Святого апостола Павла послание к Римлянам

Послание, обращенное к римским христианам того времени, в котором рассматриваются вопросы искупления, совершенного Христом, разницы спасения через закон и через благодать, первородного греха и будущей славе спасенных, отношении к государственным властям и христиан между собой, стало по значимости, но не по хронологии первым из остальных посланий апостола Павла.

К Римлянам, 1

• Пáвелъ, рáбъ Иисýсъ Христóвъ, звáнъ апóстолъ, избрáнъ въ благовѣ́стiе Бóжiе,

• éже прéжде обѣщá прорóки сво­и́ми въ писáнiихъ святы́хъ,

• о Сы́нѣ сво­éмъ, бы́в­шемъ от­ сѣ́мене Дави́дова по плóти,

• наречéн­нѣмъ Сы́нѣ Бóжiи въ си́лѣ, по Дýху святы́ни, изъ воскресéнiя от­ мéртвыхъ, Иисýса Христá Гóспода нá­шего,

• и́мже прiя́хомъ благодáть и апóстол­ст­во въ послушáнiе вѣ́ры во всѣ́хъ язы́цѣхъ, о и́мени егó,

• въ ни́хже естé и вы́, звáни Иисýсу Христý:

• всѣ́мъ сýщымъ въ ри́мѣ воз­лю́блен­нымъ Бóгу, звáн­нымъ святы́мъ: благодáть вáмъ и ми́ръ от­ Бóга Отцá нá­шего, и Гóспода Иисýса Христá.

• Пéрвое ýбо благодарю́ Бóга мо­егó Иисýсомъ Христóмъ о всѣ́хъ вáсъ, я́ко вѣ́ра вáша воз­вѣщáет­ся во всéмъ мíрѣ:

• свидѣ́тель бо ми́ éсть Бóгъ, емýже служý дýхомъ мо­и́мъ во благовѣ­ст­вовáнiи Сы́на егó, я́ко безпрестáни пáмять о вáсъ творю́,

• всегдá въ моли́твахъ мо­и́хъ моля́ся, áще ýбо когдá поспѣ́шенъ бýду вóлею Бóжiею прiити́ къ вáмъ:

• желáю бо ви́дѣти вáсъ, да нѣ́кое подáмъ вáмъ даровáнiе духóвное, ко утверждéнiю вá­шему:

• сié же éсть, со­утѣ́шитися въ вáсъ вѣ́рою óбщею, вá­шею же и мо­éю.

• Не хощý же не вѣ́дѣти вáмъ, брáтiе, я́ко мнóжицею восхотѣ́хъ прiити́ къ вáмъ, и воз­бранéнъ бы́хъ досéлѣ, да нѣ́кiй плóдъ имѣ́ю и въ вáсъ, я́коже и въ прóчихъ язы́цѣхъ.

• Е́ллиномъ же и вáрвавомъ, мýдрымъ же и неразýмнымъ дóлженъ éсмь:

• тáко éсть, éже по мо­емý усéрдiю и вáмъ сýщымъ въ ри́мѣ благовѣсти́ти.

• Не стыжýся бо благовѣ­ст­вовáнiемъ Христóвымъ: си́ла бо Бóжiя éсть во спасéнiе вся́кому вѣ́ру­ю­щему, Иудéови же прéжде и éллину.

• Прáвда бо Бóжiя въ нéмъ явля́ет­ся от­ вѣ́ры въ вѣ́ру, я́коже éсть пи́сано: прáведный же от­ вѣ́ры жи́въ бýдетъ.

• Открывáет­ся бо гнѣ́въ Бóжiй съ небесé на вся́кое нечéстiе и непрáвду человѣ́ковъ, содержáщихъ и́стину въ непрáвдѣ:

• занé разýмное Бóжiе {éже воз­мóжно разумѣ́ти о Бóзѣ} я́вѣ éсть въ ни́хъ, Бóгъ бо яви́лъ éсть и́мъ:

• неви́димая бо егó, от­ создáнiя мíра творéньми помышля́ема, ви́дима сýть, и при­­сносýщная си́ла егó и Боже­с­т­вó, во éже бы́ти и́мъ безот­вѣ́тнымъ.

• Занéже разумѣ́в­ше Бóга, не я́ко Бóга прослáвиша или́ благодари́ша, но осуети́шася помышлéнiи свóими, и омрачи́ся неразýмное и́хъ сéрдце:

• глагóлющеся бы́ти мýдри, обюродѣ́ша,

• и измѣни́ша слáву нетлѣ́н­наго Бóга въ подóбiе о́браза тлѣ́н­на человѣ́ка и пти́цъ и четверонóгъ и гáдъ:

• тѣ́мже и предадé и́хъ Бóгъ въ пóхотехъ сердéцъ и́хъ въ нечистотý, во éже скверни́тися тѣлесéмъ и́хъ въ себѣ́ самѣ́хъ:

• и́же премѣни́ша и́стину Бóжiю во лжý, и почтóша и послужи́ша твáри пáче творцá, и́же éсть благословéнъ во вѣ́ки, ами́нь.

• Сегó рáди предадé и́хъ Бóгъ въ стрáсти безчéстiя: и жены́ бо и́хъ измѣни́ша естé­с­т­вен­ную подóбу въ презъестé­с­т­вен­ную:

• тáкожде и мýжiе, остáвльше естé­с­т­вен­ную подóбу жéнска пóла, разжегóшася пóхотiю сво­éю дрýгъ на дрýга, мýжи на мужéхъ стýдъ содѣвáюще, и воз­мéздiе, éже подобá­ше прéлести и́хъ, въ себѣ́ воспрiéмлюще.

• И я́коже не искуси́ша имѣ́ти Бóга въ рáзумѣ, [сегó рáди] предадé и́хъ Бóгъ въ неискýсенъ ýмъ, твори́ти неподóбная,

• испóлненыхъ вся́кiя непрáвды, блужéнiя, лукáв­ст­ва, лихо­имáнiя, злóбы: испóлненыхъ зáвисти, убíй­ст­ва, рвéнiя, льсти́, злонрáвiя:

• шепотники́, клеветники́, богомéрзки, досади́тели, величáвы, гóрды, обрѣтáтели злы́хъ, роди́телемъ непокори́вы,

• неразýмны, непримири́телны, нелюбóвны, неклятвохрани́телны, неми́лостивны.

• Нѣ́цыи же и оправдáнiе Бóжiе разумѣ́в­ше, я́ко таковáя творя́щiи достóйни смéрти сýть, не тóчiю сáми творя́тъ, но и со­изволя́ютъ творя́щымъ.

К Римлянам, 2

• Сегó рáди безот­вѣ́тенъ еси́, о, человѣ́че вся́къ судя́й: и́мже бо судóмъ сýдиши дрýга, себé осуждáеши, тáяжде бо твори́ши судя́й.

• Вѣ́мы же, я́ко сýдъ Бóжiй éсть по­и́стин­нѣ на творя́щихъ таковáя.

• Помышля́еши ли же сié, о, человѣ́че, судя́й таковáя творя́щымъ и творя́ сáмъ тáяжде, я́ко ты́ избѣжи́ши ли судá Бóжiя,

• или́ о богáт­ст­вѣ блáгости егó и крóтости и долготерпѣ́нiи неради́ши, не вѣ́дый, я́ко блáгость Бóжiя на покая́нiе тя́ ведéтъ?

• По жестóкости же тво­éй и непокáян­ному сéрдцу, собирáеши себѣ́ гнѣ́въ въ дéнь гнѣ́ва и от­кровéнiя прáведнаго судá Бóжiя,

• и́же воз­дáстъ ко­емýждо по дѣлóмъ егó:

• о́вымъ ýбо, по терпѣ́нiю дѣ́ла благáго, слáвы и чéсти и нетлѣ́нiя и́щущымъ, живóтъ вѣ́чный:

• а и́же по рвéнiю противля́ют­ся ýбо и́стинѣ, повинýют­ся же непрáвдѣ, я́рость и гнѣ́въ.

• Скóрбь и тѣснотá на вся́ку дýшу человѣ́ка творя́щаго злóе, Иудéа же прéжде и éллина.

• Слáва же и чéсть и ми́ръ вся́кому дѣ́ла­ю­щему благóе, Иудéеви же прéжде и éллину.

• Нѣ́сть бо на лицá зрѣ́нiя у Бóга.

• Ели́цы бо беззакóн­но {безъ закóна} согрѣши́ша, беззакóн­но {безъ закóна} и поги́бнутъ: и ели́цы въ закóнѣ согрѣши́ша, закóномъ сýдъ прiи́мутъ:

• не слы́шателiе бо закóна прáведни предъ Бóгомъ, но творцы́ закóна, сíи оправдя́т­ся:

• егдá бо язы́цы, не имýще закóна, есте­с­т­вóмъ закóн­ная творя́тъ, сíи, закóна не имýще, сáми себѣ́ сýть закóнъ:

• и́же явля́ютъ дѣ́ло закóн­ное напи́сано въ сердцáхъ сво­и́хъ, спослýше­ст­ву­ю­щеи и́мъ сóвѣсти, и междý собóю помыслóмъ осуждáющымъ или́ от­вѣщáющымъ,

• въ дéнь, егдá сýдитъ Бóгъ тáйная человѣ́комъ, по благовѣ́стiю мо­емý, Иисýсомъ Христóмъ.

• Сé, ты́ Иудéй именýешися, и почивáеши на закóнѣ, и хвáлишися о Бóзѣ,

• и разумѣ́еши вóлю, и разсуждáеши лýчшая, научáемь от­ закóна,

• уповáя же себé вождá бы́ти слѣпы́мъ, свѣ́та сýщымъ во тмѣ́,

• наказáтеля безýмнымъ, учи́теля младéнцемъ, имýща о́бразъ рáзума и и́стины въ закóнѣ:

• научáя ýбо инáго, себé ли не учи́ши,

• проповѣ́дая не крáсти, крáдеши: глагóляй не прелюбы́ твори́ти, прелюбы́ твори́ши: гнушáяся и́долъ, святáя крáдеши:

• и́же въ закóнѣ хвáлишися, преступлéнiемъ закóна Бóга безчé­ст­вуеши.

• И́мя бо Бóжiе вáми хýлит­ся во язы́цѣхъ, я́коже éсть пи́сано.

• Обрѣ́занiе бо пóльзуетъ, áще закóнъ твори́ши: áще же закóна престýпникъ еси́, обрѣ́занiе твоé необрѣ́занiе бы́сть.

• А́ще ýбо необрѣ́занiе оправдáнiе закóна сохрани́тъ, не необрѣ́занiе ли егó во обрѣ́занiе вмѣни́т­ся,

• и осýдитъ éже от­ есте­ст­вá необрѣ́занiе, закóнъ совершáющее, тебé, и́же писáнiемъ и обрѣ́занiемъ еси́ престýпникъ закóна.

• Не бó и́же я́вѣ, Иудéй éсть, ни éже я́вѣ во плóти, обрѣ́занiе:

• но и́же въ тáйнѣ Иудéй, и обрѣ́занiе сéрдца дýхомъ, [а] не писáнiемъ: емýже похвалá не от­ человѣ́къ, но от­ Бóга.

К Римлянам, 3

• Чтó ýбо ли́шшее Иудéю {кóе ýбо преимýще­с­т­во Иудéа}? или́ кáя пóльза обрѣ́занiя?

• Мнóго, по вся́кому о́бразу: пéрвѣе {наипáче} бо, я́ко ввѣ́рена бы́ша и́мъ словесá Бóжiя.

• Чтó бо, áще не вѣ́роваша нѣ́цыи? едá [ýбо] невѣ́р­ст­вiе и́хъ вѣ́ру Бóжiю упраздни́тъ?

• Да не бýдетъ: да бýдетъ же Бóгъ и́стиненъ, вся́къ же человѣ́къ лóжь, я́коже éсть пи́сано: я́ко да оправди́шися во словесѣ́хъ тво­и́хъ, и побѣди́ши, внегдá суди́ти ти́.

• А́ще ли непрáвда нáша Бóжiю прáвду составля́етъ, чтó речéмъ, едá ли непрáведенъ Бóгъ нанося́й гнѣ́въ, по человѣ́ку глагóлю.

• Да не бýдетъ: понéже кáко суди́ти и́мать Бóгъ мíру?

• А́ще бо и́стина Бóжiя въ мо­éй лжи́ избы́точе­с­т­вова въ слáву егó, чтó ещé и áзъ я́ко грѣ́шникъ осуждáюся?

• И не я́коже хýлимся, и я́коже глагóлютъ нѣ́цыи нáсъ глагóлати, я́ко сотвори́мъ злáя, да прiи́дутъ благáя: и́хже сýдъ прáведенъ éсть.

• Чтó ýбо? преимѣ́емъ ли? Никáкоже: предукори́хомъ бо {прéжде бо обвинéни есмы́} иудéи же и éллины вся́ {вси́} подъ грѣхóмъ бы́ти,

• я́коже éсть пи́сано, я́ко нѣ́сть прáведенъ никтóже:

• нѣ́сть разумѣвáяй и нѣ́сть взыскáяй Бóга:

• вси́ уклони́шася, вкýпѣ непотрéбни бы́ша: нѣ́сть творя́й благосты́ню, нѣ́сть дáже до еди́наго.

• Грóбъ от­вéрстъ гортáнь и́хъ, язы́ки сво­и́ми льщáху: я́дъ áспидовъ подъ устнáми и́хъ:

• и́хже устá кля́твы и гóрести пóлна сýть.

• Скóры нóги и́хъ пролiя́ти крóвь:

• сокрушéнiе и озлоблéнiе на путéхъ и́хъ,

• и пути́ ми́рнаго не познáша.

• Нѣ́сть стрáха Бóжiя предъ очи́ма и́хъ.

• Вѣ́мы же, я́ко ели́ка закóнъ глагóлетъ, сýщымъ въ закóнѣ глагóлетъ: да вся́ка устá заградя́т­ся, и пови́ненъ бýдетъ вéсь мíръ богови:

• занé от­ дѣ́лъ закóна не оправди́т­ся вся́ка плóть предъ ни́мъ: закóномъ бо познáнiе грѣхá.

• Ны́нѣ же кромѣ́ закóна прáвда Бóжiя яви́ся, свидѣ́тел­ст­вуема от­ закóна и прорóкъ.

• Прáвда же Бóжiя вѣ́рою Иисýсъ Христóвою во всѣ́хъ и на всѣ́хъ вѣ́ру­ю­щихъ: нѣ́сть бо рáзн­ствiя,

• вси́ бо согрѣши́ша, и лишéни сýть слáвы Бóжiя,

• оправдáеми тýне благодáтiю егó, избавлéнiемъ, éже о Христѣ́ Иисýсѣ,

• егóже предположи́ Бóгъ очищéнiе вѣ́рою въ крóви егó, въ явлéнiе прáвды сво­ея́, за от­пущéнiе прéжде бы́в­шихъ грѣхóвъ,

• въ долготерпѣ́нiи Бóжiи, и въ показáнiе прáвды егó въ ны́нѣшнее врéмя, во éже бы́ти емý прáведну и оправдáющу сýщаго от­ вѣ́ры Иисýсовы.

• Гдѣ́ ýбо похвалá, от­гнáся. Котóрымъ закóномъ? дѣ́лы ли? Ни́, но закóномъ вѣ́ры.

• Мы́слимъ ýбо вѣ́рою оправдáтися человѣ́ку, безъ дѣ́лъ закóна.

• Или́ Иудéевъ Бóгъ тóкмо, а не и язы́ковъ? Е́й, и язы́ковъ:

• понéже еди́нъ Бóгъ, и́же оправди́тъ обрѣ́занiе от­ вѣ́ры и необрѣ́занiе вѣ́рою.

• Закóнъ ли ýбо разоря́емъ вѣ́рою? Да не бýдетъ: но закóнъ утверждáемъ.

К Римлянам, 4

• Чтó ýбо речéмъ Авраáма отцá нá­шего обрѣсти́ по плóти?

• А́ще бо Авраáмъ от­ дѣ́лъ оправдáся, и́мать похвалý, но не у Бóга.

• Чтó бо писáнiе глагóлетъ? вѣ́рова же Авраáмъ богови, и вмѣни́ся емý въ прáвду.

• Дѣ́ла­ю­щему же мздá не вмѣня́ет­ся по благодáти, но по дóлгу:

• а не дѣ́ла­ю­щему, вѣ́ру­ю­щему же во оправдáющаго нечести́ва, вмѣня́ет­ся вѣ́ра егó въ прáвду.

• Я́коже и Дави́дъ глагóлетъ блажéн­ство человѣ́ка, емýже вмѣня́етъ Бóгъ прáвду, безъ дѣ́лъ закóна:

• блажéни, и́хже от­пусти́шася беззакóнiя и и́хже при­­кры́шася грѣси́:

• блажéнъ мýжъ, емýже не вмѣни́тъ Госпóдь грѣхá.

• Блажéн­ство ýбо сié на обрѣ́занiе ли, или́ на необрѣ́занiе? Глагóлемъ бо, я́ко вмѣни́ся Авраáму вѣ́ра въ прáвду.

• Кáко ýбо вмѣни́ся емý? во обрѣ́занiи ли сýщу, или́ въ необрѣ́занiи? Не во обрѣ́занiи, но въ необрѣ́занiи.

• И знáменiе прiя́тъ обрѣ́занiя, печáть прáвды вѣ́ры, я́же въ необрѣ́занiи: я́ко бы́ти емý отцý всѣ́хъ вѣ́ру­ю­щихъ въ необрѣ́занiи, во éже вмѣни́тися и тѣ́мъ въ прáвду,

• и отцý обрѣ́занiя, не сýщымъ тóчiю от­ обрѣ́занiя, но и ходя́щымъ въ стопáхъ вѣ́ры, я́же [бѣ́] въ необрѣ́занiи отцá нá­шего Авраáма.

• Не закóномъ бо обѣтовáнiе Авраáму, или́ сѣ́мени егó, éже бы́ти емý наслѣ́днику мíрови, но прáвдою вѣ́ры.

• А́ще бо сýщiи от­ закóна наслѣ́дницы, испраздни́ся вѣ́ра, и разори́ся обѣтовáнiе:

• закóнъ бо гнѣ́въ содѣ́ловаетъ: идѣ́же бо нѣ́сть закóна, [тý] ни преступлéнiя.

• Сегó рáди от­ вѣ́ры, да по благодáти, во éже бы́ти извѣ́стну обѣтовáнiю всемý сѣ́мени, не тóчiю сýщему от­ закóна, но и сýщему от­ вѣ́ры Авраáмовы, и́же éсть отéцъ всѣ́мъ нáмъ,

• я́коже éсть пи́сано: я́ко отцá мнóгимъ язы́комъ положи́хъ тя́, пря́мо Бóгу, емýже вѣ́рова, животворя́щему мéртвыя и нарицáющу не сýщая я́ко сýщая.

• И́же пáче уповáнiя во уповáнiе вѣ́рова, во éже бы́ти емý отцý мнóгимъ язы́комъ, по речéн­ному: тáко бýдетъ сѣ́мя твоé.

• И не изнемóгъ вѣ́рою, ни усмотри́ сво­ея́ плóти ужé умерщвлéн­ныя, столѣ́тенъ нѣ́гдѣ сы́й, и мéртвости ложéснъ Сáрриныхъ:

• во обѣтовáнiи же Бóжiи не усумнѣ́ся невѣ́рованiемъ, но воз­мóже вѣ́рою, дáвъ слáву богови

• и извѣ́стенъ бы́въ, я́ко, éже обѣщá, си́ленъ éсть и сотвори́ти.

• Тѣ́мже и вмѣни́ся емý въ прáвду.

• Не пи́сано же бы́сть за тогó еди́наго тóчiю, я́ко вмѣни́ся емý,

• но и за ны́, и́мже хóщетъ вмѣни́тися, вѣ́ру­ю­щымъ въ воскреси́в­шаго Иисýса Христá Гóспода нá­шего изъ мéртвыхъ,

• и́же прéданъ бы́сть за прегрѣшéнiя нáша и востá за оправдáнiе нá­ше.

К Римлянам, 5

• Оправди́в­шеся ýбо вѣ́рою, ми́ръ и́мамы къ Бóгу Гóсподемъ нáшимъ Иисýсъ Христóмъ,

• и́мже и при­­ведéнiе обрѣтóхомъ вѣ́рою во благодáть сiю́, въ нéйже сто­и́мъ, и хвáлимся уповáнiемъ слáвы Бóжiя.

• Не тóчiю же, но и хвáлимся въ скóрбехъ, вѣ́дяще, я́ко скóрбь терпѣ́нiе содѣ́ловаетъ,

• терпѣ́нiе же искýс­ст­во, искýс­ст­во же уповáнiе:

• уповáнiе же не посрами́тъ, я́ко любы́ Бóжiя излiя́ся въ сердцá нáша Дýхомъ святы́мъ дáн­нымъ нáмъ.

• Ещé бо Христóсъ сýщымъ нáмъ немощны́мъ, по врéмени за нечести́выхъ ýмре.

• Едвá бо за прáведника ктó ýмретъ: за благáго бо нéгли ктó и дéрзнетъ умрéти.

• Составля́етъ же свою́ любо­́вь къ нáмъ Бóгъ, я́ко, ещé грѣ́шникомъ сýщымъ нáмъ, Христóсъ за ны́ ýмре.

• Мнóго ýбо пáче, оправдáни бы́в­ше ны́нѣ крóвiю егó, спасéмся и́мъ от­ гнѣ́ва.

• А́ще бо врази́ бы́в­ше при­­мири́хомся Бóгу смéртiю Сы́на егó, множáе пáче при­­мири́в­шеся спáсемся въ животѣ́ егó:

• не тóчiю же, но и хвáлимся о Бóзѣ Гóсподемъ нáшимъ Иисýсъ Христóмъ, и́мже ны́нѣ при­­мирéнiе прiя́хомъ.

• Сегó рáди я́коже еди́нѣмъ человѣ́комъ грѣ́хъ въ мíръ вни́де и грѣхóмъ смéрть, и тáко смéрть во вся́ человѣ́ки вни́де, въ нéмже вси́ согрѣши́ша.

• До закóна бо грѣ́хъ бѣ́ въ мíрѣ: грѣ́хъ же не вмѣня́шеся, не сýщу закóну.

• Но цáр­ст­вова смéрть от­ Адáма дáже до Моисéа и надъ несогрѣши́в­шими по подóбiю преступлéнiя Адáмова, и́же éсть о́бразъ бýдущаго.

• Но не я́коже прегрѣшéнiе, тáко и дáръ. А́ще бо прегрѣшéнiемъ еди́наго мнóзи умрóша, мнóжае пáче благодáть Бóжiя и дáръ благодáтiю еди́наго человѣ́ка Иисýса Христá во мнóгихъ преизли́ше­с­т­вова.

• И не я́коже еди́нѣмъ согрѣ́шшимъ даровáнiе: грѣ́хъ бо изъ еди́наго во осуждéнiе: дáръ же от­ мнóгихъ прегрѣшéнiи во оправдáнiе.

• А́ще бо еди́наго прегрѣшéнiемъ смéрть цáр­ст­вова еди́нѣмъ, мнóжае пáче избы́токъ благодáти и дáръ прáвды прiéмлюще, въ жи́зни воцаря́т­ся еди́нѣмъ Иисýсъ Христóмъ.

• Тѣ́мже ýбо, я́коже еди́наго прегрѣшéнiемъ во вся́ человѣ́ки вни́де осуждéнiе, тáкожде и еди́наго оправдáнiемъ во вся́ человѣ́ки вни́де оправдáнiе жи́зни.

• Я́коже бо ослушáнiемъ еди́наго человѣ́ка грѣ́шни бы́ша мнóзи, си́це и послушáнiемъ еди́наго прáведни бýдутъ мнóзи.

• Закóнъ же при­­вни́де, да умнóжит­ся прегрѣшéнiе. Идѣ́же бо умнóжися грѣ́хъ, преизбы́точе­с­т­вова благодáть:

• да я́коже цáр­ст­вова грѣ́хъ во смéрть, тáкожде и благодáть воцари́т­ся прáвдою въ жи́знь вѣ́чную, Иисýсъ Христóмъ Гóсподемъ нáшимъ.

К Римлянам, 6

• Чтó ýбо речéмъ? пребýдемъ ли во грѣсѣ́, да благодáть пре­умнóжит­ся? Да не бýдетъ.

• И́же бо умрóхомъ грѣхý, кáко пáки оживéмъ о нéмъ {кáко ещé жи́ти бýдемъ въ нéмъ}?

• Или́ не разумѣ́ете, я́ко ели́цы во Христá Иисýса крести́хомся, въ смéрть егó крести́хомся?

• Спогребóхомся ýбо емý крещéнiемъ въ смéрть, да я́коже востá Христóсъ от­ мéртвыхъ слáвою óтчею, тáко и мы́ во обновлéнiи жи́зни ходи́ти нáчнемъ {да хóдимъ}.

• А́ще бо сообрáзни {снасаждéни} бы́хомъ подóбiю смéрти егó, тó и воскресéнiя бýдемъ,

• сié вѣ́дяще, я́ко вéтхiи нáшъ человѣ́къ съ ни́мъ распя́т­ся, да упраздни́т­ся тѣ́ло грѣхóвное, я́ко ктомý не рабóтати нáмъ грѣхý:

• умéрый бо свободи́ся от­ грѣхá.

• А́ще же умрóхомъ со Христóмъ, вѣ́руемъ, я́ко и жи́ви бýдемъ съ ни́мъ,

• вѣ́дяще, я́ко Христóсъ востá от­ мéртвыхъ, ктомý ужé не умирáетъ: смéрть и́мъ ктомý не обладáетъ.

• Е́же бо ýмре, грѣхý ýмре еди́ною: а éже живéтъ, богови живéтъ.

• Тáкожде и вы́ помышля́йте себé мéртвыхъ ýбо бы́ти грѣхý, живы́хъ же богови, о Христѣ́ Иисýсѣ Гóсподѣ нá­шемъ.

• Да не цáр­ст­вуетъ ýбо грѣ́хъ въ мéртвен­нѣмъ вá­шемъ тѣ́лѣ, во éже послýшати егó въ пóхотехъ егó:

• нижé представля́йте ýды вáшя орýжiя непрáвды грѣхý: но представля́йте себé богови я́ко от­ мéртвыхъ живы́хъ, и ýды вáшя орýжiя прáвды богови.

• Грѣ́хъ бо вáми да не обладáетъ: нѣ́сте бо подъ закóномъ, но подъ благодáтiю.

• Чтó ýбо? согрѣши́мъ ли, занé нѣ́смы подъ закóномъ, но подъ благодáтiю, да не бýдетъ.

• Не вѣ́сте ли, я́ко емýже представля́ете себé рабы́ въ послушáнiе, раби́ естé, егóже послýшаете, или́ грѣхá въ смéрть, или́ послушáнiя въ прáвду?

• Благодари́мъ ýбо Бóга, я́ко бѣ́сте раби́ грѣхý, послýшасте же от­ сéрдца, въ óньже и предáстеся о́бразъ учéнiя.

• Свобóждшеся же от­ грѣхá, порабóтистеся прáвдѣ.

• Человѣ́ческо глагóлю, за нéмощь плóти вá­шея. Я́коже бо предстáвисте ýды вáшя рабы́ нечистотѣ́ и беззакóнiю въ беззакóнiе, тáко ны́нѣ предстáвите ýды вáшя рабы́ прáвдѣ во святы́ню.

• Егдá бо раби́ бѣ́сте грѣхá, свобóдни бѣ́сте от­ прáвды.

• Кíй ýбо тогдá имѣ́сте плóдъ? О ни́хже ны́нѣ стыдитéся, кончи́на бо óнѣхъ, смéрть.

• Ны́нѣ же свобóждшеся от­ грѣхá, порабóщшеся же богови, и́мате плóдъ вáшъ во святы́ню, кончи́ну же жи́знь вѣ́чную.

• Обрóцы бо грѣхá, смéрть: даровáнiе же Бóжiе живóтъ вѣ́чный о Христѣ́ Иисýсѣ Гóсподѣ нá­шемъ.

К Римлянам, 7

• Или́ не разумѣ́ете, брáтiе: вѣ́дущымъ бо закóнъ глагóлю: я́ко закóнъ обладáетъ надъ человѣ́комъ, во ели́ко врéмя живéтъ?

• И́бо мужáтая женá жи́ву мýжу при­­вя́зана éсть закóномъ: áще ли же ýмретъ мýжъ ея́, разрѣши́т­ся от­ закóна мýжескаго.

• Тѣ́мже ýбо, жи́ву сýщу мýжу, прелюбо­дѣ́йца бывáетъ, áще бýдетъ мýжеви инóму: áще ли ýмретъ мýжъ ея́, свобóдна éсть от­ закóна, не бы́ти éй прелюбо­дѣ́йцѣ, бы́в­шей мýжу инóму.

• Тѣ́мже, брáтiе моя́, и вы́ умрóсте закóну тѣ́ломъ Христóвымъ, во éже бы́ти вáмъ инóму, востáв­шему изъ мéртвыхъ, да плóдъ при­­несéмъ богови.

• Егдá бо бѣ́хомъ во плóти, стрáсти грѣхóвныя, я́же закóномъ, дѣ́й­ст­воваху во ýдѣхъ нáшихъ, во éже плóдъ твори́ти смéрти:

• ны́нѣ же упраздни́хомся от­ закóна, умéрше, и́мже держи́ми бѣ́хомъ, я́ко рабóтати нáмъ [Бóгови] во обновлéнiи дýха, а не въ вéтхости пи́смене.

• Чтó ýбо речéмъ? закóнъ ли грѣ́хъ? Да не бýдетъ: но грѣхá не знáхъ, тóчiю закóномъ: пóхоти же не вѣ́дахъ, áще не бы́ закóнъ глагóлалъ: не похóщеши.

• Винý же прiéмъ грѣ́хъ зáповѣдiю, содѣ́ла во мнѣ́ вся́ку пóхоть: безъ закóна бо грѣ́хъ мéртвъ éсть.

• А́зъ же живя́хъ кромѣ́ закóна иногдá: при­­шéдшей же зáповѣди, грѣ́хъ ýбо оживé,

• áзъ же умрóхъ: и обрѣ́теся ми́ зáповѣдь, я́же въ живóтъ, сiя́ въ смéрть,

• грѣ́хъ бо винý прiéмъ зáповѣдiю, прельсти́ мя, и тóю умертви́ мя.

• Тѣ́мже ýбо закóнъ свя́тъ, и зáповѣдь свя́та и прáведна и благá.

• Благóе ли ýбо бы́сть мнѣ́ смéрть? Да не бýдетъ: но грѣ́хъ, да яви́т­ся грѣ́хъ, благи́мъ ми́ содѣвáя смéрть, да бýдетъ по премнóгу грѣ́шенъ грѣ́хъ зáповѣдiю.

• Вѣ́мы бо, я́ко закóнъ духóвенъ éсть: áзъ же плóтянъ éсмь, прóданъ подъ грѣ́хъ.

• Е́же бо содѣвáю, не разумѣ́ю: не éже бо хощý, сié творю́, но éже ненáвижду, тó содѣ́ловаю.

• А́ще ли, éже не хощý, сié творю́, хвалю́ закóнъ я́ко дóбръ,

• ны́нѣ же не ктомý áзъ сié содѣвáю, но живы́й во мнѣ́ грѣ́хъ.

• Вѣ́мъ бо, я́ко не живéтъ во мнѣ́, си́рѣчь во плóти мо­éй, дóбро­е: éже бо хотѣ́ти при­­лежи́тъ ми́, а éже содѣ́яти дóброе, не обрѣтáю.

• Не éже бо хощý дóброе, творю́, но éже не хощý злóе, сié содѣвáю.

• А́ще ли, éже не хощý áзъ, сié творю́, ужé не áзъ сié творю́, но живы́й во мнѣ́ грѣ́хъ.

• Обрѣтáю ýбо закóнъ, хотя́щу ми́ твори́ти дóброе, я́ко мнѣ́ злóе при­лежи́тъ.

• Со­услаждáюся бо закóну Бóжiю по внýтрен­нему человѣ́ку:

• ви́жду же и́нъ закóнъ во ýдѣхъ мо­и́хъ, проти́ву вою́ющь закóну умá мо­егó и плѣня́ющь мя́ закóномъ грѣхóвнымъ, сýщимъ во ýдѣхъ мо­и́хъ.

• Окая́ненъ áзъ человѣ́къ: ктó мя избáвитъ от­ тѣ́ла смéрти сея́?

• Благодарю́ Бóга мо­егó Иисýсъ Христóмъ Гóсподемъ нáшимъ. Тѣ́мже ýбо сáмъ áзъ умóмъ мо­и́мъ рабóтаю закóну Бóжiю, плóтiю же закóну грѣхóвному.

К Римлянам, 8

• Ни еди́но ýбо ны́нѣ осуждéнiе сýщымъ о Христѣ́ Иисýсѣ, не по плóти ходя́щымъ, но по дýху:

• закóнъ бо дýха жи́зни о Христѣ́ Иисýсѣ свободи́лъ мя́ éсть от­ закóна грѣхóвнаго и смéрти.

• Немощнóе бо закóна, въ нéмже немоще­с­т­вовá­ше плóтiю, Бóгъ Сы́на сво­егó послá въ подóбiи плóти грѣхá, и о грѣсѣ́ осуди́ грѣ́хъ во плóти,

• да оправдáнiе закóна испóлнит­ся въ нáсъ, не по плóти ходя́щихъ, но по дýху.

• Сýщiи бо по плóти плотскáя мýдр­ст­вуютъ: а и́же по дýху, духóвная.

• Мудровáнiе бо плотскóе смéрть éсть, а мудровáнiе духóвное живóтъ и ми́ръ,

• занé мудровáнiе плотскóе враждá на Бóга: закóну бо Бóжiю не покаря́ет­ся, нижé бо мóжетъ.

• Сýщiи же во плóти Бóгу угоди́ти не мóгутъ.

• Вы́ же нѣ́сте во плóти, но въ дýсѣ, понéже Дýхъ Бóжiй живéтъ въ вáсъ. А́ще же ктó Дýха Христóва не имáть, сéй нѣ́сть егóвъ.

• А́ще же Христóсъ въ вáсъ, плóть ýбо мертвá грѣхá рáди, дýхъ же живéтъ прáвды рáди.

• А́ще ли же Дýхъ воскреси́в­шаго Иисýса от­ мéртвыхъ живéтъ въ вáсъ, воз­дви́гiй Христá изъ мéртвыхъ оживотвори́тъ и мéртвен­ная тѣлесá вáша, живýщимъ Дýхомъ егó въ вáсъ.

• Тѣ́мже ýбо, брáтiе, должни́ éсмы не плóти, éже по плóти жи́ти.

• А́ще бо по плóти живéте, и́мате умрéти, áще ли дýхомъ дѣя́нiя плóтская умерщвля́ете, жи́ви бýдете:

• ели́цы бо Дýхомъ Бóжiимъ вóдят­ся, сíи сýть сы́нове Бóжiи:

• не прiя́сте бо дýха рабóты пáки въ боя́знь, но прiя́сте Дýха сыноположéнiя, о нéмже вопiéмъ: áвва óтче.

• Сáмый Дýхъ спослуше­ст­вýетъ дýхови нá­шему, я́ко éсмы чáда Бóжiя.

• А́ще же чáда, и наслѣ́дницы: наслѣ́дницы ýбо Бóгу, снаслѣ́дницы же Христý, понéже съ ни́мъ стрáждемъ, да и съ ни́мъ прослáвимся.

• Непщýю бо, я́ко недостóйны стрáсти ны́нѣшняго врéмене къ хотя́щей слáвѣ яви́тися въ нáсъ.

• Чáянiе бо твáри, от­кровéнiя сынóвъ Бóжiихъ чáетъ:

• суетѣ́ бо твáрь повинýся не вóлею, но за повинýв­шаго ю́, на уповáнiи,

• я́ко и самá твáрь свободи́т­ся от­ рабóты истлѣ́нiя въ свобóду слáвы чáдъ Бóжiихъ.

• Вѣ́мы бо, я́ко вся́ твáрь съ нáми совоз­дыхáетъ и сболѣ́знуетъ дáже доны́нѣ:

• не тóчiю же, но и сáми начáтокъ Дýха имýще, и мы́ сáми въ себѣ́ воз­дыхáемъ, всыновлéнiя чáюще, избавлéнiя тѣ́лу нá­шему.

• Уповáнiемъ бо спасóхомся. Уповáнiе же ви́димое, нѣ́сть уповáнiе: éже бо ви́дитъ ктó, чтó и уповáетъ?

• А́ще ли, егóже не ви́димъ, надѣ́емся, терпѣ́нiемъ ждéмъ.

• Си́це же и Дýхъ спосóб­ст­вуетъ нáмъ въ нéмощехъ нáшихъ: о чéсомъ бо помóлимся, я́коже подобáетъ, не вѣ́мы, но сáмъ Дýхъ ходáтай­ст­вуетъ о нáсъ воз­дыхáнiи неизглагóлан­ными.

• Испытáяй же сердцá вѣ́сть, чтó éсть мудровáнiе Дýха, я́ко по Бóгу приповѣ́дуетъ {ходáтай­ст­вуетъ} о святы́хъ.

• Вѣ́мы же, я́ко лю́бящымъ Бóга вся́ поспѣше­ст­вýютъ во благóе, сýщымъ по предувѣ́дѣнiю звáн­нымъ:

• и́хже бо предувѣ́дѣ, [тѣ́хъ] и предустáви сообрáзныхъ бы́ти о́бразу Сы́на сво­егó, я́ко бы́ти емý перворóдну во мнóгихъ брáтiяхъ:

• а и́хже предустáви, тѣ́хъ и при­­звá: а и́хже при­­звá, си́хъ и оправдá: а и́хже оправдá, си́хъ и прослáви.

• Чтó ýбо речéмъ къ си́мъ, áще Бóгъ по нáсъ, ктó на ны́?

• И́же ýбо сво­егó Сы́на не пощадѣ́, но за нáсъ всѣ́хъ предáлъ éсть егó, кáко ýбо не и съ ни́мъ вся́ нáмъ дáр­ст­вуетъ?

• Ктó по­éмлетъ на избрáн­ныя Бóжiя, Бóгъ оправдáяй.

• Ктó осуждáяй? Христóсъ Иисýсъ умéрый, пáче же и воскрéсый, и́же и éсть о деснýю Бóга, и́же и ходáтай­ст­вуетъ о нáсъ.

• Ктó ны́ разлучи́тъ от­ любвé Бóжiя, скóрбь ли, или́ тѣснотá, или́ гонéнiе, или́ глáдъ, или́ наготá, или́ бѣдá, или́ мéчь? я́коже éсть пи́сано:

• я́ко тебé рáди умерщвля́еми éсмы вéсь дéнь: вмѣни́хомся я́коже óвцы заколéнiя.

• Но во всѣ́хъ си́хъ препобѣждáемъ за воз­лю́бльшаго ны́.

• Извѣсти́хся бо, я́ко ни смéрть, ни живóтъ, ни áнгели, ни начáла, нижé си́лы, ни настоя́щая, ни грядýщая,

• ни высотá, ни глубинá, ни и́на твáрь кáя воз­мóжетъ нáсъ разлучи́ти от­ любвé Бóжiя, я́же о Христѣ́ Иисýсѣ Гóсподѣ нá­шемъ.

К Римлянам, 9

• И́стину глагóлю о Христѣ́, не лгý, послуше­ст­вýющей ми́ сóвѣсти мо­éй Дýхомъ святы́мъ,

• я́ко скóрбь ми́ éсть вéлiя и непрестаю́щая болѣ́знь сéрдцу мо­емý:

• моли́лъ бы́хъ ся́ бо сáмъ áзъ от­лучéнъ бы́ти от­ Христá по брáтiи мо­éй, срóдницѣхъ мо­и́хъ по плóти,

• и́же сýть Изрáили́те, и́хже всыновлéнiе и слáва, и завѣ́ти и законоположéнiе, и служéнiе и обѣтовáнiя:

• и́хже отцы́, и от­ ни́хже Христóсъ по плóти, сы́й надъ всѣ́ми Бóгъ благословéнъ во вѣ́ки, ами́нь.

• Не тáкоже, я́ко от­падé слóво Бóжiе: не вси́ бо сýщiи от­ Изрáиля, сíи Изрáиль,

• ни занé сýть сѣ́мя Авраáмле, вси́ чáда: но во Исаáцѣ, речé, наречéт­ся ти́ сѣ́мя.

• Си́рѣчь, не чáда плóтская, сiя́ чáда Бóжiя: но чáда обѣтовáнiя при­­читáют­ся въ сѣ́мя.

• Обѣтовáнiя бо слóво сié: на сié врéмя прiидý, и бýдетъ Сáррѣ сы́нъ.

• Не тóчiю же, но и Ревéкка от­ еди́наго лóжа Исаáка óтца нá­шего имýщи:

• ещé бо не рóждшымся, ни сотвори́в­шымъ чтó благо или́ злó, да по избрáнiю предложéнiе Бóжiе пребýдетъ

• не от­ дѣ́лъ, но от­ при­­зывáющаго, речéся éй, я́ко бóлiй порабóтаетъ мéншему,

• я́коже éсть пи́сано: Иáкова воз­люби́хъ, Исáва же воз­ненави́дѣхъ.

• Чтó ýбо речéмъ? Едá непрáвда у Бóга? Да не бýдетъ.

• Моисéови бо глагóлетъ: поми́лую, егóже áще поми́лую, и ущéдрю, егóже áще ущéдрю.

• Тѣ́мже ýбо ни хотя́щаго, ни текýщаго, но ми́лу­ю­щаго Бóга.

• Глагóлетъ бо писáнiе фараóнови: я́ко на и́стое Сíе воз­двигóхъ тя́, я́ко да покажý тобóю си́лу мою́, и да воз­вѣсти́т­ся и́мя моé по всéй земли́.

• Тѣ́мже ýбо егóже хóщетъ, ми́луетъ: а егóже хóщетъ, ожесточáетъ.

• Речéши ýбо ми́: чесó рáди ещé укоря́етъ, вóли бо егó ктó проти́витися мóжетъ?

• Тѣ́мже ýбо, о, человѣ́че, ты́ ктó еси́, проти́въ от­вѣщáяй богови? едá речéтъ здáнiе создáв­шему é: почтó мя́ сотвори́лъ еси́ тáко?

• Или́ не и́мать влáсти скудéльникъ на брéнiи, от­ тогóжде смѣшéнiя сотвори́ти óвъ ýбо сосýдъ въ чéсть, óвъ же не въ чéсть?

• А́ще же хотя́ Бóгъ показáти гнѣ́въ свóй и яви́ти си́лу свою́, пренесé во мнóзѣ долготерпѣ́нiи сосýды гнѣ́ва совершéны въ поги́бель:

• и да скáжетъ богáт­ст­во слáвы сво­ея́ на сосýдѣхъ ми́лости, я́же предуготóва въ слáву,

• и́хже и при­­звá нáсъ не тóчiю от­ иудéй, но и от­ язы́къ:

• я́коже и во осíи глагóлетъ: нарекý не лю́ди моя́ лю́ди моя́, и невоз­лю́бленую воз­лю́блену:

• и бýдетъ, на мѣ́стѣ, идѣ́же речéся и́мъ: не лю́дiе мо­и́ естé вы́, тáмо нарекýт­ся сы́нове Бóга живáго.

• Исáiа же вопiéтъ о Изрáили: áще бýдетъ числó сынóвъ Изрáилевыхъ я́ко песóкъ морскíй, остáнокъ спасéт­ся:

• слóво бо скончавáя и сокращáя въ прáвдѣ, я́ко слóво сокращéно сотвори́тъ Госпóдь на земли́,

• и я́коже проречé Исáiа: áще не бы Госпóдь Саваóѳъ остáвилъ нáмъ сѣ́мене, я́коже Cодóмъ ýбо бы́ли бы́хомъ, и я́коже Гомóрру уподóбилися бы́хомъ.

• Чтó ýбо речéмъ, я́ко язы́цы, не гоня́щiи прáвду, постигóша прáвду, прáвду же, я́же от­ вѣ́ры:

• Изрáиль же, гоня́ закóнъ прáвды, въ закóнъ прáвды не пости́же.

• Чесó рáди? Занé не от­ вѣ́ры, но от­ дѣ́лъ закóна: преткнýшася бо о кáмень претыкáнiя,

• я́коже éсть пи́сано: сé, полагáю въ Сióнѣ кáмень претыкáнiя и кáмень соблáзна: и вся́къ вѣ́руяй въ óнь не постыди́т­ся.

К Римлянам, 10

• Брáтiе, благоволéнiе ýбо мо­егó сéрдца и моли́тва, я́же къ Бóгу по Изрáили, éсть во спасéнiе.

• Свидѣ́тел­ст­вую бо и́мъ, я́ко рéвность Бóжiю и́мутъ, но не по рáзуму.

• Не разумѣ́юще бо Бóжiя прáвды и свою́ прáвду и́щуще постáвити, прáвдѣ Бóжiей не повинýшася:

• кончи́на бо закóна Христóсъ, въ прáвду вся́кому вѣ́ру­ю­щему.

• Моисéй бо пи́шетъ прáвду ю́же от­ закóна: я́ко сотвори́вый тá человѣ́къ жи́въ бýдетъ въ ни́хъ.

• А я́же от­ вѣ́ры прáвда си́це глагóлетъ: да не речéши въ сéрдцы тво­éмъ: ктó взы́детъ на небо, си́рѣчь Христá свести́:

• или́ ктó сни́детъ въ бéздну, си́рѣчь Христá от­ мéртвыхъ воз­вести́.

• Но чтó глагóлетъ писáнiе? Бли́зъ ти́ глагóлъ éсть, во устѣ́хъ тво­и́хъ и въ сéрдцы тво­éмъ, си́рѣчь глагóлъ вѣ́ры, егóже проповѣ́даемъ:

• я́ко áще исповѣ́си усты́ тво­и́ми Гóспода Иисýса, и вѣ́руеши въ сéрдцы тво­éмъ, я́ко Бóгъ тогó воз­дви́же изъ мéртвыхъ, спасéшися:

• сéрдцемъ бо вѣ́рует­ся въ прáвду, усты́ же исповѣ́дует­ся во спасéнiе.

• Глагóлетъ бо писáнiе: вся́къ вѣ́руяй въ óнь не постыди́т­ся.

• Нѣ́сть бо рáзн­ствiя Иудéеви же и éллину: тóй бо Бóгъ всѣ́хъ, богатя́й {богáтъ сы́й} во всѣ́хъ при­­зывáющихъ егó.

• Вся́къ бо, и́же áще при­­зовéтъ и́мя Госпóдне, спасéт­ся.

• Кáко ýбо при­­зовýтъ, въ негóже не вѣ́роваша? Кáко же увѣ́руютъ, егóже не услы́шаша? кáко же услы́шатъ безъ проповѣ́да­ю­щаго?

• Кáко же проповѣ́дятъ, áще не пóслани бýдутъ? Я́коже éсть пи́сано: кóль красны́ нóги благовѣ­ст­вýющихъ ми́ръ, благовѣ­ст­вýющихъ благáя.

• Но не вси́ послýшаша благовѣ­ст­вовáнiя. Исáiа бо глагóлетъ: Гóсподи, ктó вѣ́рова слýху нá­шему?

• Тѣ́мже ýбо вѣ́ра от­ слýха, слýхъ же глагóломъ Бóжiимъ.

• Но глагóлю: едá не слы́шаша? Тѣ́мже ýбо {но пáче}, во всю́ зéмлю изы́де вѣщáнiе и́хъ, и въ концы́ вселéн­ныя глагóлы и́хъ.

• Но глагóлю: едá не разумѣ́ Изрáиль? Пéрвый Моисéй глагóлетъ: áзъ раздражý вы́ не о язы́цѣ, но о язы́цѣ неразýмнѣ {о не язы́цѣ, о язы́цѣ неразýмнѣ} прогнѣ́ваю вáсъ.

• Исáiа же дерзáетъ и глагóлетъ: обрѣтóхся не и́щущымъ менé, явлéнъ бы́хъ не вопрошáющымъ о мнѣ́.

• Ко Изрáилю же глагóлетъ: вéсь дéнь воз­дѣ́хъ рýцѣ мо­и́ къ лю́демъ непокори́вымъ и пререкáющымъ.

К Римлянам, 11

• Глагóлю ýбо: едá от­ри́ну Бóгъ лю́ди своя́? Да не бýдетъ. И́бо и áзъ Изрáилтянинъ éсмь, от­ сѣ́мене Авраáмля, колѣ́на Венiами́нова.

• Не от­ри́ну Бóгъ людéй сво­и́хъ, и́хже прéжде разумѣ́. Или́ не вѣ́сте, о илiи́ чтó глагóлетъ писáнiе, я́ко приповѣ́дуетъ богови {вопiéтъ къ Бóгу} на Изрáиля, глагóля:

• Гóсподи, прорóки твоя́ изби́ша и олтари́ твоя́ раскопáша: и áзъ остáхъ еди́нъ, и и́щутъ души́ мо­ея́, изъя́ти ю́.

• Но чтó глагóлетъ емý Боже­с­т­вен­ный от­вѣ́тъ? Остáвихъ себѣ́ сéдмь ты́сящъ мужéй, и́же не преклони́ша колѣ́на предъ Ваáломъ.

• Тáко ýбо и въ ны́нѣшнее врéмя остáнокъ по избрáнiю благодáти бы́сть.

• А́ще ли по благодáти, тó не от­ дѣ́лъ: занé благодáть ужé не бывáетъ благодáть. А́ще ли от­ дѣ́лъ, ктомý нѣ́сть благодáть: занé дѣ́ло ужé нѣ́сть дѣ́ло.

• Чтó ýбо? Егóже искá­ше Изрáиль, сегó не получи́, а избрáнiе получи́: прóчiи же ослѣпи́шася,

• я́коже éсть пи́сано: дадé и́мъ Бóгъ дýхъ умилéнiя {дýха нечýв­ст­вiя}, óчи не ви́дѣти и ýшы не слы́шати, дáже до днéшняго днé.

• И Дави́дъ глагóлетъ: да бýдетъ трапéза и́хъ въ сѣ́ть и въ лóвъ, и въ соблáзнъ и въ воз­дая́нiе и́мъ:

• да помрачáт­ся óчи и́хъ éже не ви́дѣти, и хребéтъ и́хъ вы́ну сляцáй.

• Глагóлю ýбо: едá согрѣши́ша, да от­падýтъ? Да не бýдетъ. Но тѣ́хъ падéнiемъ спасéнiе язы́комъ, во éже раздражи́ти и́хъ.

• А́ще ли же прегрѣшéнiе и́хъ богáт­ст­во мíра, и от­падéнiе и́хъ богáт­ст­во язы́ковъ: кольми́ пáче исполнéнiе и́хъ?

• Вáмъ бо глагóлю язы́комъ: понéже ýбо éсмь áзъ язы́комъ апóстолъ, слýжбу мою́ прославля́ю.

• А́ще кáко раздражý мою́ плóть, и спасý нѣ́кiя от­ ни́хъ?

• А́ще бо от­ложéнiе и́хъ, при­­мирéнiе мíру, чтó прiя́тiе, рáзвѣ жи́знь изъ мéртвыхъ?

• А́ще ли начáтокъ свя́тъ, тó и при­­мѣшéнiе: и áще кóрень свя́тъ, тó и вѣ́тви.

• А́ще ли нѣ́кiя от­ вѣ́твей от­ломи́шася, ты́ же, ди́вiя мáслина сы́й, при­­цѣпи́л­ся еси́ въ ни́хъ, и при­­чáст­никъ кóрене и мáсти мáслин­ныя сотвори́л­ся еси́,

• не хвали́ся на вѣ́тви: áще ли же хвáлишися, не ты́ кóрень нóсиши, но кóрень тебé.

• Речéши ýбо: от­ломи́шася вѣ́тви, да áзъ при­­цѣплю́ся.

• Дóбрѣ: невѣ́рiемъ от­ломи́шася, ты́ же вѣ́рою сто­и́ши: не высокомýдр­ст­вуй, но бóйся.

• А́ще бо Бóгъ естé­с­т­вен­ныхъ вѣтвéй не пощадѣ́, да не кáко и тебé не пощади́тъ.

• Ви́ждь ýбо блáгость и непощадѣ́нiе Бóжiе: на от­пáдшихъ ýбо непощадѣ́нiе, а на тебѣ́ блáгость Бóжiя, áще пребýдеши въ блáгости: áще ли же ни́, тó и ты́ от­сѣ́ченъ бýдеши.

• И они́ же, áще не пребýдутъ въ невѣ́р­ст­вiи, при­­цѣпя́т­ся: си́ленъ бо éсть Бóгъ пáки при­­цѣпи́ти и́хъ.

• А́ще бо ты́ от­ естé­с­т­вен­ныя от­сѣчéнъ ди́вiя мáслины, и чрезъ есте­с­т­вó при­­цѣпи́л­ся еси́ къ дóбрѣй мáслинѣ: кольми́ пáче сíи, и́же по есте­ст­вý, при­­цѣпя́т­ся сво­éй Масли́нѣ?

• Не бó хощý вáсъ не вѣ́дѣти тáйны сея́, брáтiе, да не бýдете о себѣ́ мýдри, я́ко ослѣплéнiе от­ чáсти Изрáилеви бы́сть, дóндеже исполнéнiе язы́ковъ вни́детъ,

• и тáко вéсь Изрáиль спасéт­ся, я́коже éсть пи́сано: прiи́детъ от­ Сióна избавля́яй, и от­врати́тъ нечéстiе от­ Иáкова:

• и сéй и́мъ от­ менé завѣ́тъ, егдá от­имý грѣхи́ и́хъ.

• По благовѣ­ст­вовáнiю ýбо, врази́ вáсъ рáди: по избрáнiю же, воз­лю́блени отéцъ рáди.

• Нераскáян­на бо даровáнiя и звáнiе Бóжiе.

• Я́коже бо и вы́ иногдá проти́вистеся богови, ны́нѣ же поми́ловани бы́сте си́хъ противлéнiемъ {си́хъ рáди противлéнiя}:

• тáкожде и сíи ны́нѣ проти́вишася вá­шей ми́лости {вá­шего рáди поми́лованiя}, да и тíи поми́ловани бýдутъ.

• Затвори́ бо Бóгъ всѣ́хъ въ противлéнiе, да всѣ́хъ поми́луетъ.

• О, глубинá богáт­ст­ва и премýдрости и рáзума Бóжiя! я́ко неиспы́тани сýдове егó, и неизслѣ́довани путié егó.

• Ктó бó разумѣ́ ýмъ Госпóдень, или́ ктó совѣ́тникъ емý бы́сть?

• Или́ ктó прéжде дадé емý, и воз­дáст­ся емý?

• Я́ко изъ тогó и тѣ́мъ и въ нéмъ вся́ческая. Томý слáва во вѣ́ки. Ами́нь.

К Римлянам, 12

• Молю́ ýбо вáсъ, брáтiе, щедрóтами Бóжiими, предстáвите тѣлесá вáша жéртву жи́ву, свя́ту, благо­угóдну богови, словéсное служéнiе вá­ше,

• и не сообразýйтеся вѣ́ку семý, но преобразýйтеся обновлéнiемъ умá вá­шего, во éже искушáти вáмъ, чтó éсть вóля Бóжiя благáя и угóдная и совершéн­ная.

• Глагóлю бо благодáтiю дáв­шеюся мнѣ́, вся́кому сýщему въ вáсъ не мýдр­ст­вовати пáче, éже подобáетъ мýдр­ст­вовати: но мýдр­ст­вовати въ цѣломýдрiи, ко­емýждо я́коже Бóгъ раздѣли́лъ éсть мѣ́ру вѣ́ры.

• Я́коже бо во еди́нѣмъ тѣлеси́ мнóги ýды и́мамы, ýды же вси́ не тóжде и́мутъ дѣ́ланiе,

• тáкожде мнóзи еди́но тѣ́ло éсмы о Христѣ́, а по еди́ному дрýгъ дрýгу ýди.

• Имýще же даровáнiя по благодáти дáн­нѣй нáмъ разли́чна: áще прорóче­с­т­во, по мѣ́рѣ вѣ́ры:

• áще ли служéнiе, въ служéнiи: áще учя́й, во учéнiи:

• áще утѣшáяй, во утѣшéнiи: подавáяй, въ простотѣ́: предстоя́й {начáл­ст­вуяй}, со тщáнiемъ: ми́луяй, съ дóбрымъ изволéнiемъ.

• Любы́ нелицемѣ́рна: ненави́дяще злáго, при­­лѣпля́йтеся благóму:

• братолю́бiемъ дрýгъ ко дрýгу любéзни: чéстiю дрýгъ дрýга бóлша творя́ще:

• тщáнiемъ не лѣни́ви, дýхомъ горя́ще, Гóсподеви рабóта­ю­ще:

• уповáнiемъ рáду­ю­щеся, скóрби терпя́ще, въ моли́твѣ пребывáюще:

• трéбованиемъ святы́хъ при­­общáющеся, стран­нолю́бiя держáщеся:

• благословля́йте гоня́щыя вы́: благослови́те, а не клени́те.

• Рáдоватися съ рáду­ю­щимися, и плáкати съ плáчущими.

• Тóжде дрýгъ ко дрýгу мýдр­ст­ву­ю­ще: не высóкая мýдр­ст­ву­ю­ще, но смирéн­ными ведýщеся: не бывáйте мýдри о себѣ́:

• ни еди́ному же злá за злó воз­даю́ще, промышля́юще дóбрая предъ всѣ́ми человѣ́ки.

• А́ще воз­мóжно, éже от­ вáсъ, со всѣ́ми человѣ́ки ми́ръ имѣ́йте.

• Не себé от­мщáюще, воз­лю́бленiи, но дади́те мѣ́сто гнѣ́ву. Пи́сано бо éсть: мнѣ́ от­мщéнiе, áзъ воз­дáмъ, глагóлетъ Госпóдь.

• А́ще ýбо áлчетъ врáгъ твóй, ухлѣ́би егó: áще ли жáждетъ, напóй егó: Сíе бо творя́, ýглiе óгнено собирáеши на главý егó.

• Не побѣждéнъ бывáй от­ злá, но побѣждáй благи́мъ злóе.

К Римлянам, 13

• Вся́ка душá властéмъ предержáщымъ да повинýет­ся: нѣ́сть бо влáсть áще не от­ Бóга, сýщыя же влáсти от­ Бóга учинéны сýть.

• Тѣ́мже противля́яйся влáсти, Бóжiю повелѣ́нiю противля́ет­ся: противля́ющiися же себѣ́ грѣ́хъ прiéмлютъ.

• Кня́зи бо не сýть боя́знь дóбрымъ дѣлóмъ, но злы́мъ. Хóщеши же ли не боя́тися влáсти? Благóе твори́, и имѣ́ти бýдеши похвалý от­ негó:

• Бóжiй бо слýга éсть, тебѣ́ во благóе. А́ще ли злóе твори́ши, бóйся, не бó безъ умá {всýе} мéчь нóситъ: Бóжiй бо слугá éсть, от­мсти́тель въ гнѣ́въ злóе творя́щему.

• Тѣ́мже потрéба повиновáтися не тóкмо за гнѣ́въ, но и за сóвѣсть.

• Сегó бó рáди и дáни даетé: служи́тели бо Бóжiи сýть, во и́стое сié пребывáюще.

• Воздади́те ýбо всѣ́мъ дóлжная: емýже ýбо урóкъ, урóкъ: [а] емýже дáнь, дáнь: [а] емýже стрáхъ, стрáхъ: [и] емýже чéсть, чéсть.

• Ни еди́ному же ничи́мже дóлжни бывáйте, тóчiю éже люби́ти дрýгъ дрýга: любя́й бо дрýга, закóнъ испóлни.

• Е́же бо: не прелюбы́ сотвори́ши, не убiéши, не укрáдеши, не лжесвидѣ́тел­ст­вуеши, не похóщеши, и áще кáя и́на зáповѣдь, въ сéмъ словеси́ совершáет­ся, во éже: воз­лю́биши и́скрен­няго тво­егó, я́коже сáмъ себé.

• Любы́ и́скрен­нему злá не твори́тъ: исполнéнiе ýбо закóна любы́ éсть.

• И сié, вѣ́дяще врéмя, я́ко чáсъ ужé нáмъ от­ снá востáти. Ны́нѣ бо ближáйшее нáмъ спасéнiе, нéжели егдá вѣ́ровахомъ.

• Нóщь [ýбо] прéйде, а дéнь при­­бли́жися: от­ложи́мъ ýбо дѣлá тéмная, и облечéмся во орýжiе свѣ́та.

• Я́ко во дни́, благообрáзно да хóдимъ, не козлогласовáнiи и пiя́н­ствы, не любо­дѣя́нiи и студодѣя́нiи, не рвéнiемъ и зáвистiю:

• но облецы́теся Гóсподемъ нáшимъ Иисýсъ Христóмъ, и плóти угóдiя не твори́те въ пóхоти.

К Римлянам, 14

• Вся́ка душá властéмъ предержáщымъ да повинýет­ся: нѣ́сть бо влáсть áще не от­ Бóга, сýщыя же влáсти от­ Бóга учинéны сýть.

• Тѣ́мже противля́яйся влáсти, Бóжiю повелѣ́нiю противля́ет­ся: противля́ющiися же себѣ́ грѣ́хъ прiéмлютъ.

• Кня́зи бо не сýть боя́знь дóбрымъ дѣлóмъ, но злы́мъ. Хóщеши же ли не боя́тися влáсти? Благóе твори́, и имѣ́ти бýдеши похвалý от­ негó:

• Бóжiй бо слýга éсть, тебѣ́ во благóе. А́ще ли злóе твори́ши, бóйся, не бó безъ умá {всýе} мéчь нóситъ: Бóжiй бо слугá éсть, от­мсти́тель въ гнѣ́въ злóе творя́щему.

• Тѣ́мже потрéба повиновáтися не тóкмо за гнѣ́въ, но и за сóвѣсть.

• Сегó бó рáди и дáни даетé: служи́тели бо Бóжiи сýть, во и́стое сié пребывáюще.

• Воздади́те ýбо всѣ́мъ дóлжная: емýже ýбо урóкъ, урóкъ: [а] емýже дáнь, дáнь: [а] емýже стрáхъ, стрáхъ: [и] емýже чéсть, чéсть.

• Ни еди́ному же ничи́мже дóлжни бывáйте, тóчiю éже люби́ти дрýгъ дрýга: любя́й бо дрýга, закóнъ испóлни.

• Е́же бо: не прелюбы́ сотвори́ши, не убiéши, не укрáдеши, не лжесвидѣ́тел­ст­вуеши, не похóщеши, и áще кáя и́на зáповѣдь, въ сéмъ словеси́ совершáет­ся, во éже: воз­лю́биши и́скрен­няго тво­егó, я́коже сáмъ себé.

• Любы́ и́скрен­нему злá не твори́тъ: исполнéнiе ýбо закóна любы́ éсть.

• И сié, вѣ́дяще врéмя, я́ко чáсъ ужé нáмъ от­ снá востáти. Ны́нѣ бо ближáйшее нáмъ спасéнiе, нéжели егдá вѣ́ровахомъ.

• Нóщь [ýбо] прéйде, а дéнь при­­бли́жися: от­ложи́мъ ýбо дѣлá тéмная, и облечéмся во орýжiе свѣ́та.

• Я́ко во дни́, благообрáзно да хóдимъ, не козлогласовáнiи и пiя́н­ствы, не любо­дѣя́нiи и студодѣя́нiи, не рвéнiемъ и зáвистiю:

• но облецы́теся Гóсподемъ нáшимъ Иисýсъ Христóмъ, и плóти угóдiя не твори́те въ пóхоти.

К Римлянам, 15

• Дóлжни есмы́ мы́ си́льнiи нéмощи немощны́хъ носи́ти, и не себѣ́ угождáти:

• кíиждо же вáсъ бли́жнему да угождáетъ во благóе къ созидáнiю.

• И́бо и Христóсъ не себѣ́ угоди́, но я́коже éсть пи́сано: поношéнiя понося́щихъ тебѣ́ нападóша на мя́.

• Ели́ка бо преднапи́сана бы́ша, въ нá­ше наказáнiе преднаписáшася, да терпѣ́нiемъ и утѣшéнiемъ писáнiй уповáнiе и́мамы.

• Бóгъ же терпѣ́нiя и утѣшéнiя да дáстъ вáмъ тóжде мýдр­ст­вовати дрýгъ ко дрýгу о Христѣ́ Иисýсѣ,

• да единодýшно еди́ными усты́ слáвите Бóга и Отцá Гóспода нá­шего Иисýса Христá.

• Тѣ́мже прiéмлите дрýгъ дрýга, я́коже и Христóсъ прiя́тъ вáсъ во слáву Бóжiю.

• Глагóлю же Христá Иисýса служи́теля бы́в­ша обрѣ́занiя по и́стинѣ Бóжiей, во éже утверди́ти обѣтовáнiя отцéвъ:

• а язы́комъ по ми́лости, прослáвити Бóга, я́коже éсть пи́сано: сегó рáди исповѣ́мся тебѣ́ во язы́цѣхъ, Гóсподи, и и́мени тво­емý пою́.

• И пáки глагóлетъ: воз­весели́теся, язы́цы, съ людьми́ егó.

• И пáки: хвали́те Гóспода, вси́ язы́цы, и похвали́те егó, вси́ лю́дiе.

• И пáки Исáiа глагóлетъ: бýдетъ кóрень Иессéовъ, и востая́й владѣ́ти надъ язы́ки: на тогó язы́цы уповáютъ.

• Бóгъ же уповáнiя да испóлнитъ вáсъ вся́кiя радóсти и ми́ра въ вѣ́рѣ, избы́точе­с­т­вовати вáмъ во уповáнiи, си́лою Дýха святáго.

• Извѣщéнъ же éсмь, брáтiе моя́, и сáмъ áзъ о вáсъ, я́ко и сáми вы́ пóлни естé блáгости, испóлнени вся́каго рáзума, могýще и ины́я научи́ти:

• дéрзѣе же писáхъ вáмъ, брáтiе моя́, от­ чáсти, я́ко воспоминáя вáмъ, за благодáть дáн­ную ми́ от­ Бóга,

• во éже бы́ти ми́ служи́телю Иисýсъ Христóву во язы́цѣхъ, священ­нодѣ́й­ст­ву­ю­щу благовѣ­ст­вовáнiе Бóжiе, да бýдетъ при­­ношéнiе éже от­ язы́къ благопрiя́тно и освящéн­но Дýхомъ святы́мъ.

• Имáмъ ýбо похвалý о Христѣ́ Иисýсѣ въ тѣ́хъ, я́же къ Бóгу:

• не смѣ́ю бо глагóлати чтó, и́хже не содѣ́я Христóсъ мнóю, въ послушáнiе язы́ковъ, слóвомъ и дѣ́ломъ,

• въ си́лѣ знáменiй и чудéсъ, си́лою Дýха Бóжiя, я́коже ми́ от­ Иерусали́ма и о́крестъ дáже до иллири́ка испóлнити благовѣ­ст­вовáнiе Христóво.

• Си́це же потщáхся благовѣсти́ти, не идѣ́же именовáся Христóсъ, да не на чужéмъ основáнiи сози́жду,

• но я́коже éсть пи́сано: и́мже не воз­вѣсти́ся о нéмъ, ýзрятъ, и и́же не слы́шаша, уразумѣ́ютъ.

• Тѣ́мже и воз­бранéнъ бы́хъ мнóгажды прiити́ къ вáмъ.

• Ны́нѣ же ктомý мѣ́ста не имы́й въ странáхъ си́хъ, желáнiе же имы́й прiити́ къ вáмъ от­ мнóгихъ лѣ́тъ,

• я́ко áще по­идý во Испáнiю, прiидý къ вáмъ. Уповáю бо ми́мо гряды́й ви́дѣти вáсъ и вáми проводи́тися тáмо, áще вáсъ прéжде от­ чáсти насы́щуся.

• Ны́нѣ же грядý во Иерусали́мъ, служя́й святы́мъ,

• благоволи́ша бо македóнiа и Ахáiа общéнiе нѣ́кое сотвори́ти къ ни́щымъ святы́мъ живýщымъ во Иерусали́мѣ.

• Благоволи́ша бо, и дóлжни и́мъ сýть. А́ще бо въ духóвныхъ и́хъ при­­чáстницы бы́ша язы́цы, дóлжни сýть и въ плотски́хъ послужи́ти и́мъ.

• Сié ýбо скончáвъ, и запечатлѣ́въ и́мъ плóдъ сéй, по­идý вáми во Испáнiю:

• вѣ́мъ же, я́ко гряды́й къ вáмъ, во исполнéнiи благословéнiя благовѣ́стiя Христóва прiидý.

• Молю́ же вы́, брáтiе, Гóсподемъ нáшимъ Иисýсъ Христóмъ и любо­́вiю Дýха, споспѣ́ш­ст­вуйте ми́ въ моли́твахъ о мнѣ́ къ Бóгу,

• да избáвлюся от­ противля́ющихся во Иудéи, и да слýжба моя́, я́же во Иерусали́мѣ, благопрiя́тна бýдетъ святы́мъ:

• да съ рáдостiю прiидý къ вáмъ вóлею Бóжiею и упокóюся съ вáми.

• Бóгъ же ми́ра со всѣ́ми вáми. Ами́нь.

К Римлянам, 16

• Вручáю же вáмъ фи́ву сестрý нáшу, сýщу служи́телницу цéркве я́же въ кегхрéехъ:

• да прiи́мете ю́ о Гóсподѣ достóйнѣ святы́мъ, и споспѣ́ш­ст­вуйте éй, о нéйже áще от­ вáсъ потрéбуетъ вéщи: и́бо сiя́ застýпница мнóгимъ бы́сть, и самомý мнѣ́.

• Цѣлýйте приски́ллу и аки́лу, споспѣ́шника моя́ о Христѣ́ Иисýсѣ,

• и́же по души́ мо­éй своя́ вы́я положи́ста, и́хже не áзъ еди́нъ благодарю́, но и вся́ цéркви язы́ческiя: и домáшнюю и́хъ цéрковь.

• Цѣлýйте епенéта воз­лю́блен­наго ми́, и́же éсть начáтокъ Ахáiи во Христá.

• Цѣлýйте Марiáмь, я́же мнóго трýдися о нáсъ.

• Цѣлýйте Андрони́ка и иунíю, срóдники моя́ и сплѣ́н­ники моя́, и́же сýть нарóчиты во апóстолѣхъ, и́же и прéжде менé вѣ́роваста во Христá.

• Цѣлýйте Амплíа воз­лю́блен­наго ми́ о Гóсподѣ.

• Цѣлýйте урвáна споспѣ́шника нá­шего о Христѣ́, и стахи́а воз­лю́блен­наго ми́.

• Цѣлýйте апéллiа искýсна о Христѣ́. Цѣлýйте сýщыя от­ Аристовýла.

• Цѣлýйте Иродióна срóдника мо­егó. Цѣлýйте и́же от­ нарки́сса сýщыя о Гóсподѣ.

• Цѣлýйте трифéну и трифóсу труждáющыяся о Гóсподѣ. Цѣлýйте перси́ду воз­лю́блен­ную, я́же мнóго труди́ся о Гóсподѣ.

• Цѣлýйте рýфа избрáн­наго о Гóсподѣ, и мáтерь егó и мою́.

• Цѣлýйте Асигкри́та, флéгонта, éрма, патрóва, ермíа, и сýщую съ ни́ми брáтiю.

• Цѣлýйте филолóга и иулíю, нирéа и сестрý егó, и Олимпáна, и сýщыя съ ни́ми вся́ святы́я.

• Цѣлýйте дрýгъ дрýга лобзáнiемъ святы́мъ. Цѣлýютъ вы́ вся́ цéркви Христóвы.

• Молю́ же вы́, брáтiе, блюди́теся от­ творя́щихъ рáспри и раздóры, кромѣ́ учéнiя, емýже вы́ научи́стеся, и уклони́теся от­ ни́хъ:

• таковíи бо Гóсподеви нá­шему Иисýсу Христý не рабóтаютъ, но сво­емý чрéву: и́же благи́ми словесы́ и благословéнiемъ прельщáютъ сердцá незлóбивыхъ.

• Вá­ше бо послушáнiе ко всѣ́мъ дости́же. Рáдуюся же éже о вáсъ: хощý же вáсъ мýдрыхъ ýбо бы́ти во благóе, просты́хъ же въ злóе.

• Бóгъ же ми́ра да сокруши́тъ сатанý подъ ноги́ вáшя вскóрѣ. Благодáть Гóспода нá­шего Иисýса Христá съ вáми. Ами́нь.

• Цѣлýетъ вáсъ тимоѳéй споспѣ́шникъ мóй, и лукíй и Иáсонъ и сосипáтръ, срóдницы мо­и́.

• Цѣлýю вы́ [и] áзъ тéртiй, написáвый послáнiе сié, о Гóсподѣ.

• Цѣлýетъ вы́ гáiе стран­нопрiи́мецъ мóй и цéркве всея́. Цѣлýетъ вы́ ерáстъ стро­и́тель грáдскiй, и куáртъ брáтъ.

• Благодáть Гóспода нá­шего Иисýса Христá со всѣ́ми вáми. Ами́нь.

#ДаниилСысоев #СвященноеПисание #миссия