Евангелие от Луки

Беседы священника Даниила Сысоева, проходившие летом 2005 и 2006 годов на Крутицком патриаршем подворье. Святой апостол и евангелист Лука наиболее полно и в хронологической последовательности описал по порядку все, что известно об Иисусе Христе и Его учении, и тем самым дал твердое историческое обоснование христианского упования; по числу знаков Евангелие по Луке — длиннейшая книга Нового Завета. В богословском содержании Евангелие от Луки отличается прежде всего учением о всеобщности спасения, совершенного Господом Иисусом Христом, о вселенском значении евангельской проповеди.

Евангелие от Луки, 1

Понéже ýбо мнóзи начáша чини́ти пóвѣсть о извѣ́ствованныхъ въ нáсъ вещéхъ,
я́коже предáша нáмъ, и́же испéрва самови́дцы и слýги бы́вшiи словесé:
извóлися и мнѣ́ послѣ́довавшу вы́ше вся́ испы́тно, поря́ду писáти тебѣ́, держáвный Ѳеофи́ле,
да разумѣ́еши, о ни́хже научи́лся еси́ словесѣ́хъ утверждéнiе.
Бы́сть во дни́ И́рода царя́ Иудéйска, иерéй нѣ́кiй, и́менемъ захáрiа, от дневны́я чреды́ Авiáни: и женá егó от дщéрей Аарóновѣхъ, и и́мя éй Елисавéтъ.
Бѣ́ста же прáведна óба предъ Бóгомъ, ходя́ща во всѣ́хъ зáповѣдехъ и оправдáнiихъ Госпóднихъ безпорóчна.
И не бѣ́ и́ма чáда, понéже Елисавéтъ бѣ́ неплóды, и óба заматорѣ́вша во днéхъ свои́хъ бѣ́ста.
Бы́сть же служáщу емý въ чинý чреды́ своея́ предъ Бóгомъ,
по обы́чаю свящéнничества ключи́ся емý покади́ти, вшéдшу въ цéрковь Госпóдню:
и всé мнóжество людéй бѣ́ моли́тву дѣ́я внѣ́, въ гóдъ {во врéмя} ѳимiáма:
яви́ся же емý áнгелъ Госпóдень, стоя́ одеснýю олтаря́ кади́лнаго:
и смути́ся захáрiа ви́дѣвъ, и стрáхъ нападé нáнь.
Речé же къ немý áнгелъ: не бóйся, захáрiе: занé услы́шана бы́сть моли́тва твоя́, и женá твоя́ Елисавéть роди́тъ сы́на тебѣ́, и наречéши и́мя емý Иоáннъ.
И бýдетъ тебѣ́ рáдость и весéлiе, и мнóзи о рождествѣ́ егó возрáдуются.
Бýдетъ бо вéлiй предъ Гóсподемъ: и винá и Сикéра не и́мать пи́ти, и Дýха святáго испóлнится ещé изъ чрéва мáтере своея́:
и мнóгихъ от сынóвъ Изрáилевыхъ обрати́тъ ко Гóсподу Бóгу и́хъ.
И тóй предъи́детъ предъ ни́мъ дýхомъ и си́лою илiинóю, обрати́ти сердцá отцéмъ на чáда, и проти́вныя въ мýдрости прáведныхъ, уготóвати Гóсподеви лю́ди совершéны.
И речé захáрiа ко áнгелу: по чесомý разумѣ́ю сié? áзъ бо éсмь стáръ, и женá моя́ заматорѣ́вши во днéхъ свои́хъ.
И отвѣщáвъ áнгелъ речé емý: áзъ éсмь гаврiи́лъ предстоя́й предъ Бóгомъ, и пóсланъ éсмь глагóлати къ тебѣ́ и благовѣсти́ти тебѣ́ сiя́:
и сé бýдеши молчя́ и не могíй проглагóлати, до негóже днé бýдутъ сiя́: занé не вѣ́ровалъ еси́ словесéмъ мои́мъ, я́же сбýдутся во врéмя своé.
И бѣ́ша лю́дiе ждýще захáрiю: и чудя́хуся косня́щу емý въ цéркви.
Изшéдъ же не можáше глагóлати къ ни́мъ: и разумѣ́ша, я́ко видѣ́нiе ви́дѣ въ цéркви: и тóй бѣ́ помавáя и́мъ, и пребывáше нѣ́мъ.
И бы́сть я́ко испóлнишася днíе слýжбы егó, и́де въ дóмъ свóй.
По си́хъ же днéхъ зачáтъ Елисавéтъ женá егó, и тая́шеся мѣ́сяцъ пя́ть, глагóлющи:
я́ко тáко мнѣ́ сотвори́ Госпóдь во дни́, въ ня́же призрѣ́ отъя́ти поношéнiе моé въ человѣ́цѣхъ.
Въ мѣ́сяцъ же шесты́й пóсланъ бы́сть áнгелъ гаврiи́лъ от Бóга во грáдъ Галилéйскiй, емýже и́мя назарéтъ,
къ Дѣ́вѣ обручéннѣй мýжеви, емýже и́мя Иóсифъ, от дóму Дави́дова: и и́мя Дѣ́вѣ Марiáмь.
И вшéдъ къ нéй áнгелъ речé: рáдуйся, благодáтная: Госпóдь съ тобóю: благословéна ты́ въ женáхъ.
Онá же ви́дѣвши смути́ся о словеси́ егó и помышля́ше, каковó бýдетъ цѣловáнiе сié.
И речé áнгелъ éй: не бóйся, Марiáмь: обрѣлá бо еси́ благодáть у Бóга.
И сé зачнéши во чрéвѣ, и роди́ши Сы́на, и наречéши и́мя емý Иисýсъ.
Сéй бýдетъ вéлiй, и Сы́нъ вы́шняго наречéтся: и дáстъ емý Госпóдь Бóгъ престóлъ Дави́да отцá егó:
и воцари́тся въ домý Иáковли во вѣ́ки, и цáрствiю егó не бýдетъ концá.
Речé же Марiáмь ко áнгелу: кáко бýдетъ сié, идѣ́же мýжа не знáю?
И отвѣщáвъ áнгелъ речé éй: Дýхъ святы́й нáйдетъ на тя́, и си́ла вы́шняго осѣни́тъ тя́: тѣ́мже и раждáемое свято наречéтся Сы́нъ Бóжiй:
и сé, Елисавéтъ ю́жика твоя́, и тá зачáтъ сы́на въ стáрости своéй: и сéй мѣ́сяцъ шесты́й éсть éй нарицáемѣй неплóды:
я́ко не изнемóжетъ у Бóга вся́къ глагóлъ.
Речé же Марiáмь: сé рабá Госпóдня: бýди мнѣ́ по глагóлу твоемý. И отъи́де от нея́ áнгелъ.
Востáвши же Марiáмь во дни́ ты́я, и́де въ гóрняя со тщáнiемъ, во грáдъ Иýдовъ:
и вни́де въ дóмъ захáрiинъ, и цѣловá Елисавéтъ.
И бы́сть я́ко услы́ша Елисавéтъ цѣловáнiе Марíино, взыгрáся младéнецъ во чрéвѣ ея́: и испóлнися Дýха свя́та Елисавéтъ,
и возопи́ глáсомъ вéлiимъ, и речé: благословéна ты́ въ женáхъ, и благословéнъ плóдъ чрéва твоегó:
и откýду мнѣ́ сié, да прiи́детъ Мáти Гóспода моегó ко мнѣ́?
сé бо, я́ко бы́сть глáсъ цѣловáнiя твоегó во ýшiю моéю, взыгрáся младéнецъ рáдощами во чрéвѣ моéмъ.
И блажéнна вѣ́ровавшая, я́ко бýдетъ совершéнiе глагóланнымъ éй от Гóспода.
И речé Марiáмь: вели́читъ душá моя́ Гóспода,
и возрáдовася Дýхъ мóй о Бóзѣ Спáсѣ моéмъ:
я́ко призрѣ́ на смирéнiе рабы́ своея́: сé бо, отны́нѣ ублажáтъ мя́ вси́ рóди:
я́ко сотвори́ мнѣ́ вели́чiе си́льный, и свято и́мя егó:
и ми́лость егó въ рóды родóвъ боя́щымся егó:
сотвори́ держáву мы́шцею своéю: расточи́ гóрдыя мы́слiю сéрдца и́хъ:
низложи́ си́льныя со престóлъ, и вознесé смирéнныя:
áлчущыя испóлни блáгъ, и богатя́щыяся отпусти́ тщы́.
Воспрiя́тъ Изрáиля óтрока своегó, помянýти ми́лости,
я́коже глагóла ко отцéмъ нáшымъ, Авраáму и сѣ́мени егó до вѣ́ка.
Пребы́сть же Марiáмь съ нéю я́ко три́ мѣ́сяцы и возврати́ся въ дóмъ свóй.
Елисавéти же испóлнися врéмя роди́ти éй, и роди́ сы́на.
И слы́шаша о́крестъ живýщiи и ýжики ея́, я́ко возвели́чилъ éсть Госпóдь ми́лость свою́ съ нéю: и рáдовахуся съ нéю.
И бы́сть во осмы́й дéнь, прiидóша обрѣ́зати отрочá, и нарицáху é и́менемъ отцá егó, захáрiю.
И отвѣщáвши мáти егó речé: ни́, но да наречéтся Иоáннъ.
И рѣ́ша къ нéй, я́ко никтóже éсть въ родствѣ́ твоéмъ, и́же нарицáется и́менемъ тѣ́мъ.
И помавáху отцý егó, éже кáко бы хотѣ́лъ нарещи́ é.
И испрóшь дщи́цу, написá, глагóля: Иоáннъ бýдетъ и́мя емý. И чудя́хуся вси́.
Отверзóшася же устá егó áбiе и язы́къ егó, и глагóлаше, благословя́ Бóга.
И бы́сть на всѣ́хъ стрáхъ живýщихъ о́крестъ и́хъ: и во всéй странѣ́ Иудéйстѣй повѣ́даеми бя́ху вси́ глагóли сíи.
И положи́ша вси́ слы́шавшiи въ сéрдцѣ своéмъ, глагóлюще: чтó ýбо отрочá сié бýдетъ? И рукá Госпóдня бѣ́ съ ни́мъ.
И захáрiа отéцъ егó испóлнися Дýха свя́та, и прорóчествова, глагóля:
благословéнъ Госпóдь Бóгъ Изрáилевъ, я́ко посѣти́ и сотвори́ избавлéнiе лю́демъ свои́мъ:
и воздви́же рóгъ спасéнiя нáмъ, въ домý Дави́да óтрока своегó:
я́коже глагóла усты́ святы́хъ сýщихъ от вѣ́ка прорóкъ егó,
спасéнiе от врáгъ нáшихъ и изъ руки́ всѣ́хъ ненави́дящихъ нáсъ:
сотвори́ти ми́лость со отцы́ нáшими и помянýти завѣ́тъ святы́й свóй,
кля́тву, éюже кля́тся ко Авраáму отцý нáшему, дáти нáмъ,
безъ стрáха, изъ руки́ врáгъ нáшихъ избáвльшымся,
служи́ти емý преподóбiемъ и прáвдою предъ ни́мъ вся́ дни́ животá нáшего.
И ты́, отрочá, прорóкъ вы́шняго наречéшися: предъи́деши бо предъ лицéмъ Госпóднимъ, уготóвати пути́ егó,
дáти рáзумъ спасéнiя лю́демъ егó, во оставлéнiе грѣ́хъ и́хъ,
милосéрдiя рáди ми́лости Бóга нáшего, въ ни́хже посѣти́лъ éсть нáсъ востóкъ свы́ше,
просвѣти́ти во тмѣ́ и сѣ́ни смéртнѣй сѣдя́щыя, напрáвити нóги нáшя на пýть ми́ренъ.
Отрочá же растя́ше и крѣпля́шеся дýхомъ: и бѣ́ въ пусты́нехъ до днé явлéнiя своегó ко Изрáилю.

Евангелие от Луки, 2

Бы́сть же во дни́ ты́я, изы́де повелѣ́нiе от кéсаря áвгуста написáти всю́ вселéнную.
Сié написáнiе пéрвое бы́сть владя́щу сирíею киринíю.
И идя́ху вси́ написáтися, кóждо во свóй грáдъ.
Взы́де же и Иóсифъ от Галилéи, изъ грáда назарéта, во Иудéю, во грáдъ Дави́довъ, и́же нарицáется Виѳлеéмъ, занé бы́ти емý от дóму и отéчества Дави́дова,
написáтися съ Марíею обручéною емý женóю, сýщею непрáздною.
Бы́сть же, егдá бы́ста тáмо, испóлнишася днíе роди́ти éй:
и роди́ Сы́на своегó пéрвенца, и пови́тъ егó, и положи́ егó въ я́слехъ: занé не бѣ́ и́мъ мѣ́ста во оби́тели.
И пáстырiе бѣ́ху въ тóйже странѣ́, бдя́ще и стрегýще стрáжу нощнýю о стáдѣ своéмъ.
И сé áнгелъ Госпóдень стá въ ни́хъ, и слáва Госпóдня осiя́ и́хъ: и убоя́шася стрáхомъ вéлiимъ.
И речé и́мъ áнгелъ: не бóйтеся: сé бо благовѣствýю вáмъ рáдость вéлiю, я́же бýдетъ всѣ́мъ лю́демъ:
я́ко роди́ся вáмъ днéсь Спáсъ, и́же éсть Христóсъ Госпóдь, во грáдѣ Дави́довѣ:
и сé вáмъ знáменiе: обря́щете младéнца пови́та, лежáща въ я́слехъ.
И внезáпу бы́сть со áнгеломъ мнóжество вóй небéсныхъ, хвáлящихъ Бóга и глагóлющихъ:
слáва въ вы́шнихъ Бóгу, и на земли́ ми́ръ, во человѣ́цѣхъ благоволéнiе.
И бы́сть, я́ко отидóша от ни́хъ на нéбо áнгели, и человѣ́цы пáстырiе рѣ́ша дрýгъ ко дрýгу: прéйдемъ до Виѳлеéма и ви́димъ глагóлъ сéй бы́вшiй, егóже Госпóдь сказá нáмъ.
И прiидóша поспѣ́шшеся, и обрѣтóша Марiáмь же и Иóсифа, и младéнца лежáща во я́слехъ.
Ви́дѣвше же сказáша о глагóлѣ глагóланнѣмъ и́мъ о отрочáти сéмъ.
И вси́ слы́шавшiи диви́шася о глагóланныхъ от пáстырей къ ни́мъ.
Марiáмь же соблюдáше вся́ глагóлы сiя́, слагáющи въ сéрдцы своéмъ.
И возврати́шася пáстырiе, слáвяще и хвáляще Бóга о всѣ́хъ, я́же слы́шаша и ви́дѣша, я́коже глагóлано бы́сть къ ни́мъ.
И егдá испóлнишася óсмь днíй, да обрѣ́жутъ егó, и нарекóша и́мя емý Иисýсъ, наречéнное áнгеломъ прéжде дáже не зачáтся во чрéвѣ.
И егдá испóлнишася днíе очищéнiя ею́, по закóну Моисéову, вознесóста егó во Иерусали́мъ, постáвити егó предъ Гóсподемъ,
я́коже éсть пи́сано въ закóнѣ Госпóдни: я́ко вся́къ младéнецъ мýжеска пóлу, разверзáя ложеснá, свято Гóсподеви наречéтся:
и éже дáти жéртву, по речéнному въ закóнѣ Госпóдни, двá гóрличища или́ двá птенцá голуби́на.
И сé, бѣ́ человѣ́къ во Иерусали́мѣ, емýже и́мя Симеóнъ: и человѣ́къ сéй прáведенъ и благоче́сти́въ, чáя утѣ́хи Изрáилевы: и Дýхъ бѣ́ свя́тъ въ нéмъ.
И бѣ́ емý обѣ́щано Дýхомъ святы́мъ, не ви́дѣти смéрти, прéжде дáже не ви́дитъ Христá Госпóдня.
И прiи́де дýхомъ въ цéрковь. И егдá введóста роди́теля отрочá Иисýса, сотвори́ти и́ма по обы́чаю закóнному о нéмъ,
и тóй прiéмъ егó на рукý своéю, и благослови́ Бóга, и речé:
ны́нѣ отпущáеши рабá твоегó, Влады́ко, по глагóлу твоемý, съ ми́ромъ:
я́ко ви́дѣстѣ óчи мои́ спасéнiе твоé,
éже еси́ угóтовалъ предъ лицéмъ всѣ́хъ людéй:
свѣ́тъ во откровéнiе язы́комъ, и слáву людéй твои́хъ Изрáиля.
И бѣ́ Иóсифъ и Мáти егó чудя́щася о глагóлемыхъ о нéмъ.
И благослови́ я́ Симеóнъ, и речé къ Марíи Мáтери егó: сé лежи́тъ сéй на падéнiе и на востáнiе мнóгимъ во Изрáили, и въ знáменiе пререкáемо:
и тебѣ́ же самóй дýшу прóйдетъ орýжiе: я́ко да откры́ются от мнóгихъ сердéцъ помышлéнiя.
И бѣ́ áнна прорóчица, дщи́ фанýилева, от колѣ́на Аси́рова: сiя́ заматорѣ́вши во днéхъ мнóзѣхъ, жи́вши съ мýжемъ сéдмь лѣ́тъ от дѣ́вства своегó:
и тá вдовá я́ко лѣ́тъ óсмьдесятъ и четы́ре, я́же не отхождáше от цéркве, постóмъ и моли́твами служáщи дéнь и нóщь.
И тá въ тóй чáсъ пристáвши исповѣ́дашеся Гóсподеви, и глагóлаше о нéмъ всѣ́мъ чáющымъ избавлéнiя во Иерусали́мѣ.
И я́ко скончáшася вся́ по закóну Госпóдню, возврати́шася въ Галилéю, во грáдъ свóй назарéтъ.
Отрочá же растя́ше и крѣпля́шеся дýхомъ, исполня́яся премýдрости: и благодáть Бóжiя бѣ́ на нéмъ.
И хождáста роди́теля егó на вся́ко лѣ́то во Иерусали́мъ въ прáздникъ пáсхи.
И егдá бы́сть двоюнáдесяти лѣ́ту, восходя́щымъ и́мъ во Иерусали́мъ по обы́чаю прáздника,
и скончáвшымъ дни́, и возвращáющымся и́мъ, остá óтрокъ Иисýсъ во Иерусали́мѣ: и не разумѣ́ Иóсифъ и Мáти егó:
мнѣ́вша же егó въ дружи́нѣ сýща, преидóста днé пýть, и искáста егó во срóдницѣхъ и въ знáемыхъ:
и не обрѣ́тша егó, возврати́стася во Иерусали́мъ, взыскáюща егó.
И бы́сть по трiéхъ днéхъ, обрѣтóста егó въ цéркви, сѣдя́щаго посредѣ́ учи́телей, и послýшающаго и́хъ, и вопрошáющаго и́хъ:
ужасáхуся же вси́ послýшающiи егó о рáзумѣ и о отвѣ́тѣхъ егó.
И ви́дѣвша егó, диви́стася: и къ немý Мáти егó речé: чáдо, чтó сотвори́ нáма тáко? сé отéцъ твóй и áзъ боля́ща искáхома тебé.
И речé къ ни́ма: чтó я́ко искáста менé? не вѣ́ста ли, я́ко въ тѣ́хъ, я́же Отцá моегó, достóитъ бы́ти ми́?
И тá не разумѣ́ста глагóла, егóже глагóла и́ма.
И сни́де съ ни́ма, и прiи́де въ назарéтъ: и бѣ́ повинýяся и́ма. И Мáти егó соблюдáше вся́ глагóлы сiя́ въ сéрдцы своéмъ.
И Иисýсъ преспѣвáше премýдростiю и вóзрастомъ и благодáтiю у Бóга и человѣ́къ.

Евангелие от Луки, 3

Въ пя́тое же нáдесяте лѣ́то влады́чества тивéрiа кéсаря, обладáющу понтíйскому пилáту Иудéею, и четвертовлáствующу Галилéею И́роду, Фили́ппу же брáту егó четвертовлáствующу итурéею и трахони́тскою странóю, и лисáнiю Авилинíею четвертовлáствующу,
при архiерéи áннѣ и каiáфѣ, бы́сть глагóлъ Бóжiй ко Иоáнну захáрiину сы́ну въ пусты́ни.
И прiи́де во всю́ странý Иордáнскую, проповѣ́дая крещéнiе покая́нiя во оставлéнiе грѣхóвъ:
я́коже éсть пи́сано въ кни́зѣ словéсъ Исáiи прорóка, глагóлюща: глáсъ вопiю́щаго въ пусты́ни: уготóвайте пýть Госпóдень: прáвы твори́те стези́ егó:
вся́ка дéбрь испóлнится, и вся́ка горá и хóлмъ смири́тся: и бýдутъ стрóпотная въ прáвая, и óстрiи въ пути́ глáдки:
и ýзритъ вся́ка плóть спасéнiе Бóжiе.
Глагóлаше же исходя́щымъ нарóдомъ крести́тися от негó: порождéнiя ехи́днова, ктó сказá вáмъ бѣжáти от грядýщаго гнѣ́ва?
Сотвори́те ýбо плоды́ достóины покая́нiя: и не начинáйте глагóлати въ себѣ́: отцá и́мамы Авраáма: глагóлю бо вáмъ, я́ко мóжетъ Бóгъ от кáменiя сегó воздви́гнути чáда Авраáму.
Ужé бо и сѣки́ра при кóрени дрéва лежи́тъ: вся́ко ýбо дрéво, не творя́щее плодá добрá, посѣкáется и во óгнь вметáется.
И вопрошáху егó нарóди, глагóлюще: чтó ýбо сотвори́мъ?
Отвѣщáвъ же глагóла и́мъ: имѣ́яй двѣ́ ри́зѣ, да подáстъ не имýщему: и имѣ́яй брáшна, тáкожде да твори́тъ.
Прiидóша же и мы́тари крести́тися от негó, и рѣ́ша къ немý: учи́телю, чтó сотвори́мъ?
О́нъ же речé къ ни́мъ: ничтóже бóлѣе от повелѣ́ннаго вáмъ твори́те.
Вопрошáху же егó и вóини, глагóлюще: и мы́ чтó сотвори́мъ? И речé къ ни́мъ: ни когóже оби́дите, ни оклеветавáйте: и довóлни бýдите обрóки вáшими.
Чáющымъ же лю́демъ, и помышля́ющымъ всѣ́мъ въ сердцáхъ свои́хъ о Иоáннѣ, едá тóй éсть Христóсъ,
отвѣщавáше Иоáннъ всѣ́мъ, глагóля: áзъ ýбо водóю крещáю вы́: грядéтъ же крѣ́плiй менé, емýже нѣ́смь достóинъ отрѣши́ти ремéнь сапогý егó: тóй вы́ крести́тъ Дýхомъ святы́мъ и огнéмъ:
емýже лопáта въ рукý егó, и отреби́тъ гумнó своé, и соберéтъ пшени́цу въ жи́тницу свою́, плéвы же сожжéтъ огнéмъ негасáющимъ.
Мнóга же ýбо и и́на, утѣшáя благовѣствовáше лю́демъ.
И́родъ же четвертовлáстникъ, обличáемъ от негó о Иродiáдѣ женѣ́ брáта своегó, и о всѣ́хъ, я́же сотвори́ злáя И́родъ,
приложи́ и сié надъ всѣ́ми, и затвори́ Иоáнна въ темни́цѣ.
Бы́сть же егдá крести́шася вси́ лю́дiе, и Иисýсу крéщшуся и моля́щуся, отвéрзеся нéбо,
и сни́де Дýхъ святы́й тѣлéснымъ о́бразомъ, я́ко гóлубь, нáнь: и глáсъ съ небесé бы́сть, глагóля: ты́ еси́ Сы́нъ мóй возлю́бленный, о тебѣ́ благоволи́хъ.
И тóй бѣ́ Иисýсъ я́ко лѣ́тъ три́десять начинáя, сы́й, я́ко мни́мь, Сы́нъ Иóсифовъ, илíевъ,
Матѳáтовъ, Левíинъ, Мелхíинъ, Ианнáевъ, Иóсифовъ,
маттаѳíевъ, Амóсовъ, наýмовъ, если́мовъ, наггéовъ,
маáѳовъ, маттаѳíевъ, семеíевъ, Иóсифовъ, Иýдинъ,
Иоáннановъ, рисáевъ, зоровáвелевъ, Салаѳiи́левъ, нирíевъ,
Мелхíевъ, Аддíевъ, косáмовъ, Елмодáмовъ, И́ровъ,
Иосíевъ, Елiезéровъ, Иори́мовъ, Матѳáтовъ, Левíинъ,
Симеóновъ, Иýдинъ, Иóсифовъ, Ионáновъ, Елiаки́мовъ,
мелеáевъ, маинáновъ, маттаѳáевъ, наѳáновъ, Дави́довъ,
Иессéовъ, ови́довъ, воóзовъ, Салмóновъ, Наассóновъ,
Аминадáвовъ, Арáмовъ, Есрóмовъ, Фарéсовъ, Иýдинъ,
Иáковль, Исаáковъ, Авраáмовъ, Ѳáринъ, Нахóровъ,
Серýховъ, Рагáвовъ, Фалéковъ, Евéровъ, Салáновъ,
Каинáновъ, Арфаксáдовъ, Си́мовъ, Нóевъ, лáмеховъ,
Маѳусáлевъ, Енóховъ, Иáредовъ, Малелеи́ловъ, Каинáновъ,
Енóсовъ, Си́ѳовъ, Адáмовъ, Бóжiй.

Евангелие от Луки, 4

Иисýсъ же испóлнь Дýха свя́та возврати́ся от Иордáна: и ведя́шеся Дýхомъ въ пусты́ню,
днíй четы́ридесять искушáемь от дiáвола: и не я́стъ ничесóже во дни́ ты́я: и скончáвшымся и́мъ, послѣди́ взалкá.
И речé емý дiáволъ: áще Сы́нъ еси́ Бóжiй, рцы́ кáменеви семý, да бýдетъ хлѣ́бъ.
И отвѣщá Иисýсъ къ немý, глагóля: пи́сано éсть, я́ко не о хлѣ́бѣ еди́номъ жи́въ бýдетъ человѣ́къ, но о вся́комъ глагóлѣ Бóжiи.
И возвéдъ егó дiáволъ на горý высокý, показá емý вся́ цáрствiя вселéнныя въ чáсѣ {чертѣ́} врéменнѣ.
И речé емý дiáволъ: тебѣ́ дáмъ влáсть сiю́ всю́ и слáву и́хъ: я́ко мнѣ́ преданá éсть, и, емýже áще хощý, дáмъ ю́:
ты́ ýбо áще поклони́шися прéдо мнóю, бýдутъ тебѣ́ вся́.
И отвѣщáвъ речé емý Иисýсъ: иди́ за мнóю, сатанó пи́сано éсть: поклони́шися Гóсподу Бóгу твоемý, и томý еди́ному послýжиши.
И ведé егó во Иерусали́мъ, и постáви егó на крилѣ́ церкóвнѣмъ, и речé емý: áще Сы́нъ еси́ Бóжiй, вéрзися отсю́ду дóлу:
пи́сано бо éсть, я́ко áнгеломъ свои́мъ заповѣ́сть о тебѣ́ сохрани́ти тя́:
и на рукáхъ вóзмутъ тя́, да не когдá преткнéши о кáмень нóгу твою́.
И отвѣщáвъ речé емý Иисýсъ, я́ко речéно éсть: не искýсиши Гóспода Бóга твоегó.
И скончáвъ всé искушéнiе дiáволъ, отъи́де от негó до врéмене.
И возврати́ся Иисýсъ въ си́лѣ духóвнѣй въ Галилéю: и вѣ́сть изы́де по всéй странѣ́ о нéмъ.
И тóй учáше на сóнмищихъ и́хъ, слáвимъ всѣ́ми.
И прiи́де въ назарéтъ, идѣ́же бѣ́ воспитáнъ: и вни́де, по обы́чаю своемý, въ дéнь суббóтный въ сóнмище, и востá чести́.
И дáша емý кни́гу Исáiи прорóка: и разгнýвъ кни́гу, обрѣ́те мѣ́сто, идѣ́же бѣ́ напи́сано:
Дýхъ Госпóдень на мнѣ́: егóже рáди помáза мя́ благовѣсти́ти ни́щымъ, послá мя исцѣли́ти сокрушéнныя сéрдцемъ, проповѣ́дати плѣнéннымъ отпущéнiе и слѣпы́мъ прозрѣ́нiе, отпусти́ти сокрушéнныя во отрáду,
проповѣ́дати лѣ́то Госпóдне прiя́тно.
И согнýвъ кни́гу, отдáвъ слузѣ́, сѣ́де: и всѣ́мъ въ сóнмищи óчи бѣ́ху зря́ще нáнь.
И начáтъ глагóлати къ ни́мъ, я́ко днéсь сбы́стся писáнiе сié во ýшiю вáшею.
И вси́ свидѣ́телствоваху емý, и дивля́хуся о словесѣ́хъ благодáти, исходя́щихъ изъ ýстъ егó, и глагóлаху: не сéй ли éсть Сы́нъ Иóсифовъ?
И речé къ ни́мъ: вся́ко речéте ми́ при́тчу сiю́: врачý, исцѣли́ся сáмъ: ели́ка слы́шахомъ бы́вшая въ капернаýмѣ, сотвори́ и здѣ́ во отéчествiи своéмъ.
Речé же: ами́нь глагóлю вáмъ, я́ко ни котóрый прорóкъ прiя́тенъ éсть во отéчествiи своéмъ:
пои́стиннѣ же глагóлю вáмъ: мнóги вдови́цы бѣ́ша во дни́ илiины́ во Изрáили, егдá заключи́ся нéбо три́ лѣ́та и мéсяцъ шéсть, я́ко бы́сть глáдъ вели́къ по всéй земли́:
и ни ко еди́ной и́хъ пóсланъ бы́сть илiá, тóкмо въ сарéпту Сидóнскую къ женѣ́ вдови́цѣ.
И мнóзи прокажéни бѣ́ху при Елиссéи прорóцѣ во Изрáили: и ни еди́нъ же от ни́хъ очи́стися, тóкмо неемáнъ сирiани́нъ.
И испóлнишася вси́ я́рости въ сóнмищи, слы́шавшiи сiя́:
и востáвше изгнáша егó вóнъ изъ грáда, и ведóша егó до верхý горы́, на нéйже грáдъ и́хъ сóзданъ бя́ше, да бы́ша егó низри́нули:
óнъ же прошéдъ посредѣ́ и́хъ, идя́ше.
И сни́де въ капернаýмъ грáдъ Галилéйскiй: и бѣ́ учя́ и́хъ въ суббóты.
И ужасáхуся о учéнiи егó: я́ко со влáстiю бѣ́ слóво егó.
И въ сóнмищи бѣ́ человѣ́къ имы́й дýха бѣ́са нечи́ста, и возопи́ глáсомъ вéлiимъ,
глагóля: остáви, чтó нáмъ и тебѣ́, Иисýсе назаря́нине, пришéлъ еси́ погуби́ти нáсъ: вѣ́мъ тя́, ктó еси́, святы́й Бóжiй.
И запрети́ емý Иисýсъ, глагóля: премолчи́ и изы́ди изъ негó. И повéргъ егó бѣ́съ посредѣ́, изы́де изъ негó, никáкоже вреди́въ егó.
И бы́сть ýжасъ на всѣ́хъ, и стязáхуся, дрýгъ ко дрýгу глагóлюще: чтó слóво сié, я́ко влáстiю и си́лою вели́тъ нечи́стымъ духовóмъ, и исхóдятъ?
И исхождáше глáсъ о нéмъ во вся́ко мѣ́сто страны́.
Востáвъ же изъ сóнмища, вни́де въ дóмъ Си́моновъ: тéща же Си́монова бѣ́ одержи́ма огнéмъ вéлiимъ: и моли́ша егó о нéй.
И стáвъ надъ нéю, запрети́ огню́, и остáви ю́: áбiе же востáвши служáше и́мъ.
Заходя́щу же сóлнцу, вси́, ели́цы имѣ́яху боля́щыя недýги разли́чными, привождáху и́хъ къ немý: óнъ же на еди́наго коегóждо и́хъ рýцѣ возлóжь, исцѣля́ше и́хъ.
Исхождáху же и бѣ́си от мнóгихъ, вопiю́ще и глагóлюще, я́ко ты́ еси́ Христóсъ Сы́нъ Бóжiй. И запрещáя не дая́ше и́мъ глагóлати, я́ко вѣ́дяху Христá самагó сýща.
Бы́вшу же дни́, изшéдъ идé въ пýсто мѣ́сто: и нарóди искáху егó, и прiидóша къ немý, и удержавáху егó, да бы́ не отшéлъ от ни́хъ.
О́нъ же речé къ ни́мъ, я́ко и други́мъ градовóмъ благовѣсти́ти ми́ подобáетъ цáрствiе Бóжiе: я́ко на сé пóсланъ éсмь.
И бѣ́ проповѣ́дая на сóнмищихъ Галилéйскихъ.

Евангелие от Луки, 5

Бы́сть же належáщу емý нарóду, да бы́ша слы́шали слóво Бóжiе, и тóй бѣ́ стоя́ при éзерѣ геннисарéтстѣ:
и ви́дѣ двá корабля́ стоя́ща при éзерѣ: ры́барiе же отшéдше от нею́, измывáху мрéжи.
Влѣ́зъ же въ еди́нъ от кораблю́, и́же бѣ́ Си́моновъ, моли́ егó от земли́ отступи́ти мáло: и сѣ́дъ учáше изъ корабля́ нарóды.
Я́коже престá глагóля, речé къ Си́мону: поступи́ во глубинý, и ввéрзите мрéжи вáшя въ лови́тву.
И отвѣщáвъ Си́монъ речé емý: настáвниче, объ нóщь всю́ трýждшеся, ничесóже я́хомъ: по глагóлу же твоемý ввéргу мрéжу.
И сé сотвóрше, я́ша мнóжество ры́бъ мнóго: протерзáшеся же мрéжа и́хъ.
И поманýша причáстникомъ, и́же бѣ́ху во друзѣ́мъ корабли́, да пришéдше помóгутъ и́мъ: и прiидóша, и испóлниша óба корабля́, я́ко погружáтися и́ма.
Ви́дѣвъ же Си́монъ пéтръ, припадé къ колѣ́нома Иисýсовома, глагóля: изы́ди от менé, я́ко мýжъ грѣ́шенъ éсмь, Гóсподи.
У́жасъ бо одержáше егó и вся́ сýщыя съ ни́мъ, о лови́твѣ ры́бъ, я́же я́ша.
Тáкожде же Иáкова и Иоáнна сы́на зеведéова, я́же бѣ́ста обéщника Си́монови. И речé къ Си́мону Иисýсъ: не бóйся: отсéлѣ бýдеши человѣ́ки ловя́.
И извлéкше [óба] корабля́ на зéмлю, остáвльше вся́, вслѣ́дъ егó идóша.
И бы́сть егдá бѣ́ Иисýсъ во еди́номъ от градóвъ, и сé, мýжъ испóлнь прокажéнiя: и ви́дѣвъ Иисýса, пáдъ ни́цъ, моля́ся емý, глагóля: Гóсподи, áще хóщеши, мóжеши мя́ очи́стити.
И простéръ рýку, коснýся егó, рéкъ: хощý, очи́стися: и áбiе прокáза отъи́де от негó.
И тóй заповѣ́да емý ни комýже повѣ́дати: но шéдъ покажи́ся иерéови, и принеси́ о очищéнiи твоéмъ, я́коже повелѣ́ Моисéй, во свидѣ́телство и́мъ.
Прохождáше же пáче слóво о нéмъ: и схождáхуся нарóди мнóзи слы́шати и цѣли́тися от негó от недýгъ свои́хъ.
Тóй же бѣ́ отходя́ въ пусты́ню и моля́ся.
И бы́сть во еди́нъ от днíй, и тóй бѣ́ учя́: и бѣ́ху сѣдя́ще фарисéе и законоучи́телiе, и́же бѣ́ху пришли́ от вся́кiя вéси Галилéйскiя и Иудéйскiя и Иерусали́мскiя: и си́ла Госпóдня бѣ́ исцѣля́ющи и́хъ:
и сé мýжiе нося́ще на одрѣ́ человѣ́ка, и́же бѣ́ разслáбленъ, и искáху внести́ егó и положи́ти предъ ни́мъ:
и не обрѣ́тше кудѣ́ внести́ егó нарóда рáди, взлѣ́зше на хрáмъ, сквозѣ́ скудéлы {крóвъ скудéльный} низвѣ́сиша егó со одрóмъ на средý предъ Иисýса.
И ви́дѣвъ вѣ́ру и́хъ, речé емý: человѣ́че, оставля́юттися грѣси́ твои́.
И начáша помышля́ти кни́жницы и фарисéе, глагóлюще: ктó éсть сéй, и́же глагóлетъ хулы́, ктó мóжетъ оставля́ти грѣ́хи, тóкмо еди́нъ Бóгъ?
Разумѣ́въ же Иисýсъ помышлéнiя и́хъ, отвѣщáвъ речé къ ни́мъ: чтó помышля́ете въ сердцáхъ вáшихъ?
чтó éсть удóбѣе, рещи́: оставля́юттися грѣси́ твои́? или́ рещи́: востáни и ходи́?
но да увѣ́сте, я́ко влáсть и́мать Сы́нъ человѣ́ческiй на земли́ отпущáти грѣхи́, [речé разслáбленному:] тебѣ́ глагóлю: востáни и возми́ óдръ твóй, и иди́ въ дóмъ твóй.
И áбiе востáвъ предъ ни́ми, взéмъ, на нéмже лежáше, и́де въ дóмъ свóй, слáвя Бóга.
И ýжасъ прiя́тъ всѣ́хъ, и слáвляху Бóга: и испóлнишася стрáха, глагóлюще, я́ко ви́дѣхомъ преслáвная днéсь.
И посéмъ изы́де, и узрѣ́ мытаря́ и́менемъ Левíю, сѣдя́ща на мы́тницѣ, и речé емý: иди́ по мнѣ́.
И остáвль вся́, востáвъ вослѣ́дъ егó и́де.
И сотвори́ учреждéнiе вéлiе Левíй емý въ домý своéмъ: и бѣ́ нарóдъ мытарéй мнóгъ, и инѣ́хъ, и́же бя́ху съ ни́мъ возлежáще.
И роптáху кни́жницы на негó и фарисéе, ко ученикóмъ егó глагóлюще: почтó съ мытари́ и грѣ́шники я́сте и пiéте?
И отвѣщáвъ Иисýсъ речé къ ни́мъ: не трéбуютъ здрáвiи врачá, но боля́щiи:
не прiидóхъ призвáти прáведныхъ, но грѣ́шныя въ покая́нiе.
Они́ же рѣ́ша къ немý: почтó ученицы́ Иоáнновы постя́тся чáсто и моли́твы творя́тъ, тáкожде и фарисéйстiи, а твои́ ядя́тъ и пiю́тъ?
О́нъ же речé къ ни́мъ: едá мóжете сыны́ брáчныя, дóндеже жени́хъ съ ни́ми éсть, сотвори́ти пости́тися?
Прiи́дутъ же днíе, егдá отъя́тъ бýдетъ от ни́хъ жени́хъ, и тогдá постя́тся въ ты́я дни́.
Глагóлаше же и при́тчу къ ни́мъ, я́ко никтóже приставлéнiя ри́зы нóвы приставля́етъ на ри́зу вéтху: áще ли же ни́, и нóвую раздерéтъ, и вéтсѣй не согласýетъ éже от нóваго.
И никтóже вливáетъ винá нóва въ мѣ́хи вéтхи: áще ли же ни́, растóргнетъ нóвое винó мѣ́хи, и самó излiéтся, и мѣ́си поги́бнутъ:
но винó нóвое въ мѣ́хи нóвы вливáти [подобáетъ]: и обоя́ соблюдýтся.
И никтóже пи́въ вéтхое, áбiе хóщетъ нóваго: глагóлетъ бо: вéтхое лýчше éсть.

Евангелие от Луки, 6

Бы́сть же въ суббóту второпéрвую ити́ емý сквозѣ́ сѣ́янiя: и восторгáху ученицы́ егó клáсы, и ядя́ху, стирáюще рукáми.
Нѣ́цыи же от фарисéй рѣ́ша и́мъ: чтó творитé, егóже не достóитъ твори́ти въ суббóты?
И отвѣщáвъ Иисýсъ речé къ ни́мъ: ни ли́ сегó чли́ естé, éже сотвори́ Дави́дъ, егдá взалкáся сáмъ и и́же съ ни́мъ бя́ху?
кáко вни́де въ дóмъ Бóжiй, и хлѣ́бы предложéнiя взéмъ, и ядé, и дадé и сýщымъ съ ни́мъ, и́хже не достóяше я́сти, тóкмо еди́нымъ иерéемъ?
И глагóлаше и́мъ, я́ко госпóдь éсть Сы́нъ человѣ́ческiй и суббóтѣ.
Бы́сть же и въ другýю суббóту вни́ти емý въ сóнмище и учи́ти: и бѣ́ тáмо человѣ́къ, и рукá емý деснáя бѣ́ сухá.
Назирáху же кни́жницы и фарисéи, áще въ суббóту исцѣли́тъ, да обря́щутъ рѣ́чь нáнь.
О́нъ же вѣ́дяше помышлéнiя и́хъ, и речé человѣ́ку имýщему сýху рýку: востáни и стáни посредѣ́. О́нъ же востáвъ стá.
Речé же Иисýсъ къ ни́мъ: вопрошý вы́: чтó достóитъ въ суббóты, добрó твори́ти, или́ злó твори́ти? дýшу спасти́, или́ погуби́ти? Они́ же умолчáша.
И воззрѣ́въ на всѣ́хъ и́хъ, речé емý: простри́ рýку твою́. О́нъ же сотвори́ тáко: и утверди́ся рукá егó здрáва я́ко другáя.
Они́ же испóлнишася безýмiя, и глагóлаху дрýгъ ко дрýгу, чтó бы́ша сотвори́ли Иисýсови.
Бы́сть же во дни́ ты́я, изы́де въ гóру помоли́тися: и бѣ́ объ нóщь въ моли́твѣ Бóжiи.
И егдá бы́сть дéнь, призвá ученики́ своя́: и избрá от ни́хъ дванáдесяте, и́хже и апóстолы наречé:
Си́мона, егóже именовá Петрá, и Андрéа брáта егó, Иáкова и Иоáнна, Фили́ппа и Варѳоломéа,
Матѳéа и Ѳомý, Иáкова алфéева и Симóна нарицáемаго зилóта,
Иýду Иáковля, и Иýду Искарióтскаго, и́же и бы́сть предáтель.
Изшéдъ съ ни́ми, стá на мѣ́стѣ рáвнѣ: и нарóдъ учени́къ егó, и мнóжество мнóго людéй от всея́ Иудéи и Иерусали́ма и помóрiя ти́рска и Сидóнска,
и́же прiидóша послýшати егó и исцѣли́тися от недýгъ свои́хъ, и стрáждущiи от дýхъ нечи́стыхъ: и исцѣля́хуся.
И вéсь нарóдъ искáше прикасáтися емý: я́ко си́ла от негó исхождáше и исцѣля́ше вся́.
И тóй возвéдъ óчи свои́ на ученики́ своя́, глагóлаше: блажéни ни́щiи дýхомъ: я́ко вáше éсть цáрствiе Бóжiе.
Блажéни, áлчущiи ны́нѣ: я́ко насы́титеся. Блажéни, плáчущiи ны́нѣ: я́ко возсмѣéтеся.
Блажéни бýдете, егдá возненави́дятъ вáсъ человѣ́цы, и егдá разлучáтъ вы́, и понóсятъ, и пронесýтъ и́мя вáше я́ко злó, Сы́на человѣ́ческаго рáди.
Возрáдуйтеся въ тóй дéнь и взыгрáйте: сé бо мздá вáша мнóга на небеси́. По си́мъ бо творя́ху прорóкомъ отцы́ и́хъ.
Обáче гóре вáмъ богáтымъ: я́ко отстоитé утѣшéнiя вáшего {я́ко воспрiéмлете утѣшéнiе вáше}.
Гóре вáмъ, насы́щеннiи ны́нѣ: я́ко взáлчете. Гóре вáмъ смѣю́щымся ны́нѣ: я́ко возрыдáете и восплáчете.
Гóре, егдá дóбрѣ рекýтъ вáмъ вси́ человѣ́цы: по си́мъ бо творя́ху лжепрорóкомъ отцы́ и́хъ.
Но вáмъ глагóлю слы́шащымъ: люби́те враги́ вáшя, добрó твори́те ненави́дящымъ вáсъ,
благослови́те кленýщыя вы́, и моли́теся за творя́щихъ вáмъ оби́ду.
Бiю́щему тя́ въ лани́ту, подáждь и другýю: и от взимáющаго ти́ ри́зу, и срачи́цу не возбрани́.
Вся́кому же прося́щему у тебé, дáй: и от взимáющаго твоя́, не истязýй.
И я́коже хóщете да творя́тъ вáмъ человѣ́цы, и вы́ твори́те и́мъ тáкожде.
И áще лю́бите лю́бящыя вы́, кáя вáмъ благодáть éсть? и́бо и грѣ́шницы лю́бящыя и́хъ лю́бятъ.
И áще благотворитé благотворя́щымъ вáмъ, кáя вáмъ благодáть éсть? и́бо и грѣ́шницы тóжде творя́тъ.
И áще взаи́мъ даетé, от ни́хже чáете воспрiя́ти, кáя вáмъ благодáть éсть, и́бо и грѣ́шницы грѣ́шникомъ взаи́мъ давáютъ, да воспрiи́мутъ рáвная.
Обáче люби́те враги́ вáшя, и благотвори́те, и взаи́мъ дáйте, ничесóже чáюще: и бýдетъ мздá вáша мнóга, и бýдете сы́нове вы́шняго: я́ко тóй блáгъ éсть на безблагодáтныя {неблагодáрныя} и злы́я.
Бýдите ýбо милосéрди, я́коже и Отéцъ вáшъ милосéрдъ éсть.
И не суди́те, и не сýдятъ вáмъ: [и] не осуждáйте, да не осуждéни бýдете: отпущáйте, и отпýстятъ вáмъ:
дáйте, и дáстся вáмъ: мѣ́ру добрý, наткáну и потря́сну и преливáющуся дадя́тъ на лóно вáше: тóю бо мѣ́рою, éюже мѣ́рите, возмѣ́рится вáмъ.
Речé же при́тчу и́мъ: едá мóжетъ слѣпéцъ слѣпцá води́ти? не óба ли въ я́му впадéтася?
Нѣ́сть учени́къ надъ учи́теля своегó: совершéнъ же вся́къ бýдетъ, я́коже [и] учи́тель егó.
Чтó же ви́диши сучéцъ, и́же éсть во очеси́ брáта твоегó, бервнá же, éже éсть во очеси́ твоéмъ, не чýеши?
Или́ кáко мóжеши рещи́ брáту твоемý: брáте, остáви, да измý сучéцъ, и́же éсть во очеси́ твоéмъ, сáмъ сýщаго во очеси́ твоéмъ бервнá не ви́дя? Лицемѣ́ре, изми́ пéрвѣе бервнó изъ очесé твоегó, и тогдá прóзриши изъя́ти сучéцъ изъ очесé брáта твоегó.
Нѣ́сть бо дрéво добрó, творя́ плодá злá: нижé дрéво злó, творя́ плодá добрá.
Вся́ко бо дрéво от плодá своегó познаéтся: не от тéрнiя бо чéшутъ смóквы, ни от купины́ éмлютъ грóздiя.
Благíй человѣ́къ от благáго сокрóвища сéрдца своегó изнóситъ благóе: и злы́й человѣ́къ от злáго сокрóвища сéрдца своегó изнóситъ злóе: от избы́тка бо сéрдца глагóлютъ устá егó.
Чтó же мя́ зоветé: Гóсподи, Гóсподи, и не творитé, я́же глагóлю?
Вся́къ гряды́й ко мнѣ́ и слы́шай словесá моя́ и творя́ я́, скажý вáмъ, комý éсть подóбенъ:
подóбенъ éсть человѣ́ку зи́ждущу хрáмину, и́же ископá и углуби́, и положи́ основáнiе на кáмени: наводнéнiю же бы́вшу, припадé рѣкá ко хрáминѣ тóй, и не мóже поколебáти ея́: основанá бо бѣ́ на кáмени.
Слы́шавый же и не сотвори́вый подóбенъ éсть человѣ́ку создáвшему хрáмину на земли́ безъ основáнiя: къ нéйже припадé рѣкá, и áбiе падéся, и бы́сть разрушéнiе хрáмины тоя́ вéлiе.

Евангелие от Луки, 7

Егдá же скончá вся́ глагóлы своя́ въ слýхи лю́демъ, вни́де въ капернаýмъ.
Сóтнику же нѣ́коему рáбъ боля́ злѣ́, хотя́ше {имѣ́яше} умрéти, и́же бѣ́ емý чéстенъ.
Слы́шавъ же о Иисýсѣ, послá къ немý стáрцы иудéйскiя, моля́ егó, я́ко да пришéдъ спасéтъ рабá егó.
Они́ же пришéдше ко Иисýсови, моля́ху егó тóщно, глагóлюще, я́ко достóинъ éсть, емýже дáси сié:
лю́битъ бо язы́къ нáшъ, и сóнмище тóй создá нáмъ.
Иисýсъ же идя́ше съ ни́ми. И ужé емý не далéче сýщу от хрáмины, послá къ немý сóтникъ дрýги, глагóля емý: Гóсподи, не дви́жися: нѣ́смь бо достóинъ, да подъ крóвъ мóй вни́деши:
тѣ́мже ни себé достóйна сотвори́хъ прiити́ къ тебѣ́: но рцы́ слóво, и исцѣлѣ́етъ óтрокъ мóй:
и́бо и áзъ человѣ́къ éсмь подъ влады́кою учинéнъ, имѣ́я подъ собóю вóины: и глагóлю семý: иди́, и идéтъ: и другóму: прiиди́, и прiи́детъ: и рабý моемý: сотвори́ сié, и сотвори́тъ.
Слы́шавъ же сiя́ Иисýсъ, чуди́ся емý, и обрáщься идýщему по нéмъ нарóду речé: глагóлю вáмъ, ни во Изрáили толи́ки вѣ́ры обрѣтóхъ.
И возврáщшеся пóсланiи обрѣтóша боля́щаго рабá исцѣлѣ́вша.
И бы́сть посéмъ, идя́ше во грáдъ, нарицáемый наи́нъ: и съ ни́мъ идя́ху ученицы́ егó мнóзи и нарóдъ мнóгъ.
Я́коже прибли́жися ко вратóмъ грáда, и сé изношáху умéрша, сы́на единорóдна мáтери своéй, и тá бѣ́ вдовá: и нарóдъ от грáда мнóгъ съ нéю.
И ви́дѣвъ ю́ Госпóдь, милосéрдова о нéй, и речé éй: не плáчи.
И пристýпль коснýся во óдръ: нося́щiи же стáша: и речé: ю́ноше, тебѣ́ глагóлю, востáни.
И сѣ́де мéртвый, и начáтъ глагóлати: и дадé егó мáтери егó.
Прiя́тъ же стрáхъ всѣ́хъ, и слáвляху Бóга, глагóлюще: я́ко прорóкъ вéлiй востá въ нáсъ, и я́ко посѣти́ Бóгъ людéй свои́хъ.
И изы́де слóво сié по всéй Иудéи о нéмъ, и по всéй странѣ́.
И возвѣсти́ша Иоáнну ученицы́ егó о всѣ́хъ си́хъ.
И призвáвъ двá нѣ́кая от учени́къ свои́хъ Иоáннъ, послá ко Иисýсу, глагóля: ты́ ли еси́ гряды́й, или́ инóго чáемъ?
Пришéдша же къ немý мýжа рѣ́ста: Иоáннъ крести́тель послá нáсъ къ тебѣ́, глагóля: ты́ ли еси́ гряды́й, или́ инóго чáемъ?
Въ тóй же чáсъ исцѣли́ мнóги от недýгъ и рáнъ и дýхъ злы́хъ, и мнóгимъ слѣпы́мъ даровá прозрѣ́нiе.
И отвѣщáвъ Иисýсъ речé и́ма: шéдша возвѣсти́та Иоáнну, я́же ви́дѣста и слы́шаста: я́ко слѣпíи прозирáютъ, хрóмiи хóдятъ, прокажéннiи очищáются, глусíи слы́шатъ, мéртвiи востаю́тъ, ни́щiи благовѣствýютъ:
и блажéнъ éсть, и́же áще не соблазни́тся о мнѣ́.
Отшéдшема же ученикóма Иоáнновома, начáтъ глагóлати къ нарóдомъ о Иоáннѣ: чесó изыдóсте въ пусты́ню ви́дѣти, трóсть ли вѣ́тромъ колéблему?
Но чесó изыдóсте ви́дѣти? человѣ́ка ли въ мя́гки ри́зы одѣ́яна? Сé, и́же во одéжди слáвнѣй и пи́щи сýщiи, во цáрствiи {во двóрѣхъ цáрскихъ} сýть.
Но чесó изыдóсте ви́дѣти? прорóка ли? Е́й, глагóлю вáмъ, и ли́шше прорóка.
Сéй [бо] éсть, о нéмже пи́сано éсть: сé áзъ послю́ áнгела моегó предъ лицéмъ твои́мъ, и́же устрóитъ пýть твóй предъ тобóю.
Глагóлю бо вáмъ: бóлiй въ рождéнныхъ женáми прорóка Иоáнна крести́теля никтóже éсть: мнíй же во цáрствiи Бóжiи, бóлiи егó éсть.
И вси́ лю́дiе слы́шавше и мы́тарiе, оправди́ша Бóга, крéщшеся крещéнiемъ Иоáнновымъ:
фарисéе же и закóнницы совѣ́тъ Бóжiй отвергóша о себѣ́, не крéщшеся от негó.
Речé же Госпóдь: комý ýбо уподóблю человѣ́ки рóда сегó, и комý сýть подóбни?
Подóбни сýть óтрочищемъ сѣдя́щымъ на тóржищихъ и приглашáющымъ дрýгъ дрýга, и глагóлющымъ: пискáхомъ вáмъ, и не плясáсте: рыдáхомъ вáмъ, и не плáкасте.
Прiи́де бо Иоáннъ крести́тель ни хлѣ́ба яды́й, ни винá пiя́, и глагóлете: бѣ́ся и́мать.
Прiи́де Сы́нъ человѣ́ческiй яды́й и пiя́, и глагóлете: сéй человѣ́къ я́дца и винопíйца, дрýгъ мытарéмъ и грѣ́шникомъ.
И оправди́ся премýдрость от чáдъ свои́хъ всѣ́хъ.
Моля́ше же егó нѣ́кiй от фарисéй, да бы я́лъ съ ни́мъ: и вшéдъ въ дóмъ фарисéовъ, возлежé.
И сé женá во грáдѣ, я́же бѣ́ грѣ́шница, и увѣ́дѣвши, я́ко возлежи́тъ во хрáминѣ фарисéовѣ, принéсши алавáстръ ми́ра,
и стáвши при ногý егó созади́, плáчущися, начáтъ умывáти нóзѣ егó слезáми, и власы́ главы́ своея́ отирáше, и облобызáше нóзѣ егó, и мáзаше ми́ромъ.
Ви́дѣвъ же фарисéй воззвáвый егó, речé въ себѣ́, глагóля сéй áще бы бы́лъ прорóкъ, вѣ́дѣлъ бы ктó и каковá женá прикасáется емý: я́ко грѣ́шница éсть.
И отвѣщáвъ Иисýсъ речé къ немý: Си́моне, и́мамъ ти́ нѣ́что рещи́. О́нъ же речé: учи́телю, рцы́.
Иисýсъ же речé: двá должникá бѣ́ста заимодáвцу нѣ́коему: еди́нъ бѣ́ дóлженъ пятiю́сотъ динáрiи, другíй же пятiю́десятъ:
не имýщема же и́ма воздáти, обѣ́ма отдá {остáви}. Котóрый ýбо ею́, рцы́, пáче возлю́битъ егó?
Отвѣщáвъ же Си́монъ речé: мню́, я́ко емýже вя́щше отдá {остáви}. О́нъ же речé емý: прáво суди́лъ еси́.
И обрáщься къ женѣ́, Си́монови речé: ви́диши ли сiю́ женý? Внидóхъ въ дóмъ твóй, воды́ на нóзѣ мои́ не дáлъ еси́: сiя́ же слезáми облiя́ ми́ нóзѣ и власы́ главы́ своея́ отрé.
Лобзáнiя ми́ не дáлъ еси́: сiя́ же, отнéлиже внидóхъ, не престá облобызáющи ми́ нóзѣ.
Мáсломъ главы́ моея́ не помáзалъ еси́: сiя́ же ми́ромъ помáза ми́ нóзѣ.
Егóже рáди, глагóлю ти́: отпущáются грѣси́ ея́ мнóзи, я́ко возлюби́ мнóго: а емýже мáло оставля́ется, мéнше лю́битъ.
Речé же éй: отпущáются тебѣ́ грѣси́.
И начáша возлежáщiи съ ни́мъ глагóлати въ себѣ́: ктó сéй éсть, и́же и грѣхи́ отпущáетъ?
Речé же къ женѣ́: вѣ́ра твоя́ спасé тя: иди́ въ ми́рѣ.

Евангелие от Луки, 8

И бы́сть посéмъ, и тóй прохождáше сквозѣ́ грáды и вéси, проповѣ́дуя и благовѣствýя цáрствiе Бóжiе: и обанáдесяте съ ни́мъ,
и жены́ нѣ́кiя, я́же бя́ху исцѣ́лены от духóвъ злы́хъ и недýгъ: Марíа нарицáемая Магдали́на, изъ нея́же бѣсóвъ сéдмь изы́де,
и Иоáнна женá хузáня, пристáвника И́родова, и сусáнна, и и́ны мнóги, я́же служáху емý от имѣ́нiй свои́хъ.
Разумѣвáющу же нарóду мнóгу, и от всѣ́хъ градóвъ грядýщымъ къ немý, речé при́тчу:
изы́де сѣ́яй сѣ́яти сѣ́мене своегó: и егдá сѣ́яше, óво падé при пути́, и попрáно бы́сть, и пти́цы небéсныя позобáша é:
а другóе падé на кáмени, и прозя́бъ ýсше, занé не имѣ́яше влáги:
и другóе падé посредѣ́ тéрнiя, и возрастé тéрнiе, и подави́ é:
другóе же падé на земли́ блáзѣ, и прозя́бъ сотвори́ плóдъ стори́цею. Сiя́ глагóля, возгласи́: имѣ́яй ýшы слы́шати, да слы́шитъ.
Вопрошáху же егó ученицы́ егó, глагóлюще: чтó éсть при́тча сiя́?
О́нъ же речé: вáмъ éсть данó вѣ́дати тáйны цáрствiя Бóжiя, прóчымъ же въ при́тчахъ, да ви́дяще не ви́дятъ и слы́шаще не разумѣ́ютъ.
Е́сть же сiя́ при́тча: сѣ́мя éсть слóво Бóжiе:
а и́же при пути́, сýть слы́шащiи, потóмъ же прихóдитъ дiáволъ и взéмлетъ слóво от сéрдца и́хъ, да не вѣ́ровавше спасýтся:
а и́же на кáмени, и́же егдá услы́шатъ, съ рáдостiю прiéмлютъ слóво: и Сiи́ кóрене не и́мутъ, и́же во врéмя вѣ́руютъ, и во врéмя напáсти отпадáютъ:
а éже въ тéрнiи пáдшее, сíи сýть слы́шавшiи, и от печáли и богáтства и сластьми́ житéйскими ходя́ще подавля́ются, и не совершáютъ плодá:
а и́же на дóбрѣй земли́, сíи сýть, и́же дóбрымъ сéрдцемъ и благи́мъ слы́шавше слóво, держáтъ и плóдъ творя́тъ въ терпѣ́нiи. Сiя́ глагóля, возгласи́: имѣ́яй ýшы слы́шати да слы́шитъ.
Никтóже [ýбо] свѣти́лника вжéгъ, покрывáетъ егó сосýдомъ, или́ подъ óдръ подлагáетъ: но на свѣ́щникъ возлагáетъ, да входя́щiи ви́дятъ свѣ́тъ.
Нѣ́сть бо тáйно, éже не я́влено бýдетъ: нижé утаéно, éже не познáется и въ явлéнiе прiи́детъ.
Блюди́теся ýбо, кáко слы́шите: и́же бо и́мать, дáстся емý: и и́же áще не и́мать, и éже мни́тся имѣ́я, вóзмется от негó.
Прiидóша же къ немý Мáти и брáтiя егó, и не можáху бесѣ́довати къ немý нарóда рáди.
И возвѣсти́ша емý, глагóлюще: Мáти твоя́ и брáтiя твоя́ внѣ́ стоя́тъ, ви́дѣти тя́ хотя́ще.
О́нъ же отвѣщáвъ речé къ ни́мъ: мáти моя́ и брáтiя моя́ сíи сýть, слы́шащiи слóво Бóжiе, и творя́щiи é.
И бы́сть во еди́нъ от днíй, тóй влѣ́зе въ корáбль и ученицы́ егó: и речé къ ни́мъ: прéйдемъ на о́нъ пóлъ éзера. И поидóша.
Идýщымъ же и́мъ, ýспе. И сни́де бýря вѣ́треная въ éзеро, и скончавáхуся, и въ бѣдѣ́ бѣ́ху.
И пристýпльше воздвигóша егó, глагóлюще: настáвниче, настáвниче, погибáемъ. О́нъ же востáвъ запрети́ вѣ́тру и волнéнiю вóдному: и улегóста, и бы́сть тишинá.
Речé же и́мъ: гдѣ́ éсть вѣ́ра вáша? Убоя́вшеся же чуди́шася, глагóлюще дрýгъ ко дрýгу: ктó ýбо сéй éсть, я́ко и вѣ́тромъ повелѣвáетъ и водѣ́, и послýшаютъ егó?
И преидóша во странý гадари́нску, я́же éсть объ о́нъ пóлъ Галилéи.
Изшéдшу же емý на зéмлю, срѣ́те егó мýжъ нѣ́кiй от грáда, и́же имя́ше бѣ́сы от лѣ́тъ мнóгихъ, и въ ри́зу не облачáшеся, и во хрáмѣ не живя́ше, но во гробѣ́хъ.
Узрѣ́въ же Иисýса и возопи́въ, припадé къ немý, и глáсомъ вéлiимъ речé: чтó мнѣ́ и тебѣ́, Иисýсе Сы́не Бóга вы́шняго? молю́ся ти́, не мýчи менé.
Повелѣ́ бо дýхови нечи́стому изы́ти от человѣ́ка: от мнóгихъ бо лѣ́тъ восхищáше егó: и вя́заху егó ýзы [желѣ́зны] и пýты, стрегýще егó: и растерзáя ýзы, гони́мь бывáше бѣ́сомъ сквозѣ́ пусты́ни.
Вопроси́ же егó Иисýсъ, глагóля: чтó ти́ éсть и́мя? О́нъ же речé: легеóнъ: я́ко бѣ́си мнóзи внидóша вóнь.
И моля́ху егó, да не повели́тъ и́мъ въ бéздну ити́.
Бѣ́ же тý стáдо свинéй мнóго пасóмо въ горѣ́: и моля́ху егó, да повели́тъ и́мъ въ ты́ вни́ти. И повелѣ́ и́мъ.
Изшéдше же бѣ́си от человѣ́ка, внидóша во свинiя́: и устреми́ся стáдо по брéгу въ éзеро, и истопé.
Ви́дѣвше же пасýщiи бы́вшее, бѣжáша, и возвѣсти́ша во грáдѣ и въ сéлѣхъ.
Изыдóша же ви́дѣти бы́вшее: и прiидóша ко Иисýсови и обрѣтóша человѣ́ка сѣдя́ща, изъ негóже бѣ́си изыдóша, оболчéна и смы́сляща, при ногý Иисýсову: и убоя́шася.
Возвѣсти́ша же и́мъ ви́дѣвшiи, кáко спасéся бѣсновáвыйся.
И моли́ егó вéсь нарóдъ страны́ гадари́нскiя отити́ от ни́хъ, я́ко стрáхомъ вéлiимъ одержи́ми бѣ́ху. О́нъ же влѣ́зъ въ корáбль, возврати́ся.
Моля́шеся же емý мýжъ, изъ негóже изыдóша бѣ́си, да бы́ съ ни́мъ бы́лъ. Отпусти́ же егó Иисýсъ, глагóля:
возврати́ся въ дóмъ твóй и повѣ́дай, ели́ка ти́ сотвори́ Бóгъ. И и́де, по всемý грáду проповѣ́дая, ели́ка сотвори́ емý Иисýсъ.
Бы́сть же егдá возврати́ся Иисýсъ, прiя́тъ егó нарóдъ: бѣ́ху бо вси́ чáюще егó.
И сé прiи́де мýжъ, емýже и́мя Иаи́ръ, и тóй кня́зь сóнмищу бѣ́. И пáдъ при ногý Иисýсову, моля́ше егó вни́ти въ дóмъ свóй:
я́ко дщи́ единорóдна бѣ́ емý, я́ко лѣ́тъ двоюнáдесяте, и тá умирáше. Егдá же идя́ше, нарóди угнѣтáху егó.
И женá сýщи въ точéнiи крóве от двоюнáдесяте лѣ́ту, я́же врачéмъ издáвши всé имѣ́нiе, [и] не возмóже ни от еди́наго исцѣлѣ́ти:
[и] пристýпльши созади́, коснýся крáя ри́зъ егó: и áбiе стá тóкъ крóве ея́.
И речé Иисýсъ: ктó éсть коснýвыйся мнѣ́? Отметáющымся же всѣ́мъ, речé пéтръ и и́же съ ни́мъ: настáвниче, нарóди одержáтъ тя́ и гнѣтýтъ, и глагóлеши: ктó éсть коснýвыйся мнѣ́?
Иисýсъ же речé: прикоснýся мнѣ́ нѣ́кто: áзъ бо чýхъ си́лу изшéдшую изъ менé.
Ви́дѣвши же женá, я́ко не утаи́ся, трепéщущи прiи́де, и пáдши предъ ни́мъ, ея́же рáди вины́ прикоснýся емý, повѣ́да емý предъ всѣ́ми людьми́, и я́ко исцѣлѣ́ áбiе.
О́нъ же речé éй: дерзáй дщи́, вѣ́ра твоя́ спасé тя: иди́ въ ми́рѣ.
Ещé емý глагóлющу, прiи́де нѣ́кiй от архисинагóга, глагóля емý, я́ко ýмре дщи́ твоя́: не дви́жи учи́теля.
Иисýсъ же слы́шавъ отвѣщá емý, глагóля: не бóйся, тóкмо вѣ́руй, и спасéна бýдетъ.
Пришéдъ же въ дóмъ, не остáви ни еди́наго вни́ти, тóкмо Петрá и Иоáнна и Иáкова, и отцá отрокови́цы, и мáтере.
Плáкахуся же вси́ и рыдáху ея́. О́нъ же речé: не плáчитеся: не ýмре [бо], но спи́тъ.
И ругáхуся емý, вѣ́дяще, я́ко ýмре.
О́нъ же изгнáвъ вóнъ всѣ́хъ, и éмъ за рýку ея́, возгласи́, глагóля: отрокови́це, востáни.
И возврати́ся дýхъ ея́, и воскрéсе áбiе: и повелѣ́ дáти éй я́сти.
И диви́стася роди́теля ея́. О́нъ же повелѣ́ и́ма никомýже повѣ́дати бы́вшаго.

Евангелие от Луки, 9

Созвáвъ же обанáдесяте, дадé и́мъ си́лу и влáсть на вся́ бѣ́сы, и недýги цѣли́ти:
и послá и́хъ проповѣ́дати цáрствiе Бóжiе и исцѣли́ти боля́щыя.
И речé къ ни́мъ: ничесóже возми́те на пýть: ни жезлá, ни пи́ры, ни хлѣ́ба, ни сребрá, ни по двѣмá ри́зама имѣ́ти:
и въ óньже дóмъ вни́дете, тý пребывáйте и оттýду исходи́те:
и ели́цы áще не прiéмлютъ вáсъ, исходя́ще от грáда тогó, и прáхъ от нóгъ вáшихъ оттряси́те, во свидѣ́телство на ня́.
Исходя́ще же прохождáху сквозѣ́ вéси, благовѣствýюще и исцѣля́юще всю́ду.
Слы́ша же И́родъ четвертовлáстникъ бывáющая от негó вся́ и недоумѣвáшеся: занé глагóлемо бѣ́ от нѣ́кихъ, я́ко Иоáннъ востá от мéртвыхъ:
от инѣ́хъ же, я́ко илiá яви́ся: от други́хъ же, я́ко прорóкъ еди́нъ от дрéвнихъ воскрéсе.
И речé И́родъ: Иоáнна áзъ усѣ́кнухъ: ктó же éсть сéй, о нéмже áзъ слы́шу таковáя? И искáше ви́дѣти егó.
И возврáщшеся апóстоли повѣ́даша емý, ели́ка сотвори́ша: и пои́мъ и́хъ, отъи́де еди́нъ {осóбь} на мѣ́сто пýсто грáда, нарицáемаго Виѳсаи́да.
Нарóди же разумѣ́вше, по нéмъ идóша: и прiéмъ и́хъ, глагóлаше и́мъ о цáрствiи Бóжiи и трéбующыя исцѣлéнiя цѣля́ше.
Дéнь же начáтъ прекланя́тися. Пристýпльше же обанáдесяте рекóша емý: отпусти́ нарóдъ, да шéдше во окрéстныя вéси и сéла витáютъ и обря́щутъ брáшно: я́ко здѣ́ въ пýстѣ мѣ́стѣ есмы́.
Речé же къ ни́мъ: дади́те и́мъ вы́ я́сти. Они́ же рѣ́ша: нѣ́сть у нáсъ вя́щше, тóкмо пя́ть хлѣ́бъ и ры́бѣ двѣ́, áще ýбо не шéдше мы́ кýпимъ во вся́ лю́ди сiя́ брáшна.
Бѣ́ху бо мужéй я́ко пя́ть ты́сящъ. Речé же ко ученикóмъ свои́мъ: посади́те и́хъ на кýпы по пяти́десятъ.
И сотвори́ша тáко и посади́ша и́хъ вся́.
Прiи́мъ же пя́ть хлѣ́бъ и óбѣ ры́бѣ, воззрѣ́въ на нéбо, благослови́ и́хъ, и преломи́, и дая́ше ученикóмъ предложи́ти нарóду.
И ядóша и насы́тишася вси́: и взя́ша избы́вшыя и́мъ укрýхи кóшя дванáдесяте.
И бы́сть егдá моля́шеся еди́нъ, съ ни́мъ бѣ́ху ученицы́: и вопроси́ и́хъ, глагóля: когó мя глагóлютъ нарóди бы́ти?
Они́ же отвѣщáвше рѣ́ша: Иоáнна крести́теля: инíи же илiю́: друзíи же, я́ко прорóкъ нѣ́кiй от дрéвнихъ воскрéсе.
Речé же и́мъ: вы́ же когó мя глагóлете бы́ти? Отвѣщáвъ же пéтръ речé: Христá Бóжiя.
О́нъ же запрéщь и́мъ, повелѣ́ никомýже глагóлати сегó,
рéкъ, я́ко подобáетъ Сы́ну человѣ́ческому мнóго пострадáти, и искушéну {отвéржену} бы́ти от стáрецъ и архiерéй и кни́жникъ, и убiéну бы́ти, и въ трéтiй дéнь востáти.
Глагóлаше же ко всѣ́мъ: áще ктó хóщетъ по мнѣ́ ити́, да отвéржется себé, и вóзметъ крéстъ свóй, и послѣ́дуетъ ми́.
И́же бо áще хóщетъ дýшу свою́ спасти́, погýбитъ ю́: а и́же погýбитъ дýшу свою́ менé рáди, сéй спасéтъ ю́.
Чтó бо пóльзы и́мать человѣ́къ, прiобрѣ́тъ мíръ вéсь, себé же погуби́въ или́ оттщети́въ?
И́же бо áще постыди́тся менé и мои́хъ словéсъ, сегó Сы́нъ человѣ́ческiй постыди́тся, егдá прiи́детъ во слáвѣ своéй и óтчей и святы́хъ áнгелъ.
Глагóлю же вáмъ вои́стинну: сýть нѣ́цыи от здѣ́ стоя́щихъ, и́же не и́мутъ вкуси́ти смéрти, дóндеже ви́дятъ цáрствiе Бóжiе.
Бы́сть же по словесѣ́хъ си́хъ я́ко днíй óсмь, и поéмъ Петрá и Иоáнна и Иáкова, взы́де на горý помоли́тися.
И бы́сть егдá моля́шеся, видѣ́нiе лицá егó и́но, и одѣя́нiе егó бѣлó блистáяся.
И сé мýжа двá съ ни́мъ глагóлюща, я́же бѣ́ста Моисéй и илiá,
я́вльшася во слáвѣ, глагóласта же исхóдъ егó, егóже хотя́ше скончáти во Иерусали́мѣ.
Пéтръ же и сýщiи съ ни́мъ бя́ху отягчéни снóмъ: убýждшеся же ви́дѣша слáву егó, и óба мýжа стоя́ща съ ни́мъ.
И бы́сть егдá разлучи́стася от негó, речé пéтръ ко Иисýсу: настáвниче, добрó éсть нáмъ здѣ́ бы́ти: и сотвори́мъ сѣ́ни три́, еди́ну тебѣ́, и еди́ну Моисéови, и еди́ну илiи́: не вѣ́дый, éже глагóлаше.
Сé же емý глагóлющу, бы́сть о́блакъ, и осѣни́ и́хъ: убоя́шася же, вшéдше во о́блакъ.
И глáсъ бы́сть изъ о́блака, глагóля: сéй éсть Сы́нъ мóй возлю́бленный, тогó послýшайте.
И егдá бы́сть глáсъ, обрѣ́теся Иисýсъ еди́нъ. И тíи умолчáша, и никомýже возвѣсти́ша въ ты́я дни́ ничесóже от тѣ́хъ, я́же ви́дѣша.
Бы́сть же въ прóчiй дéнь, сшéдшымъ и́мъ съ горы́, срѣ́те егó нарóдъ мнóгъ.
И сé мýжъ изъ нарóда возопи́, глагóля: учи́телю, молю́тися, при́зри на сы́на моегó, я́ко единорóденъ ми́ éсть:
и сé дýхъ éмлетъ егó, и внезáпу вопiéтъ, и пружáется {терзáетъ егó} съ пѣ́нами, и едвá отхóдитъ от негó, сокрушáя егó:
и моли́хся ученикóмъ твои́мъ, да ижденýтъ егó: и не возмогóша.
Отвѣщáвъ же Иисýсъ речé: о, рóде невѣ́рный и развращéнный, докóлѣ бýду въ вáсъ и терплю́ вы́? приведи́ [ми] сы́на твоегó сѣ́мо.
Ещé же грядýщу емý, повéрже егó бѣ́съ и стрясé. Запрети́ же Иисýсъ дýхови нечи́стому, и исцѣли́ óтрока, и вдадé егó отцý егó.
Дивля́хуся же вси́ о вели́чiи Бóжiи. Всѣ́мъ же чудя́щымся о всѣ́хъ, я́же творя́ше Иисýсъ, речé ко ученикóмъ свои́мъ:
вложи́те вы́ во ýшы вáши словесá сiя́: Сы́нъ бо человѣ́ческiй и́мать предáтися въ рýцѣ человѣ́честѣ.
Они́ же не разумѣ́ша глагóла сегó, бѣ́ бо прикровéнъ от ни́хъ, да не ощутя́тъ егó: и боя́хуся вопроси́ти егó о глагóлѣ сéмъ.
Вни́де же помышлéнiе въ ни́хъ, ктó и́хъ вя́щшiй бы бы́лъ.
Иисýсъ же вѣ́дый помышлéнiе сердéцъ и́хъ, прiéмъ отрочá, постáви é у себé
и речé и́мъ: и́же áще прiи́метъ сié отрочá во и́мя моé, менé прiéмлетъ: и и́же áще менé прiéмлетъ, прiéмлетъ послáвшаго мя́: и́же бо мéншiй éсть въ вáсъ, сéй éсть вели́къ.
Отвѣщáвъ же Иоáннъ речé: настáвниче, ви́дѣхомъ нѣ́коего о и́мени твоéмъ изгоня́ща бѣ́сы: и возбрани́хомъ емý, я́ко вослѣ́дъ не хóдитъ съ нáми.
И речé къ немý Иисýсъ: не брани́те: и́же бо нѣ́сть на вы́, по вáсъ éсть.
Бы́сть же егдá скончавáхуся днíе восхождéнiю егó, и тóй утверди́ лицé своé ити́ во Иерусали́мъ:
и послá вѣ́стники предъ лицéмъ свои́мъ: и изшéдше внидóша въ вéсь самаря́нску, я́ко да уготóвятъ емý:
и не прiя́ша егó, я́ко лицé егó бѣ́ грядýщее во Иерусали́мъ.
Ви́дѣвша же ученикá егó Иáковъ и Иоáннъ, рѣ́ста: Гóсподи, хóщеши ли, речéма, да óгнь сни́детъ съ небесé и потреби́тъ и́хъ, я́коже и илiá сотвори́?
Обрáщься же запрети́ и́ма, и речé: не вѣ́ста, кóего дýха естá вы́:
Сы́нъ бо человѣ́ческiй не прiи́де дýшъ человѣ́ческихъ погуби́ти, но спасти́: и идóша во и́ну вéсь.
Бы́сть же идýщымъ и́мъ по пути́, речé нѣ́кiй къ немý: идý по тебѣ́, áможе áще и́деши, Гóсподи.
И речé емý Иисýсъ: ли́си я́звины и́мутъ, и пти́цы небéсныя гнѣ́зда: Сы́нъ же человѣ́ческiй не и́мать гдѣ́ главý подклони́ти.
Речé же ко другóму: ходи́ вслѣ́дъ менé. О́нъ же речé: Гóсподи, повели́ ми́, [да] шéдъ прéжде погребý отцá моегó.
Речé же емý Иисýсъ: остáви мéртвыя погребсти́ своя́ мертвецы́: ты́ же шéдъ возвѣщáй цáрствiе Бóжiе.
Речé же и другíй: идý по тебѣ́, Гóсподи: прéжде же повели́ ми́ отвѣщáтися, и́же сýть {попрости́тися съ сýщими} въ домý моéмъ.
Речé же къ немý Иисýсъ: никтóже возлóжь рýку свою́ на рáло и зря́ вспя́ть, упрáвленъ éсть въ цáрствiи Бóжiи.

Евангелие от Луки, 10

По си́хъ же яви́ Госпóдь и инѣ́хъ сéдмьдесятъ, и послá и́хъ по двѣмá предъ лицéмъ свои́мъ во вся́къ грáдъ и мѣ́сто, áможе хотя́ше сáмъ ити́:
глагóлаше же къ ни́мъ: жáтва ýбо мнóга, дѣ́лателей же мáло: моли́теся ýбо Гóсподи́ну жáтвѣ, да изведéтъ дѣ́латели на жáтву свою́.
Иди́те: сé áзъ посылáю вы́ я́ко áгнцы посредѣ́ волкóвъ.
Не носи́те влагáлища, ни пи́ры, ни сапóгъ и ни когóже на пути́ цѣлýйте.
Вóньже áще дóмъ вни́дете, пéрвѣе глагóлите: ми́ръ дóму семý:
и áще ýбо бýдетъ тý сы́нъ ми́ра, почíетъ на нéмъ ми́ръ вáшъ: áще ли же ни́, къ вáмъ возврати́тся.
Въ тóмъ же домý пребывáйте, ядýще и пiю́ще, я́же сýть у ни́хъ: достóинъ бо éсть дѣ́латель мзды́ своея́: не преходи́те изъ дóму въ дóмъ.
И вóньже áще грáдъ вхóдите, и прiéмлютъ вы́, яди́те предлагáемая вáмъ:
и исцѣли́те недýжныя, и́же сýть въ нéмъ, и глагóлите и́мъ: прибли́жися на вы́ цáрствiе Бóжiе.
И вóньже áще грáдъ вхóдите, и не прiéмлютъ вáсъ, изшéдше на распýтiя егó, рцы́те:
и прáхъ прилѣ́пшiй нáмъ от грáда вáшего, оттрясáемъ вáмъ. Обáче сié вѣ́дите, я́ко прибли́жися на вы́ цáрствiе Бóжiе.
Глагóлю вáмъ, я́ко Cодóмляномъ въ дéнь тóй отрáднѣе бýдетъ, нéже грáду томý.
Гóре тебѣ́, хорази́не, гóре тебѣ́, Виѳсаи́до: я́ко áще въ ти́рѣ и Сидóнѣ бы́ша си́лы бы́ли бы́вшыя въ вáю, дрéвле ýбо во врéтищи и пéпелѣ сѣдя́ще покая́лися бы́ша:
обáче ти́ру и Сидóну отрáднѣе бýдетъ на судѣ́, нéже вáма.
И ты́, капернаýме, и́же до небéсъ вознесы́йся, до áда низведéшися.
Слýшаяй вáсъ, менé слýшаетъ: и отметáяйся вáсъ, менé отметáется: отметáяйся же менé, отметáется послáвшаго мя́.
Возврати́шася же сéдмьдесятъ съ рáдостiю, глагóлюще: Гóсподи, и бѣ́си повинýются нáмъ о и́мени твоéмъ.
Речé же и́мъ: ви́дѣхъ сатанý я́ко мóлнiю съ небесé спáдша.
Сé, даю́ вáмъ влáсть наступáти на змiю́ и на скорпíю и на всю́ си́лу врáжiю: и ничесóже вáсъ вреди́тъ.
Обáче о сéмъ не рáдуйтеся, я́ко дýси вáмъ повинýются: рáдуйтеся же, я́ко именá вáша напи́сана сýть на небесѣ́хъ.
Въ тóй чáсъ возрáдовася дýхомъ Иисýсъ и речé: исповѣ́даютися, óтче, Гóсподи небесé и земли́, я́ко утаи́лъ еси́ сiя́ от премýдрыхъ и разýмныхъ, и откры́лъ еси́ тá младéнцемъ: éй, óтче, я́ко тáко бы́сть благоволéнiе предъ тобóю.
И́ обрáщься ко ученикóмъ, речé: вся́ мнѣ́ преданá бы́ша от Отцá моегó: и никтóже вѣ́сть, ктó éсть Сы́нъ, тóкмо Отéцъ: и ктó éсть Отéцъ, тóкмо Сы́нъ, и емýже áще хóщетъ Сы́нъ откры́ти.
И́ обрáщься ко ученикóмъ, еди́нъ {осóбь} речé: блажéни óчи ви́дящiи, я́же ви́дите:
глагóлю бо вáмъ, я́ко мнóзи прорóцы и цáрiе восхотѣ́ша ви́дѣти, я́же вы́ ви́дите, и не ви́дѣша: и слы́шати, я́же слы́шите, и не слы́шаша.
И сé, закóнникъ нѣ́кiй востá, искушáя егó и глагóля: учи́телю, чтó сотвори́въ, живóтъ вѣ́чный наслѣ́дую?
О́нъ же речé къ немý: въ закóнѣ чтó пи́сано éсть? кáко чтéши?
О́нъ же отвѣщáвъ речé: возлю́биши Гóспода Бóга твоегó от всегó сéрдца твоегó, и от всея́ души́ твоея́, и всéю крѣ́постiю твоéю, и всѣ́мъ помышлéнiемъ твои́мъ: и бли́жняго своегó я́ко сáмъ себé.
Речé же емý: прáво отвѣщáлъ еси́: сié сотвори́, и жи́въ бýдеши.
О́нъ же хотя́ оправди́тися сáмъ, речé ко Иисýсу: и ктó éсть бли́жнiй мóй?
Отвѣщáвъ же Иисýсъ речé: человѣ́къ нѣ́кiй схождáше от Иерусали́ма во иерихóнъ, и въ разбóйники впадé, и́же совлéкше егó, и я́звы возлóжше отидóша, остáвльше едвá жи́ва сýща.
По слýчаю же свящéнникъ нѣ́кiй схождáше путéмъ тѣ́мъ, и ви́дѣвъ егó, мимои́де.
Тáкожде же и леви́тъ, бы́въ на тóмъ мѣ́стѣ, пришéдъ и ви́дѣвъ, мимои́де.
Самаря́нинъ же нѣ́кто гряды́й, прiи́де надъ негó, и ви́дѣвъ егó, милосéрдова:
и пристýпль обвязá стрýпы егó, возливáя мáсло и винó: всади́въ же егó на свóй скóтъ, приведé егó въ гости́нницу, и прилѣжá емý:
и наýтрiя изшéдъ, изъе́мъ двá срéбреника, дадé гости́ннику, и речé емý: прилѣжи́ емý: и, éже áще прiиждивéши, áзъ егдá возвращýся, воздáмъ ти́.
Ктó ýбо от тѣ́хъ трiéхъ бли́жнiй мни́ттися бы́ти впáдшему въ разбóйники?
О́нъ же речé: сотвори́вый ми́лость съ ни́мъ. Речé же емý Иисýсъ: иди́, и ты́ твори́ тáкожде.
Бы́сть же ходя́щымъ и́мъ, и сáмъ вни́де въ вéсь нѣ́кую: женá же нѣ́кая и́менемъ мáрѳа прiя́тъ егó въ дóмъ свóй.
И сестрá éй бѣ́ нарицáемая Марíа, я́же и сѣ́дши при ногý Иисýсову, слы́шаше слóво егó.
Мáрѳа же мóлвяше о мнóзѣ слýжбѣ, стáвши же речé: Гóсподи, не брежéши ли, я́ко сестрá моя́ еди́ну мя́ остáви служи́ти? рцы́ ýбо éй, да ми́ помóжетъ.
Отвѣщáвъ же Иисýсъ речé éй: мáрѳо, мáрѳо, печéшися, и мóлвиши о мнóзѣ,
еди́но же éсть на потрéбу: Марíа же благýю чáсть избрá, я́же не отъи́мется от нея́.

Евангелие от Луки, 11

И бы́сть внегдá бы́ти емý на мѣ́стѣ нѣ́коемъ моля́щуся, [и] я́ко престá, речé нѣ́кiй от учени́къ егó къ немý: Гóсподи, научи́ ны моли́тися, я́коже и Иоáннъ научи́ ученики́ своя́.
Речé же и́мъ: егдá мóлитеся, глагóлите: óтче нáшъ, и́же на небесѣ́хъ, да святи́тся и́мя твоé: да прiи́детъ цáрствiе твоé: да бýдетъ вóля твоя́, я́ко на небеси́, и на земли́:
хлѣ́бъ нáшъ насýщный подавáй нáмъ на вся́къ дéнь:
и остáви нáмъ грѣхи́ нáшя, и́бо и сáми оставля́емъ вся́кому должникý нáшему: и не введи́ нáсъ во искушéнiе, но избáви нáсъ от лукáваго.
И речé къ ни́мъ: ктó от вáсъ и́мать дрýга, и и́детъ къ немý въ полýнощи, и речéтъ емý: дрýже, дáждь ми́ взаи́мъ три́ хлѣ́бы:
понéже дрýгъ прiи́де съ пýти ко мнѣ́, и не и́мамъ чесó предложи́ти емý.
И тóй извнýтрь отвѣщáвъ речéтъ: не твори́ ми труды́: ужé двéри затворены́ сýть, и дѣ́ти моя́ со мнóю на лóжи сýть: [и] не могý востáвъ дáти тебѣ́.
Глагóлю же вáмъ: áще и не дáстъ емý востáвъ, занé дрýгъ емý éсть: но за безóчьство егó, востáвъ дáстъ емý, ели́ка трéбуетъ.
И áзъ вáмъ глагóлю: проси́те, и дáстся вáмъ: ищи́те, и обря́щете: толцы́те, и отвéрзется вáмъ:
вся́къ бо прося́й прiéмлетъ, и ищя́й обрѣтáетъ, и толкýщему отвéрзется.
Котóраго же вáсъ отцá воспрóситъ сы́нъ хлѣ́ба, едá кáмень подáстъ емý? или́ ры́бы, едá въ ры́бы мѣ́сто змiю́ подáстъ емý?
или́ áще попрóситъ яицá, едá подáстъ емý скóрпiю?
А́ще ýбо вы́ зли́ сýще, умѣ́ете дая́нiя блáга дая́ти чáдомъ вáшымъ, кóльми пáче Отéцъ, и́же съ небесé, дáстъ Дýха святáго прося́щымъ у негó?
И бѣ́ изгоня́ бѣ́са, и тóй бѣ́ нѣ́мъ: бы́сть же бѣ́су изшéдшу, проглагóла нѣмы́й: и диви́шася нарóди.
Нѣ́цыи же от ни́хъ рѣ́ша: о веельзевýлѣ кня́зи бѣсóвстѣмъ изгóнитъ бѣ́сы.
Друзíи же искушáюще, знáменiя от негó искáху съ небесé.
О́нъ же вѣ́дый помышлéнiя и́хъ, речé и́мъ: вся́ко цáрство самó въ себѣ́ раздѣля́яся, запустѣ́етъ: и дóмъ на дóмъ, пáдаетъ.
А́ще же и сатанá сáмъ въ себѣ́ раздѣли́ся, кáко стáнетъ цáрство егó, я́коже глагóлете, о веельзевýлѣ изгоня́щя мя́ бѣ́сы.
А́ще же áзъ о веельзевýлѣ изгоню́ бѣ́сы, сы́нове вáши о кóмъ изгóнятъ? сегó рáди тíи бýдутъ вáмъ судiи́.
А́ще ли же о пéрстѣ Бóжiи изгоню́ бѣ́сы, ýбо пости́же на вáсъ цáрствiе Бóжiе.
Егдá крѣ́пкiй вооружи́вся храни́тъ свóй двóръ, во смирéнiи {въ ми́рѣ} сýть имѣ́нiя егó:
егдá же крѣ́плѣй егó нашéдъ побѣди́тъ егó, всé орýжiе егó вóзметъ, на нéже уповáше, и коры́сть егó раздаéтъ.
И́же нѣ́сть со мнóю, на мя́ éсть: и и́же не собирáетъ со мнóю, расточáетъ.
Егдá [же] нечи́стый дýхъ изы́детъ от человѣ́ка, прехóдитъ сквозѣ́ безвóдная мѣ́ста, ищя́ покóя: и не обрѣтáя, глагóлетъ: возвращýся въ дóмъ мóй, отню́дуже изыдóхъ.
И пришéдъ обря́щетъ и́ пометéнъ и укрáшенъ:
тогдá и́детъ и пóйметъ сéдмь други́хъ духóвъ гóршихъ себé, и вшéдше живýтъ тý: и бывáютъ послѣ́дняя человѣ́ку томý гóрша пéрвыхъ.
Бы́сть же егдá глагóлаше сiя́, воздви́гши нѣ́кая женá глáсъ от нарóда, речé емý: блажéно чрéво носи́вшее тя́, и сосцá, я́же еси́ ссáлъ.
О́нъ же речé: тѣ́мже ýбо блажéни слы́шащiи слóво Бóжiе и храня́щiи é.
Нарóдомъ же собирáющымся начáтъ глагóлати: рóдъ сéй лукáвъ éсть: знáменiя и́щетъ, и знáменiе не дáстся емý, тóкмо знáменiе Иóны прорóка:
я́коже бо бы́сть Иóна знáменiе Ниневи́томъ, тáко бýдетъ и Сы́нъ человѣ́ческiй рóду семý.
Цари́ца ю́жская востáнетъ на сýдъ съ мýжи рóда сегó, и осýдитъ и́хъ: я́ко прiи́де от конéцъ земли́ слы́шати премýдрость соломóнову: и сé мнóжае соломóна здѣ́.
Мýжiе Ниневи́тстiи востáнутъ на сýдъ съ рóдомъ си́мъ, и осýдятъ и́: я́ко покая́шася прóповѣдiю Иóниною: и сé мнóжае Иóны здѣ́.
Никтóже [ýбо] свѣти́лника вжéгъ, въ скрóвѣ полагáетъ, ни подъ спýдомъ, но на свѣ́щницѣ, да входя́щiи свѣ́тъ ви́дятъ.
Свѣти́лникъ тѣ́лу éсть óко: егдá ýбо óко твоé прóсто бýдетъ, всé тѣ́ло твоé свѣ́тло бýдетъ: егдá же лукáво бýдетъ, и тѣ́ло твоé тéмно:
блюди́ ýбо, едá свѣ́тъ, и́же въ тебѣ́, тмá éсть.
А́ще бо тѣ́ло твоé всé свѣ́тло, не имы́й нѣ́кiя чáсти тéмны, бýдетъ свѣ́тло всé, я́коже егдá свѣти́лникъ блистáнiемъ просвѣщáетъ тя́.
Егдá же глагóлаше, моля́ше егó фарисéй нѣ́кiй, да обѣ́дуетъ у негó: вшéдъ же возлежé.
Фарисéй же ви́дѣвъ диви́ся, я́ко не прéжде крести́ся {не пéрвѣе умы́ся} прéжде обѣ́да.
Речé же Госпóдь къ немý: ны́нѣ вы́, фарисéе, внѣ́шняя сткля́ницы и блю́да очищáете, внýтреннее же вáше пóлно граблéнiя éсть и лукáвства.
Безýмнiи, не и́же ли сотвори́ внѣ́шнее, и внýтреннее сотвори́лъ éсть?
Обáче от сýщихъ дади́те ми́лостыню: и сé вся́ чи́ста вáмъ бýдутъ.
Но гóре вáмъ фарисéомъ, я́ко одеся́тствуете от мя́твы и пигáна и вся́каго зéлiя, и мимохóдите сýдъ и любо́вь Бóжiю: сiя́ подобáше сотвори́ти, и óнѣхъ не оставля́ти.
Гóре вáмъ фарисéомъ, я́ко лю́бите предсѣдáнiя на сóнмищехъ и цѣловáнiя на тóржищихъ.
Гóре вáмъ, кни́жницы и фарисéе лицемѣ́ри, я́ко естé я́ко грóби невѣ́доми, и человѣ́цы ходя́щiи верхý не вѣ́дятъ.
Отвѣщáвъ же нѣ́кiй от закóнникъ речé емý: учи́телю, сiя́ глагóля, и нáмъ досаждáеши.
О́нъ же речé: и вáмъ закóнникомъ гóре, я́ко наклáдаете на человѣ́ки бременá не удóбь носи́ма, и сáми еди́нѣмъ перстóмъ вáшимъ не прикасáетеся бременéмъ.
Гóре вáмъ, я́ко зи́ждете грóбы прорóкъ, отцы́ же вáши изби́ша и́хъ.
У́бо свидѣ́телствуете и соблаговоли́те дѣлóмъ отéцъ вáшихъ: я́ко тíи ýбо изби́ша и́хъ, вы́ же зи́ждете и́хъ грóбы.
Сегó рáди и премýдрость Бóжiя речé: послю́ въ ни́хъ {къ ни́мъ} прорóки и апóстолы, и от ни́хъ убiю́тъ и изженýтъ:
да взы́щется крóвь всѣ́хъ прорóкъ, проливáемая от сложéнiя мíра, от рóда сегó,
от крóве А́веля дáже до крóве захáрiи, поги́бшаго мéжду олтарéмъ и хрáмомъ: éй, глагóлю вáмъ, взы́щется от рóда сегó.
Гóре вáмъ закóнникомъ, я́ко взя́сте клю́чь разумѣ́нiя: сáми не внидóсте, и входя́щымъ возбрани́сте.
Глагóлющу же емý сiя́ къ ни́мъ, начáша кни́жницы и фарисéе бѣ́днѣ {зѣлó} гнѣ́ватися нáнь и престáти {вопрошáти} егó о мнóзѣ,
лáюще егó {навѣ́тующе нáнь}, и́щуще улови́ти нѣ́что от ýстъ егó, да нáнь возглагóлютъ.

Евангелие от Луки, 12

О ни́хже {междý тѣ́мъ} собрáвшымся тмáмъ нарóда, я́ко попирáти дрýгъ дрýга, начáтъ глагóлати ученикóмъ свои́мъ пéрвѣе: внемли́те себѣ́ от квáса фарисéйска, éже éсть лицемѣ́рiе.
Ничтóже бо покровéно éсть, éже не откры́ется, и тáйно, éже не уразумѣ́ется:
занé, ели́ка во тмѣ́ рѣ́сте, во свѣ́тѣ услы́шатся: и éже ко ýху глагóласте во хрáмѣхъ, проповѣ́стся на крóвѣхъ.
Глагóлю же вáмъ другóмъ свои́мъ: не убóйтеся от убивáющихъ тѣ́ло и потóмъ не мóгущихъ ли́шше чтó сотвори́ти:
сказýю же вáмъ, когó убóйтеся: убóйтеся имýщаго влáсть по убiéнiи воврещи́ въ дéбрь óгненную: éй, глагóлю вáмъ, тогó убóйтеся.
Не пя́ть ли пти́цъ цѣни́тся пѣ́нязема двѣмá, и ни еди́на от ни́хъ нѣ́сть забвéна предъ Бóгомъ.
Но и влáси главы́ вáшея вси́ изочтéни сýть. Не убóйтеся ýбо: мнóзѣхъ пти́цъ ýнши естé вы́.
Глагóлю же вáмъ: вся́къ, и́же áще исповѣ́сть мя́ предъ человѣ́ки, и Сы́нъ человѣ́ческiй исповѣ́сть егó предъ áнгелы Бóжiими:
а отвергíйся менé предъ человѣ́ки, отвéрженъ бýдетъ предъ áнгелы Бóжiими.
И вся́къ и́же речéтъ слóво на Сы́на человѣ́ческаго, остáвится емý: а на святáго Дýха хули́вшему не остáвится.
Егдá же приведýтъ вы́ на собóрища и влáсти и влады́чества, не пецы́теся, кáко или́ чтó отвѣщáете, или́ чтó речéте:
святы́й бо Дýхъ научи́тъ вы́ въ тóй чáсъ, я́же подобáетъ рещи́.
Речé же емý нѣ́кiй от нарóда: учи́телю, рцы́ брáту моемý раздѣли́ти со мнóю достоя́нiе.
О́нъ же речé емý: человѣ́че, ктó мя́ постáви судiю́ или́ дѣли́теля надъ вáми?
Речé же къ ни́мъ: блюди́те и храни́теся от лихои́мства: я́ко не от избы́тка {внегдá избы́точествовати} комý живóтъ егó éсть от имѣ́нiя егó.
Речé же при́тчу къ ни́мъ, глагóля: человѣ́ку нѣ́коему богáту угобзи́ся ни́ва:
и мы́сляше въ себѣ́, глагóля: чтó сотворю́, я́ко не и́мамъ гдѣ́ собрáти плодóвъ мои́хъ?
И речé: сé сотворю́: разорю́ жи́тницы моя́, и бóлшыя сози́жду, и соберý тý вся́ жи́та моя́ и благáя моя́:
и рекý души́ моéй: душé, и́маши мнóга блáга, лежáща на лѣ́та мнóга: почивáй, я́ждь, пíй, весели́ся.
Речé же емý Бóгъ: безýмне, въ сiю́ нóщь дýшу твою́ истя́жутъ от тебé: а я́же уготóвалъ еси́, комý бýдутъ?
Тáко собирáяй себѣ́, а не въ Бóга богатѣ́я.
Речé же ко ученикóмъ свои́мъ: сегó рáди глагóлю вáмъ: не пецы́теся душéю вáшею, чтó я́сте: ни тѣ́ломъ, во чтó облечéтеся:
душá бóлши éсть пи́щи, и тѣ́ло одéжды.
Смотри́те врáнъ, я́ко не сѣ́ютъ, ни жнýтъ: и́мже нѣ́сть сокрóвища, ни жи́тницы, и Бóгъ питáетъ и́хъ: кóльми пáче вы́ естé лýчши пти́цъ?
Ктó же от вáсъ пекíйся мóжетъ приложи́ти вóзрасту своемý лáкоть еди́нъ?
А́ще ýбо ни мáла чесó мóжете, чтó о прóчихъ печéтеся?
Смотри́те кри́ны, кáко растýтъ: не труждáются, ни прядýтъ: глагóлю же вáмъ, я́ко ни соломóнъ во всéй слáвѣ своéй облечéся, я́ко еди́нъ от си́хъ.
А́ще же травý, на селѣ́ днéсь сýщу и ýтрѣ въ пéщь вмéщему, Бóгъ тáко одѣвáетъ: кóльми пáче вáсъ, маловѣ́ри?
И вы́ не ищи́те, чтó я́сте, или́ чтó пiéте: и не возноси́теся:
всѣ́хъ бо си́хъ язы́цы мíра сегó и́щутъ: вáшъ же Отéцъ вѣ́сть, я́ко трéбуете си́хъ.
Обáче ищи́те цáрствiя Бóжiя, и сiя́ вся́ приложáтся вáмъ.
Не бóйся, мáлое стáдо: я́ко благоизвóли Отéцъ вáшъ дáти вáмъ цáрство.
Продади́те имѣ́нiя вáша и дади́те ми́лостыню. Сотвори́те себѣ́ влагáлища неветшáюща, сокрóвище неоскудѣ́емо на небесѣ́хъ, идѣ́же тáть не приближáется, ни мóль растлѣвáетъ.
Идѣ́же бо сокрóвище вáше, тý и сéрдце вáше бýдетъ.
Да бýдутъ чрéсла вáша препоя́сана, и свѣти́лницы горя́щiи:
и вы́ подóбни человѣ́комъ чáющымъ гóспода своегó, когдá возврати́тся от брáка, да пришéдшу и толкнýвшу, áбiе отвéрзутъ емý.
Блажéни раби́ тíи, и́хже пришéдъ госпóдь обря́щетъ бдя́щихъ: ами́нь глагóлю вáмъ, я́ко препоя́шется и посáдитъ и́хъ, и минýвъ {приступи́въ} послýжитъ и́мъ.
И áще прiи́детъ во вторýю стрáжу, и въ трéтiю стрáжу прiи́детъ, и обря́щетъ [и́хъ] тáко, блажéни сýть раби́ тíи.
Сé же вѣ́дите, я́ко áще бы вѣ́далъ господи́нъ хрáмины, въ кíй чáсъ тáть прiи́детъ, бдѣ́лъ ýбо бы, и не бы́ дáлъ подкопáти дóму своегó.
И вы́ ýбо бýдите готóви: я́ко, вóньже чáсъ не мни́те, Сы́нъ человѣ́ческiй прiи́детъ.
Речé же емý пéтръ: Гóсподи, къ нáмъ ли при́тчу сiю́ глагóлеши, или́ ко всѣ́мъ?
Речé же Госпóдь: ктó ýбо éсть вѣ́рный строи́тель и мýдрый, егóже постáвитъ госпóдь надъ чéлядiю своéю, дая́ти во врéмя житомѣ́рiе?
Блажéнъ рáбъ тóй, егóже пришéдъ госпóдь егó обря́щетъ творя́ща тáко:
вои́стинну глагóлю вáмъ, я́ко надъ всѣ́мъ имѣ́нiемъ свои́мъ постáвитъ егó.
А́ще же речéтъ рáбъ тóй въ сéрдцы своéмъ: косни́тъ господи́нъ мóй прiити́: и начнéтъ би́ти рабы́ и рабы́ни, я́сти же и пи́ти и упивáтися:
прiи́детъ господи́нъ рабá тогó въ дéнь, вóньже не чáетъ, и въ чáсъ, вóньже не вѣ́сть: и растéшетъ егó, и чáсть егó съ невѣ́рными положи́тъ.
Тóй же рáбъ вѣ́дѣвый вóлю господи́на своегó, и не уготóвавъ, ни сотвори́въ по вóли егó, бiéнъ бýдетъ мнóго:
невѣ́дѣвый же, сотвори́въ же достóйная рáнамъ, бiéнъ бýдетъ мáло. Вся́кому же, емýже данó бýдетъ мнóго, мнóго взы́щется от негó: и емýже предáша мнóжайше, мнóжайше прóсятъ {истя́жутъ} от негó.
Огня́ прiидóхъ воврещи́ на зéмлю, и чтó хощý, áще ужé возгорѣ́ся?
Крещéнiемъ же и́мамъ крести́тися, и кáко удержýся, дóндеже скончáются?
Мнитé ли, я́ко ми́ръ прiидóхъ дáти на зéмлю? ни́, глагóлю вáмъ, но раздѣлéнiе.
Бýдутъ бо отсéлѣ пя́ть во еди́номъ домý раздѣлéни, трié на двá, и двá на три́:
раздѣли́тся отéцъ на сы́на, и сы́нъ на отцá: мáти на дщéрь, и дщи́ на мáтерь: свекры́ на невѣ́сту свою́, и невѣ́ста на свекрóвь свою́.
Глагóлаше же и нарóдомъ: егдá ýзрите о́блакъ восходя́щь от зáпада, áбiе глагóлете: тýча грядéтъ: и бывáетъ тáко.
И егдá ю́гъ вѣ́ющь, глагóлете: знóй бýдетъ: и бывáетъ.
Лицемѣ́ри, лицé нéбу и земли́ вѣ́сте искушáти: врéмене же сегó кáко не искушáете?
Чтó же и о себѣ́ не сýдите прáведное?
Егдá бо грядéши съ сопéрникомъ твои́мъ ко кня́зю, на пути́ дáждь дѣ́ланiе {потщи́ся} избы́ти от негó: да не кáко привлечéтъ тебé къ судiи́, и судiя́ тя́ предáстъ слузѣ́, и слугá всади́тъ тя́ въ темни́цу:
глагóлю тебѣ́: не изы́деши оттýду, дóндеже и послѣ́днюю мѣ́дницу воздáси.

Евангелие от Луки, 13

Прiидóша же нѣ́цыи въ тó врéмя, повѣ́дающе емý о Галилéехъ, и́хже крóвь пилáтъ смѣси́ съ жéртвами и́хъ.
И отвѣщáвъ Иисýсъ речé и́мъ: мнитé ли, я́ко Галилéане сíи грѣ́шнѣйши пáче всѣ́хъ Галилéанъ бя́ху, я́ко тáко пострáдаша?
Ни́, глагóлю вáмъ: но áще не покáетеся, вси́ тáкожде поги́бнете.
Или́ óни осмьнáдесяте, на ни́хже падé стóлпъ Силоáмскiй и поби́ и́хъ, мни́те ли, я́ко тíи дóлжнѣйши бя́ху пáче всѣ́хъ живýщихъ во Иерусали́мѣ?
Ни́, глагóлю вáмъ: но áще не покáетеся, вси́ тáкожде поги́бнете.
Глагóлаше же сiю́ при́тчу: смокóвницу имя́ше нѣ́кiй въ виногрáдѣ своéмъ всажденý: и прiи́де ищя́ плодá на нéй, и не обрѣ́те:
речé же къ винарéви: сé трéтiе лѣ́то, отнéлиже прихождý ищя́ плодá на смокóвницѣ сéй, и не обрѣтáю: посѣцы́ ю́ [ýбо], вскýю и зéмлю упражня́етъ?
О́нъ же отвѣщáвъ речé емý: гóсподи, остáви ю́ и сé лѣ́то, дóндеже окопáю о́крестъ ея́ и осы́плю гнóемъ:
и áще ýбо сотвори́тъ плóдъ: áще ли же ни́, во грядýщее посѣчéши ю́.
Бя́ше же учя́ на еди́номъ от сóнмищъ въ суббóту:
и сé женá бѣ́ имýщи дýхъ недýженъ лѣ́тъ осмьнáдесять, и бѣ́ сля́ка и не могýщи восклони́тися отню́дъ.
Ви́дѣвъ же ю́ Иисýсъ, пригласи́ и речé éй: жéно, отпущенá еси́ от недýга твоегó.
И возложи́ на ню́ рýцѣ: и áбiе прострéся, и слáвляше Бóга.
Отвѣщáвъ же старѣ́йшина собóру, негодýя, занé въ суббóту исцѣли́ [ю́] Иисýсъ, глагóлаше нарóду: шéсть днíй éсть, въ ня́же достóитъ дѣ́лати: въ ты́я ýбо приходя́ще цѣли́теся, а не въ дéнь суббóтный.
Отвѣщá [же] ýбо емý Госпóдь и речé: лицемѣ́ре, кóждо вáсъ въ суббóту не отрѣшáетъ ли своегó волá или́ ослá от я́слiй, и вéдъ напая́етъ,
сiю́ же дщéрь Авраáмлю сýщу, ю́же связá сатанá сé осмоенáдесяте лѣ́то, не достóяше ли разрѣши́тися éй от ю́зы сея́ въ дéнь суббóтный?
И сiя́ емý глагóлющу, стыдя́хуся вси́ противля́ющiися емý: и вси́ лю́дiе рáдовахуся о всѣ́хъ слáвныхъ бывáющихъ от негó.
Глагóлаше же: комý подóбно éсть цáрствiе Бóжiе? и комý уподóблю é?
Подóбно éсть зéрну горýшну, éже прiéмъ человѣ́къ ввéрже въ вертогрáдъ свóй: и возрастé, и бы́сть дрéво вéлiе, и пти́цы небéсныя всели́шася въ вѣ́твiе егó.
Пáки речé: комý уподóблю цáрствiе Бóжiе?
подóбно éсть квáсу, егóже прiéмши женá, скры́ въ сáтѣхъ трiéхъ муки́, дóндеже вски́се всé.
И прохождáше сквозѣ́ грáды и вéси, учя́ и шéствiе творя́ во Иерусали́мъ.
Речé же нѣ́кiй емý: Гóсподи, áще мáло éсть спасáющихся? О́нъ же речé къ ни́мъ:
подвизáйтеся вни́ти сквозѣ́ тѣ́сная вратá: я́ко мнóзи, глагóлю вáмъ, взы́щутъ вни́ти, и не возмóгутъ.
Отнéлѣже востáнетъ дóму влады́ка, и затвори́тъ двéри, и нáчнете внѣ́ стоя́ти и ударя́ти въ двéри, глагóлюще: Гóсподи, Гóсподи, отвéрзи нáмъ. И отвѣщáвъ речéтъ вáмъ: не вѣ́мъ вáсъ, откýду естé.
Тогдá нáчнете глагóлати: ядóхомъ предъ тобóю и пи́хомъ, и на распýтiихъ нáшихъ учи́лъ еси́.
И речéтъ: глагóлю вáмъ, не вѣ́мъ вáсъ, откýду естé: отступи́те от менé, вси́ дѣ́лателiе непрáвды.
Тý бýдетъ плáчь и скрéжетъ зубóмъ, егдá ýзрите Авраáма и Исаáка и Иáкова и вся́ прорóки во цáрствiи Бóжiи, вáсъ же изгони́мыхъ вóнъ.
И прiи́дутъ от востóкъ и зáпадъ и сѣ́вера и ю́га, и возля́гутъ въ цáрствiи Бóжiи.
И сé сýть послѣ́днiи, и́же бýдутъ пéрви, и сýть пéрвiи, и́же бýдутъ послѣ́дни.
Въ тóй дéнь приступи́ша нѣ́цый от фарисéй, глагóлюще емý: изы́ди и иди́ отсю́ду, я́ко И́родъ хóщетъ тя́ уби́ти.
И речé и́мъ: шéдше рцы́те ли́су томý: сé изгоню́ бѣ́сы и исцѣлéнiя творю́ днéсь и ýтрѣ, и въ трéтiй скончáюся.
Обáче подобáетъ ми́ днéсь и ýтрѣ и въ бли́жнiй ити́: я́ко невозмóжно éсть прорóку поги́бнути кромѣ́ Иерусали́ма.
Иерусали́ме, Иерусали́ме, изби́вый прорóки и кáменiемъ побивáя пóсланныя къ тебѣ́, колькрáты восхотѣ́хъ собрáти чáда твоя́, я́коже кокóшъ гнѣздó своé подъ крилѣ́, и не восхотѣ́сте?
Сé оставля́ется вáмъ дóмъ вáшъ пýстъ. Глагóлю же вáмъ, я́ко не и́мате менé ви́дѣти, дóндеже прiи́детъ, егдá речéте: благословéнъ гряды́й во и́мя Госпóдне.

Евангелие от Луки, 14

И бы́сть егдá вни́ти емý въ дóмъ нѣ́коего кня́зя фарисéйска въ суббóту хлѣ́бъ я́сти, и тíи бя́ху назирáюще егó.
И сé человѣ́къ нѣ́кiй, имы́й водны́й трýдъ, бѣ́ предъ ни́мъ.
И отвѣщáвъ Иисýсъ речé къ закóнникомъ и фарисéомъ, глагóля: áще достои́тъ въ суббóту цѣли́ти?
Они́ же умолчáша. И прiéмъ исцѣли́ егó, и отпусти́.
И отвѣщáвъ къ ни́мъ речé: котóраго от вáсъ осéлъ или́ вóлъ въ студенéцъ впадéтъ, и не áбiе ли истóргнетъ егó въ дéнь суббóтный?
И не возмогóша отвѣщáти емý къ си́мъ.
Глагóлаше же къ звáннымъ при́тчу, обдержя́ {внимáя}, кáко предсѣдáнiя избирáху, глагóля къ ни́мъ:
егдá звáнъ бýдеши ки́мъ на брáкъ, не ся́ди на прéднемъ мѣ́стѣ: едá ктó честнѣ́е тебé бýдетъ звáнныхъ,
и пришéдъ и́же тебé звáвый и óнаго, речéтъ ти́: дáждь семý мѣ́сто: и тогдá нáчнеши со студóмъ послѣ́днее мѣ́сто держáти.
Но егдá звáнъ бýдеши, шéдъ ся́ди на послѣ́днемъ мѣ́стѣ, да егдá прiи́детъ звáвый тя́, речéтъ ти́: дрýже, пося́ди вы́ше: тогдá бýдетъ ти́ слáва предъ звáнными съ тобóю.
Я́ко вся́къ вознося́йся смири́тся, и смиря́яйся вознесéтся.
Глагóлаше же и ко звáвшему егó: егдá сотвори́ши обѣ́дъ или́ вéчерю, не зови́ другóвъ твои́хъ, ни брáтiи твоея́, ни срóдникъ твои́хъ, ни сосѣ́дъ богáтыхъ: едá когдá и тíи тя́ тáкожде воззовýтъ, и бýдетъ ти́ воздая́нiе.
Но егдá твори́ши пи́ръ, зови́ ни́щыя, маломóщныя, хромы́я, слѣпы́я:
и блажéнъ бýдеши, я́ко не и́мутъ ти́ чтó воздáти: воздáстъ же ти́ ся́ въ воскрешéнiе прáведныхъ.
Слы́шавъ же нѣ́кiй от возлежáщихъ съ ни́мъ сiя́, речé емý: блажéнъ, и́же снѣ́сть обѣ́дъ въ цáрствiи Бóжiи.
О́нъ же речé емý: человѣ́къ нѣ́кiй сотвори́ вéчерю вéлiю, и звá мнóги:
и послá рабá своегó въ гóдъ вéчери рещи́ звáннымъ: гряди́те, я́ко ужé готóва сýть вся́.
И начáша вкýпѣ отрицáтися вси́. Пéрвый речé емý: селó купи́хъ, и и́мамъ нуждý изы́ти и ви́дѣти é. Молю́тися, имѣ́й мя́ отречéна.
И другíй речé: супрýгъ волóвъ купи́хъ пя́ть, и грядý искуси́ти и́хъ: молю́ тя, имѣ́й мя́ отречéна.
И другíй речé: женý поя́хъ, и сегó рáди не могý прiити́.
И пришéдъ рáбъ тóй повѣ́да господи́ну своемý сiя́. Тогдá разгнѣ́вався дóму влады́ка, речé рабý своемý: изы́ди скóро на распýтiя и стóгны грáда, и ни́щыя и бѣ́дныя и слѣпы́я и хромы́я введи́ сѣ́мо.
И речé рáбъ. Гóсподи, бы́сть я́коже повелѣ́лъ еси́, и ещé мѣ́сто éсть.
И речé господи́нъ къ рабý: изы́ди на пути́ и халýги, и убѣди́ вни́ти, да напóлнится дóмъ мóй:
глагóлю бо вáмъ, я́ко ни еди́нъ мужéй тѣ́хъ звáнныхъ вкýситъ моея́ вéчери: мнóзи бо сýть звáни, мáло же избрáнныхъ.
Идя́ху же съ ни́мъ нарóди мнóзи: и обрáщься речé къ ни́мъ:
áще ктó грядéтъ ко мнѣ́, и не возненави́дитъ отцá своегó и мáтерь, и женý, и чáдъ, и брáтiю, и сéстръ, ещé же и дýшу свою́, не мóжетъ мóй бы́ти учени́къ:
и и́же не нóситъ крестá своегó и вслѣ́дъ менé грядéтъ, не мóжетъ мóй бы́ти учени́къ.
Ктó бо от вáсъ, хотя́й стóлпъ создáти, не прéжде ли сѣ́дъ расчтéтъ имѣ́нiе, áще и́мать, éже éсть на совершéнiе,
да не, когдá положи́тъ основáнiе и не возмóжетъ соверши́ти, вси́ ви́дящiи начнýтъ ругáтися емý,
глагóлюще, я́ко сéй человѣ́къ начáтъ здáти и не мóже соверши́ти.
Или́ кíй цáрь иды́й ко инóму царю́ сни́тися съ ни́мъ на брáнь, не сѣ́дъ ли прéжде совѣщавáетъ, áще си́ленъ éсть срѣ́сти съ десятiю́ ты́сящъ грядýщаго со двѣмáдесятма ты́сящама нáнь?
А́ще ли же ни́, ещé далéче емý сýщу, молéнiе послáвъ мóлится о смирéнiи.
Тáко ýбо вся́къ от вáсъ, и́же не отречéтся всегó своегó имѣ́нiя, не мóжетъ бы́ти мóй учени́къ.
Добрó éсть сóль: áще же сóль обуя́етъ, чи́мъ осоли́тся?
Ни въ зéмлю, ни въ гнóй потрéбна éсть: вóнъ изсы́плютъ ю́. Имѣ́яй ýшы слы́шати, да слы́шитъ.

Евангелие от Луки, 15

Бя́ху же приближáющеся къ немý вси́ мы́тарiе и грѣ́шницы, послýшати егó.
И роптáху фарисéе и кни́жницы, глагóлюще, я́ко сéй грѣ́шники прiéмлетъ и съ ни́ми я́стъ.
Речé же къ ни́мъ при́тчу сiю́, глагóля:
кíй человѣ́къ от вáсъ имы́й стó овéцъ, и погýбль еди́ну от ни́хъ, не остáвитъ ли девяти́десяти и девяти́ въ пусты́ни, и и́детъ вслѣ́дъ поги́бшiя, дóндеже обря́щетъ ю́?
И обрѣ́тъ возлагáетъ на рáмѣ свои́ рáдуяся:
и пришéдъ въ дóмъ, созывáетъ дрýги и сосѣ́ды, глагóля и́мъ: рáдуйтеся со мнóю, я́ко обрѣтóхъ овцý мою́ поги́бшую.
Глагóлю вáмъ, я́ко тáко рáдость бýдетъ на небеси́ о еди́номъ грѣ́шницѣ кáющемся, нéжели о девяти́десятихъ и девяти́ прáведникъ, и́же не трéбуютъ покая́нiя.
Или́ кáя женá имýщи дéсять дрáхмъ, áще погуби́тъ дрáхму еди́ну, не вжигáетъ ли свѣти́лника, и пометéтъ хрáмину, и и́щетъ прилѣ́жно, дóндеже обря́щетъ?
И обрѣ́тши созывáетъ други́ни и сосѣ́ды, глагóлющи: рáдуйтеся со мнóю, я́ко обрѣтóхъ дрáхму поги́бшую.
Тáко, глагóлю вáмъ, рáдость бывáетъ предъ áнгелы Бóжiими о еди́номъ грѣ́шницѣ кáющемся.
Речé же: человѣ́къ нѣ́кiй имѣ́ двá сы́на:
и речé юнѣ́йшiй ею́ {от ни́хъ} отцý: óтче, дáждь ми́ достóйную чáсть имѣ́нiя. И раздѣли́ и́ма имѣ́нiе.
И не по мнóзѣхъ днéхъ собрáвъ всé мнíй сы́нъ, отъи́де на странý далéче, и тý расточи́ имѣ́нiе своé, живы́й блýдно.
Изжи́вшу же емý всé, бы́сть глáдъ крѣ́покъ на странѣ́ тóй, и тóй начáтъ лишáтися.
И шéдъ прилѣпи́ся еди́ному от жи́тель тоя́ страны́: и послá егó на сéла своя́ пасти́ свинiя́.
И желáше насы́тити чрéво своé от рожéцъ, я́же ядя́ху свинiя́: и никтóже дая́ше емý.
Въ себé же пришéдъ, речé: коли́ко наéмникомъ отцá моегó избывáютъ хлѣ́бы, áзъ же глáдомъ ги́блю?
Востáвъ идý ко отцý моемý, и рекý емý: óтче, согрѣши́хъ на небо и предъ тобóю,
и ужé нѣ́смь достóинъ нарещи́ся сы́нъ твóй? сотвори́ мя я́ко еди́наго от наéмникъ твои́хъ.
И востáвъ и́де ко отцý своемý. Ещé же емý далéче сýщу, узрѣ́ егó отéцъ егó, и ми́лъ емý бы́сть, и тéкъ нападé на вы́ю егó, и облобызá егó.
Речé же емý сы́нъ: óтче, согрѣши́хъ на небо и предъ тобóю, и ужé нѣ́смь достóинъ нарещи́ся сы́нъ твóй.
Речé же отéцъ къ рабóмъ свои́мъ: изнеси́те одéжду пéрвую и облецы́те егó, и дади́те пéрстень на рýку егó и сапоги́ на нóзѣ:
и привéдше телéцъ упитáнный заколи́те, и я́дше весели́мся:
я́ко сы́нъ мóй сéй мéртвъ бѣ́, и оживé: и изги́блъ бѣ́, и обрѣ́теся. И начáша весели́тися.
Бѣ́ же сы́нъ егó стáрѣй на селѣ́: и я́ко гряды́й прибли́жися къ дóму, слы́ша пѣ́нiе и ли́ки:
и призвáвъ еди́наго от óтрокъ, вопрошáше: чтó [ýбо] сiя́ сýть?
О́нъ же речé емý, я́ко брáтъ твóй прiи́де: и заклá отéцъ твóй телцá упитáнна, я́ко здрáва егó прiя́тъ.
Разгнѣ́вася же, и не хотя́ше вни́ти. Отéцъ же егó изшéдъ моля́ше егó.
О́нъ же отвѣщáвъ речé отцý: сé толи́ко лѣ́тъ рабóтаю тебѣ́, и николи́же зáповѣди твоя́ преступи́хъ, и мнѣ́ николи́же дáлъ еси́ козля́те, да со дрýги свои́ми возвесели́лся бы́хъ:
егдá же сы́нъ твóй сéй, изъяды́й твоé имѣ́нiе съ любодѣ́йцами, прiи́де, заклáлъ еси́ емý телцá питóмаго.
О́нъ же речé емý: чáдо, ты́ всегдá со мнóю еси́ и вся́ моя́ твоя́ сýть:
возвесели́тижеся и возрáдовати подобáше, я́ко брáтъ твóй сéй мéртвъ бѣ́, и оживé: и изги́блъ бѣ́, и обрѣ́теся.

Евангелие от Луки, 16

Глагóлаше же ко ученикóмъ свои́мъ: человѣ́къ нѣ́кiй бѣ́ богáтъ, и́же имя́ше пристáвника: и тóй оклеветáнъ бы́сть къ немý, я́ко расточáетъ имѣ́нiя егó.
И пригласи́въ егó речé емý: чтó сé слы́шу о тебѣ́? воздáждь отвѣ́тъ о приставлéнiи домóвнѣмъ: не возмóжеши бо ктомý дóму стрóити.
Речé же въ себѣ́ пристáвникъ дóму: чтó сотворю́, я́ко госпóдь мóй отъéмлетъ строéнiе дóму от менé? копáти не могý, проси́ти стыжýся:
разумѣ́хъ, чтó сотворю́, да егдá отстáвленъ бýду от строéнiя дóму, прiи́мутъ мя́ въ дóмы своя́.
И призвáвъ еди́наго когóждо от должни́къ господи́на своегó, глагóлаше пéрвому: коли́цѣмъ дóлженъ еси́ господи́ну моемý?
О́нъ же речé: стó мѣ́ръ мáсла. И речé емý: прiими́ писáнiе твоé, и сѣ́дъ скóро напиши́ пятьдеся́тъ.
Потóмъ же речé другóму: ты́ же коли́цѣмъ дóлженъ еси́? О́нъ же речé: стó мѣ́ръ пшени́цы. И глагóла емý: прiими́ писáнiе твоé, и напиши́ óсмьдесятъ.
И похвали́ госпóдь дóму строи́теля непрáведнаго, я́ко мýдрѣ сотвори́: я́ко сы́нове вѣ́ка сегó мудрѣ́йши пáче сынóвъ свѣ́та въ рóдѣ своéмъ сýть.
И áзъ вáмъ глагóлю: сотвори́те себѣ́ дрýги от мамóны непрáвды, да, егдá оскудѣ́ете, прiи́мутъ вы́ въ вѣ́чныя крóвы.
Вѣ́рный въ мáлѣ, и во мнóзѣ вѣ́ренъ éсть: и непрáведный въ мáлѣ, и во мнóзѣ непрáведенъ éсть.
А́ще ýбо въ непрáведнѣмъ имѣ́нiи вѣ́рни не бы́сте, во и́стиннѣмъ ктó вáмъ вѣ́ру и́метъ?
И áще въ чужéмъ вѣ́рни не бы́сте, вáше ктó вáмъ дáстъ?
Никíй же рáбъ мóжетъ двѣмá господи́нома рабóтати: и́бо или́ еди́наго возненави́дитъ, а другáго возлю́битъ: или́ еди́наго держи́тся, о друзѣ́мъ же нерадѣ́ти нáчнетъ: не мóжете Бóгу рабóтати и мамóнѣ.
Слы́шаху же сiя́ вся́ и фарисéе, сребролю́бцы сýще, ругáхуся емý.
И речé и́мъ: вы́ естé оправдáюще себé предъ человѣ́ки, Бóгъ же вѣ́сть сердцá вáша: я́ко, éже éсть въ человѣ́цѣхъ высокó, мéрзость éсть предъ Бóгомъ.
Закóнъ и прорóцы до Иоáнна: оттóлѣ цáрствiе Бóжiе благовѣствýется, и вся́къ въ нé нýдится {съ нýждею вхóдитъ}.
Удóбѣе же éсть нéбу и земли́ прейти́, нéже от закóна еди́ной чертѣ́ поги́бнути.
Вся́къ пущáяй женý свою́ и приводя́ и́ну, прелю́бы дѣ́етъ: и женя́йся пущéною от мýжа, прелюбы́ твори́тъ.
Человѣ́къ же нѣ́кiй бѣ́ богáтъ, и облачáшеся въ порфи́ру и ви́ссонъ, веселя́ся на вся́ дни́ свѣ́тло.
Ни́щь же бѣ́ нѣ́кто, и́менемъ лáзарь, и́же лежáше предъ враты́ егó гнóенъ
и желáше насы́титися от крупи́цъ пáдающихъ от трапéзы богáтаго: но и пси́ приходя́ще облизáху гнóй егó.
Бы́сть же умрéти ни́щему, и несéну бы́ти áнгелы на лóно Авраáмле: ýмре же и богáтый, и погребóша егó.
И во áдѣ возвѣ́дъ óчи свои́, сы́й въ мýкахъ, узрѣ́ Авраáма издалéча, и лáзаря на лóнѣ егó:
и тóй возглáшь речé: óтче Авраáме, поми́луй мя́, и посли́ лáзаря, да омóчитъ конéцъ пéрста своегó въ водѣ́ и устуди́тъ язы́къ мóй: я́ко стрáжду во плáмени сéмъ.
Речé же Авраáмъ: чáдо, помяни́, я́ко воспрiя́лъ еси́ благáя твоя́ въ животѣ́ твоéмъ, и лáзарь тáкожде злáя: ны́нѣ же здѣ́ утѣшáется, ты́ же стрáждеши:
и надъ всѣ́ми си́ми междý нáми и вáми прóпасть вели́ка утверди́ся, я́ко да хотя́щiи прейти́ отсю́ду къ вáмъ не возмóгутъ, ни и́же оттýду, къ нáмъ прехóдятъ.
Речé же: молю́ тя ýбо, óтче, да пóслеши егó въ дóмъ отцá моегó:
и́мамъ бо пя́ть брáтiй: я́ко да засвидѣ́телствуетъ и́мъ, да не и тíи прiи́дутъ на мѣ́сто сié мучéнiя.
Глагóла емý Авраáмъ: и́мутъ Моисéа и прорóки: да послýшаютъ и́хъ.
О́нъ же речé: ни́, óтче Авраáме: но áще ктó от мéртвыхъ и́детъ къ ни́мъ, покáются.
Речé же емý: áще Моисéа и прорóковъ не послýшаютъ, и áще ктó от мéртвыхъ воскрéснетъ, не и́мутъ вѣ́ры.

Евангелие от Луки, 17

Речé же ко ученикóмъ свои́мъ: не возмóжно éсть не прiити́ соблáзномъ, гóре же, егóже рáди прихóдятъ:
ýнѣе емý бы́ло бы, áще жернóвъ осéлскiй облежáлъ бы о вы́и егó, и ввéрженъ въ мóре, нéже да соблазни́тъ от мáлыхъ си́хъ еди́наго.
Внемли́те себѣ́. А́ще согрѣши́тъ къ тебѣ́ брáтъ твóй, запрети́ емý: и áще покáется, остáви емý:
и áще седми́щи на дéнь согрѣши́тъ къ тебѣ́, и седми́щи на дéнь обрати́тся, глагóля: кáюся: остáви емý.
И рекóша апóстоли Гóсподеви: приложи́ нáмъ вѣ́ру.
Речé же Госпóдь: áще бы́сте имѣ́ли вѣ́ру я́ко зернó горýшно, глагóлали бы́сте ýбо я́годичинѣ сéй: востóргнися и всади́ся въ мóре: и послýшала бы вáсъ.
Котóрый же от вáсъ рабá имѣ́я орю́ща или́ пасýща, и́же пришéдшу емý съ селá речéтъ: áбiе минýвъ {пришéдъ} возля́зи?
Но не речéтъ ли емý: уготóвай, чтó вечеря́ю, и препоя́сався служи́ ми́, дóндеже я́мъ и пiю́: и потóмъ я́си и пiéши ты́?
Едá и́мать хвалý {благодари́тъ} рабý томý, я́ко сотвори́ повелѣ́нная? не мню́.
Тáко и вы́, егдá сотворитé вся́ повелѣ́нная вáмъ, глагóлите, я́ко раби́ неключи́ми есмы́: я́ко, éже дóлжни бѣ́хомъ сотвори́ти, сотвори́хомъ.
И бы́сть идýщу емý во Иерусали́мъ, и тóй прохождáше междý самáрiею и Галилéею.
Входя́щу же емý въ нѣ́кую вéсь, срѣтóша егó дéсять прокажéнныхъ мужéй, и́же стáша издалéча:
и тíи вознесóша глáсъ, глагóлюще: Иисýсе настáвниче, поми́луй ны́.
И ви́дѣвъ речé и́мъ: шéдше покажи́теся свящéнникомъ. И бы́сть идýщымъ и́мъ, очи́стишася.
Еди́нъ же от ни́хъ, ви́дѣвъ, я́ко исцѣлѣ́, возврати́ся, со глáсомъ вéлiимъ слáвя Бóга,
и падé ни́цъ при ногý егó, хвалý емý воздая́: и тóй бѣ́ самаряни́нъ.
Отвѣщáвъ же Иисýсъ речé: не дéсять ли очи́стишася? да дéвять гдѣ́?
кáко не обрѣтóшася возврáщшеся дáти слáву Бóгу, тóкмо иноплемéнникъ сéй?
И речé емý: востáвъ иди́: вѣ́ра твоя́ спасé тя.
Вопрошéнъ же бы́въ от фарисéй, когдá прiи́детъ цáрствiе Бóжiе, отвѣщáвъ и́мъ речé: не прiи́детъ цáрствiе Бóжiе съ соблюдéнiемъ {со усмотрéнiемъ}:
нижé рекýтъ: сé здѣ́, или́: óндѣ. Сé бо цáрствiе Бóжiе внýтрь вáсъ éсть.
Речé же ко ученикóмъ [свои́мъ]: прiи́дутъ днíе, егдá вожделѣ́ете еди́наго днé Сы́на человѣ́ческаго ви́дѣти, и не ýзрите.
И рекýтъ вáмъ: сé здѣ́, или́: сé, óндѣ: не изы́дите, ни пожени́те.
Я́ко бо мóлнiя блистáющися от поднебéсныя на поднебéснѣй свѣ́тится: тáко бýдетъ Сы́нъ человѣ́ческiй въ дéнь свóй.
Прéжде же подобáетъ емý мнóго пострадáти и искушéну {отвéржену} бы́ти от рóда сегó.
И я́коже бы́сть во дни́ Нóевы, тáко бýдетъ и во дни́ Сы́на человѣ́ческа:
ядя́ху, пiя́ху, женя́хуся, посягáху, до негóже днé вни́де Нóе въ ковчéгъ: и прiи́де потóпъ, и погуби́ вся́.
Тáкожде и я́коже бы́сть во дни́ Лóтовы: ядя́ху, пiя́ху, куповáху, продая́ху, саждáху, здáху:
вóньже дéнь изы́де Лóтъ от Cодóмлянъ, одожди́ кáмыкъ горя́щь и óгнь съ небесé, и погуби́ вся́.
По томýже бýдетъ и въ дéнь, вóньже Сы́нъ человѣ́ческiй яви́тся.
Въ тóй дéнь, и́же бýдетъ на крóвѣ, и сосýди егó въ домý, да не слáзитъ взя́ти и́хъ: и и́же на селѣ́, тáкожде да не возврати́тся вспя́ть:
поминáйте женý Лóтову.
И́же áще взы́щетъ дýшу свою́ спасти́, погуби́тъ ю́: и и́же áще погуби́тъ ю́, живи́тъ ю́.
Глагóлю вáмъ: въ тý нóщь бýдета двá на одрѣ́ еди́номъ: еди́нъ поéмлется, а другíй оставля́ется.
Бýдетѣ двѣ́ вкýпѣ мéлющѣ: еди́на поéмлется, а другáя оставля́ется.
Двá бýдета на селѣ́: еди́нъ поéмлется, а другíй оставля́ется.
И отвѣщáвше глагóлаша емý: гдѣ́, Гóсподи? О́нъ же речé и́мъ: идѣ́же тѣ́ло, тáмо соберýтся и орли́.

Евангелие от Луки, 18

Глагóлаше же и при́тчу къ ни́мъ, кáко подобáетъ всегдá моли́тися и не стужáти [си́],
глагóля: судiя́ бѣ́ нѣ́кiй въ нѣ́коемъ грáдѣ, Бóга не боя́ся и человѣ́къ не срамля́яся.
Вдовá же нѣ́кая бѣ́ во грáдѣ тóмъ: и прихождáше къ немý, глагóлющи: отмсти́ менé от сопéрника моегó.
И не хотя́ше на дóлзѣ врéмени. Послѣди́ же речé въ себѣ́: áще и Бóга не бою́ся, и человѣ́къ не срамля́юся:
но занé твори́тъ ми́ труды́ вдови́ца сiя́, отмщý ея́: да не до концá приходя́щи застои́тъ {труди́тъ} менé.
Речé же Госпóдь: слы́шите, чтó судiя́ непрáвды глагóлетъ?
Бóгъ же не и́мать ли сотвори́ти отмщéнiе избрáнныхъ свои́хъ, вопiю́щихъ къ немý дéнь и нóщь, и долготерпя́ о ни́хъ?
глагóлю вáмъ, я́ко сотвори́тъ отмщéнiе и́хъ вскóрѣ. Обáче Сы́нъ человѣ́ческiй пришéдъ ýбо обря́щетъ ли [си́] вѣ́ру на земли́?
Речé же и ко други́мъ уповáющымъ собóю, я́ко сýть прáведницы, и уничижáющымъ прóчихъ, при́тчу сiю́:
человѣ́ка двá внидóста въ цéрковь помоли́тися: еди́нъ фарисéй, а другíй мытáрь.
Фарисéй же стáвъ, си́це въ себѣ́ моля́шеся: Бóже, хвалý тебѣ́ воздаю́, я́ко нѣ́смь я́коже прóчiи человѣ́цы, хи́щницы, непрáведницы, прелюбодѣ́е, или́ я́коже сéй мытáрь:
пощýся двакрáты въ суббóту, десяти́ну даю́ всегó ели́ко притяжý.
Мытáрь же издалéча стоя́, не хотя́ше ни óчiю возвести́ на нéбо: но бiя́ше пéрси своя́, глагóля: Бóже, ми́лостивъ бýди мнѣ́ грѣ́шнику.
Глагóлю вáмъ, я́ко сни́де сéй оправдáнъ въ дóмъ свóй пáче óнаго: я́ко вся́къ вознося́йся смири́тся, смиря́яй же себé вознесéтся.
Приношáху же къ немý и младéнцы, да и́хъ кóснется: ви́дѣвше же ученицы́ запрети́ша и́мъ.
Иисýсъ же призвáвъ и́хъ, глагóла: остáвите дѣтéй приходи́ти ко мнѣ́ и не брани́те и́мъ: таковы́хъ бо éсть цáрствiе Бóжiе.
Ами́нь бо глагóлю вáмъ: и́же áще не прiи́метъ цáрствiя Бóжiя я́ко отрочá, не и́мать вни́ти въ нé.
И вопроси́ егó нѣ́кiй кня́зь, глагóля: учи́телю благíй, чтó сотвори́въ, живóтъ вѣ́чный наслѣ́дствую?
Речé же емý Иисýсъ: чтó мя глагóлеши блáга, никтóже блáгъ, тóкмо еди́нъ Бóгъ.
Зáповѣди вѣ́си: не прелю́бы твори́: не убíй: не укради́: не лжесвидѣ́телствуй: чти́ отцá твоегó и мáтерь твою́.
О́нъ же речé: вся́ сiя́ сохрани́хъ от ю́ности моея́.
Слы́шавъ же сiя́, Иисýсъ речé емý: ещé еди́наго не докончáлъ еси́: вся́, ели́ка и́маши, продáждь, и раздáй ни́щымъ: и имѣ́ти и́маши сокрóвище на небеси́: и гряди́ вослѣ́дъ менé.
О́нъ же слы́шавъ сié, прискóрбенъ бы́сть: бѣ́ бо богáтъ зѣлó.
Ви́дѣвъ же егó Иисýсъ прискóрбна бы́вша, речé: кáко не удóбь имýщiи богáтство въ цáрствiе Бóжiе вни́дутъ:
удóбѣе бо éсть велбýду сквозѣ́ иглинѣ́ ýшы проити́, нéже богáту въ цáрствiе Бóжiе вни́ти.
Рѣ́ша же слы́шавшiи: тó ктó мóжетъ спасéнъ бы́ти?
О́нъ же речé: невозмóжная у человѣ́къ возмóжна сýть у Бóга.
Речé же пéтръ: сé мы́ остáвихомъ вся́ и по тебѣ́ идóхомъ.
О́нъ же речé и́мъ: ами́нь глагóлю вáмъ, я́ко никтóже éсть, и́же остáвитъ дóмъ, или́ роди́тели, или́ брáтiю, или́ сéстры, или́ женý, или́ чáда, цáрствiя рáди Бóжiя,
и́же не прiи́метъ мнóжицею во врéмя сié, и въ вѣ́къ грядýщiй живóтъ вѣ́чный.
Поéмь же обанáдесяте ученики́ своя́, речé къ ни́мъ? сé восхóдимъ во Иерусали́мъ, и скончáются вся́ пи́санная прорóки о Сы́нѣ человѣ́честѣ:
предадя́тъ бо егó язы́комъ, и поругáются емý, и укоря́тъ егó, и оплюю́тъ егó,
и би́вше убiю́тъ егó: и въ трéтiй дéнь воскрéснетъ.
И тíи ничесóже от си́хъ разумѣ́ша: и бѣ́ глагóлъ сéй сокровéнъ от ни́хъ, и не разумѣвáху глагóлемыхъ.
Бы́сть же егдá прибли́жишася во иерихóнъ, слѣпéцъ нѣ́кiй сѣдя́ше при пути́ прося́:
слы́шавъ же нарóдъ мимоходя́щь, вопрошáше: чтó ýбо éсть сé?
Повѣ́даша же емý, я́ко Иисýсъ назаряни́нъ мимохóдитъ.
И возопи́, глагóля: Иисýсе Сы́не Дави́довъ, поми́луй мя́.
И предъидýщiи прещáху емý, да умолчи́тъ: óнъ же пáче мнóжае вопiя́ше: Сы́не Дави́довъ, поми́луй мя́.
Стáвъ же Иисýсъ повелѣ́ привести́ егó къ себѣ́: прибли́жшуся же емý къ немý, вопроси́ егó,
глагóля: чтó хóщеши, да ти́ сотворю́? О́нъ же речé: Гóсподи, да прозрю́.
Иисýсъ же речé емý: прозри́: вѣ́ра твоя́ спасé тя.
И áбiе прозрѣ́, и вслѣ́дъ егó идя́ше, слáвя Бóга. И вси́ лю́дiе ви́дѣвше воздáша хвалý богови.

Евангелие от Луки, 19

И вшéдъ прохождáше иерихóнъ.
И сé мýжъ нарицáемый закхéй, и сéй бѣ́ стáрѣй мытарéмъ, и тóй бѣ́ богáтъ:
и искáше ви́дѣти Иисýса, ктó éсть, и не можáше от нарóда, я́ко вóзрастомъ мáлъ бѣ́:
и предитéкъ, возлѣ́зе на я́годичину, да ви́дитъ, я́ко хотя́ше ми́мо ея́ проити́.
И я́ко прiи́де на мѣ́сто, воззрѣ́въ Иисýсъ ви́дѣ егó, и речé къ немý: закхéе, потщáвся слѣ́зи: днéсь бо въ домý твоéмъ подобáетъ ми́ бы́ти.
И потщáвся слѣ́зе, и прiя́тъ егó рáдуяся.
И ви́дѣвше вси́ роптáху, глагóлюще, я́ко ко грѣ́шну мýжу вни́де витáти.
Стáвъ же закхéй речé ко Гóсподу: сé пóлъ имѣ́нiя моегó, Гóсподи, дáмъ ни́щымъ: и áще когó чи́мъ оби́дѣхъ, возвращý четвери́цею.
Речé же къ немý Иисýсъ: я́ко днéсь спасéнiе дóму семý бы́сть, занé и сéй сы́нъ Авраáмль éсть:
прiи́де бо Сы́нъ человѣ́чь взыскáти и спасти́ поги́бшаго.
Слы́шащымъ же и́мъ сiя́, прилóжь речé при́тчу, занé бли́зъ емý бы́ти Иерусали́ма, и мня́ху, я́ко áбiе цáрство Бóжiе хóщетъ яви́тися.
Речé ýбо: человѣ́къ нѣ́кiй добрá рóда и́де на странý далéче, прiя́ти себѣ́ цáрство и возврати́тися.
Призвáвъ же дéсять рáбъ свои́хъ, дадé и́мъ дéсять мнáсъ, и речé къ ни́мъ: кýплю дѣ́йте, дóндеже прiидý.
И грáждане егó ненави́дяху егó, и послáша послы́ вслѣ́дъ егó, глагóлюще: не хóщемъ семý, да цáрствуетъ надъ нáми.
И бы́сть егдá возврати́ся прiи́мъ цáрство, речé пригласи́ти рабы́ ты́я, и́мже дадé сребрó, да увѣ́сть, каковý кýплю сýть сотвори́ли.
Прiи́де же пéрвый, глагóля: гóсподи, мнáсъ твоя́ придѣ́ла дéсять мнáсъ.
И речé емý: блáго, рáбе дóбрый: я́ко о мáлѣ вѣ́ренъ бы́лъ еси́, бýди о́бласть имѣ́я надъ десятiю́ градóвъ.
И прiи́де вторы́й, глагóля: гóсподи, мнáсъ твоя́ сотвори́ пя́ть мнáсъ.
Речé же и томý: и ты́ бýди надъ пятiю́ градóвъ.
И другíй прiи́де, глагóля: гóсподи, сé мнáсъ твоя́, ю́же имѣ́хъ положéну во убрýсѣ:
боя́хся бо тебé, я́ко человѣ́къ я́ръ еси́, взéмлеши, егóже не положи́лъ еси́, и жнéши, егóже не сѣ́ялъ еси́.
Глагóла же емý: от ýстъ твои́хъ суждý ти, лукáвый рáбе: вѣ́дѣлъ еси́, я́ко áзъ человѣ́къ я́ръ éсмь, взéмлю, егóже не положи́хъ, и жнý, егóже не сѣ́яхъ:
и почтó не вдáлъ еси́ моегó сребрá купцéмъ, и áзъ пришéдъ съ ли́хвою истязáлъ бы́хъ é?
И предстоя́щымъ речé: возми́те от негó мнáсъ, и дади́те имýщему дéсять мнáсъ.
И рѣ́ша емý: гóсподи, и́мать дéсять мнáсъ.
Глагóлю бо вáмъ, я́ко вся́кому имýщему дáстся: а от неимýщаго, и éже и́мать, отъи́мется от негó:
обáче враги́ моя́ о́ны, и́же не восхотѣ́ша менé, да цáрь бы́хъ бы́лъ надъ ни́ми, приведи́те сѣ́мо и изсѣцы́те предо мнóю.
И сiя́ рéкъ, идя́ше преди́, восходя́ во Иерусали́мъ.
И бы́сть я́ко прибли́жися въ Виѳсфагíю и Виѳáнiю, къ горѣ́ нарицáемѣй Елеóнъ, послá двá учени́къ свои́хъ,
глагóля: иди́та въ пря́мную вéсь: [и] въ ню́же входя́ща обря́щета жребя́ привя́зано, на нéже никтóже николи́же от человѣ́къ всѣ́де: отрѣ́шша é приведи́та.
И áще ктó вы́ вопрошáетъ: почтó отрѣшáета, си́це рцы́та емý, я́ко Госпóдь егó трéбуетъ.
Шéдша же пóсланная обрѣтóста, я́коже речé и́ма.
Отрѣшáющема же и́ма жребя́, рекóша госпóдiе егó къ ни́ма: чтó отрѣшáета жребя́?
О́на же рекóста, я́ко Госпóдь егó трéбуетъ.
И приведóста é ко Иисýсови: и возвéргше ри́зы своя́ на жребя́, всади́ша Иисýса.
Идýщу же емý, постилáху ри́зы своя́ по пути́.
Приближáющужеся емý ужé [áбiе] къ низхождéнiю горѣ́ Елеóнстѣй, начáша всé мнóжество учени́къ рáдующеся хвали́ти Бóга глáсомъ вéлiимъ о всѣ́хъ си́лахъ, я́же ви́дѣша,
глагóлюще: благословéнъ гряды́й Цáрь во и́мя Госпóдне: ми́ръ на небеси́, и слáва въ вы́шнихъ.
И нѣ́цыи фарисéе от нарóда рѣ́ша къ немý: учи́телю, запрети́ ученикóмъ твои́мъ.
И отвѣщáвъ речé и́мъ: глагóлю вáмъ, я́ко, áще сíи умолчáтъ, кáменiе возопiéтъ.
И я́ко прибли́жися, ви́дѣвъ грáдъ, плáкася о нéмъ,
глагóля: я́ко áще бы разумѣ́лъ и ты́, въ дéнь сéй твóй, éже къ смирéнiю {къ ми́ру} твоемý: ны́нѣ же скры́ся от óчiю твоéю:
я́ко прiи́дутъ днíе на тя́, и обложáтъ врази́ твои́ острóгъ о тебѣ́, и обы́дутъ тя́, и объи́мутъ тя́ отвсю́ду,
и разбiю́тъ тя́ и чáда твоя́ въ тебѣ́, и не остáвятъ кáмень на кáмени въ тебѣ́: понéже не разумѣ́лъ еси́ врéмене посѣщéнiя твоегó.
И вшéдъ въ цéрковь, начáтъ изгони́ти продаю́щыя въ нéй и купýющыя,
глагóля и́мъ: пи́сано éсть: дóмъ мóй дóмъ моли́твы éсть: вы́ же сотвори́сте егó пещéру разбóйникомъ.
И бѣ́ учя́ по вся́ дни́ въ цéркви. Архiерéе же и кни́жницы искáху егó погуби́ти, и старѣ́йшины лю́демъ.
И не обрѣтáху, чтó бы сотвори́ли емý: лю́дiе бо вси́ держáхуся егó, послýшающе егó.

Евангелие от Луки, 20

И бы́сть во еди́нъ от днíй óнѣхъ, учáщу емý лю́ди въ цéркви и благовѣствýющу, прiидóша свящéнницы и кни́жницы со стáрцы
и рѣ́ша къ немý, глагóлюще: рцы́ нáмъ, кóею о́бластiю сiя́ твори́ши, или́ ктó éсть дáвый тебѣ́ влáсть сiю́?
Отвѣщáвъ же речé къ ни́мъ: вопрошý вы и áзъ еди́наго словесé, и рцы́те ми́:
крещéнiе Иоáнново съ небесé ли бѣ́, или́ от человѣ́къ?
Они́ же помышля́ху въ себѣ́, глагóлюще, я́ко áще речéмъ: съ небесé, речéтъ: почтó ýбо не вѣ́ровасте емý?
áще ли же речéмъ: от человѣ́къ, вси́ лю́дiе кáменiемъ побiю́тъ ны́: извѣ́стно бо бѣ́ о Иоáннѣ, я́ко прорóкъ бѣ́.
И отвѣщáша: не вѣ́мы откýду.
Иисýсъ же речé и́мъ: ни áзъ глагóлю вáмъ, кóею о́бластiю сiя́ творю́.
Начáтъ же къ лю́демъ глагóлати при́тчу сiю́: человѣ́къ нѣ́кiй насади́ виногрáдъ, и вдадé егó дѣ́лателемъ, и отъи́де на лѣ́та мнóга.
И во врéмя послá къ дѣ́лателемъ рабá, да от плодá виногрáда дадýтъ емý: дѣ́латели же би́вше егó, послáша тщá.
И приложи́ послáти другáго рабá: они́ же и тогó би́вше и досади́вше емý, послáша тщá.
И приложи́ послáти трéтiяго: они́ же и тогó уя́звльше изгнáша.
Речé же господи́нъ виногрáда: чтó сотворю́? послю́ сы́на моегó возлю́бленнаго, едá кáко, егó ви́дѣвше, усрамя́тся.
Ви́дѣвше же егó дѣ́лателе, мы́шляху въ себѣ́, глагóлюще: сéй éсть наслѣ́дникъ: прiиди́те, убiéмъ егó, да нáше бýдетъ достоя́нiе.
И извéдше егó вóнъ изъ виногрáда, уби́ша. Чтó ýбо сотвори́тъ и́мъ господи́нъ виногрáда?
Прiи́детъ и погуби́тъ дѣ́латели сiя́, и вдáстъ виногрáдъ инѣ́мъ. Слы́шавше же рекóша: да не бýдетъ.
О́нъ же воззрѣ́въ на ни́хъ, речé: чтó ýбо пи́саное сié: кáмень, егóже небрегóша зи́ждущiи, сéй бы́сть во главý ýгла?
Вся́къ пады́й на кáмени тóмъ, сокруши́тся: а на нéмже падéтъ, стры́етъ егó.
И взыскáша архiерéе и книжни́цы возложи́ти нáнь рýцѣ въ тóй чáсъ, и убоя́шася нарóда: разумѣ́ша бо, я́ко къ ни́мъ при́тчу сiю́ речé.
И наблю́дше послáша лáятели {навѣ́тниковъ}, притворя́ющихъ себé прáведники бы́ти: да и́мутъ егó въ словеси́, во éже предáти егó начáлству и о́бласти игéмоновѣ.
И вопроси́ша егó, глагóлюще: учи́телю, вѣ́мы, я́ко прáво глагóлеши и учи́ши, и не на лицá зри́ши, но вои́стинну пути́ Бóжiю учи́ши:
достóитъ ли нáмъ кéсареви дáнь дая́ти, или́ ни́?
Разумѣ́въ же и́хъ лукáвство, речé къ ни́мъ: чтó мя искушáете?
покажи́те ми́ цáту {динáрiй}: чíй и́мать о́бразъ и надписáнiе? Отвѣщáвше же рекóша: кéсаревъ.
О́нъ же речé и́мъ: воздади́те ýбо, я́же кéсарева, кéсареви, и я́же Бóжiя, богови.
И не могóша зазрѣ́ти глагóла егó предъ людьми́: и диви́шася о отвѣ́тѣ егó, и умолчáша.
Приступи́ша же нѣ́цыи от саддукéй, глагóлющiи воскресéнiю не бы́ти, вопрошáху егó,
глагóлюще: учи́телю, Моисéй написá нáмъ: áще комý брáтъ ýмретъ имы́й женý, и тóй безчáденъ ýмретъ, да брáтъ егó пóйметъ женý и возстáвитъ сѣ́мя брáту своемý.
Сéдмь ýбо брáтiй бѣ́: и пéрвый поя́тъ женý, ýмре безчáденъ:
и поя́тъ вторы́й женý, и тóй ýмре безчáденъ:
и трéтiй поя́тъ ю́: тáкожде же и вси́ сéдмь: и не остáвиша чáдъ, и умрóша:
пóслѣжде же всѣ́хъ ýмре и женá:
въ воскресéнiе ýбо, котóраго и́хъ бýдетъ женá? сéдмь бо имѣ́ша ю́ женý.
И отвѣщáвъ речé и́мъ Иисýсъ: сы́нове вѣ́ка сегó жéнятся и посягáютъ:
а сподóбльшiися вѣ́къ о́нъ улучи́ти и воскресéнiе, éже от мéртвыхъ, ни жéнятся, ни посягáютъ:
ни умрéти бо ктомý мóгутъ: рáвни бо сýть áнгеломъ, и сы́нове сýть Бóжiи, воскресéнiя сы́нове сýще.
А я́ко востаю́тъ мéртвiи, и Моисéй сказá при купинѣ́, я́коже глагóлетъ Гóспода Бóга Авраáмля и Бóга Исаáкова и Бóга Иáковля.
Бóгъ же нѣ́сть мéртвыхъ, но живы́хъ: вси́ бо томý жи́ви сýть.
Отвѣщáвше же нѣ́цый от кни́жникъ рекóша: учи́телю, дóбрѣ рéклъ еси́.
Ктомýже не смѣ́яху егó вопроси́ти ничесóже. Речé же къ ни́мъ:
кáко глагóлютъ Христá Сы́на Дави́дова бы́ти?
Сáмъ бо Дави́дъ глагóлетъ въ кни́зѣ псалóмстѣй: речé Госпóдь Гóсподеви моемý: сѣди́ одеснýю менé,
дóндеже положý враги́ твоя́ поднóжiе ногáма твои́ма.
Дави́дъ ýбо Гóспода егó нарицáетъ, и кáко Сы́нъ емý éсть?
Слы́шащымъ же всѣ́мъ лю́демъ, речé ученикóмъ свои́мъ:
внемли́те себѣ́ от кни́жникъ, хотя́щихъ ходи́ти во одéждахъ, и лю́бящихъ цѣловáнiя на тóржищихъ и предсѣдáнiя на сóнмищихъ, и преждевозлежáнiя на вéчеряхъ:
и́же снѣдáютъ дóмы вдови́цъ, и винóю далéче мóлятся {и лицемѣ́рно на дóлзѣ мóлятся}: сíи прiи́мутъ ли́шше осуждéнiе.

Евангелие от Луки, 21

Воззрѣ́въ же ви́дѣ вметáющыя въ хрáмъ набдя́щiй имѣ́нiя {въ сокрóвищное храни́лище} дары́ своя́ богáтыя.
Ви́дѣ же и нѣ́кую вдови́цу убóгу вметáющу тý двѣ́ лéптѣ,
и речé: вои́стинну глагóлю вáмъ, я́ко вдови́ца сiя́ убóгая мнóжае всѣ́хъ ввéрже:
вси́ бо сíи от избы́тка своегó ввергóша въ дáры богови: сiя́ же от лишéнiя своегó всé житié, éже имѣ́, ввéрже.
И нѣ́кимъ глагóлющымъ о цéркви, я́ко кáменiемъ дóбрымъ и сосýды укрáшена, речé:
сiя́ я́же ви́дите, прiи́дутъ днíе, въ ня́же не остáнетъ кáмень на кáмени, и́же не разори́тся.
Вопроси́ша же егó, глагóлюще: учи́телю, когдá ýбо сiя́ бýдутъ? и чтó éсть знáменiе, егдá хотя́тъ сiя́ бы́ти?
О́нъ же речé: блюди́те, да не прельщéни бýдете: мнóзи бо прiи́дутъ во и́мя моé, глагóлюще, я́ко áзъ éсмь: и врéмя прибли́жися. Не изы́дите ýбо вослѣ́дъ и́хъ.
Егдá же услы́шите брáни и нестроéнiя, не убóйтеся: подобáетъ бо си́мъ бы́ти прéжде: но не ý áбiе кончи́на.
Тогдá глагóлаше и́мъ: востáнетъ бо язы́къ на язы́къ, и цáрство на цáрство:
трýси же вели́цы по мѣ́стомъ, и глáди и пáгубы бýдутъ, страховáнiя же и знáменiя вéлiя съ небесé бýдутъ.
Прéжде же си́хъ всѣ́хъ возложáтъ на вы́ рýки своя́, и ижденýтъ, предаю́ще на сóнмища и темни́цы, ведóмы къ царéмъ и влады́камъ, и́мене моегó рáди:
прилучи́тся же вáмъ во свидѣ́телство.
Положи́те ýбо на сердцáхъ вáшихъ, не прéжде поучáтися отвѣщавáти:
áзъ бо дáмъ вáмъ устá и премýдрость, éйже не возмóгутъ проти́витися или́ отвѣщáти вси́ противля́ющiися вáмъ.
Прéдани же бýдете и роди́тели и брáтiею и рóдомъ и дрýги, и умертвя́тъ от вáсъ:
и бýдете ненави́дими от всѣ́хъ и́мене моегó рáди.
И влáсъ главы́ вáшея не поги́бнетъ.
Въ терпѣ́нiи вáшемъ стяжи́те дýшы вáшя.
Егдá же ýзрите обстои́мь Иерусали́мъ вóи, тогдá разумѣ́йте, я́ко прибли́жися запустѣ́нiе емý.
Тогдá сýщiи во Иудéи да бѣ́гаютъ въ гóры: и и́же посредѣ́ егó, да исхóдятъ: и и́же во странáхъ, да не вхóдятъ вóнь:
я́ко днíе отмщéнiю сíи сýть, я́ко испóлнитися всемý пи́санному.
Гóре же имýщымъ во утрóбѣ и доя́щымъ въ ты́я дни́: бýдетъ бо бѣдá вéлiя на земли́, и гнѣ́въ на лю́дехъ си́хъ,
и падýтъ во óстрiи мечá, и плѣнéни бýдутъ во вся́ язы́ки: и Иерусали́мъ бýдетъ попирáемь язы́ки, дóндеже скончáются временá язы́къ.
И бýдутъ знáменiя въ сóлнцѣ и лунѣ́ и звѣздáхъ: и на земли́ тугá язы́комъ от нечáянiя, шýма морскáго и возмущéнiя,
издыхáющымъ человѣ́комъ от стрáха и чáянiя грядýщихъ на вселéнную: си́лы бо небéсныя подви́гнутся.
И тогдá ýзрятъ Сы́на человѣ́ческа грядýща на о́блацѣхъ съ си́лою и слáвою мнóгою.
Начинáющымъ же си́мъ бывáти, восклони́теся и воздви́гните главы́ вáшя: занé приближáется избавлéнiе вáше.
И речé при́тчу и́мъ: ви́дите смокóвницу и вся́ древá:
егдá прошибáются ужé, ви́дяще сáми вѣ́сте, я́ко бли́зъ жáтва éсть.
Тáко и вы́, егдá ýзрите сiя́ бывáюща, вѣ́дите, я́ко бли́зъ éсть цáрствiе Бóжiе.
Ами́нь глагóлю вáмъ, я́ко не и́мать прейти́ рóдъ сéй, дóндеже вся́ сiя́ бýдутъ.
Нéбо и земля́ мимои́детъ, а словесá моя́ не и́мутъ прейти́.
Внемли́те же себѣ́, да не когдá отягчáютъ сердцá вáша объядéнiемъ и пiя́нствомъ и печáльми житéйскими, и нáйдетъ на вы́ внезáпу дéнь тóй:
я́ко сѣ́ть бо прiи́детъ на вся́ живýщыя на лицы́ всея́ земли́.
Бди́те ýбо на вся́ко врéмя моля́щеся, да сподóбитеся убѣжáти всѣ́хъ си́хъ хотя́щихъ бы́ти, и стáти предъ сы́номъ человѣ́ческимъ.
Бѣ́ же во дни́ во цéркви учя́: нóщiю же исходя́ водворя́шеся въ горѣ́ нарицáемѣй Елеóнъ.
И вси́ лю́дiе изъ ýтра прихождáху къ немý во цéрковь послýшати егó.

Евангелие от Луки, 22

Приближáшеся же прáздникъ опрѣснóкъ, глагóлемый пáсха:
и искáху архiерéе и кни́жницы, кáко бы уби́ли егó: боя́хуся бо людéй.
Вни́де же сатанá во Иýду нарицáемаго Искарióтъ, сýща от числá обоюнáдесяте.
И шéдъ глагóла архiерéомъ и воевóдамъ, кáко егó предáстъ и́мъ.
И возрáдовашася, и совѣщáша емý срéбреники дáти:
и исповѣ́да {обѣщáся}, и искáше удóбна врéмене, да предáстъ егó и́мъ безъ нарóда.
Прiи́де же дéнь опрѣснóковъ, вóньже подобáше жрéти пáсху:
и послá Петрá и Иоáнна, рéкъ: шéдша уготóвайта нáмъ пáсху, да я́мы.
О́на же рекóста емý: гдѣ́ хóщеши уготóваемъ?
О́нъ же речé и́ма: сé восходя́щема вáма во грáдъ, сря́щетъ вы́ человѣ́къ въ скудéльницѣ вóду нося́: по нéмъ идѣ́та въ дóмъ, вóньже вхóдитъ,
и рцѣ́та дóму влады́цѣ: глагóлетъ тебѣ́ учи́тель: гдѣ́ éсть оби́тель, идѣ́же пáсху со ученики́ мои́ми снѣ́мъ?
И тóй вáма покáжетъ гóрницу вéлiю пóстлану: тý уготóвайта.
Шéдша же обрѣтóста, я́коже речé и́ма: и уготóваста пáсху.
И егдá бы́сть чáсъ, возлежé, и обанáдесяте апóстола съ ни́мъ.
И речé къ ни́мъ: желáнiемъ возжелѣ́хъ сiю́ пáсху я́сти съ вáми, прéжде дáже не прiимý мýкъ:
глагóлю бо вáмъ, я́ко отсéлѣ не и́мамъ я́сти от нея́, дóндеже скончáются во цáрствiи Бóжiи.
И прiи́мъ чáшу, хвалý воздáвъ, речé: прiими́те сiю́, и раздѣли́те себѣ́:
глагóлю бо вáмъ, я́ко не и́мамъ пи́ти от плодá лóзнаго, дóндеже цáрствiе Бóжiе прiи́детъ.
И прiи́мъ хлѣ́бъ, хвалý воздáвъ преломи́, и дадé и́мъ, глагóля: сié éсть тѣ́ло моé, éже за вы́ даéмо: сié твори́те въ моé воспоминáнiе.
Тáкожде же и чáшу по вéчери, глагóля: сiя́ чáша нóвый завѣ́тъ моéю крóвiю, я́же за вы́ проливáется:
обáче сé, рукá предаю́щаго мя́ со мнóю [éсть] на трапéзѣ,
и Сы́нъ ýбо человѣ́ческiй и́детъ по речéнному {по предустáвленному совѣ́ту}: обáче гóре человѣ́ку томý, и́мже предаéтся.
И тíи начáша искáти въ себѣ́, котóрый ýбо от ни́хъ хóщетъ сié сотвори́ти.
Бы́сть же и пря́ въ ни́хъ, кíй мни́тся и́хъ бы́ти бóлiй.
О́нъ же речé и́мъ: цáрiе язы́къ госпóдствуютъ и́ми, и обладáющiи и́ми благодáтеле нарицáются.
Вы́ же не тáко: но бóлiй въ вáсъ, да бýдетъ я́ко мнíй: и стáрѣй, я́ко служáй.
Ктó бо бóлiй, возлежáй ли, или́ служáй? не возлежáй ли? А́зъ же посредѣ́ вáсъ éсмь я́ко служáй.
Вы́ же естé пребы́вше со мнóю въ напáстехъ мои́хъ:
и áзъ завѣщавáю вáмъ, я́коже завѣщá мнѣ́ Отéцъ мóй, цáрство,
да я́сте и пiéте на трапéзѣ моéй во цáрствiи моéмъ: и ся́дете на престóлѣхъ, судя́ще обѣманáдесяте колѣ́нома Изрáилевома.
Речé же Госпóдь: Си́моне, Си́моне, сé сатанá прóситъ вáсъ, да бы́ сѣ́ялъ, я́ко пшени́цу:
áзъ же моли́хся о тебѣ́, да не оскудѣ́етъ вѣ́ра твоя́: и ты́ нѣ́когда обрáщься утверди́ брáтiю твою́.
О́нъ же речé емý: Гóсподи, съ тобóю готóвъ éсмь и въ темни́цу и на смéрть ити́.
О́нъ же речé: глагóлю ти́, пéтре, не возгласи́тъ пѣ́тель днéсь, дóндеже трикрáты отвéржешися менé не вѣ́дѣти.
И речé и́мъ: егдá послáхъ вы́ безъ влагáлища и безъ мѣ́ха и безъ сапóгъ, едá чесогó лишéни бы́сте? Они́ же рѣ́ша: ничесóже.
Речé же и́мъ: но ны́нѣ и́же и́мать влагáлище, да вóзметъ, тáкожде и мѣ́хъ: а и́же не и́мать, да продáстъ ри́зу свою́, и кýпитъ нóжъ.
Глагóлю бо вáмъ, я́ко ещé пи́саное сé, подобáетъ, да скончáется о мнѣ́, éже: и со беззакóнными вмѣни́ся. И́бо éже о мнѣ́, кончи́ну и́мать.
Они́ же рѣ́ша: Гóсподи, сé ножá здѣ́ двá. О́нъ же речé и́мъ: довóлно éсть.
И изшéдъ и́де по обы́чаю въ гóру Елеóнскую: по нéмъ же идóша ученицы́ егó.
Бы́въ же на мѣ́стѣ, речé и́мъ: моли́теся, да не вни́дете въ напáсть.
И сáмъ отступи́ от ни́хъ я́ко вержéнiемъ кáмене, и поклóнь колѣ́на моля́шеся,
глагóля: óтче, áще вóлиши мимонести́ чáшу сiю́ от менé: обáче не моя́ вóля, но твоя́ да бýдетъ.
Яви́ся же емý áнгелъ съ небесé, укрѣпля́я егó.
И бы́въ въ пóдвизѣ, прилѣ́жнѣе моля́шеся: бы́сть же пóтъ егó я́ко кáпли крóве кáплющыя на зéмлю.
И востáвъ от моли́твы [и] пришéдъ ко ученикóмъ, обрѣ́те и́хъ спя́щихъ от печáли
и речé и́мъ: чтó спитé? востáвше моли́теся, да не вни́дете въ напáсть.
Ещé же емý глагóлющу, сé нарóдъ, и нарицáемый Иýда, еди́нъ от обоюнáдесяте, идя́ше предъ ни́ми, и приступи́ ко Иисýсови цѣловáти егó. Сié бо бѣ́ знáменiе дáлъ и́мъ: егóже áще лобжý, тóй éсть.
Иисýсъ же речé емý: Иýдо, лобзáнiемъ ли Сы́на человѣ́ческаго предаéши?
Ви́дѣвше же, и́же бѣ́ху съ ни́мъ, бывáемое, рѣ́ша емý: Гóсподи, áще удáримъ ножéмъ?
И удáри еди́нъ нѣ́кiй от ни́хъ архiерéова рабá, и урѣ́за емý ýхо деснóе.
Отвѣщáвъ же Иисýсъ речé: остáвите до сегó. И коснýвся ýха егó, исцѣли́ егó.
Речé же Иисýсъ ко пришéдшымъ нáнь архiерéомъ и воевóдамъ церкóвнымъ и стáрцемъ: я́ко на разбóйника ли изыдóсте со орýжiемъ и дрекóльми я́ти мя́?
по вся́ дни́ сýщу ми́ съ вáми въ цéркви, не прострóсте руки́ на мя́: но сé éсть вáша годи́на и о́бласть тéмная.
Е́мше же егó ведóша, и введóша егó во двóръ архiерéовъ. Пéтръ же вослѣ́дъ идя́ше издалéча.
Возгнѣ́щшымъ же óгнь посредѣ́ дворá и вкýпѣ сѣдя́щымъ и́мъ, сѣдя́ше пéтръ посредѣ́ и́хъ.
Узрѣ́вши же егó рабы́ня нѣ́кая сѣдя́ща при свѣ́тѣ {огни́}, и воззрѣ́вши нáнь, речé: и сéй съ ни́мъ бѣ́.
О́нъ же отвéржеся егó, глагóля: жéно, не знáю егó.
И помáлѣ другíй ви́дѣвъ егó, речé: и ты́ от ни́хъ еси́. Пéтръ же речé: человѣ́че, нѣ́смь.
И мимошéдшу я́ко часý еди́ному, и́нъ нѣ́кiй крѣпля́шеся глагóля: вои́стинну и сéй съ ни́мъ бѣ́: и́бо Галилéанинъ éсть.
Речé же пéтръ: человѣ́че, не вѣ́мъ, éже глагóлеши. И áбiе, ещé глагóлющу емý, возгласи́ пѣ́тель.
И обрáщься Госпóдь воззрѣ́ на Петрá: и помянý пéтръ слóво Госпóдне, я́коже речé емý, я́ко прéжде дáже пѣ́тель не возгласи́тъ, отвéржешися менé трикрáты.
И изшéдъ вóнъ, плáкася гóрько.
И мýжiе держáщiи Иисýса ругáхуся емý, бiю́ще:
и закры́вше егó, бiя́ху егó по лицý, и вопрошáху егó, глагóлюще: прорцы́, ктó éсть ударéй тя́?
И и́на мнóга хýляще глагóлаху нáнь.
И я́ко бы́сть дéнь, собрáшася стáрцы людстíи и архiерéе и кни́жницы, и ведóша егó на сóнмъ свóй,
глагóлюще: áще ты́ еси́ Христóсъ? рцы́ нáмъ. Речé же и́мъ: áще вáмъ рекý, не и́мете вѣ́ры:
áще же и вопрошý [вы́], не отвѣщáете ми́, ни отпуститé:
отсéлѣ бýдетъ Сы́нъ человѣ́ческiй сѣдя́й одеснýю си́лы Бóжiя.
Рѣ́ша же вси́: ты́ ли ýбо еси́ Сы́нъ Бóжiй? О́нъ же къ ни́мъ речé: вы́ глагóлете, я́ко áзъ éсмь.
Они́ же рѣ́ша: чтó ещé трéбуемъ свидѣ́телства? сáми бо слы́шахомъ от ýстъ егó.

Евангелие от Луки, 23

И востáвше всé мнóжество и́хъ, ведóша егó къ пилáту.
Начáша же нáнь вáдити, глагóлюще: сегó обрѣтóхомъ развращáюща язы́къ нáшъ и возбраня́юща кéсареви дáнь дая́ти, глагóлюща себé Христá Царя́ бы́ти.
Пилáтъ же вопроси́ егó, глагóля: ты́ ли еси́ Цáрь Иудéомъ? О́нъ же отвѣщáвъ речé емý: ты́ глагóлеши.
Пилáтъ же речé ко архiерéомъ и нарóду: никóеяже обрѣтáю вины́ въ человѣ́цѣ сéмъ.
Они́ же крѣпля́хуся глагóлюще, я́ко развращáетъ лю́ди, учя́ по всéи Иудéи, начéнъ от Галилéи до здѣ́.
Пилáтъ же слы́шавъ Галилéю, вопроси́, áще человѣ́къ Галилéанинъ éсть?
И разумѣ́въ, я́ко от о́бласти И́родовы éсть, послá егó ко И́роду, сýщу и томý во Иерусали́мѣ въ ты́я дни́.
И́родъ же ви́дѣвъ Иисýса рáдъ бы́сть зѣлó: бѣ́ бо желáя от мнóга врéмене ви́дѣти егó, занé слы́шаше мнóга о нéмъ: и надѣ́яшеся знáменiе нѣ́кое ви́дѣти от негó бывáемо.
Вопрошáше же егó словесы́ мнóгими: óнъ же ничесóже отвѣщавáше емý.
Стоя́ху же архiерéе и кни́жницы, прилѣ́жно вáдяще нáнь.
Укори́въ же егó И́родъ съ вóи свои́ми и поругáвся, обóлкъ егó въ ри́зу свѣ́тлу, возврати́ егó къ пилáту.
Бы́ста же дрýга И́родъ же и пилáтъ въ тóй дéнь съ собóю: прéжде бо бѣ́ста враждý имýща междý собóю.
Пилáтъ же созвáвъ архiерéи и кня́зи и лю́ди,
речé къ ни́мъ: приведóсте ми́ человѣ́ка сегó, я́ко развращáюща лю́ди: и сé áзъ предъ вáми истязáвъ, ни еди́ныя же обрѣтáю въ человѣ́цѣ сéмъ вины́, я́же нáнь вáдите:
но ни И́родъ: послáхъ бо егó къ немý, и сé ничтóже достóйно смéрти сотворéно éсть о нéмъ:
наказáвъ ýбо егó отпущý.
Нýжду же имя́ше на вся́ прáздники отпущáти и́мъ еди́наго.
Возопи́ша же вси́ нарóди, глагóлюще: возми́ сегó, отпусти́ же нáмъ Варáвву.
И́же бѣ́ за нѣ́кую крамóлу бы́вшую во грáдѣ и убíйство ввéрженъ въ темни́цу.
Пáки же пилáтъ возгласи́, хотя́ отпусти́ти Иисýса.
Они́ же возглашáху, глагóлюще: распни́, распни́ егó.
О́нъ же трети́цею речé къ ни́мъ: чтó бо злó сотвори́ сéй? ничесóже достóйна смéрти обрѣтóхъ въ нéмъ: наказáвъ ýбо егó отпущý.
Они́ же прилѣжáху глáсы вели́кими, прося́ще егó на распя́тiе: и устоя́ху {превозмогáху} глáси и́хъ и архiерéйстiи.
Пилáтъ же посуди́ бы́ти прошéнiю и́хъ:
отпусти́ же бы́вшаго за крамолý и убíйство всаждéна въ темни́цу, егóже прошáху: Иисýса же предадé вóли и́хъ.
И я́ко поведóша егó, éмше Си́мона нѣ́коего киринéа, грядýща съ селá, возложи́ша нáнь крéстъ, нести́ по Иисýсѣ.
Идя́ше же вослѣ́дъ егó нарóдъ мнóгъ людéй, и жены́, я́же и плáкахуся и рыдáху егó.
Обрáщься же къ ни́мъ Иисýсъ речé: дщéри Иерусали́мски, не плáчитеся о мнѣ́, обáче себé плáчите и чáдъ вáшихъ:
я́ко сé днíе грядýтъ, въ ня́же рекýтъ: блажéны неплóды, и утрóбы, я́же не роди́ша, и сосцы́, и́же не дои́ша.
Тогдá начнýтъ глагóлати горáмъ: пади́те на ны́: и холмóмъ: покры́йте ны́.
Занé, áще въ сýровѣ дрéвѣ сiя́ творя́тъ, въ сýсѣ чтó бýдетъ?
Ведя́ху же и и́на двá злодѣ́я съ ни́мъ уби́ти.
И егдá прiидóша на мѣ́сто, нарицáемое лóбное, тý распя́ша егó и злодѣ́я, óваго ýбо одеснýю, а другáго ошýюю.
Иисýсъ же глагóлаше: óтче, отпусти́ и́мъ: не вѣ́дятъ бо чтó творя́тъ. Раздѣля́юще же ри́зы егó, метáху жрéбiя.
И стоя́ху лю́дiе зря́ще. Ругáхуся же и кня́зи съ ни́ми, глагóлюще: ины́я спасé, да спасéтъ и себé, áще тóй éсть Христóсъ Бóжiй избрáнный.
Ругáхуся же емý и вóини, приступáюще и óцетъ придѣ́юще емý,
и глагóлаху: áще ты́ еси́ Цáрь Иудéйскъ, спаси́ся сáмъ.
Бѣ́ же и написáнiе напи́сано надъ ни́мъ писмены́ éллинскими и ри́мскими и Еврéйскими: сéй éсть Цáрь Иудéйскъ.
Еди́нъ же от обѣ́шеною злодѣ́ю хýляше егó, глагóля: áще ты́ еси́ Христóсъ, спаси́ себé и нáю.
Отвѣщáвъ же другíй прещáше емý, глагóля: ни ли́ ты́ бои́шися Бóга, я́ко въ тóмже осуждéнъ еси́?
и мы́ ýбо въ прáвду: достóйная бо по дѣлóмъ нáю воспрiéмлева: сéй же ни еди́наго злá сотвори́.
И глагóлаше Иисýсови: помяни́ мя, Гóсподи, егдá прiи́деши во цáрствiи си́.
И речé емý Иисýсъ: ами́нь глагóлю тебѣ́, днéсь со мнóю бýдеши въ раи́.
Бѣ́ же чáсъ я́ко шесты́й, и тмá бы́сть по всéй земли́ до часá девя́таго:
и помéрче сóлнце, и завѣ́са церкóвная раздрáся посредѣ́.
И возглáшь глáсомъ вéлiимъ Иисýсъ, речé: óтче, въ рýцѣ твои́ предаю́ Дýхъ мóй. И сiя́ рéкъ и́здше.
Ви́дѣвъ же сóтникъ бы́вшее, прослáви Бóга, глагóля: вои́стинну человѣ́къ сéй прáведенъ бѣ́.
И вси́ пришéдшiи нарóди на позóръ сéй, ви́дяще бывáющая, бiю́ще пéрси своя́ возвращáхуся.
Стоя́ху же вси́ знáемiи егó издалéча, и жены́ спослѣ́дствовавшыя емý от Галилéи, зря́щя сiя́.
И сé, мýжъ и́менемъ Иóсифъ, совѣ́тникъ сы́й, мýжъ блáгъ и прáведенъ,
сéй не бѣ́ пристáлъ совѣ́ту и дѣ́лу и́хъ, от Аримаѳéа грáда Иудéйска, и́же чáяше и сáмъ цáрствiя Бóжiя:
сéй пристýпль къ пилáту, проси́ тѣлесé Иисýсова:
и снéмъ é обви́тъ плащани́цею, и положи́ é во грóбѣ изсѣ́ченѣ, въ нéмже не бѣ́ никтóже никогдáже положéнъ.
И дéнь бѣ́ пятóкъ, и суббóта свѣтáше.
Вслѣ́дъ же шéдшыя жены́, я́же бя́ху пришли́ съ ни́мъ от Галилéи, ви́дѣша грóбъ, и я́ко положéно бы́сть тѣ́ло егó:
возврáщшяся же уготóваша аромáты и ми́ро: и въ суббóту ýбо умолчáша по зáповѣди.

Евангелие от Луки, 24

Во еди́ну же от суббóтъ зѣлó рáно прiидóша на грóбъ, нося́щя я́же уготóваша аромáты: и другíя съ ни́ми:
обрѣтóша же кáмень отвалéнъ от грóба,
и вшéдшя не обрѣтóша тѣлесé Гóспода Иисýса.
И бы́сть не домышля́ющымся и́мъ о сéмъ, и сé мýжа двá стáста предъ ни́ми въ ри́захъ блещáщихся.
Пристрáшнымъ же бы́вшымъ и́мъ и поклóншымъ ли́ца на зéмлю, рекóста къ ни́мъ: чтó и́щете живáго съ мéртвыми?
нѣ́сть здѣ́, но востá: помяни́те, я́коже глагóла вáмъ, ещé сы́й въ Галилéи,
глагóля, я́ко подобáетъ Сы́ну человѣ́ческому прéдану бы́ти въ рýцѣ человѣ́къ грѣ́шникъ, и пропя́ту бы́ти, и въ трéтiй дéнь воскрéснути.
И помянýша глагóлы егó:
и возврáщшяся от грóба, возвѣсти́ша вся́ сiя́ единомунáдесяте и всѣ́мъ прóчымъ.
Бя́ше же Магдали́на Марíа и Иоáнна и Марíа Иáковля, и прóчыя съ ни́ми, я́же глагóлаху ко апóстоломъ сiя́.
И яви́шася предъ ни́ми я́ко лжá глагóлы и́хъ, и не вѣ́роваху и́мъ.
Пéтръ же востáвъ течé ко грóбу, и прини́къ ви́дѣ ри́зы еди́ны лежáщя: и отъи́де, въ себѣ́ дивя́ся бы́вшему.
И сé двá от ни́хъ бѣ́ста идýща въ тóйже дéнь въ вéсь, отстоя́щу стáдiй шестьдеся́тъ от Иерусали́ма, éйже и́мя Еммаýсъ:
и тá бесѣ́доваста къ себѣ́ о всѣ́хъ си́хъ приклю́чшихся.
И бы́сть бесѣ́дующема и́ма и совопрошáющемася, и сáмъ Иисýсъ прибли́жився идя́ше съ ни́ма:
óчи же ею́ держáстѣся, да егó не познáета.
Речé же къ ни́ма: чтó сýть словесá сiя́, о ни́хже стязáетася къ себѣ́ идýща, и естá дря́хла?
Отвѣщáвъ же еди́нъ, емýже и́мя клеóпа, речé къ немý: ты́ ли еди́нъ пришлéцъ еси́ во Иерусали́мъ, и не увѣ́дѣлъ еси́ бы́вшихъ въ нéмъ во дни́ сiя́?
И речé и́ма: кíихъ? О́на же рѣ́ста емý: я́же о Иисýсѣ назаряни́нѣ, и́же бы́сть мýжъ прорóкъ, си́ленъ дѣ́ломъ и слóвомъ предъ Бóгомъ и всѣ́ми людьми́:
кáко предáша егó архiерéи и кня́зи нáши на осуждéнiе смéрти, и распя́ша егó:
мы́ же надѣ́яхомся, я́ко сéй éсть хотя́ избáвити Изрáиля: но и надъ всѣ́ми си́ми, трéтiй сéй дéнь éсть днéсь, отнéлиже сiя́ бы́ша.
Но и жены́ нѣ́кiя от нáсъ ужаси́ша ны́, бы́вшыя рáно у грóба:
и не обрѣ́тшя тѣлесé егó, прiидóша, глагóлющя, я́ко и явлéнiе áнгелъ ви́дѣша, и́же глагóлютъ егó жи́ва.
И идóша нѣ́цыи от нáсъ ко грóбу, и обрѣтóша тáко, я́коже и жены́ рѣ́ша: самагó же не ви́дѣша.
И тóй речé къ ни́ма: о несмы́сленная и кóсная сéрдцемъ, éже вѣ́ровати о всѣ́хъ, я́же глагóлаша прорóцы:
не сiя́ ли подобáше пострадáти Христý и вни́ти въ слáву свою́?
И начéнъ от Моисéа и от всѣ́хъ прорóкъ, сказáше и́ма от всѣ́хъ писáнiй я́же о нéмъ.
И прибли́жишася въ вéсь, въ ню́же идя́ста: и тóй творя́шеся далечáйше ити́.
И нýждаста егó, глагóлюща: обля́зи съ нáма, я́ко къ вéчеру éсть, и приклони́лся éсть дéнь. И вни́де съ ни́ма облещи́.
И бы́сть я́ко возлежé съ ни́ма, и прiи́мъ хлѣ́бъ благослови́, и преломи́въ дая́ше и́ма:
óнѣма же отверзóстѣся óчи, и познáста егó: и тóй неви́димь бы́сть и́ма.
И рекóста къ себѣ́: не сéрдце ли нáю горя́ бѣ́ въ нáю, егдá глагóлаше нáма на пути́ и егдá скáзоваше нáма писáнiя?
И востáвша въ тóй чáсъ, возврати́стася во Иерусали́мъ, и обрѣтóста совокýпленныхъ единонáдесяте и и́же бя́ху съ ни́ми,
глагóлющихъ, я́ко вои́стинну востá Госпóдь и яви́ся Си́мону.
И тá повѣ́даста, я́же бы́ша на пути́, и я́ко познáся и́ма въ преломлéнiи хлѣ́ба.
Сiя́ же и́мъ глагóлющымъ, [и] сáмъ Иисýсъ стá посредѣ́ и́хъ, и глагóла и́мъ: ми́ръ вáмъ.
Убоя́вшеся же и пристрáшни бы́вше, мня́ху дýхъ ви́дѣти:
и речé и́мъ: чтó смущéни естé? и почтó помышлéнiя вхóдятъ въ сердцá вáша?
ви́дите рýцѣ мои́ и нóзѣ мои́, я́ко сáмъ áзъ éсмь: осяжи́те мя́ и ви́дите: я́ко дýхъ плóти и кóсти не и́мать, я́коже менé ви́дите имýща.
И сié рéкъ, показá и́мъ рýцѣ и нóзѣ.
Ещé же невѣ́рующымъ и́мъ от рáдости и чудя́щымся, речé и́мъ: и́мате ли чтó снѣ́дно здѣ́?
Они́ же дáша емý ры́бы печéны чáсть и от пчéлъ сóтъ.
И взéмъ предъ ни́ми ядé,
речé же и́мъ: сiя́ сýть словесá, я́же глагóлахъ къ вáмъ ещé сы́й съ вáми, я́ко подобáетъ скончáтися всѣ́мъ напи́саннымъ въ закóнѣ Моисéовѣ и прорóцѣхъ и псалмѣ́хъ о мнѣ́.
Тогдá отвéрзе и́мъ ýмъ разумѣ́ти писáнiя
и речé и́мъ, я́ко тáко пи́сано éсть, и тáко подобáше пострадáти Христý и воскрéснути от мéртвыхъ въ трéтiй дéнь,
и проповѣ́датися во и́мя егó покая́нiю и отпущéнiю грѣхóвъ во всѣ́хъ язы́цѣхъ, начéнше от Иерусали́ма:
вы́ же естé свидѣ́телiе си́мъ:
и сé, áзъ послю́ обѣтовáнiе Отцá моегó на вы́: вы́ же сѣди́те во грáдѣ Иерусали́мстѣ, дóндеже облечéтеся си́лою свы́ше.
Извéдъ же и́хъ вóнъ до Виѳáнiи и воздви́гъ рýцѣ свои́, [и] благослови́ и́хъ.
И бы́сть егдá благословля́ше и́хъ, отступи́ от ни́хъ и возношáшеся на нéбо.
И тíи поклони́шася емý и возврати́шася во Иерусали́мъ съ рáдостiю вели́кою:
и бя́ху вы́ну въ цéркви, хвáляще и благословя́ще Бóга. Ами́нь.

#ДаниилСысоев #СвященноеПисание #миссия

Даниил Сысоев

Евангелие от Луки

Евангелие от Луки, 1

Comments