóстолъ? Нѣ́смь ли свобóдь? Не Иисýса Христá ли Гóспода нá­шего ви́дѣхъ? Не дѣ́ло ли моé вы́ естé о Гóсподѣ?

• А́ще ины́мъ [и] нѣ́смь апóстолъ, но обáче вáмъ éсмь: печáть бо мо­егó апóстол­ст­ва вы́ естé о Гóсподѣ.

• Мóй от­вѣ́тъ востязýющымъ менé сéй éсть.

• Едá не и́мамы влáсти я́сти и пи́ти?

• Едá не и́мамы влáсти сестрý женý води́ти, я́ко и прóчiи апóстоли, и брáтiя Госпóдня, и ки́фа?

• Или́ еди́нъ áзъ и Варнáва не и́мамы влáсти éже не дѣ́лати?

• Ктó вóин­ствуетъ сво­и́ми обрóки когдá? Или́ ктó насаждáетъ виногрáдъ, и от­ плодá егó не я́стъ? Или́ ктó пасéтъ стáдо, и от­ млекá стáда не я́стъ?

• Едá по человѣ́ку сiя́ глагóлю? Не и закóнъ ли сiя́ глагóлетъ?

• Въ Моисéовѣ бо закóнѣ пи́сано: да не загради́ши устнý волá молотя́ща. Едá о волѣ́хъ ради́тъ Бóгъ?

• Или́ нáсъ рáди вся́ко глагóлетъ? Нáсъ бо рáди написáся, я́ко о надéжди дóлженъ éсть оря́й орáти, и молотя́й съ надéждею сво­егó уповáнiя при­­чащáтися.

• А́ще мы́ духóвная сѣ́яхомъ вáмъ, вели́ко ли, áще мы́ вáша тѣлéсная пóжнемъ?

• А́ще инíи влáсти вá­шея при­­чащáют­ся, не пáче ли мы́? Но не сотвори́хомъ по о́бласти сéй: но вся́ терпи́мъ, да не прекращéнiе кóе дáмы благовѣ­ст­вовáнiю Христóву.

• Не вѣ́сте ли, я́ко дѣ́ла­ю­щiи свящéн­ная от­ святи́лища ядя́тъ? [и] служáщiи олтарю́ со олтарéмъ дѣ́лят­ся?

• Тáко и Госпóдь повелѣ́ проповѣ́да­ю­щымъ благовѣ́стiе от­ благовѣ́стiя жи́ти.

• А́зъ же ни еди́но сотвори́хъ от­ си́хъ. Не писáхъ же сiя́, да тáко бýдетъ о мнѣ́: дóбрѣе бо мнѣ́ пáче умрéти, нéжели похвалý мою́ ктó да испраздни́тъ.

• А́ще бо благовѣ­ст­вýю, нѣ́сть ми́ похвалы́, нýжда бо ми́ належи́тъ: гóре же мнѣ́ éсть, áще не благовѣ­ст­вýю.

• А́ще ýбо вóлею сié творю́, мздý и́мамъ: áще же невóлею, стро­éнiе ми́ éсть преданó.

• Кáя ýбо ми́ éсть мздá? Да благовѣ­ст­вýяй безъ мзды́ положý благовѣ́стiе Христóво, во éже не твори́ти ми́ по о́бласти мо­éй въ благовѣ­ст­вовáнiи.

• Свобóденъ бо сы́й от­ всѣ́хъ, всѣ́мъ себé порабóтихъ, да мнóжайшыя при­­обря́щу:

• бы́хъ Иудéемъ я́ко Иудéй, да иудéи прiобря́щу: подзакóн­нымъ я́ко подзакóненъ, да подзакóн­ныя при­­обря́щу:

• беззакóн­нымъ я́ко беззакóненъ, не сы́й беззакóн­никъ Бóгу, но закóн­никъ Христý, да при­­обря́щу беззакóн­ныя.

• Бы́хъ немощны́мъ я́ко нéмощенъ, да немощны́я прiобря́щу. Всѣ́мъ бы́хъ вся́, да вся́ко нѣ́кiя спасý.

• Сié же творю́ за благовѣ́стiе, да соóбщникъ емý бýду.

• Не вѣ́сте ли, я́ко текýщiи въ позóрищи вси́ ýбо текýтъ, еди́нъ же прiéмлетъ пóчесть? Тáко тецы́те, да пости́гнете.

• Вся́къ же подвизáяйся от­ всѣ́хъ воз­держи́т­ся: и они́ ýбо да истлѣ́ненъ вѣнéцъ прiи́мутъ, мы́ же неистлѣ́ненъ.

• А́зъ ýбо тáко текý, не я́ко безвѣ́стно, тáко подвизáюся, не я́ко воз­дýхъ бiя́й:

• но умерщвля́ю тѣ́ло моé и порабощáю, да не кáко, ины́мъ проповѣ́дуя, сáмъ неключи́мь бýду.

Первое к Коринфянам, 10

• Не хощý же вáсъ не вѣ́дѣти, брáтiе, я́ко отцы́ нáши вси́ подъ о́блакомъ бы́ша, и вси́ сквоз­ѣ́ мóре про­идóша:

• и вси́ въ Моисéа крести́шася во о́блацѣ и въ мóри:

• и вси́ тóжде брáшно духóвное ядóша:

• и вси́ тóжде пи́во духóвное пи́ша, пiя́ху бо от­ духóвнаго послѣ́ду­ю­щаго кáмене: кáмень же бѣ́ Христóсъ.

• Но не во мнóжайшихъ и́хъ благоволи́ Бóгъ, поражéни бо бы́ша въ пусты́ни.

• Сiя́ же о́брази нáмъ бы́ша, я́ко не бы́ти нáмъ похотникóмъ злы́хъ, я́коже и они́ похотѣ́ша.

• Ни идолослужи́теле бывáйте, я́коже нѣ́цыи от­ ни́хъ, я́коже éсть пи́сано: сѣдóша лю́дiе я́сти и пи́ти, и востáша игрáти.

• Нижé соблýдимъ, я́коже нѣ́цыи от­ ни́хъ соблуди́ша, и падóша во еди́нъ дéнь двáдесять три́ ты́сящы.

• Ни да искушáимъ Христá, я́коже нѣ́цыи от­ ни́хъ искуси́ша и от­ змíй погибóша.

• Ни ропщи́те, я́коже нѣ́цыи от­ ни́хъ роптáша и погибóша от­ всегуби́теля.

• Сiя́ же вся́ о́брази при­­лучáхуся о́нѣмъ: пи́сана же бы́ша въ научéнiе нá­ше, въ ни́хже концы́ вѣ́къ достигóша.

• Тѣ́мже мня́йся стоя́ти да блюдéт­ся, да не падéтъ.

• Искушéнiе вáсъ не дости́же, тóчiю человѣ́ческо­е: вѣ́ренъ же Бóгъ, и́же не остáвитъ вáсъ искуси́тися пáче, éже мóжете, но сотвори́тъ со искушéнiемъ и избы́тiе, я́ко воз­мощи́ вáмъ понести́.

• Тѣ́мже, брáтiе моя́ воз­лю́блен­ная, бѣ́гайте от­ идолослужéнiя.

• Я́ко мýдрымъ глагóлю: суди́те вы́, éже глагóлю:

• чáша благословéнiя, ю́же благословля́емъ, не общéнiе ли крóве Христóвы éсть? хлѣ́бъ, егóже лóмимъ, не общéнiе ли тѣ́ла Христóва éсть?

• Я́ко еди́нъ хлѣ́бъ, еди́но тѣ́ло есмы́ мнóзи: вси́ бо от­ еди́наго хлѣ́ба при­­чащáемся.

• Ви́дите Изрáиля по плóти: не ядýщiи ли жéртвы о́бщницы олтарéви сýть?

• Чтó ýбо глагóлю? я́ко и́долъ чтó éсть? или́ идоложéртвен­ное чтó éсть?

• Но занé, я́же жрýтъ язы́цы, бѣсóмъ жрýтъ, а не богови: не хощý же вáсъ óбщниковъ бы́ти бѣсóмъ.

• Не мóжете чáшу Госпóдню пи́ти и чáшу бѣсóвскую: не мóжете трапéзѣ Госпóдней при­­чащáтися и трапéзѣ бѣсóвстѣй.

• Или́ раздражáемъ Гóспода? Едá крѣпчáйши егó есмы́?

• Вся́ ми́ лѣ́ть сýть, но не вся́ на пóльзу: вся́ ми́ лѣ́ть сýть, но не вся́ назидáютъ.

• Никтóже сво­егó си да и́щетъ, но éже бли́жняго кíйждо.

• Всé, éже на тóржищи продаéмое, яди́те, ничтóже сумня́щеся, за сóвѣсть:

• Госпóдня бо земля́ и исполнéнiе ея́.

• А́ще ли ктó от­ невѣ́рныхъ при­­зывáетъ вы́, и хóщете ити́, всé предлагáемое вáмъ яди́те, ничтóже сумня́щеся, за сóвѣсть.

• А́ще ли же ктó вáмъ речéтъ: сié идоложéртвен­но éсть: не яди́те за óного повѣ́дав­шаго, и сóвѣсть: Госпóдня бо земля́ и исполнéнiе ея́.

• Сóвѣсть же глагóлю не свою́, но другáго: вскýю бо свобóда моя́ сýдит­ся от­ ины́я сóвѣсти?

• А́ще áзъ благодáтiю при­­чащáюся, почтó хулý прiéмлю, о нéмже áзъ благодарю́?

• А́ще ýбо я́сте, áще ли пiетé, áще ли и́но чтó творитé, вся́ во слáву Бóжiю твори́те.

• Безпреткновéни бывáйте Иудéемъ и éллиномъ и цéркви Бóжiей,

• я́коже и áзъ во всéмъ всѣ́мъ угождáю, не искíй сво­ея́ пóльзы, но мнóгихъ, да спасýт­ся.

Первое к Коринфянам, 11

• Подражáтеле мнѣ́ бывáйте, я́коже и áзъ Христý.

• Хвалю́ же вы́, брáтiе, я́ко вся́ моя́ пóмните, и я́коже предáхъ вáмъ, предáнiя держитé.

• Хощý же вáсъ вѣ́дѣти, я́ко вся́кому мýжу главá Христóсъ éсть, главá же женѣ́ мýжъ, главá же Христý Бóгъ.

• Вся́къ мýжъ, моли́тву дѣ́я или́ прорóче­ст­вуяй покры́тою главóю, срамля́етъ главý свою́:

• и вся́ка женá, моли́тву дѣ́ющая или́ прорóче­ст­ву­ю­щая от­кровéн­ною главóю, срамля́етъ главý свою́: еди́но бо éсть и тóжде {éже бы́ти} остри́жен­нѣй:

• áще бо не покрывáет­ся женá, да стрижéт­ся: áще ли же срáмъ женѣ́ стри́щися или́ бри́тися, да покрывáет­ся.

• Мýжъ ýбо не дóлженъ éсть покрывáти главý, о́бразъ и слáва Бóжiя сы́й: женá же слáва мýжу éсть.

• Нѣ́сть бо мýжъ от­ жены́, но женá от­ мýжа:

• и́бо не сóзданъ бы́сть мýжъ жены́ рáди, но женá мýжа рáди.

• Сегó рáди должнá éсть женá влáсть имѣ́ти на главѣ́ áнгелъ рáди.

• Обáче ни мýжъ безъ жены́, ни женá безъ мýжа, о Гóсподѣ.

• Я́коже бо женá от­ мýжа, си́це и мýжъ женóю: вся́ же от­ Бóга.

• Въ вáсъ самѣ́хъ суди́те, лѣ́по ли éсть женѣ́ от­кровéн­нѣй Бóгу моли́тися?

• Или́ и не сáмое есте­с­т­вó учи́тъ вы́, я́ко мýжъ ýбо áще власы́ расти́тъ, безчéстiе емý éсть,

• женá же áще власы́ расти́тъ, слáва éй éсть? занé растѣ́нiе власóвъ вмѣ́сто одѣя́нiя данó бы́сть éй.

• А́ще ли ктó мни́т­ся спóрливъ бы́ти, мы́ таковáго обы́чая не и́мамы, нижé цéркви Бóжiя.

• Сié же завѣщавáя не хвалю́, я́ко не на лýчшее, но на хýждшее сбирáетеся.

• Пéрвое ýбо, сходя́щымся вáмъ въ цéрковь, слы́шу въ вáсъ рáспри сýщыя, и чáсть нѣ́кую [си́хъ] вѣ́рую.

• Подобáетъ бо и ересéмъ въ вáсъ бы́ти, да искýснiи явлéни бывáютъ въ вáсъ.

• Сходя́щымся ýбо вáмъ вкýпѣ, нѣ́сть Гóсподскую вéчерю я́сти:

• кíйждо бо свою́ вéчерю предваря́етъ въ снѣдéнiе, и óвъ ýбо áлчетъ, óвъ же упивáет­ся.

• Едá бо домóвъ не и́мате, во éже я́сти и пи́ти? Или́ о цéркви Бóжiей нерадитé и срамля́ете не имýщыя? Чтó вáмъ рекý? похвалю́ ли вы́ о сéмъ? Не похвалю́.

• А́зъ бо прiя́хъ от­ Гóспода, éже и предáхъ вáмъ, я́ко Госпóдь Иисýсъ въ нóщь, въ ню́же прéданъ бывá­ше, прiéмь хлѣ́бъ,

• и благодари́въ преломи́, и речé: прiими́те, яди́те, сié éсть тѣ́ло моé, éже за вы́ ломи́мо­е: сié твори́те въ моé воспоминáнiе.

• Тáкожде и чáшу по вéчери, глагóля: сiя́ чáша нóвый завѣ́тъ éсть въ мо­éй крóви: сié твори́те, ели́жды áще пiéте, въ моé воспоминáнiе.

• Ели́жды бо áще я́сте хлѣ́бъ сéй и чáшу сiю́ пiéте, смéрть Госпóдню воз­вѣщáете, дóндеже прiи́детъ.

• Тѣ́мже и́же áще я́стъ хлѣ́бъ сéй или́ пiéтъ чáшу Госпóдню недостóйнѣ, пови́ненъ бýдетъ тѣ́лу и крóви Госпóдни.

• Да искушáетъ же человѣ́къ себé, и тáко от­ хлѣ́ба да я́стъ и от­ чáши да пiéтъ.

• Яды́й бо и пiя́й недостóйнѣ, сýдъ себѣ́ я́стъ и пiéтъ, не разсуждáя тѣ́ла Госпóдня.

• Сегó рáди въ вáсъ мнóзи нéмощни и недýжливи, и спя́тъ [усыпáютъ] довóлни.

• А́ще бо бы́хомъ себé разсуждáли, не бы́хомъ осуждéни бы́ли.

• Суди́ми же, от­ Гóспода наказýемся, да не съ мíромъ осýдимся.

• Тѣ́мже, брáтiе моя́, сходя́щеся я́сти, дрýгъ дрýга жди́те.

• А́ще ли ктó áлчетъ, въ домý да я́стъ, да не въ грѣ́хъ схóдитеся. О прóчихъ же, егдá прiидý, устрóю.

Первое к Коринфянам, 12

• О духóвныхъ же, брáтiе, не хощý вáсъ не вѣ́дѣти.

• Вѣ́сте, я́ко егдá невѣ́рни бѣ́сте, ко и́доломъ безглáснымъ я́ко ведóми ведóстеся.

• Тѣ́мже сказýю вáмъ, я́ко никтóже, Дýхомъ Бóжiимъ глагóляй, речéтъ анáѳема Иисýса, и никтóже мóжетъ рещи́ Гóспода Иисýса, тóчiю Дýхомъ святы́мъ.

• Раздѣлéнiя же даровáнiй сýть, а тóйжде Дýхъ:

• и раздѣлéнiя служéнiй сýть, а тóйжде Госпóдь:

• и раздѣлéнiя дѣ́й­ст­въ сýть, а тóйжде éсть Бóгъ, дѣ́й­ст­вуяй вся́ во всѣ́хъ.

• Комýждо же даéт­ся явлéнiе Дýха на пóльзу:

• óвому бо Дýхомъ даéт­ся слóво премýдрости, инóму же слóво рáзума, о тóмже Дýсѣ:

• другóму же вѣ́ра, тѣ́мже Дýхомъ: инóму же даровáнiя исцѣлéнiй, о тóмже Дýсѣ:

• другóму же дѣ́й­ст­вiя си́лъ, инóму же прорóче­с­т­во, другóму же разсуждéнiя духовóмъ, инóму же рóди язы́ковъ, другóму же сказáнiя язы́ковъ.

• Вся́ же сiя́ дѣ́й­ст­вуетъ еди́нъ и тóйжде Дýхъ, раздѣля́я влáстiю ко­емýждо я́коже хóщетъ.

• Я́коже бо тѣ́ло еди́но éсть и ýды и́мать мнóги, вси́ же ýди еди́наго тѣ́ла, мнóзи сýще, еди́но сýть тѣ́ло: тáко и Христóсъ.

• И́бо еди́нѣмъ Дýхомъ мы́ вси́ во еди́но тѣ́ло крести́хомся, áще Иудéе, áще éллини, или́ раби́, или́ свобóдни: и вси́ еди́нѣмъ Дýхомъ напо­и́хомся.

• И́бо тѣ́ло нѣ́сть еди́нъ ýдъ, но мнóзи.

• А́ще речéтъ ногá, я́ко нѣ́смь рукá, нѣ́смь от­ тѣ́ла: едá сегó рáди нѣ́сть от­ тѣ́ла?

• И áще речéтъ ýхо, я́ко нѣ́смь óко, нѣ́смь от­ тѣ́ла: едá сегó рáди нѣ́сть от­ тѣ́ла?

• А́ще всé тѣ́ло óко, гдѣ́ слýхъ? áще [же] всé слýхъ, гдѣ́ ухáнiе?

• Ны́нѣ же положи́ Бóгъ ýды, еди́наго ко­егóждо и́хъ въ тѣлеси́, я́коже извóли.

• А́ще ли бы́ша вси́ еди́нъ ýдъ, гдѣ́ тѣ́ло?

• Ны́нѣ же мнóзи ýбо ýдове, еди́но же тѣ́ло.

• Не мóжетъ же óко рещи́ руцѣ́: не трéбѣ ми́ еси́: или́ пáки главá ногáма: не трéбѣ ми́ естé.

• Но мнóго пáче, мня́щiися ýди тѣ́ла немощнѣ́йши бы́ти, нýжнѣйши сýть,

• и и́хже мни́мъ безчéстнѣйшихъ бы́ти тѣ́ла, си́мъ чéсть мнóжайшую при­­лагáемъ:

• и неблагообрáзнiи нáши благообрáзiе мнóжайше и́мутъ, а благообрáзнiи нáши не трéбѣ и́мутъ. Но Бóгъ ра­ст­вори́ тѣ́ло, худѣ́йшему бóлшу дáвъ чéсть,

• да не бýдетъ рáспри въ тѣлеси́, но да тóжде въ себѣ́ [да рáвно еди́нъ о друзѣ́мъ] пекýт­ся ýди.

• И áще стрáждетъ еди́нъ ýдъ, съ ни́мъ стрáждутъ вси́ ýди: áще ли же слáвит­ся еди́нъ ýдъ, съ ни́мъ рáдуют­ся вси́ ýди.

• Вы́ же естé тѣ́ло Христóво, и ýди от­ чáсти.

• И óвыхъ ýбо положи́ Бóгъ въ цéркви пéрвѣе апóстоловъ, вторóе прорóковъ, трéтiе учи́телей: потóмъ же си́лы, тáже даровáнiя исцѣлéнiй, заступлéнiя, правлéнiя, рóди язы́ковъ.

• Едá вси́ апóстоли? едá вси́ прорóцы? едá вси́ учи́теле? едá вси́ си́лы?

• едá вси́ даровáнiя и́мутъ исцѣлéнiй? едá вси́ язы́ки глагóлютъ? едá вси́ сказýютъ?

• Ревнýйте же даровáнiй бóлшихъ, и ещé по превосхождéнiю пýть вáмъ показýю.

Первое к Коринфянам, 13

• А́ще язы́ки человѣ́ческими глагóлю и áнгелскими, любвé же не и́мамъ, бы́хъ [я́ко] мѣ́дь звеня́щи, или́ кимвáлъ звяцáяй.

• И áще и́мамъ прорóче­с­т­во, и вѣ́мъ тáйны вся́ и вéсь рáзумъ, и áще и́мамъ всю́ вѣ́ру, я́ко и гóры преставля́ти, любвé же не и́мамъ, ничтóже éсмь.

• И áще раздáмъ вся́ имѣ́нiя моя́, и áще предáмъ тѣ́ло моé, во éже сжещи́ é, любвé же не и́мамъ, ни кáя пóльза ми́ éсть.

• Любы́ долготерпи́тъ, милосéрд­ст­вуетъ, любы́ не зави́дитъ, любы́ не превоз­нóсит­ся, не горди́т­ся,

• не безчи́н­ствуетъ, не и́щетъ сво­и́хъ си́, не раздражáет­ся, не мы́слитъ злá,

• не рáдует­ся о непрáвдѣ, рáдует­ся же о и́стинѣ:

• вся́ лю́битъ {покрывáетъ}, всемý вѣ́ру éмлетъ, вся́ уповáетъ, вся́ терпи́тъ.

• Любы́ николи́же от­пáдаетъ, áще же прорóче­ст­вiя упраздня́т­ся, áще ли язы́цы умóлкнутъ, áще рáзумъ испраздни́т­ся.

• От чáсти бо разумѣвáемъ и от­ чáсти прорóче­ст­вуемъ:

• егдá же прiи́детъ совершéн­ное, тогдá, éже от­ чáсти, упраздни́т­ся.

• Егдá бѣ́хъ младéнецъ, я́ко младéнецъ глагóлахъ, я́ко младéнецъ мýдр­ст­вовахъ, я́ко младéнецъ смышля́хъ: егдá же бы́хъ мýжъ, от­вергóхъ младéнческая.

• Ви́димъ ýбо ны́нѣ я́коже зерцáломъ въ гадáнiи, тогдá же лицéмъ къ лицý: ны́нѣ разумѣ́ю от­ чáсти, тогдá же познáю, я́коже и познáнъ бы́хъ.

• Ны́нѣ же пребывáютъ вѣ́ра, надéжда, любы́, три́ сiя́: бóлши же си́хъ любы́.

Первое к Коринфянам, 14

• Держи́теся любвé: ревнýйте же духóвнымъ, пáче же да прорóче­ст­вуете.

• Глагóляй бо язы́ки, не человѣ́комъ глагóлетъ, но Бóгу: никтóже бо слы́шитъ, дýхомъ же глагóлетъ тáйны:

• прорóче­ст­вуяй же, человѣ́комъ глагóлетъ созидáнiе и утѣшéнiе и утверждéнiе.

• Глагóляй [бо] язы́ки себé зи́ждетъ, а прорóче­ст­вуяй цéрковь зи́ждетъ.

• Хощý же всѣ́хъ вáсъ глагóлати язы́ки, пáче же да прорицáете: бóлiй бо прорóче­ст­вуяй, нéжели глагóляй язы́ки, рáзвѣ áще [ктó] сказýетъ, да цéрковь созидáнiе прiéмлетъ.

• Ны́нѣ же, брáтiе, áще прiидý къ вáмъ язы́ки глагóля, кýю вáмъ пóльзу сотворю́, áще вáмъ не глагóлю или́ во от­кровéнiи, или́ въ рáзумѣ, или́ въ прорóче­ст­вiи, или́ въ научéнiи?

• Обáче бездýшная глáсъ даю́щая, áще сопѣ́ль, áще гýсли, áще рáзн­ствiя пискáнiемъ не дадя́тъ, кáко разýмно бýдетъ пискáнiе или́ гудéнiе?

• И́бо áще безвѣ́стенъ глáсъ трубá дáстъ, ктó уготóвит­ся на брáнь?

• Тáко и вы́ áще не благоразýмно слóво дадитé язы́комъ, кáко уразумѣ́ет­ся глагóлемо­е? Бýдете бо на воз­дýхъ глагóлюще.

• Толи́цы ýбо, áще ключи́т­ся, рóди гласóвъ сýть въ мíрѣ, и ни еди́нъ и́хъ безглáсенъ.

• А́ще ýбо не увѣ́мъ си́лы глáса, бýду глагóлющему иноязы́чникъ, и глагóлющiй мнѣ́ иноязы́чникъ.

• Тáко и вы́, понéже ревни́теле естé духовóмъ, [я́же] къ созидáнiю цéркве проси́те {ищи́те}, да избы́точе­ст­вуете.

• Тѣ́мже глагóляй язы́комъ да мóлит­ся, да сказýетъ.

• А́ще бо молю́ся язы́комъ, дýхъ мóй мóлит­ся, а ýмъ мóй безъ плодá éсть.

• Чтó ýбо éсть? Помолю́ся дýхомъ, помолю́ся же и умóмъ: воспою́ дýхомъ, воспою́ же и умóмъ.

• Понéже áще благослови́ши дýхомъ, исполня́яй мѣ́сто невѣ́жды кáко речéтъ ами́нь, по тво­емý благодарéнiю? Понéже не вѣ́сть, чтó глагóлеши.

• Ты́ ýбо дóбрѣ благодари́ши, но другíй не созидáет­ся.

• Благодарю́ Бóга мо­егó, пáче всѣ́хъ вáсъ язы́ки глагóля:

• но въ цéркви хощý пя́ть словéсъ умóмъ мо­и́мъ глагóлати, да и и́ны пóльзую, нéжели тмы́ словéсъ язы́комъ.

• Брáтiе, не дѣ́ти бывáйте умы́: но злóбою младéн­ствуйте, умы́ же совершéни бывáйте.

• Въ закóнѣ пи́шетъ: я́ко ины́ми язы́ки и устны́ ины́ми воз­глагóлю лю́демъ си́мъ, и ни тáко послýшаютъ менé, глагóлетъ Госпóдь.

• Тѣ́мже язы́цы въ знáменiе сýть не вѣ́ру­ю­щымъ, но невѣ́рнымъ: а прорóче­с­т­во не невѣ́рнымъ, но вѣ́ру­ю­щымъ.

• А́ще ýбо сни́дет­ся цéрковь вся́ вкýпѣ, и вси́ язы́ки глагóлютъ, вни́дутъ же [и] неразýмивiи или́ невѣ́рнiи, не рекýтъ ли, я́ко бѣснýетеся?

• А́ще же вси́ прорóче­ст­вуютъ, вни́детъ же нѣ́кiй невѣ́ренъ или́ невѣ́жда, обличáет­ся всѣ́ми, [и] истязýет­ся от­ всѣ́хъ,

• и си́це тáйная сéрдца егó явлéна бывáютъ: и тáко пáдъ ни́цъ поклóнит­ся богови, воз­вѣщáя, я́ко во­и́стин­ну Бóгъ съ вáми éсть.

• Чтó ýбо éсть, брáтiе? Егдá схóдитеся, кíйждо вáсъ псалóмъ и́мать, учéнiе и́мать, язы́къ и́мать от­кровéнiе и́мать, сказáнiе и́мать: вся́ [же] къ созидáнiю да бывáютъ.

• А́ще язы́комъ ктó глагóлетъ, по двѣмá, или́ мнóжае по трiéмъ, и по чáсти: и еди́нъ да сказýетъ.

• А́ще ли не бýдетъ сказáтель, да молчи́тъ въ цéркви, себѣ́ же да глагóлетъ и богови.

• Прорóцы же двá или́ трié да глагóлютъ, и друзíи да разсуждáютъ:

• áще ли инóму от­кры́ет­ся сѣдя́щу, пéрвый да молчи́тъ.

• Мóжете бо вси́ по еди́ному прорóче­с­т­вовати, да вси́ учáт­ся и вси́ утѣшáют­ся.

• И дýси прорóчестiи прорóкомъ повинýют­ся:

• нѣ́сть бо нестро­éнiя Бóгъ, но ми́ра, я́ко во всѣ́хъ цéрквахъ святы́хъ.

• Жены́ вáшя въ цéрквахъ да молчáтъ: не повелѣ́ся бо и́мъ глагóлати, но повиновáтися, я́коже и закóнъ глагóлетъ.

• А́ще ли чесомý научи́тися хотя́тъ, въ домý сво­и́хъ мужéй да вопрошáютъ: срáмно бо éсть женѣ́ въ цéркви глагóлати.

• Или́ от­ вáсъ слóво Бóжiе изы́де? Или́ вáсъ еди́ныхъ дости́же?

• А́ще ктó мни́т­ся прорóкъ бы́ти или́ духóвенъ, да разумѣ́етъ, я́же пишý вáмъ, занé Госпóдни сýть зáповѣди?

• áще ли ктó не разумѣ́етъ, да не разумѣвáетъ.

• Тѣ́мже, брáтiе моя́, ревнýйте éже прорóче­с­т­вовати, и éже глагóлати язы́ки не воз­браня́йте:

• вся́ же благообрáзно и по чи́ну да бывáютъ.

Первое к Коринфянам, 15

• Сказýю же вáмъ, брáтiе, благовѣ­ст­вовáнiе, éже благовѣсти́хъ вáмъ, éже и прiя́сте, въ нéмже и сто­итé,

• и́мже и спасáетеся, кáцѣмъ слóвомъ благовѣсти́хъ вáмъ, áще содержитé: рáзвѣ áще не всýе вѣ́ровасте.

• Предáхъ бо вáмъ испéрва, éже и прiя́хъ, я́ко Христóсъ ýмре грѣ́хъ нáшихъ рáди, по писáниемъ,

• и я́ко погребéнъ бы́сть, и я́ко востá въ трéтiй дéнь, по писáниемъ,

• и я́ко яви́ся ки́фѣ, тáже едино­нá­де­ся­тимъ:

• потóмъ же яви́ся бóлѣ пяти́ сóтъ брáтiямъ еди́ною, от­ ни́хже мнóжайшiи пребывáютъ досéлѣ, нѣ́цыи же и почи́ша:

• потóмъ же яви́ся Иáкову, тáже апóстоломъ всѣ́мъ:

• послѣди́ же всѣ́хъ, я́ко нѣ́ко­ему и́звергу, яви́ся и мнѣ́.

• А́зъ бо éсмь мнíй апóстоловъ, и́же нѣ́смь достóинъ нарещи́ся апóстолъ, занé гони́хъ цéрковь Бóжiю.

• Благодатiю же Бóжiею éсмь, éже éсмь, и благодáть егó, я́же во мнѣ́, не тщá бы́сть, но пáче всѣ́хъ и́хъ потруди́хся: не áзъ же, но благодáть Бóжiя, я́же со мнóю.

• А́ще ýбо áзъ, áще ли они́, тáко проповѣ́дуемъ, и тáко вѣ́ровасте.

• А́ще же Христóсъ проповѣ́дует­ся, я́ко изъ мéртвыхъ востá, кáко глагóлютъ нѣ́цыи въ вáсъ, я́ко воскресéнiя мéртвыхъ нѣ́сть?

• И áще воскресéнiя мéртвыхъ нѣ́сть, тó ни Христóсъ востá:

• áще же Христóсъ не востá, тщé ýбо проповѣ́данiе нá­ше, тщá же и вѣ́ра вáша.

• Обрѣтáемся же и лжесвидѣ́теле Бóжiи, я́ко послýше­с­т­вовахомъ на Бóга, я́ко воскреси́ Христá, егóже не воскреси́, áще ýбо мéртвiи не востаю́тъ:

• áще бо мéртвiи не востаю́тъ, тó ни Христóсъ востá:

• áще же Христóсъ не востá, сýетна вѣ́ра вáша, ещé естé во грѣсѣ́хъ вáшихъ:

• ýбо и умéршiи о Христѣ́, погибóша.

• [И] áще въ животѣ́ сéмъ тóчiю уповáюще есмы́ во Христá, окая́н­нѣйши всѣ́хъ человѣ́къ есмы́.

• Ны́нѣ же Христóсъ востá от­ мéртвыхъ, начáтокъ умéршымъ бы́сть.

• Понéже бо человѣ́комъ смéрть [бы́сть], и человѣ́комъ воскресéнiе мéртвыхъ.

• Я́коже бо о Адáмѣ вси́ умирáютъ, тáкожде и о Христѣ́ вси́ оживýтъ,

• кíйждо же во сво­éмъ чинý: начáтокъ Христóсъ, потóмъ же Христý вѣ́ровав­шiи въ при­­шé­ст­вiи егó.

• Тáже кончи́на, егдá предáстъ цáр­ст­во Бóгу и Отцý, егдá испраздни́тъ вся́ко начáл­ст­во и вся́ку влáсть и си́лу:

• подобáетъ бо емý цáр­ст­вовати, дóндеже положи́тъ вся́ враги́ подъ ногáма сво­и́ма.

• Послѣ́днiй же врáгъ испраздни́т­ся смéрть,

• вся́ бо покори́ подъ нóзѣ егó: внегдá же рещи́, я́ко вся́ покорéна сýть емý, я́вѣ, я́ко рáзвѣ покóршаго емý вся́.

• Егдá же покори́тъ емý вся́ческая, тогдá и сáмъ Сы́нъ покори́т­ся покóршему емý вся́ческая, да бýдетъ Бóгъ вся́ческая во всѣ́хъ.

• Понéже чтó сотворя́тъ крестя́щiися мéртвыхъ рáди? А́ще от­ню́дъ мéртвiи не востаю́тъ, чтó и крещáют­ся мéртвыхъ рáди?

• Почтó [же] и мы́ бѣды́ прiéмлемъ на вся́къ чáсъ?

• По вся́ дни́ умирáю: тáко ми́ вáша похвалá, брáтiе, ю́же и́мамъ о Христѣ́ Иисýсѣ Гóсподѣ нá­шемъ.

• А́ще [бо] по человѣ́ку со звѣ́ремъ боря́хся въ Ефéсѣ, кáя ми́ пóльза, áще мéртвiи не востаю́тъ? Да я́мы и пiéмъ, ýтрѣ бо ýмремъ.

• Не льсти́теся: тля́тъ обы́чаи блáги бесѣ́ды злы́.

• Истрезви́теся прáведно и не согрѣшáйте: невѣ́дѣнiе бо Бóжiе нѣ́цыи и́мутъ, къ срáму вáмъ глагóлю.

• Но речéтъ нѣ́кто: кáко востáнутъ мéртвiи? кóимъ же тѣ́ломъ прiи́дутъ?

• Безýмне, ты́ éже сѣ́еши, не оживéтъ, áще не ýмретъ:

• и éже сѣ́еши, не тѣ́ло бýдущее сѣ́еши, но голó зéрно, áще случи́т­ся, пшени́цы или́ инóго от­ прóчихъ:

• Бóгъ же даéтъ емý тѣ́ло, я́коже восхóщетъ, и ко­емýждо сѣ́мени своé тѣ́ло.

• Не вся́ка плóть тáже плóть: но и́на ýбо плóть человѣ́комъ, и́на же плóть скотóмъ, и́на же ры́бамъ, и́на же пти́цамъ.

• И тѣлесá небéсная, и тѣлесá земнáя: но и́на ýбо небéснымъ слáва, и и́на земны́мъ:

• и́на слáва сóлнцу, и и́на слáва лунѣ́, и и́на слáва звѣздáмъ: звѣздá бо от­ звѣзды́ рáзн­ствуетъ во слáвѣ.

• Тáкожде и воскресéнiе мéртвыхъ: сѣ́ет­ся въ тлѣ́нiе, востаéтъ въ нетлѣ́нiи:

• сѣ́ет­ся не въ чéсть, востаéтъ въ слáвѣ: сѣ́ет­ся въ нéмощи, востаéтъ въ си́лѣ:

• сѣ́ет­ся тѣ́ло душéвное, востаéтъ тѣ́ло духóвное. Е́сть тѣ́ло душéвное, и éсть тѣ́ло духóвное.

• Тáко и пи́сано éсть: бы́сть пéрвый человѣ́къ Адáмъ въ дýшу жи́ву, послѣ́днiй Адáмъ въ Дýхъ животворя́щь.

• Но не прéжде духóвное, но душéвное, потóмъ же духóвное.

• Пéрвый человѣ́къ от­ земли́, пéрстенъ: вторы́й человѣ́къ Госпóдь съ небесé.

• Якóвъ пéрстный, такови́ и пéрстнiи: и якóвъ небéсный, тáцы же и небéснiи:

• и я́коже облекóхомся во о́бразъ пéрстнаго, да облечéмся и во о́бразъ небéснаго.

• Сié же глагóлю, брáтiе, я́ко плóть и крóвь цáр­ст­вiя Бóжiя наслѣ́дити не мóгутъ, нижé тлѣ́нiе нетлѣ́нiя наслѣ́д­ст­вуетъ.

• Сé, тáйну вáмъ глагóлю: вси́ бо не ýспнемъ, вси́ же измѣни́мся

• вскóрѣ, во мгновéнiи óка, въ послѣ́дней трубѣ́: вострýбитъ бо, и мéртвiи востáнутъ нетлѣ́н­ни, и мы́ измѣни́мся:

• подобáетъ бо тлѣ́н­ному семý облещи́ся въ нетлѣ́нiе и мéртвен­ному семý облещи́ся въ безсмéртiе.

• Егдá же тлѣ́н­ное сié облечéт­ся въ нетлѣ́нiе и смéртное сié облечéт­ся въ безсмéртiе, тогдá бýдетъ слóво напи́сан­но­е: пожéрта бы́сть смéрть побѣ́дою.

• Гдѣ́ ти, смéрте, жáло? гдѣ́ ти, áде, побѣ́да?

• Жáло же смéрти грѣ́хъ: си́ла же грѣхá закóнъ.

• Бóгу же благодарéнiе, дáв­шему нáмъ побѣ́ду Гóсподемъ нáшимъ Иисýсъ Христóмъ.

• Тѣ́мже, брáтiе моя́ воз­лю́блен­ная, твéрди бывáйте, непостýпни, избы́точе­ст­ву­ю­ще въ дѣ́лѣ Госпóдни всегдá, вѣ́дяще, я́ко трýдъ вáшъ нѣ́сть тóщь предъ Гóсподемъ.

Первое к Коринфянам, 16

• О ми́лостыни же, я́же ко святы́мъ, я́коже устрóихъ цéрквамъ Галати́йскимъ, тáко и вы́ сотворя́йте:

• по еди́нѣй от­ суббóтъ кíйждо вáсъ да полагáетъ у себé сохраня́я, éже áще чтó благопоспѣши́т­ся, да не егдá прiидý, тогдá собрáнiя бывáютъ.

• Егдá же прiидý, и́хже áще искýсите, съ послáньми си́хъ послю́ от­нести́ благодáть вáшу во Иерусали́мъ.

• А́ще же достóйно бýдетъ и мнѣ́ ити́, со мнóю пóйдутъ.

• Прiидý же къ вáмъ, егдá македóнiю преидý: македóнiю бо прохождý.

• У вáсъ же, áще случи́т­ся мнѣ́, пребýду, или́ и озимѣ́ю, да вы́ мя́ провóдите, áможе áще по­идý.

• Не хощý бо вáсъ ны́нѣ въ мимохождéнiи ви́дѣти: уповáю же врéмя нѣ́кое пребы́ти у вáсъ, áще Госпóдь повели́тъ.

• Пребýду же во Ефéсѣ до пентикóстiи:

• двéрь бо ми́ от­вéрзеся вели́ка и поспѣ́шна, и сопроти́внiи мнóзи.

• А́ще же прiи́детъ тимоѳéй, блюди́те, да безъ стрáха бýдетъ у вáсъ: дѣ́ло бо Госпóдне дѣ́лаетъ, я́коже и áзъ:

• да никтóже ýбо егó уничижи́тъ: проводи́те же егó съ ми́ромъ, да прiи́детъ ко мнѣ́, ждý бо егó съ брáтiею.

• О аполлóсѣ же брáтѣ: мнóго моли́хъ егó, да прiи́детъ къ вáмъ съ брáтiею: и вся́ко не бѣ́ вóля, да ны́нѣ прiи́детъ, прiи́детъ же, егдá упраздни́т­ся.

• Бóдр­ст­вуйте, стóйте въ вѣ́рѣ, мужáйтеся, утверждáйтеся:

• вся́ вáмъ любо­́вiю да бывáютъ.

• Молю́ же вы́, брáтiе: вѣ́сте дóмъ стефани́новъ, я́ко éсть начáтокъ Ахáiи, и въ служéнiе святы́мъ учини́ша себé:

• да и вы́ повинýйтеся таковы́мъ и вся́кому споспѣ́ш­ст­ву­ю­щу и труждáющуся.

• Возрáдовахся же о при­­шé­ст­вiи стефани́новѣ и фуртунáтовѣ и Ахáиковѣ, я́ко вá­ше лишéнiе сíи испóлниша:

• упокóиша бо мóй дýхъ и вáшъ. Познавáйте ýбо таковы́я.

• Цѣлýютъ вы́ цéркви Аси́йскiя: цѣлýютъ вы́ о Гóсподѣ мнóго аки́ла и приски́лла съ домáшнею и́хъ цéрковiю.

• Цѣлýютъ вы́ брáтiя вся́. Цѣлýйте дрýгъ дрýга лобзáнiемъ святы́мъ.

• Цѣловáнiе мо­éю рукóю пáвлею.

• А́ще ктó не лю́битъ Гóспода Иисýса Христá, да бýдетъ прóклятъ, марáнъ Аѳá {Госпóдь нáшъ прiи́де [си́рскiй глáсъ]}.

• Благодáть Гóспода нá­шего Иисýса Христá съ вáми,

• [и] любы́ моя́ со всѣ́ми вáми о Христѣ́ Иисýсѣ. Ами́нь.

#ДаниилСысоев #миссия #СвященноеПисание