Изъяснение Книги пророка Исаии
- отец Даниил
- 27 апр. 2017 г.
- 78 мин. чтения
Исаия - один из великих библейских пророков, выходец из знатной иудейской священнической семьи, родился в Иерусалиме в шестом веке до рождества Христова. Пророчествовал на арамейском языке. Примечателен пророчествами о рождении Мессии, искупительной жертве Христа, осуждал иудеев за беззаконие.
Началось пророческое служение Исаии в возрасте 20 лет с видения Бога на высоком и превознесенном престоле; "...края риз его наполняли весь храм, вокруг Него летали ангелы и взывали друг к другу: "Свят, Свят, Свят, Господь Саваоф! Вся земля полна славы Его..."."
Видѣ́нiе, éже ви́дѣ Исáiа сы́нъ Амóсовъ, éже ви́дѣ на Иудéю и на Иерусали́мъ, въ цáрство Озíи и Иоаѳáма, и Ахáза и езекíи, и́же цáрствоваша во Иудéи.
Слы́ши, небо, и внуши́, землé, я́ко Госпóдь возглагóла: сы́ны роди́хъ и возвы́сихъ, тíи же отвергóшася менé.
Познá вóлъ стяжáвшаго и́, и осéлъ я́сли господи́на своегó: Изрáиль же менé не познá, и лю́дiе мои́ не разумѣ́ша.
Увы́, язы́къ грѣ́шный, лю́дiе испóлнени грѣхóвъ, сѣ́мя лукáвое, сы́нове беззакóннiи, остáвисте Гóспода и разгнѣ́васте святáго Изрáилева, отврати́теся вспя́ть.
Чтó ещé уязвля́етеся, прилагáюще беззакóнiе? Вся́кая главá въ болѣ́знь, и вся́кое сéрдце въ печáль.
От нóгъ дáже до главы́ нѣ́сть въ нéмъ цѣ́лости: ни стрýпъ, ни я́зва, ни рáна паля́щаяся: нѣ́сть плáстыря приложи́ти, нижé елéа, нижé обязáнiя.
Земля́ вáша пустá, грáди вáши огнéмъ пожжéни, странý вáшу предъ вáми чуждíи поядáютъ, и опустѣ́ низвращéна от людíй чужди́хъ.
Остáвится дщéрь Сióня, я́ко кýща въ виногрáдѣ и я́ко овóщное храни́лище въ вертогрáдѣ, я́ко грáдъ вою́емый.
И áще не бы́ Госпóдь Саваóѳъ остáвилъ нáмъ сѣ́мене, я́ко Cодóма ýбо бы́ли бы́хомъ, и я́ко Гомóрру уподóбилися бы́хомъ.
Услы́шите слóво Госпóдне, кня́зи Cодóмстiи: внемли́те закóну Бóжiю, лю́дiе Гомóррстiи.
Чтó ми мнóжество жéртвъ вáшихъ, глагóлетъ Госпóдь? Испóлненъ éсмь всесожжéнiй óвнихъ и тýка áгнцевъ, и крóве юнцéвъ и козлóвъ не хощý.
Нижé приходи́те яви́тися ми́: ктó бо изыскá сiя́ изъ рýкъ вáшихъ? Ходи́ти по дворý моемý не приложитé.
И áще принесéте ми́ семидáлъ, всýе: кади́ло мéрзость ми́ éсть.
Новомéсячiй вáшихъ и суббóтъ и днé вели́каго не потерплю́: постá и прáздности, и новомéсячiй вáшихъ и прáздниковъ вáшихъ ненави́дитъ душá моя́: бы́сте ми́ въ сы́тость, ктомý не стерплю́ грѣхóвъ вáшихъ.
Егдá прострéте рýки [вáшя] ко мнѣ́, отвращý óчи мои́ от вáсъ: и áще умнóжите молéнiе, не услы́шу вáсъ: рýки бо вáшя испóлнены крóве.
Измы́йтеся, [и] чи́сти бýдите, отими́те лукáвства от дýшъ вáшихъ предъ очи́ма мои́ма, престáните от лукáвствъ вáшихъ.
Научи́теся добрó твори́ти, взыщи́те судá, избáвите оби́димаго, суди́те си́ру и оправди́те вдови́цу,
и прiиди́те, и истя́жимся, глагóлетъ Госпóдь. И áще бýдутъ грѣси́ вáши я́ко багря́ное, я́ко снѣ́гъ убѣлю́: áще же бýдутъ я́ко червлéное, я́ко вóлну убѣлю́.
И áще хóщете и послýшаете менé, благáя земли́ снѣ́сте:
áще же не хóщете, нижé послýшаете менé, мéчь вы́ поя́стъ: устá бо Госпóдня глагóлаша сiя́.
Кáко бы́сть блудни́ца грáдъ вѣ́рный Сióнъ пóлнъ судá? въ нéмже прáвда почивáше, ны́нѣ же [въ нéмъ] уби́йцы.
Сребрó вáше неискушéно, корчéмницы твои́ мѣшáютъ винó съ водóю.
Кня́зи твои́ не покаря́ются, óбщницы татéмъ, лю́бяще дáры, гоня́ще воздая́нiе, си́рымъ не судя́щiи и судý вдови́цъ не внимáющiи.
Сегó рáди тáко глагóлетъ Влады́ка Госпóдь Саваóѳъ: гóре крѣ́пкимъ во Изрáили: не престáнетъ бо я́рость моя́ на проти́вныя, и сýдъ врагóмъ мои́мъ сотворю́:
и наведý рýку мою́ на тя́, и разжегý въ чистотý, непокаря́ющихся же погублю́, и отимý всѣ́хъ беззакóнныхъ от тебé, и всѣ́хъ гóрдыхъ смирю́.
И пристáвлю судiи́ твоя́ я́коже прéжде, и совѣ́тники твоя́ я́ко от начáла: и по си́хъ нарѣчéшися грáдъ прáвды, мáти градовóмъ, вѣ́рный Сióнъ.
Съ судóмъ бо спасéтся плѣнéнiе егó и съ ми́лостынею.
И сокрушáтся беззакóннiи и грѣ́шницы вкýпѣ, и остáвившiи Гóспода скончáются:
занéже постыдя́тся о и́долѣхъ свои́хъ, и́хже сáми восхотѣ́ша, и посрáмятся о садѣ́хъ свои́хъ, и́хже возжелѣ́ша.
Бýдутъ бо я́ко тереви́нѳъ отмéтнувый ли́ствiя [своя́], и я́ко вертогрáдъ не имы́й воды́.
И бýдетъ крѣ́пость и́хъ я́ко стéбль изгрéбiя, и дѣ́ланiя и́хъ я́ко и́скры óгненныя, и сожгýтся беззакóнницы и грѣ́шницы вкýпѣ, и не бýдетъ угашáяй.
Слóво бы́вшее от Гóспода ко Исáiи сы́ну Амóсову о Иудéи и о Иерусали́мѣ.
Я́ко бýдетъ въ послѣ́днiя дни́ явлéна горá Госпóдня, и дóмъ Бóжiй на версѣ́ гóръ, и возвы́сится превы́ше холмóвъ: и прiи́дутъ къ нéй вси́ язы́цы.
И пóйдутъ язы́цы мнóзи и рекýтъ: прiиди́те, и взы́демъ на гóру Госпóдню и въ дóмъ Бóга Иáковля, и возвѣсти́тъ нáмъ пýть свóй, и пóйдемъ по немý. От Сióна бо изы́детъ закóнъ, и слóво Госпóдне изъ Иерусали́ма:
и суди́ти бýдетъ посредѣ́ язы́къ и изобличи́тъ лю́ди мнóги: и раскую́тъ мечы́ своя́ на орáла и кóпiя своя́ на серпы́, и не вóзметъ язы́къ на язы́къ мечá, и не навы́кнутъ ктомý рáтоватися.
И ны́нѣ, дóме Иáковль, прiиди́те, пóйдемъ свѣ́томъ Госпóднимъ.
Остáви бо лю́ди своя́, дóмъ Иáковль: занé я́коже изъ начáла напóлнися странá и́хъ волхвовáнiй, я́коже иноплемéнниковъ, и чáда мнóга иноплемéннича роди́шася и́мъ.
Напóлнися бо странá и́хъ сребрá и злáта, и не бя́ше числá сокрóвищъ и́хъ: и напóлнися земля́ и́хъ кóней, и не бя́ше числá колесни́цъ и́хъ:
и напóлнися земля́ мéрзостей дѣ́лъ рýкъ и́хъ, и поклони́шася тѣ́мъ, я́же сотвори́ша пéрсты и́хъ:
и преклони́ся человѣ́къ, и смири́ся мýжъ, и не претерплю́ и́мъ.
И ны́нѣ вни́дите въ кáменiе и скры́йтеся въ зéмлю от лицá стрáха Госпóдня и от слáвы крѣ́пости егó, егдá востáнетъ сокруши́ти зéмлю.
О́чи бо Госпóдни высóцы, человѣ́къ же смирéнъ: и смири́тся высотá человѣ́ческая, и вознесéтся Госпóдь еди́нъ въ дéнь óный.
Дéнь бо Гóспода Саваóѳа на вся́каго досади́теля и гордели́ваго, и на вся́каго высóкаго и величáваго, и смиря́тся:
и на вся́къ кéдръ Ливáнскiй высóкихъ и превознесéнныхъ и на вся́ко дрéво жéлудя Васáнска,
и на вся́кую гóру высóкую и на вся́кiй хóлмъ высóкiй,
и на вся́кiй стóлпъ высóкъ и на вся́кую стѣ́ну высóкую,
и на вся́кiй корáбль морскíй и на вся́ко видѣ́нiе добрóты кораблéй.
И смири́тся вся́кiй человѣ́къ, и падéтся высотá человѣ́ча, и вознесéтся Госпóдь еди́нъ въ дéнь óный.
И рукотворéная вся́ скры́ютъ,
внéсше въ пещéры и въ разсѣ́лины кáменiй и въ вертéпы земны́я, от лицá стрáха Госпóдня и от слáвы крѣ́пости егó, егдá востáнетъ сокруши́ти зéмлю.
Въ дéнь бо óный изри́нетъ человѣ́къ мéрзости своя́ златы́я и срéбряныя, я́же сотвори́ша, да покланя́ются сýетнымъ и нетопырéмъ,
éже вни́ти въ вертéпы твéрдаго кáмене и въ разсѣ́лины кáменiй, от лицá стрáха Госпóдня и от слáвы крѣ́пости егó, егдá востáнетъ сокруши́ти зéмлю.
Остáвите [ýбо] вáмъ человѣ́ка, емýже éсть дыхáнiе въ ноздрéхъ егó: я́ко въ чéмъ вмѣни́ся сéй?
Сé, Влады́ка Госпóдь Саваóѳъ отъи́метъ от Иерусали́ма и от Иудéи крѣ́пкаго и крѣ́пкую, крѣ́пость хлѣ́ба и крѣ́пость воды́,
исполи́на и крѣ́пкаго, и человѣ́ка рáтника и судiю́, и прорóка и смотрели́ваго, и стáрца
и пятьдесятоначáлника, и ди́внаго совѣ́тника и премýдраго архитéктона и разýмнаго послýшателя.
И постáвлю ю́ношы кня́зи и́хъ, и ругáтелiе госпóдствовати бýдутъ и́ми.
И напáдати и́мутъ лю́дiе, человѣ́къ на человѣ́ка, и человѣ́къ на бли́жняго своегó: прирази́тся отрочá къ стáрцу, и безчéстный къ честнóму.
Я́ко и́мется человѣ́къ брáта своегó, или́ домáшняго отцá своегó, глагóля: ри́зу и́маши, началовóждь нáмъ бýди, и брáшно моé подъ тобóю да бýдетъ.
И отвѣщáвъ въ дéнь óный речéтъ: не бýду твóй началовóждь, нѣ́сть бо въ домý моéмъ ни хлѣ́ба, ни ри́зы: не бýду началовóждь лю́демъ си́мъ.
Я́ко остáвленъ бы́сть Иерусали́мъ, и Иудéа падé, и язы́къ и́хъ со беззакóнiемъ, не покаря́ющься Гóсподеви.
Сегó рáди ны́нѣ смири́ся слáва и́хъ, и стýдъ лицá и́хъ проти́ву стá и́мъ: грѣ́хъ же свóй я́ко Cодóмскiй возвѣсти́ша и яви́ша. Гóре души́ и́хъ, занé умы́слиша совѣ́тъ лукáвый на себé сами́хъ,
рéкше: свя́жемъ прáведнаго, я́ко непотрéбенъ нáмъ éсть. У́бо плоды́ дѣ́лъ свои́хъ снѣдя́тъ.
Гóре беззакóнному: лукáвая бо приключáтся емý по дѣлóмъ рукý егó.
Лю́дiе мои́, пристáвницы вáши пожинáютъ вáсъ, и истязáющiи обладáютъ вáми: лю́дiе мои́, блажáщiи вáсъ льстя́тъ вы́ и стези́ нóгъ вáшихъ возмущáютъ.
Но ны́нѣ устрóится Госпóдь на сýдъ и постáвитъ на сýдъ лю́ди своя́:
сáмъ Госпóдь на сýдъ прiи́детъ со старѣ́йшины людíй и со кня́зи и́хъ. Вы́ же почтó запали́сте виногрáдъ мóй, и разграблéнiе убóгаго въ домѣ́хъ вáшихъ?
почтó вы́ оби́дите людíй мои́хъ и лицé убóгихъ посрамля́ете? глагóлетъ Госпóдь Саваóѳъ.
Сiя́ глагóлетъ Госпóдь: понéже вознесóшася дщéри Сióни и ходи́ша высóкою вы́ею и помизáнiемъ очéсъ и ступáнiемъ нóгъ, кýпно ри́зы влекýшыя [по дóлу] и ногáма кýпно игрáющыя:
и смири́тъ Госпóдь начáлныя дщéри Сióни, и Госпóдь откры́етъ срамотý и́хъ.
Въ дéнь о́нъ, и отъи́метъ Госпóдь слáву ри́зъ и́хъ и красоты́ и́хъ, и вплетéнiя златáя [на главѣ́] и трéсны ри́зныя, и лýницы гри́венныя
и срачи́цы тóнкiя, и красотý лицá и́хъ и состроéнiе красы́ слáвныя, и о́бручи и пéрстни, и мони́ста и запя́стiя и худóжныя усеря́зи,
и багряни́цы и пребагря́ная, и ýтварь хрáмную
и свѣ́тлая лакóнская, и виссóны и синеты́, и червлени́цы
и виссóнъ со злáтомъ и синетóю преты́каны, и тончи́цы преи́маны злáтомъ:
и бýдетъ вмѣ́сто вони́ дóбрыя смрáдъ, и вмѣ́сто пóяса ýжемъ препоя́шешися, и вмѣ́сто украшéнiя златáго, éже на главѣ́, плѣ́шь имѣ́ти бýдеши дѣ́лъ твои́хъ рáди, и вмѣ́сто ри́зы багря́ныя препоя́шешися врéтищемъ:
и сы́нъ твóй добрѣ́йшiй, егóже лю́биши, мечéмъ падéтъ, и крѣ́пцыи вáши мечéмъ падýтъ и смиря́тся:
и восплáчутся храни́лища ýтварей вáшихъ, и остáнешися еди́на и о зéмлю удáрена бýдеши.
И и́мутся сéдмь жéнъ за мýжа еди́наго, глагóлющя: хлѣ́бъ нáшъ я́сти бýдемъ и въ ри́зы нáшя одѣвáтися, тóчiю и́мя твоé да наречéтся на нáсъ, отими́ укори́зну нáшу.
Въ дéнь óный возсiя́етъ Бóгъ въ совѣ́тѣ со слáвою на земли́, éже вознести́ и прослáвити остáнокъ Изрáиля.
И бýдетъ остáнокъ въ Сióнѣ и остáнокъ во Иерусали́мѣ, святи нарекýтся вси́ напи́саннiи въ жи́знь во Иерусали́мѣ:
я́ко отмы́етъ Госпóдь сквéрну сынóвъ и дщéрей Сióнскихъ и крóвь Иерусали́мску очи́ститъ от среды́ и́хъ дýхомъ судá и дýхомъ знóя.
И прiи́детъ Госпóдь, и бýдетъ всé мѣ́сто горы́ Сióни, и вся́ я́же о́крестъ ея́ осѣни́тъ о́блакъ во дни́, и я́ко ды́ма и свѣ́та óгненна горя́ща въ нощи́, всéю слáвою покры́ется:
и бýдетъ въ сѣ́нь от знóя и въ покрóвъ и въ сокровéнiе от жéстости и дождя́.
Воспою́ ны́нѣ возлю́бленному пѣ́снь возлю́бленнаго моегó виногрáду моемý: виногрáдъ бы́сть возлю́бленному въ рóзѣ, на мѣ́стѣ тýчнѣ:
и ограждéнiемъ огради́хъ и окопáхъ, и насади́хъ лóзу избрáнну, и создáхъ стóлпъ посредѣ́ егó, и предточи́лiе ископáхъ въ нéмъ, и ждáхъ, да сотвори́тъ грóздiе, и сотвори́ тéрнiе.
И ны́нѣ, живýщiи во Иерусали́мѣ и человѣ́че Иýдинъ, суди́те междý мнóю и виногрáдомъ мои́мъ.
Чтó сотворю́ ещé виногрáду моемý, и не сотвори́хъ емý? занéже ждáхъ, да сотвори́тъ грóздiе, сотвори́ же тéрнiе.
Ны́нѣ ýбо возвѣщý вáмъ, чтó áзъ сотворю́ виногрáду моемý: отимý ограждéнiе егó, и бýдетъ въ разграблéнiе: и разорю́ стѣ́ну егó, и бýдетъ въ попрáнiе.
И остáвлю виногрáдъ мóй, и ктомý не обрѣ́жется, нижé покопáется, и взы́детъ на нéмъ, я́коже на ляди́нѣ, тéрнiе: и облакóмъ заповѣ́мъ, éже не одожди́ти на негó дождя́.
Виногрáдъ бо Гóспода Саваóѳа, дóмъ Изрáилевъ éсть, и человѣ́къ Иýдинъ нóвый сáдъ возлю́бленный: ждáхъ, да сотвори́тъ сýдъ, сотвори́ же беззакóнiе, и не прáвду, но вóпль.
Гóре совокупля́ющымъ дóмъ къ дóму и селó къ селý приближáющымъ, да бли́жнему оти́мутъ чтó: едá вселитéся еди́ни на земли́?
Услы́шашася бо во ушесѣ́хъ Гóспода Саваóѳа сiя́: áще бо бýдутъ дóмове мнóзи, въ запустѣ́нiе бýдутъ вели́цыи и дóбрiи, и не бýдутъ живýщiи въ ни́хъ:
идѣ́же бо возорю́тъ дéсять супрýгъ волóвъ, сотвори́тъ корчáгъ еди́нъ, и сѣ́яй Артавáсъ шéсть сотвори́тъ мѣ́ры три́.
Гóре востаю́щымъ заýтра и Сикéръ гоня́щымъ, ждýщымъ вéчера: винó бо сожжéтъ я́:
со гýсльми бо и пѣвни́цами, и тимпáны и свирѣ́льми винó пiю́тъ, на дѣлá же Госпóдня не взирáютъ и дѣ́лъ рукý егó не помышля́ютъ.
У́бо плѣнéни бы́ша лю́дiе мои́, за éже не вѣ́дѣти и́мъ Гóспода, и мнóжество бы́сть мéртвыхъ глáда рáди и жáжди водны́я.
И разшири́ áдъ дýшу свою́ и развéрзе устá своя́, éже не престáти: и сни́дутъ слáвнiи и вели́цыи и богáтiи и губи́телiе и́хъ и веселя́йся въ нéмъ:
и смири́тся человѣ́къ, и обезчéстится мýжъ, и óчи высокогля́дающiи смиря́тся.
И вознесéтся Госпóдь Саваóѳъ въ судѣ́, и Бóгъ святы́й прослáвится въ прáвдѣ:
и упасýтся расхищéннiи я́ко юнцы́, и пусты́ни плѣнéнныхъ áгнцы поядя́тъ.
Гóре привлачáющымъ грѣхи́ я́ко ýжемъ дóлгимъ, и я́ко и́га ю́нична ремéнемъ беззакóнiя своя́,
глагóлющымъ: скóро да прибли́жатся, я́же сотвори́тъ, да ви́димъ, и да прiи́детъ совѣ́тъ святáго Изрáилева, да разумѣ́емъ.
Гóре глагóлющымъ лукáвое дóброе, и дóброе лукáвое, полагáющымъ тмý свѣ́тъ, и свѣ́тъ тмý, полагáющымъ гóрькое слáдкое, и слáдкое гóрькое.
Гóре, и́же мýдри въ себѣ́ сами́хъ и предъ собóю разýмни.
Гóре крѣ́пкимъ вáшымъ, винó пiю́щымъ, и вельмóжамъ растворя́ющымъ Сикéръ,
оправдáющымъ нечести́ва дарóвъ рáди, и éже éсть прáведное прáведнаго взéмлющымъ от негó.
Сегó рáди я́коже сгори́тъ трóсть от ýглiя óгненнаго и сожжéтся от плáмене разгорѣ́вшагося, кóрень и́хъ я́ко пéрсть бýдетъ, и цвѣ́тъ и́хъ я́ко прáхъ взы́детъ: не восхотѣ́ша бо закóна Гóспода Саваóѳа, но слóво святáго Изрáилева раздражи́ша.
И возъяри́ся гнѣ́вомъ Госпóдь Саваóѳъ на лю́ди своя́, и наложи́ рýку свою́ на ни́хъ, и порази́ и́хъ: и раздражи́шася гóры, и бы́ша трýпи и́хъ я́ко гнóй посредѣ́ пути́. И во всѣ́хъ си́хъ не отврати́ся я́рость егó, но ещé рукá егó высокá.
Воздви́гнетъ ýбо знáменiе во язы́цѣхъ сýщихъ далéче и позви́ждетъ и́мъ от конéцъ земли́, и сé, скóро лéгцѣ грядýтъ:
не взáлчутъ, ни утрудя́тся, ни воздрéмлютъ, ни поспя́тъ, ни распоя́шутъ пóясовъ свои́хъ от чрéслъ свои́хъ, нижé растóргнутся ремéни сапогóвъ и́хъ:
и́хже стрѣ́лы остры́ сýть, и лýцы и́хъ напряжéни: копы́та кóней и́хъ я́ко твéрдъ кáмень вмѣни́шася, колéса колесни́цъ и́хъ я́ко бýря.
Яря́тся я́ко львóве, и предстáша я́ко льви́чища: и и́метъ, и возопiéтъ я́ко звѣ́рь, и извéржетъ, и не бýдетъ отъéмлющаго и́хъ.
И возопiéтъ и́хъ рáди въ тóй дéнь, я́ко шýмъ мóря волнýющася: и воззря́тъ на зéмлю, и сé, тмá жéстока въ недоумѣ́нiи и́хъ.
И бы́сть въ лѣ́то, въ нéже ýмре Озíа цáрь, ви́дѣхъ Гóспода сѣдя́ща на престóлѣ высóцѣ и превознесéннѣ, и испóлнь дóмъ слáвы егó.
И серафи́ми стоя́ху о́крестъ егó, шéсть кри́лъ еди́ному и шéсть кри́лъ другóму: и двѣмá ýбо покрывáху ли́ца своя́, двѣмá же покрывáху нóги своя́ и двѣмá летáху.
И взывáху дрýгъ ко дрýгу и глагóлаху: свя́тъ, свя́тъ, свя́тъ Госпóдь Саваóѳъ: испóлнь вся́ земля́ слáвы егó.
И взя́ся наддвéрiе от глáса, и́мже вопiя́ху, и дóмъ напóлнися ды́ма.
И рекóхъ: о, окая́нный áзъ, я́ко умили́хся, я́ко человѣ́къ сы́й и нечи́сты устнѣ́ имы́й, посредѣ́ людíй нечи́стыя устнѣ́ имýщихъ áзъ живý: и Царя́ Гóспода Саваóѳа ви́дѣхъ очи́ма мои́ма.
И пóсланъ бы́сть ко мнѣ́ еди́нъ от серафи́мовъ, и въ руцѣ́ своéй имя́ше ýгль горя́щь, егóже клещáми взя́тъ от олтаря́,
и прикоснýся устнáмъ мои́мъ и речé: сé, прикоснýся сié устнáмъ твои́мъ, и отъи́метъ беззакóнiя твоя́ и грѣхи́ твоя́ очи́ститъ.
И слы́шахъ глáсъ Гóспода глагóлюща: когó послю́, и ктó пóйдетъ къ лю́демъ си́мъ? И рекóхъ: сé, áзъ éсмь, посли́ мя́.
И речé: иди́ и рцы́ лю́демъ си́мъ: слýхомъ услы́шите, и не уразумѣ́ете: и ви́дяще ýзрите, и не уви́дите:
одебелѣ́ бо сéрдце людíй си́хъ, и уши́ма свои́ма тя́жко слы́шаша, и óчи свои́ смежи́ша, да не когдá ýзрятъ очи́ма и уши́ма услы́шатъ, и сéрдцемъ уразумѣ́ютъ и обратя́тся, и исцѣлю́ я́.
И рекóхъ: докóлѣ, Гóсподи? И речé: дóндеже опустѣ́ютъ грáди, от éже ненаселéнымъ бы́ти, и дóмы, от éже не бы́ти человѣ́комъ, и земля́ остáнется пустá.
И посéмъ продолжи́тъ Бóгъ человѣ́ки, и умнóжатся остáвльшiися на земли́.
И ещé на нéй éсть десяти́на, и пáки бýдетъ въ расхищéнiе я́коже тереви́нѳъ и я́ко жéлудь, егдá испадéтъ изъ плю́ски своея́: сѣ́мя свято стоя́нiе егó.
И бы́сть во дни́ Ахáза сы́на Иоаѳáмля, сы́на Озíи, царя́ Иýдина, взы́де раси́нъ цáрь Арáмль, и факéй сы́нъ ромелíевъ, цáрь Изрáилевъ, на Иерусали́мъ, воевáти на негó, и не возмогóша разори́ти егó.
И возвѣсти́ся въ домý дави́довѣ, глагóля: совѣщáся Арáмъ со Ефрéмомъ, и ужасéся душá егó и душá людíй егó, я́коже въ дубрáвѣ дрéво вѣ́тромъ восколéблется.
И речé Госпóдь ко Исáiи: изы́ди во срѣ́тенiе Ахáзу ты́ и остáвыйся Иасýвъ сы́нъ твóй, къ купѣ́ли гóрняго пути́ селá бѣли́лнича,
и речéши емý: блюди́, éже молчáти, и не бóйся, нижé душá твоя́ да изнемóжетъ от двою́ дрéву главéнь дымя́щихся си́хъ: егдá бо гнѣ́въ я́рости моея́ бýдетъ, пáки исцѣлю́.
Сы́нъ же Арáмль и сы́нъ ромелíевъ я́ко совѣщáста совѣ́тъ лукáвый на тя́, глагóлюще:
взы́демъ во Иудéю, и собесѣ́довавше съ ни́ми отврати́мъ я́ къ нáмъ и воцари́мъ въ нéй сы́на тавеи́лева:
сiя́ же глагóлетъ Госпóдь Саваóѳъ: не пребýдетъ совѣ́тъ сéй, нижé сбýдется,
но главá Арáму Дамáскъ, и главá Дамáску раси́нъ: но ещé шестьдеся́тъ и пя́ть лѣ́тъ, оскудѣ́етъ цáрство Ефрéмово от людíй,
главá же Ефрéмови соморóнъ, и главá соморóну сы́нъ ромелíевъ: и áще не увѣ́рите, нижé и́мате разумѣ́ти.
И приложи́ Госпóдь глагóлати ко Ахáзу, рекíй:
проси́ себѣ́ знáменiя от Гóспода Бóга твоегó во глубинý, или́ въ высотý.
И речé Ахáзъ: не и́мамъ проси́ти, нижé искушý Гóспода.
И речé [Исáiа]: слы́шите ýбо, дóме дави́довъ: едá мáло вáмъ éсть трýдъ дая́ти человѣ́комъ, и кáко даетé Гóсподеви трýдъ?
Сегó рáди дáстъ Госпóдь сáмъ вáмъ знáменiе: сé, Дѣ́ва во чрéвѣ зачнéтъ и роди́тъ Сы́на, и наречéши и́мя емý Емманýилъ:
мáсло и мéдъ снѣ́сть, прéжде нéже разумѣ́ти емý извóлити злáя, или́ избрáти благóе:
занé прéжде нéже разумѣ́ти отрочáти благóе или́ злóе, отри́нетъ лукáвое, éже избрáти благóе, и остáвится земля́, ея́же ты́ бои́шися, от лицá двýхъ царéй.
Но наведéтъ Госпóдь на тя́ и на лю́ди твоя́ и на дóмъ отцá твоегó дни́, и́же ещé не пришли́, от днé въ óньже отъя́ Ефрéма от Иýды, царя́ Ассирíйска.
И бýдетъ въ тóй дéнь, позви́ждетъ Госпóдь мýхамъ, я́же владѣ́ютъ чáстiю рѣки́ Еги́петскiя, и пчелѣ́, я́же éсть во странѣ́ Ассирíйстѣй:
и прiи́дутъ вси́ и почíютъ въ дéбрехъ страны́ и въ пещéрахъ кáменныхъ, и во вертéпѣхъ и во вся́цѣй разсѣ́линѣ и во вся́цѣмъ дрéвѣ.
Въ дéнь óный обрíетъ Госпóдь бри́твою ная́тою объ онý странý рѣки́ царя́ Ассирíйска, главý и власы́ нóгъ, и брадý отъи́метъ.
И бýдетъ въ тóй дéнь, корми́ти бýдетъ человѣ́къ ю́ницу от волóвъ и двѣ́ óвцѣ:
и бýдетъ от мнóжества творéнiя млéчнаго, мáсло и мéдъ снѣ́сть вся́къ остáвыйся на земли́.
И бýдетъ въ тóй дéнь, вся́ко мѣ́сто, идѣ́же áще бýдетъ ты́сяща лóзъ виногрáда, по ты́сящи Си́кль, въ ляди́ну бýдетъ и въ тéрнiе:
со стрѣлóю и лýкомъ вни́дутъ тáмо, я́ко ляди́ною и тéрнiемъ бýдетъ вся́ земля́:
и вся́ка горá орéмая возорéтся, не нáйдетъ тáмо стрáхъ: бýдетъ от ляди́ны и от тéрнiя пáству овцáмъ и въ попрáнiе волý.
И речé Госпóдь ко мнѣ́: прiими́ себѣ́ сви́токъ нóвъ вели́къ и напиши́ въ нéмъ писáломъ человѣ́чимъ, éже скóро плѣнéнiе сотвори́ти коры́стей, приспѣ́ бо:
и свидѣ́тели мнѣ́ сотвори́ вѣ́рны человѣ́ки, урíю иерéа и захáрiю сы́на Варахíина.
И приступи́хъ ко прорóчицѣ, и во чрéвѣ зачáтъ и роди́ сы́на. И речé Госпóдь мнѣ́: нарцы́ и́мя емý: скóро плѣни́, нáгло расхи́ти,
занé прéжде нéже разумѣ́ти отрочáти назвáти отцá или́ мáтерь, прiи́метъ си́лу Дамáскову, и коры́сти самари́йскiя предъ царéмъ Ассирíйскимъ.
И приложи́ Госпóдь глагóлати ко мнѣ́ ещé, глагóля:
понéже не восхотѣ́ша лю́дiе сíи воды́ Силоáмли текýщiя ти́сѣ, но восхотѣ́ша имѣ́ти рассóна и сы́на ромелíева царя́ надъ вáми,
сегó рáди сé, возвóдитъ Госпóдь на вы́ вóду рѣки́ си́льну и мнóгу, царя́ Ассирíйска и слáву егó: и взы́детъ на вся́ку дéбрь вáшу, и обы́детъ вся́ку стѣ́ну вáшу,
и отъи́метъ от Иудéи человѣ́ка, и́же возмóжетъ главý воздви́гнути, или́ могýщаго чтó соверши́ти: и бýдетъ пóлкъ егó, во éже напóлнити ширинý страны́ твоея́, съ нáми Бóгъ!
Разумѣ́йте, язы́цы, и покаря́йтеся, услы́шите дáже до послѣ́днихъ земли́: могýщiи, покаря́йтеся: áще бо пáки возмóжете, пáки побѣ́ждени бýдете,
и и́же áще совѣ́тъ совѣщáете, разори́тъ Госпóдь, и слóво, éже áще возглагóлете, не пребýдетъ въ вáсъ, я́ко съ нáми Бóгъ.
Тáко глагóлетъ Госпóдь: крѣ́пкою рукóю не покаря́ются хождéнiю пути́ людíй си́хъ, глагóлюще:
да не когдá рекýтъ: жéстоко: всé бо, éже áще рекýтъ лю́дiе сíи, жéстоко éсть: стрáха же и́хъ не убóйтеся, нижé возмяти́теся.
Гóспода си́лъ, тогó освяти́те, и тóй бýдетъ тебѣ́ въ стрáхъ.
И áще бýдеши уповáя на негó, бýдетъ тебѣ́ во освящéнiе, а не я́коже о кáмень претыкáнiя преткнéшися, нижé я́ко о кáмень падéнiя: дóмове же Иáковли въ прýглѣ, и въ раздóлiи сѣдя́щiи во Иерусали́мѣ.
Сегó рáди изнемóгутъ въ ни́хъ мнóзи, и падýтъ, и сокрушáтся, и прибли́жатся, и я́ти бýдутъ человѣ́цы въ тверды́ни сýще.
Тогдá явлéни бýдутъ печатлѣ́ющiи закóнъ, éже не учи́тися.
И речéтъ: пождý Бóга отврáщшаго лицé своé от дóму Иáковля и уповáя бýду нáнь.
Сé, áзъ и дѣ́ти, я́же ми́ дадé Бóгъ: и бýдутъ знáменiя и чудесá въ домý Изрáилевѣ от Гóспода Саваóѳа, и́же обитáетъ на горѣ́ Сióнъ.
И áще рекýтъ къ вáмъ: изыщи́те чревоволшéбниковъ и от земли́ возглашáющихъ, тщеслóвующихъ, и́же от чрéва глашáютъ, не язы́къ ли къ Бóгу своемý взы́щетъ? чтó испытýютъ мéртвыя о живы́хъ?
Закóнъ бо въ пóмощь дадé, да рекýтъ не я́коже слóво сié, зáньже не лѣ́ть дáры дая́ти.
И прiи́детъ на вы́ жéстокъ глáдъ, и бýдетъ, егдá взáлчете, скóрбни бýдете и злó речéте кня́зю и отéчеству:
и воззря́тъ на нéбо горѣ́, и на зéмлю ни́зу при́зрятъ, и сé, скýдость тѣ́сна и тмá, скóрбь и тѣснотá и тмá, я́коже не ви́дѣти: и не оскудѣ́етъ въ тѣ́снотѣ сы́й дáже до врéмене.
Сié прéжде испíй, скóро твори́, странó Завулóня и землé Нефѳали́мля, и прóчiи при мóри живýщiи, и объ онý странý Иордáна, Галилéа язы́ковъ.
Лю́дiе ходя́щiи во тмѣ́ ви́дѣша свѣ́тъ вéлiй: живýщiи во странѣ́ и сѣ́ни смéртнѣй, свѣ́тъ возсiя́етъ на вы́.
Мнóжайшiи лю́дiе, я́же извéлъ еси́, въ весéлiи твоéмъ: и возвеселя́тся предъ тобóю, я́коже веселя́щiися въ жáтву, и я́коже веселя́тся дѣля́щiи коры́сти.
Занé отъя́тся ярéмъ лежáй на ни́хъ, и жéзлъ, и́же на вы́и и́хъ: жéзлъ бо истязýющихъ разсы́па Госпóдь, я́коже въ дéнь, и́же на Мадiáма.
Я́ко вся́кую одéжду сóбранну лéстiю и ри́зу съ примирéнiемъ отдадýтъ, и восхотя́тъ, да бы́ша огнéмъ сожжéны бы́ли.
Я́ко отрочá роди́ся нáмъ, Сы́нъ, и дадéся нáмъ, егóже начáлство бы́сть на рáмѣ егó: и нарицáется и́мя егó: вели́ка совѣ́та áнгелъ, чýденъ, совѣ́тникъ, Бóгъ крѣ́пкiй, властели́нъ, кня́зь ми́ра, Отéцъ бýдущаго вѣ́ка: приведý бо ми́ръ на кня́зи, ми́ръ и здрáвiе емý.
И вéлiе начáлство егó, и ми́ра егó нѣ́сть предѣ́ла на престóлѣ Дави́довѣ и на цáрствѣ егó, испрáвити é и заступи́ти егó въ судѣ́ и прáвдѣ, отны́нѣ и до вѣ́ка: рéвность Гóспода Саваóѳа сотвори́тъ сiя́.
Смéрть {Евр.: слóво.} послá Госпóдь на Иáкова, и прiи́де на Изрáиля:
и уразумѣ́ютъ вси́ лю́дiе Ефрéмовы и живýщiи въ самарíи, въ досаждéнiи и высóцѣмъ сéрдцы глагóлюще:
пли́нѳы падóша, но прiиди́те, изсѣчéмъ кáменiе и посѣчéмъ черни́чiе и кéдры, и сози́ждемъ себѣ́ стóлпъ.
И разруши́тъ Бóгъ востаю́щыя на гóру Сióню, и враги́ егó разсы́плетъ:
сирíю от востóкъ сóлнца и éллины от зáпада сóлнца, поядáющыя Изрáиля всѣ́ми усты́. Во всѣ́хъ си́хъ не отврати́ся я́рость егó, но ещé рукá егó высокá.
И лю́дiе не обрати́шася, дóндеже я́звени бы́ша, и Гóспода не взыскáша.
И отъя́тъ Госпóдь от Изрáиля главý и о́шибъ, вели́ка и мáла, во еди́нъ дéнь:
стáрца и чудя́щихся ли́цамъ, сié начáло: и прорóка учáща беззакóнная, сéй о́шибъ.
И бýдутъ блажáщiи людíй си́хъ льстя́ше, и льстя́тъ, я́ко да поглотя́тъ я́.
Сегó рáди о ю́ношахъ и́хъ не возвесели́тся Госпóдь, и сирóтъ и́хъ и вдови́цъ и́хъ не поми́луетъ: я́ко вси́ беззакóннiи и лукáвiи, и вся́кая устá глагóлютъ непрáвду. Во всѣ́хъ си́хъ не отврати́ся я́рость егó, но ещé рукá егó высокá.
И разгори́тся я́ко óгнь беззакóнiе, и я́ко трóскотъ сухíй поядéнъ бýдетъ огнéмъ, и разгори́тся въ чáщахъ дубрáвныхъ и поя́стъ, я́же о́крестъ холмóвъ вся́.
За я́рость гнѣ́ва Госпóдня сгорѣ́ вся́ земля́, и бýдутъ лю́дiе я́ко огнéмъ пожжéни: человѣ́къ брáта своегó не поми́луетъ,
но уклони́тся на дéсно, я́ко взáлчетъ, и снѣ́сть от шýiихъ, и не насы́тится человѣ́къ яды́й плóти мы́шцы своея́:–
–снѣ́сть бо Манассíй Ефрéмово, и Ефрéмъ Манассíино, я́ко вкýпѣ повою́ютъ Иýду. 21Во всѣ́хъ си́хъ не отврати́ся я́рость [егó], но ещé рукá егó высокá.
Гóре пи́шущымъ лукáвство: пи́шущiи бо лукáвство пи́шутъ,
укланя́юще сýдъ убóгихъ, восхищáюще сýдъ ни́щихъ людíй мои́хъ, я́ко бы́ти и́мъ вдови́цѣ въ расхищéнiе и сиротѣ́ въ разграблéнiе.
И чтó сотворя́тъ въ дéнь посѣщéнiя? скóрбь бо вáмъ отдалéче прiи́детъ. И къ комý прибѣ́гнете, да помóжетъ вáмъ? И гдѣ́ остáвите слáву вáшу,
éже не впáсти въ плѣнéнiе? И подъ убiéными падýтъ. И во всѣ́хъ си́хъ не отврати́ся гнѣ́въ егó, но ещé рукá егó высокá.
Гóре Ассири́емъ, жéзлъ я́рости моея́ и гнѣ́въ éсть въ рукý и́хъ.
Гнѣ́въ мóй послю́ на язы́къ беззакóненъ, и свои́хъ людíй повелю́ сотвори́ти коры́сти и плѣнéнiе, и попрáти грáды и положи́ти я́ въ прáхъ.
Сéй же не тáко помы́сли и душéю не тáко возмнѣ́: но отстýпитъ ýмъ егó, и éже потреби́ти язы́ки не мáлы.
И áще рекýтъ емý: ты́ ли еси́ еди́нъ кня́зь?
И речéтъ: не взя́хъ ли страны́, я́же вы́ше Вавилóна и халáни, идѣ́же стóлпъ создáнъ, и взя́хъ Аравíю и Дамáскъ и самарíю?
Я́коже сiя́ взя́хъ, и вся́ княжéнiя возмý. Возрыдáйте, извáянная во Иерусали́мѣ и въ самарíи:
я́коже бо сотвори́хъ самарíи и рукотворéннымъ ея́, тáко сотворю́ и Иерусали́му и кумíромъ егó.
И бýдетъ, егдá скончáетъ Госпóдь вся́ творя́ въ горѣ́ Сióни и во Иерусали́мѣ, наведéтъ на ýмъ вели́кiй, на кня́зя Ассирíйска и на высотý слáвы óчiю егó.
Речé бо: крѣ́постiю руки́ моея́ сотворю́, и премýдростiю рáзума [моегó] отимý предѣ́лы язы́ковъ, и си́лу и́хъ плѣню́,
и сотрясý грáды населéныя, и вселéнную всю́ объимý рукóю моéю я́ко гнѣздó, и я́ко остáвленая я́ица возмý: и нѣ́сть, и́же убѣжи́тъ менé, или́ проти́ву мнѣ́ речéтъ, и отвéрзетъ устá и глуми́тъ.
Едá прослáвится сѣки́ра безъ сѣкýщаго éю? или́ вознесéтся пилá безъ влекýщаго ю́? Тáкожде áще ктó вóзметъ жéзлъ, или́ дрéво: и не тáко.
Но пóслетъ Госпóдь Саваóѳъ на твою́ чéсть безчéстiе, и на твою́ слáву óгнь горя́ возгори́тся.
И бýдетъ свѣ́тъ Изрáилевъ во óгнь, и освяти́тъ егó огнéмъ горя́щимъ, и поя́стъ я́ко сѣ́но веществó.
Въ тóй дéнь угáснутъ гóры и хóлми и дубрáвы, и поя́стъ от души́ дáже до плóтей: и бýдетъ бѣжáй, я́ко бѣжáй от плáмене горя́ща:
и остáвльшiися от ни́хъ бýдутъ въ числó, и отрочá мáлое напи́шетъ я́.
И бýдетъ въ тóй дéнь, не приложи́тся ктомý остáнокъ Изрáилевъ, и спасéннiи Иáковли не бýдутъ ктомý уповáюще на оби́дѣвшыя и́хъ, но бýдутъ уповáюще на Бóга святáго Изрáилева и́стиною.
И обрати́тся остáнокъ Иáковль къ Бóгу крѣ́пкому.
И áще бýдутъ лю́дiе Изрáилевы я́ко песóкъ морскíй, остáнокъ и́хъ спасéтся:
слóво бо совершáя и сокращáя прáвдою, я́ко слóво сокращéно сотвори́тъ Госпóдь во всéй вселéннѣй.
Сегó рáди сiя́ глагóлетъ Госпóдь Саваóѳъ: не бóйтеся, лю́дiе мои́, от Ассирíанъ, живýщiи въ Сióнѣ, я́ко жезлóмъ порази́тъ тя́: я́зву бо навóдитъ на тя́, éже ви́дѣти пýть Еги́пта.
Ещé бо мáло, и престáнетъ гнѣ́въ, я́рость же моя́ на совѣ́тъ и́хъ:
и воздви́гнетъ Бóгъ си́лъ на ня́ я́зву, я́ко я́зву Мадiáмлю на мѣ́стѣ скóрби, и я́рость егó на пýть и́же къ мóрю, на пýть и́же во Еги́петъ:
и бýдетъ въ тóй дéнь, отъи́мется и́го егó от рáмене твоегó и стрáхъ егó от тебé, и согнiéтъ и́го от рáменъ вáшихъ.
Прiи́детъ бо во грáдъ Аггáй, и прéйдетъ въ Магеддó, и въ Махмáсѣ положи́тъ сосýды своя́.
И минéтъ дéбрь, и прiи́детъ во Аггáй: стрáхъ прiи́метъ рамý грáдъ Саýловъ,
побѣ́гнетъ дщéрь Гали́мля, услы́шится въ лаисѣ́, услы́шится во Анаѳóѳѣ.
И ужасéся Мадеми́на и живýщiи во гиви́мѣ.
Утѣшáйте днéсь éже на пути́ пребы́ти: утѣшáйте рукóю гóру дщéрь Сióню, и хóлми, и́же во Иерусали́мѣ:
сé, Влады́ка Госпóдь Саваóѳъ смятéтъ слáвныя со крѣ́постiю, и высóцiи укори́зною сокрушáтся, и высóцыи смиря́тся,
и падýтъ высóцыи мечéмъ, Ливáнъ же съ высóкими падéтся.
И изы́детъ жéзлъ изъ кóрене Иессéова, и цвѣ́тъ от кóрене егó взы́детъ:
и почíетъ на нéмъ Дýхъ Бóжiй, Дýхъ премýдрости и рáзума, Дýхъ совѣ́та и крѣ́пости, Дýхъ вѣ́дѣнiя и благочéстiя:
испóлнитъ егó Дýхъ стрáха Бóжiя: не бо слáвѣ суди́ти и́мать, нижé по глагóланiю обличи́тъ,
но сýдитъ прáвдою смирéнному сýдъ и обличи́тъ прáвостiю смирéнныя земли́, и порази́тъ зéмлю слóвомъ ýстъ свои́хъ и Дýхомъ устéнъ убiéтъ нечести́ваго:
и бýдетъ препоя́санъ прáвдою о чрéслѣхъ свои́хъ и и́стиною обви́тъ по рéбрамъ свои́мъ:
и пасти́ся бýдутъ вкýпѣ вóлкъ со áгнцемъ, и ры́сь почíетъ со кóзлищемъ, и телéцъ и юнéцъ и лéвъ вкýпѣ пасти́ся бýдутъ, и отрочá мáло поведéтъ я́:
и вóлъ и медвѣ́дь вкýпѣ пасти́ся бýдутъ, и вкýпѣ дѣ́ти и́хъ бýдутъ, и лéвъ áки вóлъ я́сти бýдетъ плéвы:
и отрочá млáдо на пещéры áспидовъ и на лóже исчáдiй áспидскихъ рýку возложи́тъ:
и не сотворя́тъ злá, ни возмóгутъ погуби́ти ни когóже на горѣ́ святѣ́й моéй: я́ко напóлнися вся́ земля́ вѣ́дѣнiя Госпóдня, áки водá мнóга покры́ мóре.
И бýдетъ въ дéнь óный кóрень Иессéовъ, и востая́й владѣ́ти язы́ки, на тогó язы́цы уповáти бýдутъ: и бýдетъ покóй егó чéсть.
И бýдетъ въ дéнь óный, приложи́тъ Госпóдь показáти рýку свою́, éже возревновáти по остáнку прóчему людíй, и́же áще остáнетъ от Ассири́овъ и от Еги́пта, и Вавилóна и от еѳióпiи, и от Елами́товъ и от востóковъ сóлнца, и от Аравíи и от островóвъ морски́хъ.
И воздви́гнетъ знáменiе въ язы́ки, и соберéтъ поги́бшыя Изрáилевы, и расточéнныя Иýдины соберéтъ от четы́рехъ кри́лъ земли́.
И отъи́мется рéвность Ефрéмова, и врази́ Иýдины поги́бнутъ: Ефрéмъ не возревнýетъ Иýдѣ, и Иýда не оскорби́тъ Ефрéма.
И полетя́тъ въ кораблéхъ иноплемéнничихъ, мóре кýпно плѣня́тъ, и сýщихъ от востóкъ сóлнца, и Идумéю: и на Моáва пéрвѣе рýки возложáтъ, сы́нове же Аммóни пéрвiи покоря́тся.
И опустоши́тъ Госпóдь мóре Еги́петское и возложи́тъ рýку свою́ на рѣкý дýхомъ преси́льнымъ: и порази́тъ на сéдмь дéбрiй, я́коже преходи́ти ю́ во обувéнiи:
и бýдетъ прошéствiе лю́демъ мои́мъ остáвшымъ во Еги́птѣ, и бýдетъ Изрáилю, я́коже въ дéнь, егдá изы́де от земли́ Еги́петскiя.
И речéши въ дéнь óный: благословлю́ тя́, Гóсподи, я́ко разгнѣ́вался еси́ на мя́, и отврати́лъ еси́ я́рость твою́ [от менé], и поми́ловалъ мя́ еси́.
Сé, Бóгъ мóй Спáсъ мóй, уповáя бýду на негó и не убою́ся: занé слáва моя́ и похвалá моя́ Госпóдь, и бы́сть ми́ во спасéнiе.
И почерпи́те вóду со весéлiемъ от истóчникъ спасéнiя.
И речéши въ дéнь óный: хвали́те Гóспода, воспóйте и́мя егó, возвѣсти́те во язы́цѣхъ слáвная егó, поминáйте, я́ко вознесéся и́мя егó.
Хвали́те и́мя Госпóдне, я́ко высóкая сотвори́: возвѣсти́те сiя́ по всéй земли́.
Весели́теся и рáдуйтеся, живýщiи въ Сióнѣ, я́ко вознесéся святы́й Изрáилевъ посредѣ́ тебé.
Видѣ́нiе на Вавилóна, éже ви́дѣ Исáiа сы́нъ Амóсовъ.
На горѣ́ пóльнѣй воздви́гните знáменiе, вознеси́те глáсъ и́мъ, не бóйтеся, поущáйте рукóю, отвéрзите, кня́зи.
А́зъ повелѣвáю, освящéнни сýть: и áзъ ведý и́хъ, исполи́ни и́дутъ испóлнити я́рость мою́ рáдующеся, вкýпѣ и укаря́юще.
Глáсъ язы́ковъ мнóгихъ на горáхъ, подóбенъ язы́ковъ мнóгихъ, глáсъ царéй и язы́ковъ собрáвшихся: Госпóдь Саваóѳъ заповѣ́да язы́ку оружебóрцу
прiити́ от земли́ издалéча, от крáя основáнiя небесé, Госпóдь и оружебóрцы егó, растли́ти всю́ вселéнную.
Рыдáйте: бли́зъ бо дéнь Госпóдень, и сокрушéнiе от Бóга прiи́детъ:
сегó рáди вся́ка рукá разслабѣ́етъ, и вся́ка душá человѣ́ча убои́тся,
и смятýтся послы́, и болѣ́зни прiи́мутъ я́ я́ко жены́ раждáющiя: и поскорбя́тъ дрýгъ ко дрýгу, и ужáснутся, и лицé своé я́ко плáмень измѣня́тъ.
Сé бо, дéнь Госпóдень грядéтъ неисцѣ́льный, я́рости и гнѣ́ва, положи́ти вселéнную [всю́] пýсту и грѣ́шники погуби́ти от нея́.
Звѣ́зды бо небéсныя и ори́онъ и всé украшéнiе небéсное свѣ́та своегó не дадя́тъ, и помрачи́тся сóлнце возсiявáющее, и лунá не дáстъ свѣ́та своегó.
И заповѣ́мъ всéй вселéннѣй злáя и нечести́вымъ грѣхи́ и́хъ, и погублю́ укори́зну беззакóнныхъ и укори́зну гóрдыхъ смирю́:
и бýдутъ остáвшiи честнíи пáче, нéжели злáто нежжéное, и человѣ́къ чéстенъ бýдетъ пáче, нéжели кáмень, и́же от суфи́ра.
Разъяри́тся бо нéбо, и земля́ потрясéтся от основáнiй свои́хъ, за я́рость гнѣ́ва Гóспода Саваóѳа въ дéнь, въ óньже прiи́детъ я́рость егó.
И бýдутъ остáвшiи я́ко сéрна бѣжáщая и я́ко овцá заблуди́вшая, и не бýдетъ собирáяй, я́ко человѣ́ку въ лю́ди своя́ возврати́тися, и человѣ́къ во странý свою́ побѣ́гнетъ.
И́же бо áще плѣни́тся, порази́тся, и и́же сóбрани сýть, мечéмъ падýтъ.
И чáда и́хъ предъ ни́ми разбiю́тъ, и дóмы и́хъ плѣня́тъ, и жены́ и́хъ пóймутъ.
Сé, áзъ возбуждáю на вы́ ми́довъ, и́же сребрá не вмѣня́ютъ, нижé злáта трéбуютъ:
стрѣля́нiя ю́ношеская сокрушáтъ, и чáдъ вáшихъ не поми́луютъ, нижé пощадя́тъ чáдъ твои́хъ óчи и́хъ.
И бýдетъ Вавилóнъ, и́же нарицáется слáвный от царя́ Халдéйска, я́коже разсы́па Бóгъ Cодóму и Гомóрру,
не насели́тся въ вѣ́чное врéмя, и не вни́дутъ въ óнь чрезъ мнóгiя рóды, нижé прóйдутъ егó Арáвляне, нижé пастуси́ почíютъ въ нéмъ.
И почíютъ тáмо звѣ́рiе, и напóлнятся дóмове шýма, и почíютъ тý Си́рини, и бѣ́си тáмо воспля́шутъ,
и онокентáвры тáмо вселя́тся, и вогнѣздя́тся ежéве въ домѣ́хъ и́хъ.
Скóро и́детъ и не умéдлитъ: и поми́луетъ Госпóдь Иáкова и изберéтъ пáки Изрáиля, и почíютъ на земли́ своéй, и пришлéцъ приложи́тся къ ни́мъ и приложи́тся къ дóму Иáковлю,
и пóймутъ и́хъ язы́цы и введýтъ на мѣ́сто и́хъ, и наслѣ́дятъ и умнóжатся на земли́ Бóжiи въ рабы́ и рабы́ни: и бýдутъ плѣнéни плѣни́вшiи я́, и обладáни бýдутъ обладáвшiи и́ми.
И бýдетъ въ тóй дéнь, упокóитъ тя́ Госпóдь от болѣ́зни и я́рости твоея́ и от рабóты жестóкiя, éюже рабóталъ еси́ и́мъ.
И прiи́меши плáчь сéй {Евр.: при́тчу сiю́.} на царя́ Вавилóнска и речéши въ тóй дéнь: кáко престá истязýяй и престá понуждáяй?
Сокруши́ Бóгъ ярéмъ грѣ́шниковъ, ярéмъ князéй,
порази́въ язы́къ я́ростiю, я́звою неисцѣ́льною, поражáяй язы́къ я́звою я́рости, éюже не пощадѣ́, почи́ уповáющи.
Вся́ земля́ вопiéтъ со весéлiемъ,
и древá Ливáнова возвесели́шася о тебѣ́ и кéдръ Ливáнскiй: онéлѣже ты́ уснýлъ еси́, не взы́де посѣкáяй нáсъ.
А́дъ дóлѣ огорчи́ся, срѣ́тъ тя́: востáша съ тобóю вси́ исполи́ни обладáвшiи землéю, подвизáвшiи от престóловъ свои́хъ всѣ́хъ царéй язы́ческихъ.
Вси́ отвѣщáютъ и рекýтъ тебѣ́: и ты́ плѣнéнъ еси́, я́коже и мы́: и въ нáсъ вмѣнéнъ еси́.
Сни́де слáва твоя́ во áдъ, мнóгое весéлiе твоé: подъ тобóю постéлютъ гни́лость, и покрóвъ твóй чéрвь.
Кáко спадé съ небесé денни́ца восходя́щая заýтра? сокруши́ся на земли́ посылáяй ко всѣ́мъ язы́комъ.
Ты́ же рéклъ еси́ во умѣ́ твоéмъ: на нéбо взы́ду, вы́ше звѣ́здъ небéсныхъ постáвлю престóлъ мóй, ся́ду на горѣ́ высóцѣ, на горáхъ высóкихъ, я́же къ сѣ́веру:
взы́ду вы́ше о́блакъ, бýду подóбенъ вы́шнему.
Ны́нѣ же во áдъ сни́деши и во основáнiя земли́.
Ви́дѣвшiи тя́ удивя́тся о тебѣ́ и рекýтъ: сéй человѣ́къ раздражáяй зéмлю, потрясáяй цари́,
положи́вый вселéнную всю́ пýсту и грáды ея́ разсы́па, плѣнéныхъ не разрѣши́.
Вси́ цáрiе язы́ковъ успóша въ чéсти, кíйждо въ домý своéмъ.
Ты́ же повéрженъ бýдеши въ горáхъ, я́ко мертвéцъ мéрзкiй со мнóгими мертвецы́ изсѣ́чеными мечéмъ, сходя́щими во áдъ.
Я́коже ри́за въ крóви намочéна не бýдетъ чистá, тáкожде и ты́ не бýдеши чи́стъ, занé зéмлю мою́ погуби́лъ еси́ и лю́ди моя́ изби́лъ еси́: не пребýдеши въ вѣ́чное врéмя, сѣ́мя злóе.
Уготóви чáда твоя́ на убiéнiе грѣхáми отцá твоегó, да востáнутъ и наслѣ́дятъ зéмлю и напóлнятъ зéмлю рáтьми.
И востáну на ня́, глагóлетъ Госпóдь Саваóѳъ, и погублю́ и́мя и́хъ, и остáнокъ, и сѣ́мя: сiя́ глагóлетъ Госпóдь.
И положý Вавилóна пýста, я́ко вогнѣзди́тися ежéмъ, и бýдетъ ни во чтóже: и положý и́ брéнiя прóпасть въ пáгубу.
Сiя́ глагóлетъ Госпóдь Саваóѳъ: я́коже глагóлахъ, тáко бýдетъ, и я́коже совѣщáхъ, тáко пребýдетъ,
éже погуби́ти Ассирíанъ на земли́ моéй и на горáхъ мои́хъ: и бýдутъ въ попрáнiе, и отъи́мется от ни́хъ ярéмъ и́хъ, и слáва {Евр.: брéмя.} и́хъ от рáменъ и́хъ отъи́мется.
Сéй совѣ́тъ, егóже совѣщá Госпóдь на всю́ вселéнную, и сiя́ рукá на вся́ язы́ки вселéнныя:
я́же бо Бóгъ святы́й совѣщá, ктó разори́тъ? и рýку егó высóкую ктó отврати́тъ?
Въ лѣ́то, въ нéже ýмре Ахáзъ цáрь, бы́сть глагóлъ сéй:
не рáдуйтеся, вси́ иноплемéнницы, сокруши́ся бо ярéмъ бiю́щаго вы́: от сѣ́мене бо змiи́на изы́дутъ исчáдiя áспидовъ, и исчáдiя и́хъ изы́дутъ змiи́ паря́щiи:
и упасýтся убóзiи и́мъ, ни́щiи же человѣ́цы въ ми́рѣ почíютъ: и потреби́тъ глáдомъ сѣ́мя твоé, и остáнокъ твóй избiéтъ.
Восплáчитеся, вратá градóвъ, да возопiю́тъ грáды смятéннiи, иноплемéнницы вси́, занé ды́мъ от сѣ́вера и́детъ, и нѣ́сть, и́же пребýдетъ.
И чтó отвѣщáютъ цáрiе язы́ковъ? я́ко Госпóдь основá Сióна, и тѣ́мъ спасýтся смирéннiи людíй егó.
Нóщiю поги́бнетъ Моави́тска земля́, нóщiю бо поги́бнетъ стѣнá Моави́тская.
Плáчитеся о себѣ́, поги́бнетъ бо и дивóнъ, идѣ́же трéбище вáше: тáмо взы́дете плáкатися надъ Навáвомъ Моави́тскимъ. Плáчитеся, на вся́цѣй главѣ́ плѣ́шь, вся́ мы́шцы обсѣ́чены,
на стóгнахъ егó препоя́шитеся во врéтища, и восплáчитеся на хрáминахъ егó и на ýлицахъ егó и на стóгнахъ егó, вси́ возрыдáйте съ плáчемъ.
Я́ко возопи́ есевóнъ и Елеалá, дáже до Иассы́ услы́шася глáсъ и́хъ: сегó рáди чрéсла Моави́тиды вопiю́тъ, душá ея́ увѣ́сть.
Сéрдце Моави́тиды вопiéтъ въ нéй дáже до Сигóра: ю́ница бо éсть трилѣ́тна. Въ возшéствiи же луи́ѳа къ тебѣ́ плáчущеся взы́дутъ путéмъ Аронiи́млимъ: вопiéтъ сотрéнiе и трýсъ.
Водá немри́мля пустá бýдетъ, и травá ея́ оскудѣ́етъ: травы́ бо зелéны не бýдетъ.
Едá и си́це спасéтся? наведý бо на дéбрь Арáвлянъ, и вóзмутъ ю́:
прéйде бо вóпль предѣ́лъ земли́ Моави́тскiя до агалли́ма, и плáчь ея́ дáже до клáдязя Ели́мля.
Водá бо димóня напóлнится крóве: наведý бо на димóна Арáвляны, и возмý сѣ́мя Моáвле и Арiи́лево и остáнокъ Адами́нь.
Послю́ áки гáды на зéмлю: едá кáмень пýстъ éсть горá дщéре Сióни {посли́те áгнцы владýщему землéю от кáмене пусты́ни къ горѣ́ дщéре Сióни}?
Бýдеши бо áки пти́цы паря́щiя птенéцъ отъя́тый, дщи́ Моáвля, потóмъ же Арнóнъ {Евр.: въ прохождéнiи Арнóна.} мнóжайше совѣщавáй.
Сотвори́те покрóвъ плáча ея́ при́сно: въ полýденнѣй тмѣ́ бѣгýтъ, ужаснýшася: да не отведéшися,
обитáти бýдутъ въ тебѣ́ бѣглецы́ Моáвли: бýдутъ въ покровéнiе вáмъ от лицá гоня́щаго, я́ко отъя́ся пóмощь твоя́, и кня́зь поги́бе попирáяй от земли́.
И испрáвится съ ми́лостiю престóлъ, и ся́детъ на нéмъ со и́стиною во ски́нiи дави́довѣ, судя́ и взыскáя сýдъ и ускоря́я прáвду.
Слы́шахомъ укори́зну Моáвлю, укори́тель [бы́сть] зѣлó, горды́ню отъя́хъ: не тáко волхвовáнiе твоé, не тáко.
Восплáчется Моáвъ, въ Моави́тидѣ бо вси́ восплáчутся: живýщымъ же въ сéѳѣ помышлéнiя, и не усрами́шися.
Поля́ есевóня возрыдáютъ, виногрáдъ Севамáнь: пожирáющiи язы́ковъ, попери́те виногрáды егó, дáже до Иази́ра: не совокупи́теся, обходи́те пусты́ню, пóсланнiи остáшася, проидóша бо мóре.
Сегó рáди восплáчуся я́ко плáчемъ Иази́ровымъ о виногрáдѣ Севамáни: древá твоя́ посѣчé есевóнъ и Елiалá, я́ко на жáтву твою́ и на объимáнiе винá поперý, и вся́ падýтся.
И отъи́мется рáдость и весéлiе от виногрáдовъ, и въ виногрáдѣхъ твои́хъ не возрáдуются, и не изгнетýтъ винá въ точи́лѣхъ, престáло бо éсть:
сегó рáди чрéво моé на Моáва áки гýсли возгласи́тъ, и внýтренняя моя́ áки стѣ́ну обнови́лъ еси́.
И бýдетъ въ посрамлéнiе тебѣ́, я́ко утруди́ся Моáвъ о трéбищихъ, и вни́детъ въ рукотворéнная своя́, да помóлится, и не возмóгутъ избáвити егó.
Сié слóво éже глагóла Госпóдь на Моáва, егдá возглагóла.
И ны́нѣ глагóлю: въ трiéхъ лѣ́тѣхъ лѣ́тъ наéмника обезчéстится слáва Моáвля во всéмъ богáтствѣ мнóзѣ, и остáвится умáленъ и нечéстенъ.
Сé, Дамáскъ вóзмется от градóвъ бýдетъ въ падéнiе.
Остáвленъ въ вѣ́къ, въ лóже стадáмъ и въ покóй, и не бýдетъ отгоня́яй.
И ксемý не бýдетъ укрѣплéнъ, éже вбѣ́гнути тáмо Ефрéму: и ксемý не бýдетъ цáрство въ дамáсцѣ, и остáнокъ Си́рянъ поги́бнетъ: нѣ́си бо ты́ лýчшiй от сынóвъ Изрáилевыхъ и слáвы и́хъ: сiя́ глагóлетъ Госпóдь Саваóѳъ.
Бýдетъ въ тóй дéнь помрачéнiе слáвы Иáковли, и тýчная слáвы егó потрясýтся.
И бýдетъ, я́коже áще ктó собирáетъ жáтву стоя́щую, и сѣ́мя клáсовъ пожинáетъ: и бýдетъ, я́коже áще ктó собирáетъ клáсы въ дéбри твéрдѣ.
И остáнется въ нéй стéблiе, или́ áки зéрна мáслична двѣ́ или́ три́ на версѣ́ высóцѣ, или́ четы́ре или́ пя́ть на вѣ́твiи ея́ остáнутъ: сiя́ глагóлетъ Госпóдь Бóгъ Изрáилевъ.
Въ тóй дéнь уповáя бýдетъ человѣ́къ на сотвóршаго и́, и óчи егó ко святóму Изрáилеву воззря́тъ,
и не бýдутъ уповáюще на трéбища, нижé на дѣлá рýкъ свои́хъ, я́же сотвори́ша пéрсты и́хъ, и не бýдутъ смотри́ти на дубрáвы, нижé на мéрзости и́хъ.
Въ тóй дéнь бýдутъ грáди твои́ остáвлени, я́коже остáвиша Аморрéе и Евéе от лицá сынóвъ Изрáилевыхъ: и бýдутъ пýсти,
занé остáвилъ еси́ Бóга Спáса твоегó и Гóспода помóщника твоегó не помянýлъ еси́: сегó рáди насади́ши сáдъ невѣ́ренъ и сѣ́мя невѣ́рно.
Въ óньже бо дéнь áще насади́ши, прельсти́шися: а éже áще заýтра посѣ́еши, тó процвѣтéтъ на жáтву, во óньже дéнь наслѣ́диши, и áки отéцъ человѣ́чь наслѣ́дiе дáси сынóмъ твои́мъ.
О, лю́тѣ мнóжеству язы́ковъ мнóгихъ! áки мóре волнýющееся, тáко смятéтеся, и хребéтъ язы́ковъ мнóгихъ я́ко водá возшуми́тъ:
áки водá мнóга язы́цы мнóзи, áки [шýмъ] воды́ мнóгiя нýждею носи́мыя: и отвéржетъ егó и далéче поженéтъ егó, áки прáхъ плéвный вѣ́ющихъ проти́ву вѣ́тра, и я́ко прáхъ колéсный бýря вознося́щая.
Къ вéчеру, и бýдетъ плáчь: прéжде заýтрiя, и не бýдетъ: сiя́ чáсть плѣни́вшихъ ны́, и жрéбiй наслѣ́дившихъ нáсъ.
Гóре корабéлнымъ кри́ламъ земли́, я́же объ онý странý рѣ́къ еѳióпскихъ.
Посылáяй по мóрю послы́ въ залóгъ и послáнiя кни́жная верхý воды́: пóйдутъ бо вѣ́стницы лéгцы ко язы́ку высóку и къ лю́демъ стрáннымъ и стропти́вымъ. Ктó дáлѣе и́хъ? язы́къ безнадéженъ и попрáнъ.
Ны́нѣ рѣ́ки земны́я вся́ áки странá населéна насели́тся, странá и́хъ áки знáменiе от горы́ воздви́гнется, áки глáсъ трубы́ услы́шанъ бýдетъ.
Я́ко тáко ми́ речé Госпóдь: утверждéнiе бýдетъ въ моéмъ грáдѣ, áки свѣ́тъ знóя полýденнаго и áки о́блакъ рóсный въ дéнь жáтвы бýдетъ.
Прéжде жáтвы, егдá соверши́тся цвѣ́тъ, и грéзнъ произы́детъ по цвѣ́тѣ недозрѣ́лъ: и отъи́метъ грóздiе мáлое серпáми и лóзiе отъи́метъ и посѣчéтъ,
и остáвитъ вкýпѣ пти́цамъ небéснымъ и звѣрéмъ земны́мъ: и соберýтся на ня́ пти́цы небéсныя, и вси́ звѣ́рiе земли́ нáнь прiи́дутъ.
Въ тó врéмя принесýтся дáры Гóсподу Саваóѳу от людíй оскорблéныхъ и оттóрженыхъ и от людíй вели́кихъ, отны́нѣ и въ вѣ́чное врéмя: язы́къ надѣ́ющься и попрáнъ, и́же éсть въ чáсти рѣ́чнѣй страны́ своея́, на мѣ́сто, идѣ́же и́мя Гóспода Саваóѳа, на гóру Сióню.
Сé, Госпóдь сѣди́тъ на о́блацѣ лéгцѣ и прiи́детъ во Еги́петъ, и потрясýтся рукотворéнная Еги́петская от лицá егó, и сердцá и́хъ разслáбнутъ въ ни́хъ.
И востáнутъ Еги́птяне на Еги́птяны, и вооружи́тся человѣ́къ на брáта своегó, и вся́къ на бли́жняго своегó, востáнетъ грáдъ на грáдъ и закóнъ на закóнъ.
И возмятéтся дýхъ Еги́птянъ въ ни́хъ, и совѣ́тъ и́хъ разсы́плю, и вопрóсятъ богóвъ свои́хъ и кумíровъ свои́хъ, и глася́щихъ от земли́ и чревоволшéбниковъ.
И предáмъ Еги́петъ въ рýцѣ человѣ́ковъ влáстелей жéстокихъ, и цáрiе жéстоцы обладáти бýдутъ и́ми: сiя́ глагóлетъ Госпóдь Саваóѳъ.
И испiю́тъ Еги́птяне вóду, я́же при мóри, а рѣкá оскудѣ́етъ и и́зсхнетъ.
И оскудѣ́ютъ рѣ́ки и ровéнницы рѣ́чнiи: и и́зсхнетъ вéсь сóнмъ водны́й, и во вся́цѣмъ лýзѣ трóстнѣмъ и си́тнѣмъ,
и злáкъ зелéный вéсь и́же о́крестъ рѣки́, и всé сѣ́емое при рѣцѣ́ пóсхнетъ вѣ́тромъ растлѣ́нно.
И возстеня́тъ ры́барiе, и возстеня́тъ вси́ мéщущiи ýдицу въ рѣкý, и мéщущiи нéводы и мéщущiи сѣ́ти возрыдáютъ.
И стýдъ прiи́метъ дѣ́лающихъ лéнъ расчéсаный и дѣ́лающихъ виссóнъ, и бýдутъ дѣ́лающiи я́ въ болѣ́зни,
и вси́ творя́щiи Сикéру опечáлятся и поболя́тъ душáми.
И юрóдиви бýдутъ кня́зи танéсовы: мýдрiи царéвы совѣ́тницы, совѣ́тъ и́хъ обюрóдѣетъ. Кáко речéте царю́: сы́нове смы́сленыхъ мы́, сы́нове царéй дрéвнихъ?
Гдѣ́ сýть ны́нѣ мýдрiи твои́, и да возвѣстя́тъ тебѣ́ и рекýтъ: чтó совѣщá Госпóдь Саваóѳъ на Еги́петъ?
Оскудѣ́ша кня́зи танéсовы, и вознесóшася кня́зи мемфи́тстiи, и прельстя́тъ Еги́пта по племенóмъ.
Госпóдь бо раствори́ и́мъ дýхъ прельщéнiя, и прельсти́ша Еги́пта всѣ́ми дѣлесы́ свои́ми, я́коже прельщáется пiя́ный и кýпно блю́ющь.
И не бýдетъ Еги́птяномъ дѣ́ла, éже бы сотвори́ло главý и о́шибъ, и начáло и конéцъ.
Въ тóй дéнь бýдутъ Еги́птяне áки жены́ во стрáсѣ и трéпете от лицá руки́ Гóспода Саваóѳа, ю́же тóй возложи́тъ на ня́.
И бýдетъ странá Иудéйска во стрáхъ Еги́птяномъ: вся́къ, и́же áще воспомянéтъ ю́ и́мъ, убоя́тся совѣ́та рáди, егóже совѣщá Госпóдь Саваóѳъ нáнь.
Въ тóй дéнь бýдетъ пя́ть градóвъ во Еги́птѣ, глагóлющихъ язы́комъ ханаани́тскимъ и кленýщихся и́менемъ Гóспода Саваóѳа: грáдъ аседéкъ прозовéтся еди́нъ грáдъ.
Въ тóй дéнь бýдетъ жéртвенникъ Гóсподеви въ земли́ Еги́петстѣй и стóлпъ въ предѣ́лѣхъ егó Гóсподеви.
И бýдетъ въ знáменiе во вѣ́къ Гóсподеви въ земли́ Еги́петстѣй: я́ко возопiю́тъ ко Гóсподу на оскорбля́ющыя и́хъ, и пóслетъ и́мъ Госпóдь человѣ́ка, и́же спасéтъ я́, судя́й спасéтъ я́.
И познáнъ бýдетъ Госпóдь Еги́птяномъ: и увѣ́дятъ Еги́птяне Гóспода въ тóй дéнь и сотворя́тъ жéртвы и дáры, и обѣщáютъ обѣ́ты Гóсподеви и воздадя́тъ.
И порази́тъ Госпóдь Еги́птянъ я́звою вели́кою и исцѣли́тъ и́хъ цѣльбóю, и обратя́тся ко Гóсподеви, и услы́шитъ и́хъ и исцѣли́тъ и́хъ цѣльбóю.
Въ тóй дéнь бýдетъ пýть от Еги́пта ко Ассирíаномъ, и вни́дутъ Ассирíане во Еги́петъ, и Еги́птяне пóйдутъ ко Ассирíаномъ, и порабóтаютъ Еги́птяне Ассирíаномъ.
Въ тóй дéнь бýдетъ Изрáиль трéтiй во Еги́птянѣхъ и во Ассирíанѣхъ, благословéнъ на земли́,
ю́же благослови́ Госпóдь Саваóѳъ, глагóля: благословéни лю́дiе мои́, и́же во Еги́птѣ и и́же во Ассирíахъ, и наслѣ́дiе моé Изрáиль.
Въ лѣ́то, въ нéже вни́де танаѳáнъ во азóтъ, егдá пóсланъ бы́сть от Арны́, царя́ Ассирíйскаго, и воевá на азóтъ и взя́ егó,
тогдá речé Госпóдь ко Исáiи сы́ну Амóсову, глагóля: иди́ и свéрзи врéтище со чрéслъ свои́хъ, и сандáлiя твоя́ иззýй съ нóгъ твои́хъ, и сотвори́ си́це, ходя́ нáгъ и бóсъ.
И речé Госпóдь: я́коже ходи́лъ рáбъ мóй Исáiа нáгъ и бóсъ три́ лѣ́та, три́ лѣ́та бýдутъ знáменiя и чудесá Еги́птяномъ и еѳióпляномъ:
я́ко тáкожде отведéтъ цáрь Ассирíйскъ плѣ́нъ Еги́петскъ и еѳióпскъ, ю́ношы и стáрцы, нáги и бóсы, откровéны во стыдѣ́нiе Еги́пту.
И постыдя́тся побѣждéни Еги́птяне о еѳióплянѣхъ, на ни́хже уповáху Еги́птяне, бя́ху бо и́мъ слáва.
И рекýтъ живýщiи на óстровѣ сéмъ въ дéнь óный: сé, мы́ бѣ́хомъ уповáюще бѣжáти къ ни́мъ на пóмощь, и́же не могóша спасти́ся от царя́ Ассирíйска, и кáко мы́ спасéмся?
Я́коже бýря сквозѣ́ пусты́ню прохóдитъ, от пусты́ни исходя́щая изъ земли́,
стрáшно видѣ́нiе и жéстоко повѣ́дася мнѣ́: преступáяй преступáетъ, и беззакóннуяй беззакóнствуетъ: на мя́ Елами́те, и послы́ пéрсстiи на мя́ и́дутъ: ны́нѣ воздохнý и утѣ́шу себé.
Сегó рáди напóлнишася чрéсла моя́ разслаблéнiя, и болѣ́зни прiя́ша мя́ áки раждáющую: непрáвдовахъ éже не слы́шати, потщáхся éже не ви́дѣти.
Сéрдце моé заблуждáетъ, и беззакóнiе погружáетъ мя́, душá моя́ стои́тъ во стрáсѣ.
Уготóвите трапéзу, яди́те, пíйте: востáвше, кня́зи, уготóвите щиты́,
я́ко тáко речé Госпóдь ко мнѣ́: шéдъ постáви себѣ́ стрáжа, и éже áще ýзриши, возвѣсти́.
И узрѣ́хъ всáдники кóнныя двá, всáдника на осля́ти и всáдника на велблю́дѣ. Послýшай слýшанiемъ мнóгимъ
и призови́ урíю на стрáжбу Госпóдню. И речé: стоя́хъ вы́ну дéнь, и у пóлчища áзъ стоя́хъ всю́ нóщь,
и сé, сáмъ грядéтъ [мýжъ] всáдникъ двокóнный, и отвѣщáвъ речé: падé, падé Вавилóнъ, и вси́ кумíры егó и вся́ рукотворéнная егó сокруши́шася на земли́.
Послýшайте, остáвшiися, и болѣ́знующiи, услы́шите: éже слы́шахъ от Гóспода Саваóѳа, Бóгъ Изрáилевъ возвѣсти́ нáмъ.
Видѣ́нiе на Идумéю. Ко мнѣ́ зови́ от Сии́ра: стреги́те забрáла.
Стрегý заýтра и нóщiю. А́ще и́щеши, ищи́ и у менé обитáй.
Въ дубрáвѣ въ вéчеръ преспи́ши, или́ на пути́ Дедáновѣ.
Во срѣ́тенiе жáждущему вóду принеси́те, живýщiи во странѣ́ Ѳемáновѣ, со хлѣ́бы срѣтáйте бѣжáщыя мнóжества рáди убiéнныхъ
и мнóжества рáди заблуждáющихъ, и мнóжества рáди мечéй и мнóжества рáди лукóвъ напряжéнныхъ, и мнóжества рáди пáдшихъ на сѣ́чи.
Я́ко си́це речé Госпóдь ко мнѣ́: ещé лѣ́то [еди́но], я́коже лѣ́то наéмника, оскудѣ́етъ слáва сынóвъ Кидáрскихъ,
и остáнокъ лукóвъ си́льныхъ сынóвъ Кидáрскихъ бýдетъ мáлъ, я́ко Госпóдь Бóгъ Изрáилевъ глагóла.
Чтó бы́сть тебѣ́, я́ко ны́нѣ возлѣзóсте вси́ на хрáмины тщéтныя?
Напóлнися грáдъ вопiю́щихъ, уя́звленнiи твои́ не мечьми́ уязвлéни, нижé мертвецы́ твои́ умерщвлéни рáтiю:
вси́ кня́зи твои́ побѣгóша, и плѣнéннiи жéстоцѣ сýть свя́зани, и крѣ́пцыи въ тебѣ́ далéче отбѣжáша.
Сегó рáди рекóхъ: остáвите менé, да гóрцѣ восплáчуся: не належи́те утѣшáти мя́ о сокрушéнiи дщéре рóда моегó:
я́ко дéнь мятéжа и пáгубы и попрáнiя, и смятéнiе от Гóспода Саваóѳа: въ дéбри Сióни скитáются, от мáла дáже до вели́ка скитáются по горáмъ.
Елами́те же взя́ша тýлы, и всáдницы человѣ́цы на кóнехъ, и собóръ ополчéнiя.
И бýдутъ избрáнны дéбри твоя́, напóлнятся колесни́цъ, кóнницы же застýпятъ вратá твоя́
и откры́ютъ вратá Иýдина, и воззря́тъ въ тóй дéнь во избрáнныя дóмы грáда,
и откры́ютъ сокровéнная домóвъ краегрáдiя дави́дова, и ýзрятъ, я́ко мнóжайшiи сýть, и я́ко отврати́ша вóду дрéвнiя купѣ́ли во грáдъ,
и я́ко разори́ша дóмы Иерусали́мли на утверждéнiе стѣнѣ́ грáднѣй.
И сотвори́сте себѣ́ вóду междý двѣмá стѣнáма, внутрьýду купѣ́ли дрéвнiя, и не воззрѣ́сте на сотвори́вшаго ю́ испéрва, и согрáждшаго ю́ не ви́дѣсте.
И призвá Госпóдь, Госпóдь Саваóѳъ въ тóй дéнь плáчь и рыдáнiе, и острижéнiе и препоя́санiе во врéтища:
тíи же сотвори́ша рáдость и весéлiе, закалáюще телцы́ и жрýще óвцы, я́ко я́сти мясá и пи́ти винó, глагóлюще: да я́мы и пiéмъ, ýтрѣ бо ýмремъ.
И откровéнна сiя́ сýть во ýшiю Гóспода Саваóѳа, я́ко не остáвится вáмъ тóй грѣ́хъ, дóндеже ýмрете.
Си́це глагóлетъ Госпóдь Саваóѳъ: иди́ въ кýщу ко сомнáну строи́телю дóму и рцы́ емý:
чтó ты́ здѣ́, и чтó тебѣ́ здѣ́, я́ко истесáлъ еси́ себѣ́ здѣ́ грóбъ и сотвори́лъ еси́ себѣ́ на высóцѣ грóбъ, и написáлъ еси́ себѣ́ на кáмени кýщу?
Сé, ны́нѣ Госпóдь Саваóѳъ извéржетъ и сотрéтъ мýжа, и отъи́метъ ýтварь твою́ и вѣнéцъ твóй слáвный,
и повéржетъ тя́ во странý вели́ку и безмѣ́рну, и тáмо ýмреши: и положи́тъ колесни́цу твою́ дóбрую въ безчéстiе и дóмъ кня́зя твоегó въ попрáнiе:
и извéржешися от строи́телства твоегó и от степéне твоегó.
И бýдетъ въ тóй дéнь, и призовý рабá моегó Елiаки́ма сы́на хелкíева
и облекý егó во ýтварь твою́, и вѣнéцъ твóй дáмъ емý и держáву твою́, и строи́телство твоé дáмъ въ рýцѣ егó, и бýдетъ я́ко отéцъ живýщымъ во Иерусали́мѣ и живýщымъ во Иудéи.
И дáмъ емý слáву дави́дову, и обвладѣ́етъ, и не бýдетъ противоглагóлющаго: и дáмъ емý клю́чь дóму дави́дова на рáмо егó, и отвéрзетъ, и не бýдетъ затворя́ющаго, и затвóритъ, и не бýдетъ отверзáющаго.
И постáвлю егó кня́зя на мѣ́стѣ вѣ́рнѣ, и бýдетъ на престóлѣ слáвы дóму отцá своегó.
И бýдетъ уповáяй на негó вся́къ слáвный въ домý отцá егó, от мáла дáже до вели́ка: и бýдутъ зави́сяще на нéмъ.
Въ тóй дéнь, сiя́ глагóлетъ Госпóдь Саваóѳъ, подви́гнется человѣ́къ утверждéнъ на мѣ́стѣ вѣ́рнѣ, и отъи́мется, и падéтъ, и потреби́тся слáва, я́же на нéмъ, я́ко Госпóдь глагóла.
Плáчитеся, корабли́ кархидóнстiи, я́ко поги́бе, и ктомý не и́дутъ от земли́ китiéйскiя, отведéся плѣнéнъ.
Комý подóбни бы́ша живýщiи во óстровѣ, купцы́ фи́ничестiи, преходя́щiи мóре?
Въ водѣ́ мнóзѣ сѣ́мя купéческо, áки жáтвѣ вноси́мѣй купцы́ язы́честiи.
Усрами́ся, Сидóне, речé мóре. Крѣ́пость же морскáя речé: не болѣ́хъ, ни породи́хъ, ни вскорми́хъ ю́ношъ, нижé вознесóхъ дѣви́цъ.
Егдá же слы́шано бýдетъ во Еги́птѣ, прiи́метъ я́ болѣ́знь о ти́рѣ.
Иди́те въ кархидóнъ, плáчитеся, живýщiи во óстровѣ сéмъ.
Не сié ли бѣ́ величáнiе вáмъ испéрва, прéжде нéже прéдану бы́ти емý?
Ктó сiя́ совѣщá на ти́ра? едá хýждшiй éсть, или́ не крѣ́пкiй éсть? купцы́ егó слáвнiи кня́зи земли́.
Госпóдь Саваóѳъ совѣщá разсы́пати вся́кую горды́ню слáвныхъ и обезчéстити вся́кое слáвное на земли́.
Дѣ́лай зéмлю твою́, и́бо корабли́ ктомý не прiи́дутъ от кархидóна.
И рукá твоя́ ктомý не укрѣпѣ́етъ по мóрю, разгнѣвля́ющая царéй. Госпóдь Саваóѳъ заповѣ́да о Ханаáнѣ, éже погуби́ти крѣ́пость егó.
И рекýтъ: ктомý не приложи́те укаря́ти и оби́дѣти дщéрь Сидóню: и áще отъи́деши ко китiи́омъ, нижé тáмо бýдетъ тебѣ́ покóй:
и въ зéмлю Халдéйску, но и тá опустѣ́ла от Ассирíанъ, я́ко стѣнá ея́ падéся.
Плáчитеся, корабли́ кархидóнстiи, я́ко поги́бе тверды́ня вáша.
И бýдетъ въ тóй дéнь, остáвленъ бýдетъ ти́ръ сéдмьдесятъ лѣ́тъ, я́коже врéмя [еди́наго] царя́, я́ко врéмя человѣ́ческо: и по седми́десятихъ лѣ́тѣхъ бýдетъ ти́ръ я́ко пѣ́снь блудни́цы.
Возми́ гýсли, обыди́ грáдъ, блудни́ца забвéная, дóбрѣ погуди́, мнóго воспóй, да пáмять твоя́ бýдетъ.
И бýдетъ по седми́десятихъ лѣ́тѣхъ, присѣщéнiе сотвори́тъ Бóгъ ти́ру, и пáки возстáвится на прéжднее и бýдетъ тóржище всѣ́мъ цáрствамъ вселéнныя на лицы́ земли́.
И бýдетъ егó кýпля и мздá свято Гóсподеви, не и́мъ сóбрано бýдетъ, но живýщымъ предъ Гóсподемъ, вся́ кýпля егó, я́сти и пи́ти и напóлнитися, и въ сы́тость, на пáмять предъ Гóсподемъ.
Сé, Госпóдь разсы́плетъ вселéнную и опустоши́тъ ю́, и откры́етъ лицé ея́ и расточи́тъ живýщыя на нéй.
И бýдутъ лю́дiе áки жрéцъ, и рáбъ áки господи́нъ, и рабá áки госпожá: бýдетъ купýяй я́ко продая́й, и взаи́мъ éмляй áки заимодáвецъ, и дóлжный áки емýже éсть дóлженъ.
Тлѣ́нiемъ истлѣ́етъ земля́, и расхищéнiемъ расхищéна бýдетъ земля́: устá бо Госпóдня глагóлаша сiя́.
Восплáкася земля́, и растлѣ́нна бы́сть вселéнная, восплáкашася высóцыи земли́.
Земля́ бо беззакóнiе сотвори́ живýщихъ рáди на нéй, понéже преступи́ша закóнъ и измѣни́ша зáповѣди, разруши́ша завѣ́тъ вѣ́чный.
Сегó рáди прокля́тiе поя́стъ зéмлю, я́ко согрѣши́ша живýщiи на нéй: сегó рáди убóзи бýдутъ живýщiи на земли́, и остáнется человѣ́ковъ мáло.
Восплáчется винó, возрыдáетъ виногрáдъ, возстенýтъ вси́ рáдующiися душéю.
Престáло éсть весéлiе тимпáновъ, престá высокодéрзость и богáтство нечести́выхъ, престáлъ éсть глáсъ гýслей:
усрами́шася, не пи́ша винá, горькá бы́сть Сикéра пiю́щымъ.
Опустѣ́ вся́къ грáдъ, заключи́тъ хрáмъ, éже не вни́ти.
Плáчитеся о винѣ́ всю́ду, престáла éсть рáдость вся́ земнáя, отъи́де вся́ рáдость земли́.
И остáнутъ грáди пýсти, и дóмове остáвлени поги́бнутъ.
Сiя́ вся́ бýдутъ на земли́ среди́ язы́ковъ: я́коже áще ктó отрясáетъ мáсличину, тáко отрясýтъ и́хъ: и [я́коже] áще остáнетъ от объимáнiя виногрáда,
сíи глáсомъ возопiю́тъ: остáвшiися же на земли́ возрáдуются со слáвою Госпóднею, возмятéтся водá морскáя.
Сегó рáди слáва Госпóдня во óстровѣхъ бýдетъ морски́хъ, и́мя Госпóдне прослáвлено бýдетъ.
Гóсподи Бóже Изрáилевъ, от кри́лъ земны́хъ чудесá слы́шахомъ, надéжда благочести́вому: и рекýтъ: [гóре хýлящымъ, и́же хýлятъ закóнъ,] гóре престýпникомъ, и́же преступáютъ закóнъ.
Стрáхъ и прóпасть и сѣ́ть на вáсъ живýщихъ на земли́.
И бýдетъ, бѣжáй стрáха впадéтъ въ прóпасть, и излáзяй изъ прóпасти и́мется въ сѣ́ть: я́ко óкна съ небесé отверзóшася, и потрясýтся основáнiя земнáя.
Мятéжемъ возмятéтся земля́, и скýдостiю оскудѣ́етъ земля́.
Преклони́ся и потрясéся земля́ áки овóщное храни́лище, и áки пiя́нъ и шýменъ падéтъ и не возмóжетъ востáти, преодолѣ́ бо на нéй беззакóнiе.
И бýдетъ въ тóй дéнь, наведéтъ Госпóдь на ýтварь небéсную рýку и на цари́ земны́я.
И соберýтъ собрáнiе ея́ и затворя́тъ въ твéрди и въ темни́цы: мнóзѣми рóды бýдетъ посѣщéнiе и́хъ.
И истáетъ пли́нѳа и падéтъ стѣнá, и устыди́тся лунá и посрами́тся сóлнце: я́ко воцари́тся Госпóдь въ Сióнѣ и во Иерусали́мѣ и предъ старѣ́йшины слáвенъ бýдетъ.
Гóсподи Бóже мóй, прослáвлю тя́, воспою́ и́мя твоé, я́ко сотвори́лъ еси́ чýдная дѣлá, совѣ́тъ дрéвнiй и́стинный: да бýдетъ, Гóсподи.
Я́ко положи́лъ еси́ грáды въ пéрсть, грáды твéрдыя, éже пáсти основáниемъ и́хъ, нечести́выхъ грáдъ да не сози́ждется во вѣ́къ.
Сегó рáди благословя́тъ тя́ лю́дiе ни́щiи, и грáди человѣ́ковъ оби́димыхъ возблагословя́тъ тя́.
Бы́лъ бо еси́ вся́кому грáду смирéнному помóщникъ, и изнемогáющымъ за оскудѣ́нiе покрóвъ, от человѣ́къ злы́хъ избáвиши и́хъ: покрóвъ жáждущихъ, и дýхъ человѣ́ковъ оби́димыхъ.
А́ки человѣ́цы малодýшнiи жáждущiи въ Сióнѣ, я́ко избáвиши и́хъ от человѣ́къ нечести́выхъ, и́мже нáсъ прéдалъ еси́.
И сотвори́тъ Госпóдь Саваóѳъ всѣ́мъ язы́комъ: на горѣ́ сéй испiю́тъ рáдость, испiю́тъ винó,
помáжутся ми́ромъ на горѣ́ сéй: предáждь сiя́ вся́ язы́комъ: тóй бо совѣ́тъ на вся́ язы́ки.
Пожрé смéрть {Евр.: пожéрта бýдетъ смéрть} возмóгши, и пáки отъя́тъ Госпóдь Бóгъ вся́кую слéзу от вся́каго лицá: поношéнiе людíй отъя́тъ от всея́ земли́, устá бо Госпóдня глагóлаша [сiя́].
И рекýтъ въ дéнь óный: сé, Бóгъ нáшъ, нáньже уповáхомъ, и спасéтъ нáсъ: сéй Госпóдь, потерпѣ́хомъ егó, и возрáдовахомся и возвесели́хомся о спасéнiи нáшемъ.
Покóй дáстъ Бóгъ на горѣ́ сéй, и поперéтся Моави́тида, я́коже тóпчутъ тóкъ колесни́цами.
И воздви́гнетъ рýцѣ свои́, я́коже и тóй смири́, éже погуби́ти: и смири́тъ горды́ню егó, на ня́же рýцѣ возложи́.
И высотý убѣ́жища огрáды твоея́ смири́тъ, и обни́зится дáже до земли́.
Въ тóй дéнь воспою́тъ пѣ́снь сiю́ въ земли́ Иудéйстѣй, глагóлюще: сé, грáдъ крѣ́покъ, и спасéнiе нáмъ положи́тъ стѣ́ну и ограждéнiе.
Отвéрзите вратá, да вни́дутъ лю́дiе храня́щiи прáвду и храня́щiи и́стину,
прiéмлющiи и́стину и храня́щiи ми́ръ.
Я́ко на тя́ надѣ́янiемъ надѣ́яшася, Гóсподи, во вѣ́къ, Бóже вели́кiй, вѣ́чный,
и́же смири́въ низвéлъ еси́ живýщыя въ высóкихъ: грáды крѣ́пкiя разори́ши и обни́зиши я́ дáже до земли́.
И поперýтъ я́ нóги крóткихъ и смирéнныхъ.
Пýть благочести́выхъ прáвъ бы́сть, и приуготóванъ пýть благочести́выхъ.
Пýть бо Госпóдень сýдъ: уповáхомъ на и́мя твоé и пáмять, ея́же желáетъ душá нáша.
От нóщи ýтренюетъ дýхъ мóй къ тебѣ́, Бóже, занé свѣ́тъ повелѣ́нiя твоя́ на земли́: прáвдѣ научи́теся, живýщiи на земли́.
Престá бо нечести́вый: вся́къ, и́же не научи́тся прáвдѣ на земли́, и́стины не сотвори́тъ: да вóзмется нечести́вый, да не ви́дитъ слáвы Госпóдни.
Гóсподи, высокá твоя́ мы́шца, и не вѣ́дѣша, разумѣ́вше же постыдя́тся: рéвность прiи́метъ лю́ди ненакáзанныя, и ны́нѣ óгнь супостáты поя́стъ.
Гóсподи Бóже нáшъ, ми́ръ дáждь нáмъ, вся́ бо воздáлъ еси́ нáмъ.
Гóсподи Бóже нáшъ, стяжи́ ны: Гóсподи, рáзвѣ тебé инóго не вѣ́мы: и́мя твоé именýемъ.
Мéртвiи же животá не и́мутъ ви́дѣти, нижé врáчеве воскреся́тъ: сегó рáди навéлъ еси́ и погуби́лъ еси́, и взя́лъ еси́ вся́къ мýжескъ пóлъ и́хъ.
Приложи́ и́мъ злá, Гóсподи, приложи́ злá слáвнымъ земли́.
Гóсподи, въ скóрби помянýхомъ тя́, въ скóрби мáлѣ наказáнiе твоé нáмъ.
И я́ко боля́щая приближáется роди́ти и въ болѣ́зни своéй воскричá, тáко бы́хомъ возлю́бленному твоемý.
Стрáха рáди твоегó, Гóсподи, во чрéвѣ прiя́хомъ и поболѣ́хомъ, и роди́хомъ дýхъ спасéнiя твоегó, егóже сотвори́хомъ на земли́: не падéмся, но падýтся вси́ живýщiи на земли́.
Воскрéснутъ мéртвiи и востáнутъ и́же во гробѣ́хъ, и возрáдуются и́же на земли́: росá бо, я́же от тебé, исцѣлéнiе и́мъ éсть, земля́ же нечести́выхъ падéтъ.
Иди́те, лю́дiе мои́, вни́дите во хрáмину вáшу, затвори́те двéри своя́, укры́йтеся мáло ели́ко ели́ко, дóндеже мимои́детъ гнѣ́въ Госпóдень.
Сé бо, Госпóдь от святáго [мѣ́ста] навóдитъ гнѣ́въ на живýщыя на земли́: и откры́етъ земля́ крóвь свою́ и не покры́етъ избiéныхъ.
Въ тóй дéнь наведéтъ Госпóдь мéчь святы́й и вели́кiй и крѣ́пкiй на дрáконта змíа бѣжáща, на дрáконта змíа лукáваго, и убiéтъ дрáконта сýщаго въ мóри.
Въ тóй дéнь виногрáдъ дóбрый, желáнiе пѣ́ти надъ ни́мъ:
áзъ грáдъ крѣ́пкiй, грáдъ вою́емый, всýе напою́ егó: плѣнéнъ бо бýдетъ нóщiю, въ дéнь же падéтся стѣнá егó: нѣ́сть тогó, и́же не вóзметъ егó.
Ктó мя пристáвитъ стрещи́ стéблiе на ни́вѣ? рáди вражды́ сея́ отри́нухъ и́. У́бо сегó рáди сотвори́ Госпóдь Бóгъ вся́, ели́ка совѣщá.
И сгорѣ́хъ, возопiю́тъ живýщiи въ нéмъ: сотвори́мъ ми́ръ емý, сотвори́мъ ми́ръ,
приходя́щая чáда Иáковля: прозя́бнетъ и процвѣтéтъ Изрáиль, и напóлнится вселéнная плодá егó.
Едá я́коже тóй порази́, и сáмъ си́це уязви́тся? и я́коже сáмъ уби́, тáкожде убiéнъ бýдетъ?
Сваря́ся и укоря́я отпýститъ я́: не ты́ ли бы́лъ еси́ помышля́я дýхомъ жéстокимъ, уби́ти я́ дýхомъ я́рости?
Сегó рáди отъи́мется беззакóнiе Иáковле, и сié éсть благословéнiе егó, егдá отимý грѣ́хъ егó, егдá положáтъ всé кáменiе трéбищъ сокрушéно áки прáхъ дрóбный: и не пребýдутъ древесá и́хъ, и кумíры и́хъ бýдутъ посѣ́чени, áки дубрáва далéче.
Обитáющее стáдо отпущéнно бýдетъ, áки стáдо остáвленое: и бýдетъ мнóго врéмя въ пáжить, и тáмо почíютъ стадá.
И по врéмени не бýдетъ въ нéмъ вся́каго злáка, занéже и́зсхнетъ: жены́ грядýщыя съ позóрища, прiиди́те: не сýть бо лю́дiе имýще смы́сла, сегó рáди не ущéдритъ сотвори́вый я́, нижé создáвый и́хъ поми́луетъ.
И бýдетъ въ тóй дéнь, загради́тъ Госпóдь о ровéнника рѣ́чнаго, дáже до ринокорýры {Евр.: водотéчи Еги́петскiя.} [грáда]: вы́ же собери́те сы́ны Изрáилевы по еди́ному.
И бýдетъ въ тóй дéнь, вострýбятъ трубóю вели́кою, и прiи́дутъ погубля́емiи во странѣ́ Ассирíйстѣй и погубля́емiи во Еги́птѣ, и поклóнятся Гóсподеви на горѣ́ святѣ́й во Иерусали́мѣ.
Гóре вѣнцý горды́ни, наи́мницы Ефрéмовы, цвѣ́тъ отпады́й от слáвы, на версѣ́ горы́ тýчныя пiя́нiи безъ винá.
Сé, крѣпкá и жéстока я́рость Госпóдня, áки грáдъ низпущáемый не имы́й крóва, наси́льно низпущáемый: я́коже воды́ мнóгое мнóжество влекýщее странý, земли́ сотвори́тъ покóй рукáма,
и ногáма поперéтся вѣнéцъ горды́ни, наи́мницы Ефрéмовы.
И бýдетъ цвѣ́тъ отпады́й от надéжды слáвы на версѣ́ горы́ высóкiя, áки рáннiй плóдъ смóквинъ: ви́дѣвый егó, прéжде взя́тiя въ рýцѣ свои́, восхóщетъ поглоти́ти егó.
Въ тóй дéнь бýдетъ Госпóдь Саваóѳъ вѣнéцъ надéжди, сплетéный слáвою остáвшымся лю́демъ.
И остáвятся дýхомъ сýднымъ на сýдъ, и крѣ́пость возбраня́ющихъ погубля́ти.
Сíи бо винóмъ сýть прельщéни: прельсти́шася Сикéры рáди, жрéцъ и прорóкъ изступи́ша умá от Сикéры, пожéрты бы́ша винóмъ, потрясóшася от пiя́нства Сикéры, прельсти́шася: сié éсть привидѣ́нiе.
Прокля́тiе поя́стъ сéй совѣ́тъ, сéй бо совѣ́тъ рáди лихои́мства.
Комý возвѣсти́хомъ злáя и комý повѣ́дахомъ вѣ́сть? и́же отдоéнiи [сýть] от млекá, оттóрженнiи от сосцá.
Печáли на печáль ожидáй, надéжды къ надéжди, ещé мáло, ещé мáло,
я́ко хýдостiю устéнъ, язы́комъ ины́мъ возглагóлютъ лю́демъ си́мъ, рекýще и́мъ:
сéй покóй áлчному и сié сокрушéнiе, и не восхотѣ́ша слы́шати.
И бýдетъ и́мъ слóво Гóспода Бóга, печáль къ печáли, надéжда къ надéжди, ещé мáло, ещé мáло, да и́дутъ и падýтся вспя́ть и въ бѣдý впадýтъ, и сокрушáтся и плѣнéни бýдутъ.
Сегó рáди услы́шите слóво Госпóдне, мýжiе озлóбленнiи и кня́зи людíй сýщихъ во Иерусали́мѣ.
Я́ко рекóсте: сотвори́хомъ завѣ́тъ со áдомъ и со смéртiю сложéнiе: бýря носи́ма áще мимои́детъ, не прiи́детъ на нáсъ: положи́хомъ лжý надéжду нáшу и лжéю покры́емся.
Сегó рáди тáко глагóлетъ Госпóдь: сé, áзъ полагáю во основáнiе Сióну кáмень многоцѣ́ненъ, избрáнъ, краеугóленъ, чи́стенъ, во основáнiе емý, и вѣ́руяй въ óнь не постыди́тся:
и положý сýдъ въ надéжду, ми́лость же моя́ на мѣ́рилѣхъ, и уповáвшiи вотщé на лжý, я́ко не минéтъ вáсъ бýря:
и не отъи́метъ от вáсъ завѣ́та смéртнаго, и надéжда вáша, я́же ко áду, не пребýдетъ. Бýря идýщая áще нáйдетъ, бýдете éй въ попрáнiе:
егдá мимои́детъ, вóзметъ вáсъ: я́ко по вся́ко ýтро преходи́ти бýдетъ въ дéнь, и въ нощи́ бýдетъ надéжда злá. Научи́теся слы́шати, утѣсня́емiи:
не мóжемъ рáтовати, сáми же изнемогáемъ, éже собрáтися нáмъ.
Я́коже горá на нечести́выхъ востáнетъ Госпóдь, и бýдетъ [я́коже] въ дéбри гаваóнстѣй, съ я́ростiю сотвори́тъ дѣлá своя́, гóрести дѣ́ло: я́рость же егó чýждо употреби́тся, и погублéнiе егó стрáнно.
И вы́ не рáдуйтеся, нижé да возмóгутъ вáши ýзы: занé скончáны и сокращéны вéщи слы́шахъ от Гóспода Саваóѳа, я́же сотвори́тъ надъ всéю землéю.
Внуши́те и слы́шите глáсъ мóй, внемли́те и слы́шите словесá моя́.
Едá вéсь дéнь бýдетъ оря́й орáти? или́ сѣ́мя уготóвитъ прéжде воздѣ́ланiя земли́?
Не егдá ли умягчи́тъ {уравни́тъ} лицé ея́, тогдá всѣ́етъ мáло чернýхи и кими́на, потóмъ же сѣ́етъ пшени́цу и ячмéнь и прóсо въ предѣ́лѣхъ твои́хъ?
И научи́шися судý Бóга твоегó и возрáдуешися.
И́бо не съ жéстокостiю очищáется чернýха, нижé кóло колесни́чное обы́детъ кими́на, но жезлóмъ истрясáется чернýха, кими́нъ же со хлѣ́бомъ снѣ́стся.
Не во вѣ́къ бо áзъ разгнѣ́ваюся на вы́, нижé глáсъ гнѣ́ва моегó поперéтъ вáсъ.
И сiя́ от Гóспода Саваóѳа изыдóша чудесá: совѣ́туйте, вознеси́те тщéтное утѣшéнiе.
Гóре грáду Арiи́лу, нáньже дави́дъ воевá. Собери́те жи́та от гóда до гóда, снѣ́сте бо вкýпѣ съ Моáвомъ:
озлóблю бо Арiи́ла, и бýдетъ крѣ́пость егó и богáтство мнѣ́:
и обся́ду тя́ áки дави́дъ, и постáвлю о́крестъ тебé острóгъ, и сограждý столпы́.
И смиря́тся словесá твоя́ до земли́, и въ зéмлю вни́дутъ словесá твоя́: и бýдетъ глáсъ твóй áки глася́щихъ от земли́, и ко земли́ изнемóжетъ глáсъ твóй.
И бýдетъ я́ко пéрсть от колесé богáтство нечести́выхъ, и áки прáхъ летя́й мнóжество утѣсня́ющихъ тя́, и бýдетъ áки чертá внезáпу от Гóспода Саваóѳа.
Присѣщéнiе бо бýдетъ со грóмомъ и съ трýсомъ и глáсомъ вели́кимъ, бýря несóма и плáмень óгненный поядáяй.
И бýдетъ áки сóнiе ви́дяй во снѣ́ нóщiю, богáтство всѣ́хъ язы́ковъ, ели́цы воевáша на Арiи́ла, и вси́, и́же воевáша на Иерусали́ма, и вси́ сóбраннiи нáнь и озлобля́ющiи егó.
И бýдутъ áки во снѣ́ ядýщiи и пiю́щiи, и востáвшымъ, тóщь и́хъ сóнъ: и я́коже во снѣ́ жáждай áки пiя́й, воспрянýвъ же ещé жáждетъ, душá же егó вотщé надѣ́яся: тáко бýдетъ богáтство всѣ́хъ язы́ковъ, ели́цы воевáша на гóру Сióню.
Разслабѣ́йте и ужасни́теся, и упíйтеся не Сикéромъ, ни винóмъ,
я́ко напои́ вáсъ Госпóдь дýхомъ умилéнiя, и смежи́тъ óчи и́хъ и прорóковъ и́хъ и князéй и́хъ, ви́дящихъ сокровéнная.
И бýдутъ вáмъ вся́ сiя́ словесá, áки словесá кни́ги запечатлѣ́нныя сея́, ю́же áще дадýтъ человѣ́ку вѣ́дущему писáнiя, глагóлюще: прочти́ сié. И речéтъ: не могý прочести́, запечатлѣ́нна бо.
И дáстся кни́га сiя́ въ рýцѣ человѣ́ку не вѣ́дущему писáнiя, и речéтся емý: прочти́ сié. И речéтъ: не вѣ́мъ писáнiя.
И речé Госпóдь: приближáются мнѣ́ лю́дiе сíи усты́ свои́ми и устнáми свои́ми почитáютъ мя́, сéрдце же и́хъ далéче отстои́тъ от менé: всýе же почитáютъ мя́, учáще зáповѣдемъ человѣ́ческимъ и учéниемъ.
Сегó рáди сé, áзъ приложý, éже пресели́ти лю́ди сiя́, и престáвлю я́, и погублю́ премýдрость премýдрыхъ и рáзумъ разýмныхъ сокры́ю.
Гóре творя́щымъ глубóко совѣ́тъ, а не Гóсподемъ: гóре въ тáйнѣ совѣ́тъ творя́щымъ, и бýдутъ во тмѣ́ дѣлá и́хъ, и рекýтъ: ктó ны ви́дѣ, и ктó ны уразумѣ́етъ, я́же мы́ твори́мъ?
Не я́коже ли брéнiе скудéльника вмѣнитéся? Едá речéтъ здáнiе создáвшему é: не ты́ мя́ создáлъ еси́? или́ творéнiе сотвóршему: не разýмно мя́ сотвори́лъ еси́?
Не ещé ли мáло, и приложи́тся Ливáнъ, áки горá хермéль, и хермéль въ дубрáву вмѣни́тся?
И услы́шатъ въ дéнь óный глусíи словесá кни́ги [сея́], и и́же во тмѣ́ и и́же во мглѣ́ óчи слѣпы́хъ ýзрятъ.
И возрáдуются ни́щiи рáди Гóспода въ весéлiи, и отчáявшiися человѣ́цы испóлнятся весéлiя.
Исчезé беззакóнникъ, и поги́бе гóрдый, и потреби́шася вси́ беззакóннующiи во злóбѣ
и творя́щiи согрѣшáти человѣ́ки во слóвѣ: всѣ́мъ же обличáющымъ во вратѣ́хъ претыкáнiе положáтъ, понéже соврати́ша въ непрáвдахъ прáведнаго.
Сегó рáди тáко глагóлетъ Госпóдь на дóмъ Иáковль, егóже опредѣли́ от Авраáма: не ны́нѣ постыди́тся Иáковъ, нижé ны́нѣ лицé своé измѣни́тъ Изрáиль:
но егдá уви́дятъ чáда и́хъ дѣлá моя́, менé рáди освятя́тъ и́мя моé и освятя́тъ святáго Иáковля, и Бóга Изрáилева убоя́тся.
И уразумѣ́ютъ заблуждáющiи дýхомъ смы́слъ, и рóпщущiи научáтся послýшати, и язы́цы нѣмотствýющiи научáтся глагóлати ми́ръ.
Гóре, чáда отступи́вшая, сiя́ глагóлетъ Госпóдь: сотвори́сте совѣ́тъ не мнóю и завѣ́ты не Дýхомъ мои́мъ, приложи́ти грѣхи́ ко грѣхóмъ:
идýщiи сни́ти во Еги́петъ, менé же не вопроси́ша, éже пóмощь имѣ́ти от фараóна и заступлéнiе от Еги́птянъ.
Бýдетъ бо вáмъ покрóвъ фараóновъ въ постыдѣ́нiе и уповáющымъ на Еги́петъ укори́зна:
я́ко сýть въ тáнѣ старѣ́йшины егó, и вѣ́стницы егó зли́.
Вотщé потрудя́тся людíй рáди, и́же не упóльзуютъ и́хъ, нижé на пóмощь, нижé на пóльзу, но на стýдъ и на укори́зну.
Видѣ́нiе четверонóгихъ, и́же въ пусты́ни. Въ печáли и въ тѣснотѣ́ лéвъ и льви́чищь: оттýду áспиды и плéмя áспидовъ паря́щихъ, и́же везя́ху на ослѣ́хъ и на велблю́дѣхъ богáтство своé ко язы́ку, и́же не помóжетъ и́мъ въ пóмощь, но на стýдъ и укори́зну.
Еги́птяне вотщé и всýе успѣ́ютъ вáмъ: возвѣсти́ и́мъ, я́ко тщéтно утѣшéнiе вáше сié.
Ны́нѣ ýбо сѣ́дъ напиши́ сiя́ на дскѣ́ и въ кни́гу: я́ко бýдутъ сiя́ во дни́ времéнъ и дáже до вѣ́ка.
Я́ко лю́дiе непокори́ви сýть, сы́нове лжи́вiи, и́же не похотѣ́ша слы́шати закóна Бóжiя,
глагóлюще прорóкомъ: не повѣ́дайте нáмъ: и видѣ́нiя ви́дящымъ: не глагóлите нáмъ, но нáмъ глагóлите и возвѣщáйте нáмъ инóе прельщéнiе
и соврати́те нáсъ съ пути́ сегó: отими́те от нáсъ пýть сéй и отими́те от нáсъ сýдъ Изрáилевъ {Евр.: святóе Изрáилево.}.
Тогó рáди си́це глагóлетъ Госпóдь святы́й Изрáилевъ: понéже не покори́стеся словесéмъ си́мъ и надѣ́ястеся на лжý, и я́ко пороптáсте и уповáюще бы́сте на слóво сié,
сегó рáди бýдетъ вáмъ грѣ́хъ сéй, áки стѣнá пáдающая внезáпу грáда твéрда плѣнéна, егóже áбiе настои́тъ падéнiе:
и падéнiе егó бýдетъ я́ко сокрушéнiе сосýда гли́няна, от гли́ны дрóбны, я́ко не мóжно обрѣсти́ въ ни́хъ чрéпа, и́мже óгнь вóзмеши и въ óньже влiéши воды́ мáло.
Тáко глагóлетъ Госпóдь, Госпóдь святы́й Изрáилевъ: егдá возврати́вся воздóхнеши, тогдá спасéшися и уразумѣ́еши, гдѣ́ еси́ бы́лъ: егдá уповáлъ еси́ на сýетная, тщéтна крѣ́пость вáша бы́сть, и не хотѣ́сте послýшати,
но рекóсте: на кóнехъ побѣ́гнемъ. Тогó рáди побѣ́гнете. И рекóсте: на лéгкихъ всáдницы бýдемъ. Тогó рáди лéгцы бýдутъ гоня́щiи вáсъ.
От глáса еди́наго побѣ́гнутъ ты́сяща, и от глáса пяти́ побѣ́гнутъ мнóзи, дóндеже остáвлени бýдете áки щóгла на горѣ́ и я́ко знáмя нося́й на холмѣ́.
И пáки пождéтъ Бóгъ, éже ущéдрити вáсъ, и сегó рáди вознесéтся éже поми́ловати вáсъ: занé судiя́ Госпóдь Бóгъ вáшъ éсть, и гдѣ́ остáвите слáву вáшу? блажéни вси́ пребывáющiи въ нéмъ.
Занé лю́дiе святíи въ Сióнѣ вселя́тся, Иерусали́мъ же плáчемъ восплáкася: поми́луй мя́. Поми́луетъ тя́, егдá узрѣ́ глáсъ вóпля твоегó, послýша тебé.
И дáстъ Госпóдь вáмъ хлѣ́бъ печáли и вóду тѣ́сную, и ктомý не прибли́жатся къ тебѣ́ льстя́щiи тя́: я́ко óчи твои́ ýзрятъ прельщáющихъ тя́,
и ушесá твоя́ услы́шатъ словесá созади́ тебé прельщáющихъ, и́же глагóлютъ: сéй пýть, поиди́мъ по немý или́ на дéсно, или́ на лѣ́во.
И отвéржеши кумíры посрéбренныя, и позлащéнныя раздроби́ши, и развѣ́еши я́ко вóду жены́ мѣ́сячныя, и áки моты́ла отвéржеши я́.
Тогдá бýдетъ дóждь сѣ́мени земли́ твоея́, и хлѣ́бъ жи́та земли́ твоея́ бýдетъ изоби́ленъ и тýченъ, и напасýтся скóти твои́ въ тóй дéнь на мѣ́стѣ тýчнѣ и прострáннѣ.
Юнцы́ вáши и волóве дѣ́лающiи зéмлю наядя́тся плéвъ смѣ́шенныхъ со ячмéнемъ извѣ́янымъ.
И бýдетъ на вся́цѣй горѣ́ высóцѣ и на вся́цѣмъ хóлмѣ вознесéннѣ водá текýщая въ дéнь óный, егдá поги́бнутъ мнóзи, и егдá падýтся столпи́:
и бýдетъ свѣ́тъ луны́ áки свѣ́тъ сóлнца, и свѣ́тъ сóлнечный бýдетъ седмери́цею въ тóй дéнь, егдá исцѣли́тъ Госпóдь сокрушéнiе людíй свои́хъ и болѣ́знь я́звы твоея́ исцѣли́тъ.
Сé, и́мя Госпóдне и́детъ врéменемъ мнóгимъ, горя́щая я́рость егó: со слáвою слóво устéнъ егó, слóво гнѣ́ва пóлно, и гнѣ́въ я́рости я́ко óгнь поя́стъ:
и дýхъ егó áки водá въ дéбри влекýщи прiи́детъ дáже до вы́и и раздѣли́тся, éже смути́ти язы́ки о прельщéнiи сýетнѣмъ, и поженéтъ я́ прéлесть тщá, и вóзметъ я́ предъ лицéмъ и́хъ.
Едá при́сно подобáетъ вáмъ рáдоватися и входи́ти во святáя моя́ всегдá, áки прáзднующымъ и я́ко веселя́щымся вни́ти со сопѣ́лiю въ гóру Госпóдню къ Бóгу Изрáилеву?
И слы́шану сотвори́тъ Госпóдь слáву глáса своегó, и я́рость мы́шцы своея́ показáти, съ я́ростiю и гнѣ́вомъ, и со плáменемъ поядáющимъ возгреми́тъ зѣ́лно, и я́ко водá и грáдъ низходя́щь нýждею.
Глáсомъ бо Госпóднимъ побѣждéни бýдутъ Ассирíане я́звою, éюже áще порази́тъ я́.
И бýдетъ емý о́крестъ, отонýдуже бѣ́ и́хъ надéжда пóмощи, на ню́же тóй уповáше: тíи со тимпáны и гýсльми рáтовати бýдутъ нáнь от премѣнéнiя.
Ты́ бо прéжде днíй истя́занъ бýдеши: едá и тебѣ́ уготóвася цáрствовати? дéбрь глубóкую, древесá лежáща, óгнь и древá мнóга, я́рость Госпóдня áки дéбрь жýпеломъ горя́щая.
Гóре сходя́щымъ во Еги́петъ пóмощи рáди, уповáющымъ на кóни и на колесни́цы: сýть бо мнóга, и кóнническое мнóжество мнóго зѣлó: и не бѣ́ша уповáюще на святáго Изрáилева, и Бóга не взыскáша.
Тóйже премýдрѣ наведé на ни́хъ злáя, и слóво егó не отри́нется, и востáнетъ на дóмы человѣ́ковъ злы́хъ и на надéжду и́хъ тщéтную,
Еги́птянина человѣ́ка, а не Бóга, кóнски плóти, и не бýдетъ пóмощи: Госпóдь же наведéтъ рýку свою́ на ня́, и утрудя́тся помагáющiи, и вси́ вкýпѣ поги́бнутъ.
Занéже тáко речé мнѣ́ Госпóдь: я́коже возревéтъ лéвъ, или́ льви́чищь о лови́твѣ, ю́же и́метъ, и возопiéтъ надъ нéю, дóндеже напóлнятся гóры глáса егó, и побѣди́шася и мнóжества я́рости убоя́шася: тáко Госпóдь Саваóѳъ сни́детъ на гóру Сióню и на гóры егó воевáти.
Я́коже пти́цы паря́щыя, си́це защи́титъ Госпóдь Саваóѳъ о Иерусали́мѣ, защи́титъ и избáвитъ, и снабди́тъ и спасéтъ.
Обрати́теся, совѣщавáющiи глубóкъ совѣ́тъ и беззакóненъ, сы́нове Изрáилевы:
я́ко въ тóй дéнь отвéргутъ человѣ́цы рукотворéнная своя́ срéбряная и рукотворéнная златáя, я́же сотвори́ша рýки и́хъ.
И падéтъ Ассýръ не мечéмъ человѣ́ческимъ, ни мéчь мýжескiй поя́стъ егó, и побѣ́гнетъ не от лицá мечá: ю́ноты же бýдутъ въ побѣждéнiе.
Кáменiемъ бо объи́мутся я́ко острóгомъ и побѣждéни бýдутъ, а бѣжáй плѣнéнъ бýдетъ. Сiя́ глагóлетъ Госпóдь: [блажéнъ,] и́же имѣ́етъ плéмя въ Сióнѣ и ю́жики во Иерусали́мѣ.
Сé бо, Цáрь прáведный воцари́тся, и кня́зи со судóмъ владѣ́ти начнýтъ.
И бýдетъ человѣ́къ сокрывáяй словесá своя́, и скры́ется, áки от воды́ носи́мыя: и яви́тся въ Сióнѣ я́ко рѣкá текýщая слáвная въ земли́ жáждущей.
И ксемý не бýдутъ уповáюще на человѣ́ки, но ýшы вдадя́тъ на слы́шанiе,
и сéрдце изнемóгшихъ вóнметъ послýшати, и язы́цы нѣмотствýющiи скóро научáтся глагóлати ми́ръ:
и ксемý не рекýтъ юрóдивому владѣ́ти, и ксемý не рекýтъ слуги́ твои́: молчи́.
Юрóдъ бо юрóдивая изрѣчéтъ, и сéрдце егó тщéтная уразумѣ́етъ, éже совершáти беззакóнная и глагóлати на Гóспода прéлесть, éже растли́ти дýшы áлчныя и дýшы жáждущыя тщы́ сотвори́ти.
Совѣ́тъ бо злы́хъ беззакóнная совѣщавáетъ, растли́ти смирéнныя словесы́ непрáведными и разсы́пати словесá смирéнныхъ на судѣ́.
Благочести́вiи же смы́сленнѣ совѣщáша, и тóй совѣ́тъ пребýдетъ.
Жены́ богáтыя, востáните и услы́шите глáсъ мóй: дщéри, съ надéждею слы́шите словесá моя́:
дня́ лѣ́тняго пáмять сотвори́те въ болѣ́зни съ надéждею: потреби́ся объимáнiе ви́нное, престá сѣ́янiе, и [собирáнiе] ктомý не прiи́детъ.
Ужасни́теся, сжáлитеся, уповáвшыя, совлецы́теся, нáги бýдите, препоя́шите чрéсла своя́ во врéтища
и въ пéрси бíйтеся о селѣ́ желáемѣмъ и о виногрáднѣмъ рождéнiи.
На земли́ людíй мои́хъ тéрнiе и бы́лiе возни́кнетъ, и от всегó дóму рáдость восхи́тится: грáдъ богáтъ,
дóмове остáвленнiи, богáтство грáда и дóмы вожделѣ́нiя остáвятъ: и бýдутъ вéси пещéры до вѣ́ка, рáдость ослóмъ ди́вiимъ, пáствы пастухóвъ:
дóндеже нáйдетъ на ны́ Дýхъ от вы́шняго, и бýдетъ пусты́ня въ хермéль, а хермéль въ дубрáву вмѣни́тся.
И почíетъ въ пусты́ни сýдъ, и прáвда въ карми́лѣ всели́тся:
и бýдутъ дѣлá прáвды ми́ръ, и одержи́тъ прáвда покóй, и уповáюще бýдутъ до вѣ́ка:
и вселя́тся лю́дiе егó во грáдѣ ми́ра и обитáти бýдутъ уповáюще, и почíютъ съ богáтствомъ.
Грáдъ же, áще сни́детъ, тó не на вы́ прiи́детъ: и бýдутъ живýщiи въ дубрáвахъ уповáюще, я́коже сýщiи на поля́хъ.
Блажéни сѣ́ющiи при вся́цѣй водѣ́, идѣ́же вóлъ и осéлъ попирáетъ.
Гóре оби́дящымъ вáсъ! вáсъ никтóже изоби́дитъ, и отвергáяй вáсъ не отвéржетъ: плѣнéни бýдутъ отметáющiи [вáсъ] и предадя́тся, и я́ко мóлiе въ ри́зѣ, тáко побѣждéни бýдутъ.
Гóсподи, поми́луй ны́, на тя́ бо уповáхомъ: бы́сть плéмя непокаря́ющихся въ пáгубу, спасéнiе же нáше во врéмя печáли.
Глáсомъ стрáха твоегó ужасóшася лю́дiе от стрáха твоегó, и разсѣ́яшася язы́цы.
Ны́нѣ же соберýтся коры́сти вáшя мáлаго и вели́каго: я́коже áще ктó соберéтъ прýги, тáко наругáются вáмъ.
Святъ Бóгъ живы́й въ вы́шнихъ, напóлнися Сióнъ судá и прáвды.
Въ закóнѣ предадя́тся, въ сокрóвищихъ спасéнiе нáше, тáмо премýдрость и хи́трость и благочéстiе ко Гóсподеви: сiя́ сýть сокрóвища прáвды.
Сé, ны́нѣ во стрáсѣ вáшемъ тíи убоя́тся: и́хже боя́стеся, возопiю́тъ от вáсъ: вѣ́стницы бо пóслани бýдутъ гóрцѣ плáчущеся, прося́ще ми́ра.
Опустѣ́ютъ бо си́хъ путié: престá стрáхъ язы́ковъ, и завѣ́тъ и́же къ ни́мъ взéмлется, и не вмѣнитé и́хъ въ человѣ́ки.
Восплáкася земля́, посрáмленъ Ливáнъ, блáто бы́сть Сáронь: явлéна бýдетъ Галилéа и хермéль.
Ны́нѣ воскрéсну, глагóлетъ Госпóдь, ны́нѣ прослáвлюся, ны́нѣ вознесýся.
Ны́нѣ ýзрите, ны́нѣ ощутитé, тщéтна бýдетъ крѣ́пость дýха вáшего: óгнь вы́ поя́стъ.
И бýдутъ язы́цы пожжéни, áки тéрнiе на ни́вѣ размéтано и пожжéно.
Услы́шатъ дáльнiи, я́же сотвори́хъ, [глагóлетъ Госпóдь,] увѣ́дятъ приближáющiися крѣ́пость мою́.
Отступи́ша, и́же въ Сióнѣ, беззакóнницы, прiи́метъ трéпетъ нечести́выя: ктó возвѣсти́тъ вáмъ, я́ко óгнь гори́тъ? ктó возвѣсти́тъ вáмъ мѣ́сто вѣ́чное?
Ходя́й въ прáвдѣ, глагóляй прáвый пýть, ненави́дяй беззакóнiя и непрáвды и рýцѣ оттрясáяй от дарóвъ: отягчавáяй ýшы, да не услы́шитъ судá крóве: смежáяй óчи, да не ýзритъ непрáвды,
сéй всели́тся во высóцѣ пещéрѣ кáмене крѣ́пкаго: хлѣ́бъ емý дáстся, и водá егó вѣ́рна.
Царя́ со слáвою ýзрите, и óчи вáши ýзрятъ зéмлю издалéча,
душá вáша поучи́тся стрáху Госпóдню: гдѣ́ сýть книгóчiи? гдѣ́ сýть совѣщавáющiи? гдѣ́ éсть исчитáяй питáемыя мáлы и вели́ки лю́ди?
И́мже не совѣщáше, нижé вѣ́дяше глубóкiй глáсъ имýщаго, я́ко не слы́шати лю́демъ уничтожéнымъ, и нѣ́сть слы́шащему смы́сла.
Сé, Сióнъ грáдъ, спасéнiе нáше, óчи твои́ ýзрятъ, Иерусали́ме, грáде богáтый, кýщы не поколéблются, нижé подви́гнутся кóлiе хрáмины егó въ вѣ́чное врéмя, и ýжя егó не претóргнутся.
Я́ко и́мя Госпóдне вели́ко вáмъ éсть, мѣ́сто вáмъ бýдетъ, рѣ́ки и ровéнницы ширóцы и прострáнни: не пóйдеши по семý пути́, нижé пóйдетъ корáбль пловýщь:
Бóгъ бо мóй вели́къ éсть: не минéтъ менé Госпóдь судiя́ нáшъ, Госпóдь кня́зь нáшъ, Госпóдь Цáрь нáшъ, Госпóдь тóй нáсъ спасéтъ.
Прервáшася ýжя твоя́, я́ко не укрѣпи́шася: щóгла твоя́ преклони́ся, не распýститъ вѣ́трилъ, не воздви́гнетъ знáменiя, дóндеже предáстся на плѣнéнiе: тѣ́мже мнóзи хромíи плѣ́нъ сотворя́тъ,
и не рекýтъ: труждáемся, лю́дiе живýщiи въ ни́хъ, остáвися бо и́мъ грѣ́хъ.
Приступи́те, язы́цы, и услы́шите, кня́зи: да слы́шитъ земля́ и живýщiи на нéй, вселéнная и лю́дiе, и́же на нéй.
Занé я́рость Госпóдня на вся́ язы́ки и гнѣ́въ на числó и́хъ, éже погуби́ти и́хъ и предáти я́ на заклáнiе.
И я́звенiи и́хъ повéргнутся и мертвецы́, и взы́детъ и́хъ смрáдъ, и намóкнутъ гóры крóвiю и́хъ:
и истáютъ вся́ си́лы небéсныя, и свiéтся нéбо áки сви́токъ, и вся́ звѣ́зды спадýтъ я́ко ли́ствiе съ лозы́, и я́коже спáдаетъ ли́ствiе смокóвницы.
Упи́ся мéчь мóй на небеси́: сé, на Идумéю сни́детъ и на лю́ди пáгубныя съ судóмъ.
Мéчь Госпóдень напóлнися крóве, растолстѣ́ тýкомъ, от крóве козлóвъ и áгнцевъ и от тýка козлóвъ и овнóвъ: я́ко жéртва Гóсподеви въ Восóрѣ, и заклáнiе вéлiе во Идумéи.
И падýтъ съ ни́ми си́льнiи, и овны́ и юнцы́, и упiéтся земля́ от крóве и от тýка и́хъ насы́тится:
дéнь бо судá Госпóдня, и лѣ́то воздая́нiя судá Сióня.
И обратя́тся дéбри егó въ смолý, и земля́ егó въ жýпелъ,
и бýдетъ земля́ егó горя́щи я́ко смолá днéмъ и нóщiю, и не угáснетъ въ вѣ́чное врéмя, и взы́детъ ды́мъ ея́ высóцѣ, въ рóды своя́ опустѣ́етъ.
И во врéмя мнóго пти́цы и éжеве, совы́ и врáнове возгнѣздя́тся въ нéмъ: и возложáтъ нáнь ýже землемѣ́рно пусты́ни, и онокентáври вселя́тся въ нéмъ.
Кня́зи егó не бýдутъ: цáрiе бо и вельмóжи егó бýдутъ въ пáгубу.
И возни́кнутъ во градѣ́хъ и́хъ тернóвая древесá и во тверды́нехъ егó, и бýдутъ селéнiя Си́риномъ сели́ща струѳióномъ:
и сря́щутся бѣ́си со онокентáвры и возопiю́тъ дрýгъ ко дрýгу, тý почíютъ онокентáври, обрѣ́тше себѣ́ покóища:
тáмо возгнѣзди́тся éжь, и сохрани́тъ земля́ дѣ́ти егó со утверждéнiемъ: тáмо елéни срѣтóшася и уви́дѣша ли́ца дрýгъ дрýга.
Числóмъ преидóша, и еди́нъ от ни́хъ не поги́бе, дрýгъ дрýга не взыскá, я́ко Госпóдь заповѣ́да и́мъ, и Дýхъ егó собрá я́.
И тóй вéржетъ и́мъ жрéбiя, и рукá егó раздѣли́ пасти́ся: въ вѣ́чное врéмя наслѣ́дите, въ рóды родóвъ почíютъ въ нéмъ.
Рáдуйся, пусты́ня жáждущая, да весели́тся пусты́ня и да цвѣтéтъ я́ко кри́нъ.
И процвѣтéтъ и возвесели́тся пусты́ня Иордáнова: и слáва Ливáнова дадéся éй, и чéсть карми́лова, и ýзрятъ лю́дiе мои́ слáву Госпóдню и высотý Бóжiю.
Укрѣпи́теся, рýцѣ ослáбленыя и колѣ́на разслáбленая:
утѣ́шитеся, малодýшнiи умóмъ, укрѣпи́теся, не бóйтеся: сé, Бóгъ нáшъ сýдъ воздаéтъ и воздáстъ, тóй прiи́детъ и спасéтъ нáсъ.
Тогдá отвéрзутся óчи слѣпы́хъ, и ýши глухи́хъ услы́шатъ.
Тогдá скóчитъ хромы́й я́ко елéнь, и я́сенъ бýдетъ язы́къ гугни́выхъ: я́ко протóржеся водá въ пусты́ни и дéбрь въ земли́ жáждущей.
И безвóдная бýдетъ во езéра, и на жáждущей земли́ истóчникъ водны́й бýдетъ: тáмо бýдетъ весéлiе пти́цамъ, и сели́тва трóсти, и лýзи.
И тáмо бýдетъ пýть чи́стъ, и пýть свя́тъ нарѣчéтся: и не прéйдетъ тáмо нечи́стый, нижé бýдетъ тáмо пýть нечи́стъ: разсѣ́яннiи же пóйдутъ по немý и не заблýдятъ.
И не бýдетъ тáмо львá, ни от звѣрéй злы́хъ не взы́детъ нáнь, нижé обря́щется тáмо, но пóйдутъ по немý избáвленнiи:
и сóбраннiи Гóсподемъ обратя́тся и прiи́дутъ въ Сióнъ съ рáдостiю, и рáдость вѣ́чная надъ главóю и́хъ: надъ главóю бо и́хъ хвалá и весéлiе, и рáдость прiи́метъ я́, отбѣжé болѣ́знь и печáль и воздыхáнiе.
И бы́сть во четвертоенáдесять лѣ́то цáрствующу езекíи, взы́де сеннахири́мъ цáрь Ассирíйскъ на грáды твéрды иудéйски и взя́ о́ныя.
И послá цáрь Ассирíйскъ рапсáка от лахи́са во Иерусали́мъ ко царю́ езекíи съ си́лою вели́кою, и стá у водовáжды купѣ́ли вы́шнiя на пути́ селá кнафéова {бѣли́лнича}.
И изы́де къ немý Елiаки́мъ сы́нъ хелкíевъ домострои́тель, и сомнáсъ книгóчiй, и Иоáхъ сы́нъ Асáфовъ памятопи́сецъ.
И речé и́мъ рапсáкъ: рцы́те езекíи: сiя́ глагóлетъ цáрь вели́кiй, цáрь Ассирíйскъ: на чтó уповáеши?
едá совѣ́томъ и словесы́ ýстными би́тва бывáетъ? и ны́нѣ на когó уповáеши, я́ко не покаря́ешися мнѣ́?
сé, уповáеши на жéзлъ трóстянъ сокрушéнный сéй, на Еги́петъ, на негóже áще опрéтся мýжъ, вни́детъ въ рýку егó и прободéтъ ю́: тáко éсть фараóнъ цáрь Еги́петскiй, и вси́ уповáющiи на негó:
áще же глагóлете, на Гóспода Бóга нáшего уповáемъ: не сéй ли éсть, егóже разори́ езекíа высóкая и трéбища егó, и заповѣ́да Иýдѣ и Иерусали́му: предъ олтарéмъ си́мъ поклони́теся?
ны́нѣ соедини́теся господи́ну моемý царю́ Ассирíйску, и дáмъ вáмъ двѣ́ ты́сящы кóней, áще мóжете дáти всѣдáющыя на ни́хъ:
и кáко мóжете отврати́ти лицé воевóды еди́наго? раби́ сýть, и́же уповáютъ на Еги́птянъ, на кóней и всáдниковъ:
и ны́нѣ едá безъ Гóспода прiидóхомъ на странý сiю́, воевáти на ню́? Госпóдь речé ко мнѣ́: взы́ди на зéмлю сiю́ и погуби́ ю́.
И речé къ немý Елiаки́мъ и сомнáсъ книгóчiй и Иоáхъ: глагóли къ рабóмъ твои́мъ Си́рски, разумѣ́емъ бо мы́, а не глагóли къ нáмъ Иудéйски: и вскýю глагóлеши во ýшы человѣ́комъ сѣдя́щымъ на стѣнѣ́?
И речé къ ни́мъ рапсáкъ: едá ко господи́ну вáшему, или́ къ вáмъ послá мя господи́нъ мóй глагóлати словесá сiя́? не къ человѣ́комъ ли сѣдя́щымъ на огрáдѣ, да ядя́тъ моты́ла и пiю́тъ мóчь съ вáми вкýпѣ?
И стá рапсáкъ, и возопи́ глáсомъ вéлiимъ Иудéйски и речé: слы́шите словесá царя́ вели́каго, царя́ Ассирíйска:
сiя́ глагóлетъ цáрь: да не прельщáетъ вáсъ езекíа словесы́, не мóжетъ избáвити вáсъ:
и да не глагóлетъ вáмъ езекíа, я́ко избáвитъ вы́ Бóгъ, и не предáстся грáдъ сéй въ рýцѣ царя́ Ассирíйска:
не слýшайте езекíи: сiя́ глагóлетъ цáрь Ассирíйскiй: áще хóщете благословéни бы́ти, изыди́те ко мнѣ́ и яди́те кíйждо виногрáдъ свóй и смóкви, и пíйте от потóка вáшего,
дóндеже прiидý и поимý вы́ въ зéмлю, я́же áки вáша земля́, земля́ пшени́цы и винá и хлѣ́бовъ и виногрáдовъ:
да не прельщáетъ вáсъ езекíа, глагóля: Бóгъ вáшъ избáвитъ вы́: едá избáвиша бóзи язы́честiи, кíйждо странý свою́ от руки́ царя́ Ассирíйска?
гдѣ́ éсть бóгъ Емáѳовъ и Арфáѳовъ? и гдѣ́ бóгъ грáда Сепфари́ма? едá возмогóша избáвити самарíю от руки́ моея́?
ктó от богóвъ всѣ́хъ язы́ковъ си́хъ, и́же избáви зéмлю свою́ от руки́ моея́, я́ко избáвитъ Бóгъ Иерусали́ма от руки́ моея́?
И умолкóша, и никтóже отвѣщá емý словесé, повелѣ́нiя рáди царéва, да никтóже отвѣщáетъ.
И вни́де Елiаки́мъ сы́нъ хелкíевъ домострои́тель, и сомнáсъ книгóчiй си́лы, и Иоáхъ сы́нъ Асáфовъ памятопи́сецъ ко езекíи въ растéрзаныхъ ри́захъ и повѣ́даша емý словесá рапсáкова.
И бы́сть егдá услы́ша цáрь езекíа, растерзá ри́зы и облечéся во врéтище и вни́де во хрáмъ Госпóдень:
и послá Елiаки́ма домострои́теля, и сóмну книгóчiя, и старѣ́йшины жрéчески оболчéны во врéтища ко Исáiи прорóку сы́ну Амóсову.
И рекóша емý: сiя́ глагóлетъ езекíа: дéнь печáли и укори́зны и обличéнiя и гнѣ́ва днéшнiй дéнь, понéже прiи́де болѣ́знь раждáющей, крѣ́пости же не имѣ́етъ роди́ти:
да услы́шитъ Госпóдь Бóгъ твóй словесá рапсáкова, я́же послá цáрь Ассирíйскiй, господи́нъ егó, укаря́ти Бóга живáго и поноси́ти словесы́, я́же слы́ша Госпóдь Бóгъ твóй, и да помóлишися ко Гóсподеви Бóгу твоемý о остáвшихся си́хъ.
И прiидóша óтроцы царя́ езекíи ко Исáiи.
И речé и́мъ Исáiа: си́це рцы́те ко господи́ну вáшему: сiя́ глагóлетъ Госпóдь: не убóйся от словéсъ, я́же еси́ слы́шалъ, и́миже укори́ша мя́ послы́ царя́ Ассирíйска:
сé, áзъ вложý въ негó дýхъ, и услы́шавъ вѣ́сть возврати́тся во странý свою́ и падéтъ мечéмъ на своéй земли́.
И возврати́ся рапсáкъ и обрѣ́те царя́ Ассирíйскаго облежáща ловнý: и услы́ша цáрь Ассирíйскъ, я́ко отъи́де от лахи́са,
и изы́де Ѳаракá цáрь еѳióпскiй воевáти нáнь: и услы́шавъ возврати́ся и послá послы́ ко езекíи, глагóля:
си́це рцы́те езекíи царю́ Иудéйску: да не прельщáетъ Бóгъ твóй тебé, на негóже уповáя еси́, глагóля, я́ко не предáстся Иерусали́мъ въ рýцѣ царя́ Ассирíйска:
или́ не слы́шалъ еси́ ты́, чтó сотвори́ша цáрiе Ассирíйстiи, кáко всю́ зéмлю погуби́ша, и ты́ ли избáвишися?
едá избáвиша си́хъ бóзи язы́честiи, и́хже погуби́ша отцы́ мои́, гозáнъ и Харрáнъ и расéмъ, и́же сýть во странѣ́ Ѳеемáѳи?
гдѣ́ сýть цáрiе Емáѳовы, и гдѣ́ Арфáѳовы, и гдѣ́ грáда епфаруéма, Анагугáна?
И взя́ езекíа кни́гу от послóвъ и прочтé ю́, и вни́де во хрáмъ Госпóдень и отвéрзе ю́ предъ Гóсподемъ.
И помоли́ся езекíа ко Гóсподеви, глагóля:
Гóсподи Саваóѳъ, Бóже Изрáилевъ, сѣдя́й на херуви́мѣхъ, ты́ еси́ Бóгъ еди́нъ Цáрь вся́каго цáрства вселéнныя, ты́ сотвори́лъ еси́ нéбо и зéмлю:
приклони́, Гóсподи, ýхо твоé, услы́ши, Гóсподи, отвéрзи, Гóсподи, óчи твои́, при́зри, Гóсподи, и ви́ждь и слы́ши вся́ словесá сеннахири́мля, я́же послá укаря́ти Бóга живáго:
пои́стиннѣ бо, Гóсподи, пýсту сотвори́ша цáрiе Ассирíйстiи всю́ зéмлю и страны́ и́хъ,
и ввергóша кумíры и́хъ во óгнь, не бѣ́ша бо бóзи, но дѣлá рýкъ человѣ́ческихъ, древá и кáменiе, и погуби́ша я́:
ны́нѣ же, Гóсподи Бóже нáшъ, спаси́ ны от руки́ и́хъ, да увѣ́дятъ вся́ цáрствiя земнáя, я́ко ты́ еси́ [Госпóдь] Бóгъ еди́нъ.
И пóсланъ бы́сть Исáiа сы́нъ Амóсовъ ко езекíи и речé емý: сiя́ глагóлетъ Госпóдь Бóгъ Изрáилевъ: слы́шахъ, о ни́хже моли́лся еси́ ко мнѣ́ о сеннахири́мѣ цари́ Ассирíйстѣмъ.
Сié слóво, éже глагóла о нéмъ Бóгъ: похýли тя́ и поругáся тебѣ́ дѣви́ца дщи́ Сióня, на тя́ главóю покивá дщи́ Иерусали́мля:
когó укори́лъ и разгнѣ́валъ еси́? или́ къ комý возвы́силъ еси́ глáсъ твóй, и не воздви́глъ еси́ на высотý очéсъ твои́хъ? ко святóму Изрáилеву!
я́ко послáми укори́лъ еси́ Гóспода, ты́ бо рéклъ еси́: мнóжествомъ колесни́цъ áзъ взыдóхъ на высотý гóръ и на послѣ́дняя Ливáна, и посѣкóхъ высотý кéдра егó и добрóту кипари́сову, и внидóхъ въ высотý чáсти дубрáвныя
и положи́хъ мóстъ, и опустоши́хъ вóды и всé собрáнiе воднóе:
не слы́шалъ ли еси́ издрéвле си́хъ, я́же áзъ сотвори́хъ? от дрéвнихъ днíй совѣщáхъ, ны́нѣ же показáхъ опустоши́ти язы́ки въ тверды́нехъ и живýщыя во твéрдыхъ градѣ́хъ:
опусти́хъ рýцѣ, и изсхóша и бы́ша áки сýхо сѣ́но на крóвѣхъ и áки трóскотъ:
ны́нѣ же покóй твóй и исхóдъ твóй и вхóдъ твóй áзъ вѣ́мъ,
я́рость же твоя́, éюже разгнѣ́вался еси́, и огорчéнiе твоé взы́де ко мнѣ́, и вложý броздý въ нóздри твоя́ и уздý во устá твоя́, и возвращý тя путéмъ, и́мже еси́ пришéлъ.
Сié же тебѣ́ знáменiе: я́ждь сегó лѣ́та, éже еси́ всѣ́ялъ, а во вторóе лѣ́то, éже от себé растéтъ: а въ трéтiе насѣ́явше пóжнете и насадитé виногрáды и снѣ́сте плоды́ и́хъ:
и бýдутъ остáвшiи во Иудéи, прорастя́тъ корéнiе дóлу и сотворя́тъ въ вéрхъ плóдъ,
я́ко от Иерусали́ма бýдутъ остáвшiися и спáсшiися от горы́ Сióни: рéвность Гóспода Саваóѳа сотвори́тъ сiя́.
Сегó рáди тáко глагóлетъ Госпóдь на царя́ Ассирíйска: не вни́детъ въ сéй грáдъ, нижé пýститъ нáнь стрѣлý, нижé возложи́тъ нáнь щитá, нижé огради́тъ о́крестъ егó ограждéнiя:
но путéмъ, и́мже прiи́де, тѣ́мже возврати́тся, и во грáдъ сéй не вни́детъ. Сiя́ глагóлетъ Госпóдь:
защищý грáдъ сéй, éже спасти́ егó менé рáди и рáди дави́да рабá моегó.
И изы́де áнгелъ Госпóдень и изби́ от полкá Ассирíйска стó óсмьдесятъ пя́ть ты́сящъ. И востáвше заýтра, обрѣтóша вся́ тѣлесá мéртва.
И отъи́де возврáщься сеннахири́мъ цáрь Ассирíйскiй и всели́ся во Ниневíи.
И внегдá покланя́тися емý въ домý насарáху отечествоначáлнику своемý, Адрамелéхъ и сарасáръ сы́нове егó уби́ста егó мечьми́, сáми же убѣжáста во Армéнiю. И воцари́ся Асордáнъ сы́нъ егó вмѣ́сто егó.
Бы́сть же въ тó врéмя, разболѣ́ся езекíа до смéрти. И прiи́де къ немý Исáiа прорóкъ сы́нъ Амóсовъ и речé къ немý: сiя́ глагóлетъ Госпóдь: устрóй о дóмѣ твоéмъ, умирáеши бо ты́ и не бýдеши жи́въ.
И обрати́ езекíа лицé своé ко стѣнѣ́ и помоли́ся ко Гóсподеви глагóля:
помяни́, Госпóдь, кáко ходи́хъ предъ тобóю со и́стиною и сéрдцемъ и́стиннымъ, и угóдная предъ тобóю сотвори́хъ. И плáкася езекíа плáчемъ вели́кимъ.
И бы́сть слóво Госпóдне ко Исáiи глагóля:
иди́ и рцы́ езекíи: тáко глагóлетъ Госпóдь Бóгъ дави́да отцá твоегó: услы́шахъ моли́тву твою́ и ви́дѣхъ слéзы твоя́, сé, прилагáю къ лѣ́томъ твои́мъ лѣ́тъ пятьнáдесять,
и от руки́ царя́ Ассирíйска избáвлю тя́ и грáдъ сéй, и защищý о грáдѣ сéмъ:
сié же тебѣ́ знáменiе от Гóспода, я́ко Бóгъ сотвори́тъ глагóлъ сéй, я́коже глагóла:
сé, áзъ возвращý сѣ́нь степéней, и́миже сни́де сóлнце дéсять степéней дóму отцá твоегó, возвращý сóлнце дéсять степéней, и́миже сни́де сѣ́нь. И взы́де сóлнце дéсять степéней, и́миже сни́де сѣ́нь.
Моли́тва езекíи царя́ Иудéйска, егдá болѣ́ и востá от недýга своегó.
А́зъ рекóхъ въ высотѣ́ днíй мои́хъ: пойдý во вратá áдова, остáвлю лѣ́та прóчая.
Рекóхъ: ктомý не узрю́ спасéнiя Бóжiя на земли́ живы́хъ, ктомý не узрю́ спасéнiя Изрáилева на земли́, ктомý не узрю́ человѣ́ка со живýщими:
остáхъ от сродствá моегó, остáвихъ прóчее животá моегó, изы́де и отъи́де от менé áки разрушáяй кýщу поткнýвый: áки платнó дýхъ мóй во мнѣ́ бы́сть, ткáтелницѣ приближáющейся отрѣ́зати.
Въ тóй дéнь прéданъ бы́хъ до заýтра áки львý, тáко сокруши́ вся́ кóсти моя́: от днé бо до нóщи прéданъ бы́хъ.
Я́ко лáстовица, тáко возопiю́, и я́ко гóлубь, тáко поучýся: исчезóстѣ бо óчи мои́, éже взирáти на высотý небéсную ко Гóсподу, и́же избáви мя́ и отъя́ болѣ́знь души́ моея́:
и тóй сотвори́ путевóдство во вся́ лѣ́та моя́.
Гóсподи, о тóй бо возвѣсти́ся тебѣ́, и воздви́глъ еси́ дыхáнiе моé, и утѣ́шився ожи́хъ.
Избáвилъ бо еси́ дýшу мою́, да не поги́бнетъ, и завéрглъ еси́ за мя́ вся́ грѣхи́ моя́.
Не похвáлятъ бо тебé, и́же во áдѣ, ни умéршiи возблагословя́тъ тя́, и не надѣ́ются, и́же во áдѣ, ми́лости твоея́.
Живíи же возблагословя́тъ тя́, я́коже и áзъ: отднéсь бо дѣ́ти сотворю́, я́же возвѣстя́тъ прáвду твою́,
Гóсподи спасéнiя моегó: и не престáну благословя́ тя съ пѣ́снiю вся́ дни́ животá моегó пря́мо дóму Бóжiю.
И речé Исáiа ко езекíи: возми́ от смóквiй и сотри́, и приложи́ плáстырь на я́зву и здрáвъ бýдеши.
И речé езекíа: сié знáменiе, я́ко взы́ду въ дóмъ Бóжiй.
Въ тó врéмя послá меродáхъ Валадáнъ сы́нъ Валадáновъ, цáрь Вавилóнскiй, писáнiя и послы́ и дáры езекíи: слы́ша бо, я́ко болѣ́лъ éсть до смéрти и востá.
И обрáдовася о ни́хъ езекíа рáдостiю вели́кою, и показá и́мъ дóмъ аромáтовъ и ми́ра, и стáкти и ѳимiáма, и сребрá и злáта, и вся́ дóмы сосýдовъ сокрóвищныхъ, и вся́ ели́ка бя́ху во сокрóвищихъ егó: и не остá ничтóже, егóже не показá и́мъ езекíа въ домý своéмъ и во всéй о́бласти своéй.
И прiи́де Исáiа прорóкъ ко езекíи царю́ и речé къ немý: чтó глагóлютъ сíи мýжiе, и откýду прiидóша къ тебѣ́? И речé езекíа: от земли́ далéкiя прiидóша ко мнѣ́, от Вавилóна.
И речé Исáiа: чтó ви́дѣша въ домý твоéмъ? И речé езекíа: вся́, ели́ка въ домý моéмъ, ви́дѣша, и нѣ́сть въ домý моéмъ, егóже бы не ви́дѣли, но и я́же въ сокрóвищихъ мои́хъ.
И речé емý Исáiа: послýшай словесé Гóспода Саваóѳа:
сé, днíе грядýтъ, глагóлетъ Госпóдь, и вóзмутъ вся́, я́же въ домý твоéмъ, и ели́ка собрáша отцы́ твои́ дáже до днé сегó, въ Вавилóнъ прéйдутъ, и ничесóже остáвятъ:
речé Госпóдь, я́ко и от чáдъ твои́хъ, и́хже роди́лъ еси́, пóймутъ и сотворя́тъ кáженики въ домý царя́ Вавилóнска.
И речé езекíа ко Исáiи: благо слóво Госпóдне, éже глагóла: да бýдетъ ны́нѣ ми́ръ и прáвда во дни́ моя́.
Утѣшáйте, утѣшáйте лю́ди моя́, глагóлетъ Бóгъ:
свящéнницы, глагóлите въ сéрдце Иерусали́му, утѣшáйте и́, я́ко напóлнися смирéнiе егó, разрѣши́ся грѣ́хъ егó, я́ко прiя́тъ от рýки Госпóдни сугýбы грѣхи́ своя́.
Глáсъ вопiю́щаго въ пусты́ни: уготóвайте пýть Госпóдень, прáвы сотвори́те стези́ Бóга нáшего:
вся́ка дéбрь напóлнится, и вся́ка горá и хóлмъ смири́тся, и бýдутъ вся́ стрóпотная въ прáво, и óстрая въ пути́ глáдки.
И яви́тся слáва Госпóдня, и ýзритъ вся́ка плóть спасéнiе Бóжiе, я́ко Госпóдь глагóла.
Глáсъ вопiю́щаго: возопíй. И рекóхъ: чтó возопiю́? вся́ка плóть сѣ́но, и вся́ка слáва человѣ́ча я́ко цвѣ́тъ травны́й:
и́зсше травá, и цвѣ́тъ отпадé,
глагóлъ же Бóга нáшего пребывáетъ во вѣ́ки.
На гóру высóку взы́ди, благовѣствýяй Сióну, возвы́си крѣ́постiю глáсъ твóй, благовѣствýяй Иерусали́му: возвы́сите, не бóйтеся. Рцы́ градóмъ Иýдинымъ:
сé, Бóгъ вáшъ, сé, Госпóдь, Госпóдь со крѣ́постiю и́детъ, и мы́шца егó со влáстiю: сé, мздá егó съ ни́мъ, и дѣ́ло егó предъ ни́мъ:
áки пáстырь упасéтъ пáству свою́, и мы́шцею своéю соберéтъ áгнцы, и имýщыя во утрóбѣ утѣ́шитъ.
Ктó измѣ́ри гóрстiю вóду и нéбо пя́дiю и всю́ зéмлю гóрстiю? ктó постáви гóры въ мѣ́рилѣ и хóлмы въ вѣ́сѣ?
ктó уразумѣ́ ýмъ Госпóдень, и ктó совѣ́тникъ емý бы́сть, и́же научáетъ егó?
или́ съ ки́мъ совѣ́това, и настáви и́? или́ ктó показá емý сýдъ? или́ пýть разумѣ́нiя ктó показá емý? или́ ктó прéжде дадé емý, и воздáстся емý?
А́ще вси́ язы́цы, áки кáпля от кáди, и я́ко претяжéнiе вѣ́са вмѣни́шася, и áки плюновéнiе вмѣня́тся?
Дубрáва же Ливáнова не довóлна на сожжéнiе, и вся́ четверонóгая не довóлна на всесожжéнiе.
И вси́ язы́цы я́ко ничтóже сýть, и въ ничтóже вмѣни́шася.
Комý уподóбисте Гóспода, и кóему подóбiю уподóбисте егó?
Едá о́бразъ сотвори́ древодѣ́латель, или́ злáтарь слiя́въ злáто позлати́ егó, или́ подóбiемъ сотвори́ егó?
Дрéво бо негнiю́щее избирáетъ древодѣ́латель и мýдрѣ и́щетъ, кáко постáвитъ о́бразъ егó, и да не поколéблется.
Не разумѣ́сте ли, не слы́шасте ли, не возвѣсти́ся ли вáмъ испéрва? не разумѣ́сте ли основáнiя земли́?
Содержáй крýгъ земли́, и живýщiи на нéй áки прýзи: постáвивый нéбо я́ко камáру и простéръ é, я́ко ски́нiю обитáти:
дая́й кня́зи áки ничтóже владѣ́ти, и зéмлю áки ничтóже сотвори́.
Не насадя́тъ бо, нижé насѣ́ютъ, и не вкорени́тся въ земли́ корéнiе и́хъ: дхнý на ни́хъ вѣ́тръ, и изсхóша, и бýря áки стéблiе вóзметъ и́хъ.
Ны́нѣ ýбо комý мя уподóбисте, и вознесýся? речé святы́й.
Воззри́те на высотý очи́ма вáшима и ви́дите, ктó сотвори́ сiя́ вся́: нося́й по числý ýтварь свою́, и вся́ по и́мени прозовéтъ от мнóгiя слáвы и въ держáвѣ крѣ́пости своея́: ничтóже утаи́ся от тебé.
Едá бо речéши, Иáкове, и чтó глагóлалъ еси́, Изрáилю: утаи́ся пýть мóй от Бóга, и Бóгъ мóй сýдъ отъя́, и отступи́?
И ны́нѣ не уразумѣ́лъ ли еси́? ни ли́ слы́шалъ еси́? Бóгъ вѣ́чный, Бóгъ устрóивый концы́ земли́, не взáлчетъ, нижé утруди́тся, нижé éсть изобрѣ́тенiе премýдрости егó,
дая́й áлчущымъ крѣ́пость и неболѣ́зненнымъ печáль.
Взáлчутъ бо юнѣ́йшiи, и утрудя́тся ю́ноты, и избрáннiи не крѣ́пцы бýдутъ:
терпя́щiи же Гóспода измѣня́тъ крѣ́пость, окрылáтѣютъ áки орли́, потекýтъ и не утрудя́тся, пóйдутъ и не взáлчутъ.
Обновля́йтеся ко мнѣ́, óстрови, кня́зи бо измѣня́тъ крѣ́пость: да прибли́жатся и да глагóлютъ вкýпѣ, тогдá сýдъ да возвѣщáютъ.
Ктó возстáви от востóкъ прáвду, призвá ю́ къ ногáмъ свои́мъ, и пóйдетъ? дáстъ предъ язы́ки, и цари́ ужаси́тъ: и повéржетъ на зéмлю мечы́ и́хъ, и áки стéблiе отвéржени лýцы и́хъ,
и проженéтъ я́, и прóйдетъ съ ми́ромъ пýть нóгъ егó.
Ктó содѣ́ла и сотвори́ сiя́? призвá ю́ призывáяй ю́ от начáла родóвъ. А́зъ Бóгъ пéрвый, и въ грядýщая áзъ éсмь.
Ви́дѣша язы́цы и убоя́шася, концы́ земнíи прибли́жишася и прiидóша вкýпѣ.
Судя́й кíйждо бли́жнему, и брáту помощи́, и речéтъ:
превозмóже мýжъ древодѣ́латель, и ковáчь бiя́й млáтомъ, вкýпѣ проковáяй: овогдá ýбо речéтъ: спая́нiе добрó éсть, утверди́ша я́ гвоздьми́, положáтъ я́, и не подви́гнутся.
Ты́ же, Изрáилю, рáбе мóй, Иáкове, егóже избрáхъ, сѣ́мя Авраáмле, егóже возлюби́хъ,
егóже поя́хъ от конéцъ земли́, и от стрáжбъ ея́ призвáхъ тя́, и рекóхъ ти́: рáбъ мóй еси́, избрáхъ тя́, и не остáвихъ тебé:
не бóйся, съ тобóю бо éсмь, не прельщáю: áзъ бо éсмь Бóгъ твóй, укрѣпи́вый тя́, и помогóхъ ти́, и утверди́хъ тя́ десни́цею моéю прáведною:
сé, постыдя́тся и посрáмятся вси́ сопротивля́ющiися тебѣ́, бýдутъ бо я́ко не сýщiи, и поги́бнутъ вси́ сопéрницы твои́:
взы́щеши и́хъ, и не обря́щеши человѣ́ковъ, и́же поругáются тебѣ́: бýдутъ бо áки не бы́вшiи и не бýдутъ рáтующiи тебé.
Я́ко áзъ Бóгъ твóй держáй десни́цу твою́, глагóляй тебѣ́:
не бóйся, Иáкове, мáлый Изрáилю, áзъ помогóхъ ти́, глагóлетъ Бóгъ твóй, избавля́яй тя́ святы́й Изрáилевъ:
сé, сотвори́хъ тя́ áки колéса колесни́чная нóвая, стирáющая áки пилá, и сотрéши гóры, и истончи́ши хóлмы, и áки прáхъ положи́ши,
и извѣ́еши, и вѣ́тръ вóзметъ я́, и бýря развѣ́етъ я́: ты́ же возвесели́шися во святы́хъ Изрáилевыхъ.
И возрáдуются убóзiи и неимýщiи: пои́щутъ бо воды́, и не бýдетъ, язы́къ и́хъ от жáжди и́зсше. А́зъ Госпóдь Бóгъ, áзъ услы́шу и́хъ, Бóгъ Изрáилевъ, и не остáвлю и́хъ,
но отвéрзу на горáхъ рѣ́ки и среди́ пóля истóчники, сотворю́ пусты́ню въ лýги водны́я и жáждущую зéмлю въ водотéчы,
положý въ безвóдную зéмлю кéдръ и смéрчiе, и мирси́ну и кипари́съ и топóлю:
да ýзрятъ и уразумѣ́ютъ, и помы́слятъ и увѣ́дятъ вкýпѣ, я́ко рукá Госпóдня сотвори́ сiя́ вся́, и святы́й Изрáилевъ показá.
Приближáется сýдъ вáшъ, глагóлетъ Госпóдь Бóгъ: прибли́жишася совѣ́ти вáши, глагóлетъ Цáрь Иáковль.
Да прибли́жатся и возвѣстя́тъ вáмъ, я́же сбýдутся, или́ я́же прéжде бы́ша, рцы́те: и пристáвимъ ýмъ и уразумѣ́емъ, чтó послѣ́дняя и бýдущая: рцы́те нáмъ,
возвѣсти́те нáмъ грядýщая на послѣ́докъ, и увѣ́мы, я́ко бóзи естé: блáго сотвори́те и злó сотвори́те, и почуди́мся и ýзримъ вкýпѣ.
Я́ко откýду естé вы́, и откýду дѣ́ло вáше? от земли́ мéрзость избрáша вáсъ.
А́зъ же возстáвихъ, и́же от сѣ́вера и и́же от востóкъ сóлнечныхъ, прозовýтся и́менемъ мои́мъ: да прiи́дутъ кня́зи, и я́ко брéнiе скудéльника и я́ко скудéльникъ тóпчущь брéнiе, тáко попрáни бýдете.
Ктó бо возвѣсти́тъ, я́же испéрва, да увѣ́мы, я́же напреди́, и речéмъ, я́ко и́стинна сýть? нѣ́сть предглагóлющаго, ни слы́шащаго словéсъ вáшихъ.
Начáло Сióну дáмъ и Иерусали́ма утѣ́шу на пути́.
От язы́къ бо, сé, ни еди́нъ: и от куми́ръ и́хъ нѣ́сть возвѣщáяй. И áще вопрошý и́хъ, откýду естé, не отвѣщáютъ ми́.
Сýть бо творя́щiи вáсъ и всýе прельщáющiи вáсъ.
Иáковъ óтрокъ мóй, воспрiимý и́: Изрáиль избрáнный мóй, прiя́тъ егó душá моя́, дáхъ Дýхъ мóй нáнь, сýдъ язы́комъ возвѣсти́тъ:
не возопiéтъ, нижé ослáбитъ, нижé услы́шится внѣ́ глáсъ егó:
трóсти сокрушéны не сотрéтъ и льнá куря́щася не угаси́тъ, но во и́стину изнесéтъ сýдъ:
возсiя́етъ и не потýхнетъ, дóндеже положи́тъ на земли́ сýдъ, и на и́мя егó язы́цы уповáти и́мутъ.
Тáко глагóлетъ Госпóдь Бóгъ, сотвори́вый нéбо и водрузи́вый é, утверждéй зéмлю и я́же на нéй, и дая́й дыхáнiе лю́демъ, и́же на нéй, и дýхъ ходя́щымъ на нéй:
áзъ Госпóдь Бóгъ призвáхъ тя́ въ прáвдѣ, и удержý за рýку твою́ и укрѣплю́ тя: и дáхъ тя́ въ завѣ́тъ рóда Изрáилева, во свѣ́тъ язы́ковъ,
отвéрсти óчи слѣпы́хъ, извести́ от ýзъ свя́занныя и изъ дóму темни́цы и сѣдя́щыя во тмѣ́.
А́зъ Госпóдь Бóгъ, сié моé éсть и́мя, слáвы моея́ инóму не дáмъ, нижé добродѣ́телей мои́хъ истукáннымъ.
Я́же изъ начáла, сé, прiидóша, и нóвая, я́же áзъ возвѣщý, и прéжде нéже возвѣсти́ти, яви́шася вáмъ.
Воспóйте Гóсподеви пѣ́снь нóву: начáлство егó, прослáвите и́мя егó от конéцъ земли́, сходя́щiи въ мóре и плáвающiи по немý, óстрови и живýщiи на ни́хъ.
Возвесели́ся, пусты́не, и вéси ея́, придвóрiя, и живýщiи въ Кидáрѣ: возвеселя́тся живýщiи на кáмени, от крáя гóръ возопiю́тъ,
дадя́тъ Бóгу слáву, добродѣ́тели егó во óстровѣхъ возвѣстя́тъ.
Госпóдь Бóгъ си́лъ изы́детъ и сокруши́тъ рáть, воздви́гнетъ рвéнiе и возопiéтъ на враги́ своя́ со крѣ́постiю.
Молчáхъ, едá и всегдá умолчý и потерплю́? Терпѣ́хъ я́ко раждáющая, истреблю́ и изсушý вкýпѣ,
опустошý гóры и хóлмы, и вся́ку травý и́хъ изсушý, и положý рѣ́ки во óстровы, и лýги изсушý:
и наведý слѣпы́я на пýть, егóже не ви́дѣша, и по стезя́мъ, и́хже не знáша, ходи́ти сотворю́ и́мъ: сотворю́ и́мъ тмý во свѣ́тъ и стрóпотная въ прáвая: сiя́ глагóлы сотворю́, и не остáвлю и́хъ.
Тíи же возврати́шася вспя́ть: посрами́теся стыдѣ́нiемъ, уповáющiи на извáянная, глагóлющiи слiя́ннымъ: вы́ естé бóзи нáши.
Глусíи, услы́шите, и слѣпíи, прозри́те ви́дѣти.
И ктó слѣ́пъ, рáзвѣ раби́ мои́? и глýси, рáзвѣ владѣ́ющiи и́ми? и ослѣпóша раби́ Бóжiи.
Ви́дѣсте мнóгажды, и не сохрани́сте: отвéрсты ýшы [имýще], и не слы́шасте.
Госпóдь Бóгъ восхотѣ́, да оправди́тся и возвели́читъ хвалý.
И ви́дѣхъ, и бы́ша лю́дiе расхищéни и разгрáблени: пруглó бо въ лóжахъ вездѣ́, и въ домѣ́хъ вкýпѣ, идѣ́же скры́ша я́, бы́ша въ плѣ́нъ: и не бы́сть изъимáяй разграблéнiя и не бѣ́ глагóлющаго: отдáждь.
Ктó въ вáсъ, и́же внуши́тъ сiя́? и услы́шитъ во грядýщая.
Ктó дадé на разграблéнiе Иáкова, и Изрáиля плѣня́ющымъ егó? не Бóгъ ли, емýже согрѣши́ша и не восхотѣ́ша въ путéхъ егó ходи́ти, ни слýшати закóна егó?
И наведé на ня́ гнѣ́въ я́рости своея́, и укрѣпи́ся на ня́ рáть, и паля́щiи и́хъ о́крестъ, и не увѣ́дѣша кíйждо и́хъ, нижé положи́ша на умѣ́.
И ны́нѣ си́це глагóлетъ Госпóдь Бóгъ сотвори́вый тя́, Иáкове, и создáвый тя́, Изрáилю: не бóйся, я́ко избáвихъ тя́, прозвáхъ тя́ и́менемъ твои́мъ: мóй еси́ ты́.
И áще прехóдиши сквозѣ́ вóду, съ тобóю éсмь, и рѣ́ки не покры́ютъ тебé: и áще сквозѣ́ óгнь прóйдеши, не сожжéшися, и плáмень не опали́тъ тебé,
я́ко áзъ Госпóдь Бóгъ твóй, святы́й Изрáилевъ, спасáяй тя́: сотвори́хъ премѣ́ну твою́ Еги́петъ и еѳióпiю, и сои́ну за тя́.
Отнéлиже чéстенъ бы́лъ еси́ предо мнóю, прослáвился еси́, и áзъ тя́ возлюби́хъ, и дáмъ человѣ́ки за тебé и кня́зи за главý твою́.
Не бóйся, я́ко съ тобóю éсмь: от востóкъ приведý сѣ́мя твоé и от зáпадъ соберý тя:
рекý сѣ́веру: приведи́: и Ли́ву: не возбраня́й, приведи́ сы́ны моя́ от земли́ дáльнiя и дщéри моя́ от крáевъ земны́хъ,
всѣ́хъ, ели́цы нарицáются и́менемъ мои́мъ: во слáвѣ бо моéй устрóихъ егó и создáхъ егó и сотвори́хъ и́.
И изведóхъ лю́ди слѣ́пы, и óчи сýть тáкожде слѣ́пы, и глýси ýшы имýщiи.
Вси́ язы́цы собрáшася вкýпѣ, и соберýтся кня́зи от ни́хъ. Ктó возвѣсти́тъ сiя́? или́ я́же испéрва ктó возвѣсти́тъ вáмъ? да приведýтъ свидѣ́тели своя́ и оправдя́тся, и да услы́шатъ и да рекýтъ и́стину.
Бýдите ми́ свидѣ́телiе, и áзъ свидѣ́тель, глагóлетъ Госпóдь Бóгъ, и óтрокъ мóй, егóже избрáхъ, да увѣ́сте и вѣ́руете ми́ и уразумѣ́ете, я́ко áзъ éсмь: прéжде менé не бы́сть и́нъ Бóгъ, и по мнѣ́ не бýдетъ.
А́зъ Бóгъ, и нѣ́сть рáзвѣ менé спасáяй.
А́зъ возвѣсти́хъ и спасóхъ, укори́хъ, и не бѣ́ въ вáсъ чуждíй: вы́ мнѣ́ свидѣ́телiе, и áзъ свидѣ́тель, глагóлетъ Госпóдь Бóгъ,
ещé от начáла, и нѣ́сть изъимáяй от рукý моéю: сотворю́, и ктó отврати́тъ é?
Тáко глагóлетъ Госпóдь Бóгъ, избавля́яй вáсъ, святы́й Изрáилевъ: вáсъ рáди послю́ въ Вавилóнъ и воздви́гну вся́ бѣжáщыя, и халдéе въ кораблéхъ свя́жутся.
А́зъ Госпóдь Бóгъ святы́й вáшъ, показáвый Изрáиля царя́ вáшего.
Си́це глагóлетъ Госпóдь, дая́й пýть по мóрю и по водѣ́ си́льнѣ стезю́:
изводя́й колесни́цы и кóни и нарóдъ си́ленъ: но успóша и не востáнутъ, угасóша áки лéнъ угашéнъ.
Не поминáйте пéрвыхъ, и вéтхихъ не помышля́йте,
сé, áзъ творю́ нóвая, я́же ны́нѣ возсiя́ютъ, и увѣ́сте я́: и сотворю́ въ пусты́ни пýть и въ безвóднѣй рѣ́ки.
Возблагословя́тъ мя́ звѣ́рiе сéлнiи, Си́рини и дщéри стрýѳовы: я́ко дáхъ въ пусты́ни вóду и рѣ́ки въ безвóднѣй, напои́ти рóдъ мóй избрáнный,
лю́ди моя́, я́же снабдѣ́хъ, добродѣ́тели моя́ повѣ́дати.
Не ны́нѣ призвáхъ тебé, Иáкове, нижé труди́тися сотвори́хъ тя́, Изрáилю.
Не принéслъ еси́ мнѣ́ овéцъ твои́хъ всесожжéнiя твоегó, ни въ жéртвахъ твои́хъ прослáвилъ мя́ еси́, не порабóтихъ тя́ въ жéртвахъ, нижé утруждéна сотвори́хъ тя́ въ Ливáнѣ:
не купи́лъ еси́ мнѣ́ на сребрó ѳимiáма, нижé тýка трéбъ твои́хъ возжелáхъ, но во грѣсѣ́хъ твои́хъ стáлъ еси́ предо мнóю и въ непрáвдахъ твои́хъ.
А́зъ éсмь, áзъ éсмь заглаждáяй беззакóнiя твоя́ менé рáди и грѣхи́ твоя́, и не помянý.
Ты́ же помяни́, и да сýдимся: глагóли ты́ беззакóнiя твоя́ прéжде, да оправди́шися.
Отцы́ вáши пéрвiи согрѣши́ша, и кня́зи вáши беззакóнноваша на мя́.
И оскверни́ша кня́зи святáя моя́, и дáхъ погуби́ти Иáкова и Изрáиля во укори́зну.
Ны́нѣ же слы́ши, рáбе мóй Иáкове, и Изрáилю, егóже избрáхъ.
Си́це глагóлетъ Госпóдь Бóгъ сотвори́вый тя́ и создáвый тя́ изъ утрóбы: ещé помóжетъ ти́: не бóйся, рáбе мóй Иáкове, и возлю́бленный Изрáилю, егóже избрáхъ.
Я́ко áзъ дáмъ вóду въ жáжду ходя́щымъ въ безвóднѣй, наложý Дýхъ мóй на сѣ́мя твоé и благословéнiя моя́ на чáда твоя́,
и прозя́бнутъ áки травá посредѣ́ воды́ и я́ко вéрба при водѣ́ текýщей.
Сéй речéтъ: Бóжiй éсмь: и сéй возопiéтъ о и́мени Иáковли, и другíй напи́шетъ рукóю своéю: Бóжiй éсмь: и о и́мени Изрáилевѣ возопiéтъ.
Си́це глагóлетъ Бóгъ Цáрь Изрáилевъ, и избавлéй егó Бóгъ Саваóѳъ: áзъ пéрвый и áзъ по си́хъ, кромѣ́ менé нѣ́сть Бóга:
ктó я́коже áзъ? да стáнетъ и да призовéтъ, и да возвѣсти́тъ и да уготóвитъ ми́, отнéлѣже сотвори́хъ человѣ́ка во вѣ́къ, и грядýщая прéжде нéже прiити́ и́мъ, да возвѣстя́тъ вáмъ.
Не укрывáйтеся, нижé заблуждáйте: не испéрва ли внуши́сте, и возвѣсти́хъ вáмъ? свидѣ́телiе вы́ естé, áще éсть Бóгъ рáзвѣ менé.
И не послýшаша тогдá созидáющiи, и вая́ющiи вси́ тщéтни, творя́щiи желáнiя своя́, я́же не упóльзуютъ и́хъ:
но посрáмятся вси́ созидáющiи бóга и вая́ющiи вси́ неполéзная.
И вси́, отню́дуже бы́ша, изсхóша: и глусíи от человѣ́къ да соберýтся вси́ и да стáнутъ вкýпѣ, и да посрáмятся и устыдя́тся вкýпѣ.
Я́ко наостри́ древодѣ́латель сѣ́чиво, теслóю содѣ́ла óное, и свéрдломъ состáви é, и длáтомъ издолбé é, и содѣ́ла é крѣ́постiю мы́шцы своея́: и взáлчетъ, и изнемóжетъ, и не напiéтся воды́.
И избрáвъ древодѣ́ля дрéво, постáви é въ мѣ́ру, и клéемъ сострóи é, и сотвори́ é áки о́бразъ мýжескъ и áки красотý человѣ́чу, постáвити é въ домý.
Посѣчé дрéво въ дубрáвѣ, éже насади́ Госпóдь, сóсну, и дóждь возрасти́,
да бýдетъ человѣ́комъ на жжéнiе: и взя́въ от негó, согрѣ́ся, и изжéгше я́, испекóша и́ми хлѣ́бы, изъ остáвшаго же сотвори́ша бóги и покланя́ются и́мъ: сотвори́ é извáянное, и прекланя́ется и́мъ.
Пóлъ егó сожжé огнéмъ, и пóлъ егó сожжé на ýглiе, и испечé въ ни́хъ хлѣ́бы, и на ни́хъ испечé мя́со, и ядé, и насы́тися, и согрѣ́вся речé: слáдко мнѣ́, я́ко согрѣ́хся и ви́дѣхъ óгнь.
Изъ остáвшаго же сотвори́ бóга извáянна, прекланя́ется емý и покланя́ется, и мóлится емý глагóля: избáви мя́, я́ко бóгъ мóй еси́ ты́.
Не увѣ́даша смы́слити, я́ко отемнѣ́ша óчи и́хъ, éже ви́дѣти и разумѣ́ти сéрдцемъ свои́мъ.
И не помы́сли въ души́ своéй, ни увѣ́дѣ смышлéнiемъ, я́ко пóлъ егó сожжé огнéмъ, и испечé на ýглiехъ егó хлѣ́бы, и испéкъ мясá снѣдé, и остáвшее егó въ мéрзость сотвори́, и покланя́ются емý.
Увѣ́ждь, я́ко пéпелъ éсть сéрдце и́хъ, и прельщáются, и ни еди́нъ мóжетъ души́ своея́ избáвити: ви́дите, не рцы́те, я́ко лжá въ десни́цѣ моéй.
Помяни́ сiя́, Иáкове и Изрáилю, я́ко рáбъ мóй еси́ ты́, сотвори́хъ тя́ рабá моегó, и ты́, Изрáилю, не забывáй менé.
Сé бо, отъя́хъ я́ко о́блакъ беззакóнiя твоя́ и я́ко примрáкъ грѣхи́ твоя́: обрати́ся ко мнѣ́, и избáвлю тя́.
Возвесели́теся, небесá, я́ко поми́лова Бóгъ Изрáиля: воструби́те, основáнiя земнáя, возопíйте, гóры, весéлiе, хóлми и вся́ древесá, я́же на ни́хъ: я́ко избáви Бóгъ Иáкова, и Изрáиль прослáвится.
Си́це глагóлетъ Госпóдь избавля́яй тя́ и создáвый тя́ от чрéва: áзъ Госпóдь совершáяй вся́, распрострóхъ нéбо еди́нъ и утверди́хъ зéмлю.
Ктó и́нъ разсы́плетъ знáменiя чревоволшéбниковъ и волшбы́ от сéрдца, отвращáяй мýдрыя вспя́ть и совѣ́ты и́хъ обуя́яй,
и уставля́я глагóлъ рабá своегó, и совѣ́тъ вѣ́стниковъ свои́хъ и́стиненъ творя́й? глагóляй Иерусали́му: насели́шися: и градóмъ иудéйскимъ: возградитéся, и пусты́ни егó просiя́ютъ,
глагóляй бéзднѣ: опустѣ́еши, и рѣ́ки твоя́ изсушý,
глагóляй ки́ру смы́слити, и вся́ вóли моя́ сотвори́тъ: глагóляй Иерусали́му: возгради́шися, и хрáмъ святы́й мóй осную́.
Си́це глагóлетъ Госпóдь Бóгъ помáзанному моемý ки́ру, егóже удержáхъ за десни́цу, повинýти предъ ни́мъ язы́ки, и крѣ́пость царéй разрушý, отвéрзу предъ ни́мъ вратá, и грáди не затворя́тся:
áзъ предъ тобóю пойдý и гóры уравню́, вратá мѣ́дяная сокрушý и вереи́ желѣ́зныя сломлю́,
и дáмъ ти́ сокрóвища тéмная сокровéнная: неви́димая отвéрзу тебѣ́, да увѣ́си, я́ко áзъ Госпóдь Бóгъ твóй прозывáя и́мя твоé, Бóгъ Изрáилевъ.
Рáди рабá моегó Иáкова и Изрáиля избрáннаго моегó, áзъ прозовý тя́ и́менемъ твои́мъ и прiимý тя:
ты́ же не познáлъ еси́ менé, я́ко áзъ Госпóдь Бóгъ, и нѣ́сть рáзвѣ менé ещé Бóга: укрѣпи́хъ тя́, и не познáлъ еси́ менé,
да бы́ша увѣ́дѣли, и́же от востóкъ сóлнечныхъ и и́же от зáпадъ, я́ко нѣ́сть Бóгъ рáзвѣ менé: áзъ Госпóдь Бóгъ, и нѣ́сть ещé.
А́зъ устрóивый свѣ́тъ и сотвори́вый тмý, творя́й ми́ръ и зи́ждяй злáя, áзъ Госпóдь Бóгъ, творя́й сiя́ вся́.
Да возрáдуется нéбо свы́ше, и о́блацы да кропя́тъ прáвду: да прозя́бнетъ земля́, и да прорасти́тъ ми́лость, и прáвду да прозя́бнетъ вкýпѣ: áзъ éсмь Госпóдь создáвый тя́.
Чтó лýчшее устрóихъ я́ко гли́ну скудéльничу? едá оря́й орáти бýдетъ зéмлю вéсь дéнь? едá речéтъ брéнiе скудéльнику: чтó твори́ши, я́ко не дѣ́лаеши, нижé и́маши рýкъ, едá отвѣщáетъ здáнiе создáвшему é?
едá глагóлетъ отцý: чтó роди́ши? и мáтери: чтó чревоболи́ши?
Я́ко тáко глагóлетъ Госпóдь Бóгъ, святы́й Изрáилевъ, сотвори́вый грядýщая: вопроси́те менé о сынѣ́хъ мои́хъ и о дщéрехъ мои́хъ, и о дѣ́лѣхъ рукý моéю заповѣ́дите мнѣ́.
А́зъ сотвори́хъ зéмлю и человѣ́ка на нéй, áзъ рукóю моéю утверди́хъ нéбо, áзъ всѣ́мъ звѣздáмъ заповѣ́дахъ.
А́зъ возстáвихъ егó со прáвдою царя́, и вси́ путié егó прáвы: сéй сози́ждетъ грáдъ мóй и плѣнéнiе людíй мои́хъ возврати́тъ, не по мздѣ́, ни по дарóмъ, речé Госпóдь Саваóѳъ.
Тáко глагóлетъ Госпóдь Саваóѳъ: утруди́ся Еги́петъ и кýпли еѳióпскiя, и Саваи́мстiи мýжiе высóцыи къ тебѣ́ прéйдутъ и тебѣ́ бýдутъ раби́, и вслѣ́дъ тебé пóйдутъ свя́зани ýзами ручны́ми, и прéйдутъ къ тебѣ́ и поклóнятся тебѣ́, и въ тебѣ́ помóлятся, я́ко въ тебѣ́ Бóгъ éсть, и рекýтъ: нѣ́сть Бóга рáзвѣ тебé:
ты́ бо еси́ Бóгъ, и не вѣ́дѣхомъ, Бóгъ Изрáилевъ Спáсъ.
Постыдя́тся и посрáмятся вси́ проти́вящiися емý и пóйдутъ въ студѣ́: обновля́йтеся ко мнѣ́, óстрови.
Изрáиль спасáется от Гóспода спасéнiемъ вѣ́чнымъ: не постыдя́тся, ни посрáмятся дáже до вѣ́ка ктомý.
Занé тáко глагóлетъ Госпóдь сотвори́вый нéбо, сéй Бóгъ показáвый зéмлю и сотвори́вый ю́, тóй раздѣли́ ю́, не вотщé сотвори́ ю́, но на вселéнiе создá ю́: áзъ éсмь Госпóдь, и нѣ́сть ктомý.
Не о́тай глагóлахъ, ни въ тéмнѣ мѣ́стѣ земли́: не рекóхъ плéмени Иáковлю: сýетнаго взыщи́те. А́зъ éсмь, áзъ éсмь Госпóдь глагóляй прáвду и возвѣщáяй и́стину.
Собери́теся и прiиди́те, совѣщáйтеся вкýпѣ, спасáемiи от язы́къ. Не разумѣ́ша воздви́жущiи дрéво извáянiе своé и моля́щеся богóмъ, и́же не спасáютъ.
А́ще возвѣстя́тъ, да прибли́жатся, да увѣ́дятъ вкýпѣ, ктó слы́шана сотвори́ сiя́ испéрва? Тогдá возвѣсти́ся вáмъ: áзъ Бóгъ, и нѣ́сть инóго рáзвѣ менé, прáведенъ и спаси́тель, нѣ́сть кромѣ́ менé.
Обрати́теся ко мнѣ́ и спасéтеся, и́же от крáя земнáго: áзъ éсмь Бóгъ, и нѣ́сть инóго.
Кленýся мнóю сами́мъ, áще не изы́детъ изо ýстъ мои́хъ прáвда, словесá моя́ не возвратя́тся: я́ко мнѣ́ поклóнится вся́ко колѣ́но, и исповѣ́стся вся́къ язы́къ богови, глагóля:
прáвда и слáва къ немý прiи́детъ: и посрáмятся вси́ отлучáющiися.
От Гóспода оправдя́тся, и о Бóзѣ прослáвится всé сѣ́мя сынóвъ Изрáилевыхъ.
Падé ви́лъ, сокруши́ся дагóнъ, бы́ша вая́нiя и́хъ во звѣ́ри и скóты: нóсите я́ свя́зана я́ко брéмя труждáющемуся и разслабѣ́вшу,
и áлчущу и не могýщу вкýпѣ, и́же не возмóгутъ спасти́ся от рáти, сáми же плѣнéни приведóшася.
Послýшайте менé, дóме Иáковль и вéсь остáнокъ Изрáилевъ, носи́мiи от чрéва и наказýемiи от дѣ́тска дáже до стáрости:
áзъ éсмь, и дóндеже состарѣ́етеся, áзъ éсмь, áзъ терплю́ вáмъ, áзъ сотвори́хъ и áзъ понесý, áзъ подъимý и спасý вы.
Комý мя́ уподóбисте? ви́дите, ухи́трите, заблуждáющiи,
слагáющiи злáто изъ мѣ́ха, и сребрó вѣ́сомъ поставля́ютъ въ мѣ́рилѣ, и наéмше злáтаря сотвори́ша рукотворéнная, и преклóншеся покланя́ются и́мъ:
воздви́жутъ я́ на рáмѣхъ и хóдятъ: áще же положáтъ я́ на мѣ́стѣ своéмъ, тý лежáтъ, нижé подви́жутся: и и́же áще возопiéтъ къ ни́мъ, не услы́шатъ, от бѣ́дъ не спасýтъ егó.
Помяни́те сiя́ и возстени́те, покáйтеся, прельсти́вшiися, обрати́теся сéрдцемъ
и помяни́те пéрвая от вѣ́ка, я́ко áзъ éсмь Бóгъ, и нѣ́сть ещé рáзвѣ менé:
возвѣщáяй пéрвѣе послѣ́дняя, прéжде нéже бы́ти и́мъ, и áбiе сбы́шася: и рекóхъ: вéсь совѣ́тъ мóй стáнетъ, и вся́, ели́ка совѣщáхъ, сотворю́.
Призывáяй от востóкъ пти́цу, и от земли́ издалéча, о ни́хже совѣщáхъ: рекóхъ и приведóхъ, создáхъ и сотвори́хъ, приведóхъ и́ и благопоспѣши́хъ пýть егó.
Послýшайте менé, погýбльшiи сéрдце, сýщiи далéче от прáвды:
прибли́жихъ прáвду мою́, и не удали́тся, и спасéнiе, éже от менé, не умéдлю: дáхъ въ Сióнѣ спасéнiе Изрáилю во прославлéнiе.
Сни́ди, ся́ди на земли́, дѣ́во, дщи́ Вавилóня, вни́ди во тмý {По ины́мъ: ся́ди на зéмлю.}, дщи́ Халдéйска, я́ко не приложи́ши ксемý прозывáтися мягкá и ю́на.
Возми́ жéрновы, мели́ мукý, откры́й покрывáло твоé, откры́й сѣди́ны, возсучи́ гóлени, прейди́ рѣ́ки:
откры́ется стýдъ твóй, явя́тся укори́зны твоя́, прáведное от тебé возмý, ктомý не предáмъ человѣ́комъ.
Речé избáвивый тя́ Госпóдь Саваóѳъ, и́мя емý святы́й Изрáилевъ:
ся́ди умилéна, вни́ди во тмý, дщи́ Халдéйска, ксемý не прозовéшися крѣ́пость цáрства.
Разгнѣ́вахся на лю́ди моя́, оскверни́ла еси́ наслѣ́дiе моé: áзъ вдáхъ я́ въ рýку твою́, ты́ же не далá и́мъ ми́лости, стáрчiй ярéмъ отягчи́ла еси́ зѣлó
и реклá еси́: въ вѣ́къ бýду влады́чица: не помы́слила еси́ си́хъ въ сéрдцы твоéмъ, нижé помянýла еси́ послѣ́днихъ:
ны́нѣ же слы́ши сié, ю́ная, сѣдя́щая, уповáющая, глагóлющая въ сéрдцы своéмъ: áзъ éсмь, и нѣ́сть ины́я, не ся́ду вдовóю и не познáю сиротствá.
Ны́нѣ же прiи́дутъ на тя́ двá сiя́ внезáпу во еди́нъ дéнь, безчáдiе и вдовствó внезáпу прiи́детъ на тя́, въ волшéбствѣ твоéмъ и въ крѣ́пости волхвóвъ твои́хъ зѣлó,
въ надѣ́янiи злóбы твоея́: ты́ бо реклá еси́: áзъ éсмь, и нѣ́сть ины́я: увѣ́ждь, я́ко смышлéнiе си́хъ и блужéнiе твоé бýдетъ тебѣ́ срáмъ: и реклá еси́ сéрдцемъ свои́мъ: áзъ éсмь, и нѣ́сть ины́я.
И прiи́детъ на тя́ пáгуба, и не увѣ́си, прóпасть, и впадéши въ ню́: и прiи́детъ на тя́ печáль, и не возмóжеши чистá бы́ти: и прiи́детъ на тя́ внезáпу пáгуба, и не увѣ́си.
Стáни ны́нѣ съ волхвы́ твои́ми и со мнóгими чáры твои́ми, и́мже научи́лася еси́ изъ ю́ности твоея́, áще возмóгутъ ти́ помощи́.
Утруди́лася еси́ въ совѣ́тѣхъ твои́хъ: да стáнутъ ны́нѣ и спасýтъ тя́ звѣздочéтцы небесé, смотря́ющiи звѣ́здъ, да возвѣстя́тъ ти́, чтó и́мать на тя́ прiити́.
Сé, вси́ я́ко хврáстiе огнéмъ погоря́тъ и не изъи́мутъ души́ своея́ изъ плáмене, понéже и́маши ýглiе óгненное, ся́ди на ни́хъ.
Сíи бýдутъ тебѣ́ пóмощь: труди́лася еси́ въ преложéнiи от ю́ности, человѣ́къ сáмъ въ себѣ́ прельсти́ся, тебѣ́ же не бýдетъ спасéнiя.
Услы́шите сiя́, дóме Иáковль, прозвáннiи и́менемъ Изрáилевымъ и изшéдшiи изъ Иýды, кленýщiися и́менемъ Гóспода Бóга Изрáилева, поминáющiи не со и́стиною, нижé со прáвдою,
и придержáщiися и́мени грáда святáго, и о Бóзѣ Изрáилевѣ подтверждáющiися: Госпóдь Саваóѳъ и́мя емý.
Прéждняя ещé возвѣсти́хъ, и изъ ýстъ мои́хъ изыдóша, и слы́шано бы́сть: внезáпу сотвори́хъ, и нáйде.
Вѣ́мъ, я́ко жéстокъ еси́, и жи́ла желѣ́зна вы́я твоя́, и челó твоé мѣ́дяно.
И возвѣсти́хъ ти́, я́же дрéвле, прéжде нéже прiити́ на тя́: слы́шана тебѣ́ сотвори́хъ, да не когдá речéши, я́ко и́доли мнѣ́ сiя́ сотвори́ша, и не рцы́, я́ко извáянная и слiя́нная заповѣ́даша мнѣ́.
Слы́шасте вся́, и вы́ не разумѣ́сте: но и слы́шана тебѣ́ сотвори́хъ нóвая отны́нѣ, я́же и́мутъ бы́ти:
и не рéклъ еси́: ны́нѣ бывáютъ, а не прéжде, и не въ прéжднiя дни́ слы́шалъ еси́ сiя́: не рцы́: éй, вѣ́мъ сiя́.
Не вѣ́дѣлъ еси́, нижé разумѣ́лъ еси́, нижé испéрва отверзóхъ ушесá твоя́: вѣ́дѣхъ бо, я́ко отвергáя отри́неши и беззакóнникъ ещé от чрéва прозовéшися.
И́мене моегó рáди покажý ти я́рость мою́, и слáвная моя́ наведý на тя́, да не потреблю́ тебé.
Сé, продáхъ тя́ не сребрá рáди: изъя́хъ же тя́ изъ пéщи убóжества.
Менé рáди сотворю́ ти́, я́ко моé и́мя оскверня́ется, и слáвы моея́ инóму не дáмъ.
Послýшай менé, Иáкове и Изрáилю, егóже áзъ призывáю: áзъ éсмь пéрвый и áзъ éсмь во вѣ́къ.
И рукá моя́ основá зéмлю, и десни́ца моя́ утверди́ нéбо: призовý я́, и стáнетъ вкýпѣ,
и соберýтся вси́ и услы́шатъ: ктó и́мъ возвѣсти́ сiя́? любя́ тя́ сотвори́хъ вóлю твою́ надъ Вавилóномъ, éже отъя́ти плéмя Халдéйско.
А́зъ глагóлахъ, áзъ призвáхъ, приведóхъ и́, и благопоспѣши́тъ пýть егó.
Приступи́те ко мнѣ́ и слы́шите сiя́, испéрва не о́тай глагóлахъ: егдá бывáху, тáмо бѣ́хъ, и ны́нѣ Госпóдь Госпóдь послá мя и Дýхъ егó.
Тáко глагóлетъ Госпóдь, избáвивый тя́, святы́й Изрáилевъ: áзъ éсмь Госпóдь Бóгъ твóй, научи́хъ тя́, éже обрѣсти́ тебѣ́ пýть, по немýже пóйдеши.
И áще бы еси́ послýшалъ зáповѣдiй мои́хъ, тó бы́лъ бы ýбо áки рѣкá ми́ръ твóй, и прáвда твоя́ я́ко волнá морскáя,
и бы́ло бы я́ко песóкъ сѣ́мя твоé, и исчáдiя чрéва твоегó я́ко пéрсть земли́: нижé ны́нѣ потреби́шися, нижé поги́бнетъ и́мя твоé предо мнóю.
Изы́ди от Вавилóна, бѣжáй от халдéевъ: глáсъ рáдости возвѣсти́те, и да слы́шано бýдетъ сié, возвѣсти́те дáже до послѣ́днихъ земли́, глагóлите: избáви Госпóдь рабá своегó Иáкова.
И áще вжáждутъ, пусты́нею проведéтъ и́хъ и вóду изъ кáмене изведéтъ и́мъ: разся́дется кáмень, и потечéтъ водá, и испiю́тъ лю́дiе мои́.
Нѣ́сть рáдоватися нечести́вымъ, глагóлетъ Госпóдь.
Послýшайте менé, óстрови, и внемли́те, язы́цы. Врéменемъ мнóгимъ стоя́ти бýдетъ, глагóлетъ Госпóдь: от чрéва мáтере моея́ наречé и́мя моé,
и положи́ устá моя́ я́ко мéчь óстръ, и подъ крóвомъ руки́ своея́ скры́ мя́: положи́ мя́ я́ко стрѣлý избрáнну, и въ тýлѣ своéмъ скры́ мя́,
и речé ми́: рáбъ мóй еси́ ты́, Изрáилю, и въ тебѣ́ прослáвлюся.
А́зъ же рекóхъ: вотщé труди́хся, всýе и ни во чтó дáхъ крѣ́пость мою́: сегó рáди сýдъ мóй предъ Гóсподемъ и трýдъ мóй предъ Бóгомъ мои́мъ.
И ны́нѣ тáко глагóлетъ Госпóдь, создáвый мя́ от чрéва рабá себѣ́, éже собрáти Иáкова къ немý и Изрáиля: соберýся и прослáвлюся предъ Гóсподемъ, и Бóгъ мóй бýдетъ мнѣ́ крѣ́пость.
И речé ми: вéлiе ти́ éсть, éже назвáтися тебѣ́ рабóмъ мои́мъ, éже возстáвити племенá Иáковля и разсѣ́янiе Изрáилево обрати́ти: сé, дáхъ тя́ въ завѣ́тъ рóда, во свѣ́тъ язы́комъ, éже бы́ти тебѣ́ во спасéнiе дáже до послѣ́днихъ земли́.
Тáко глагóлетъ Госпóдь, избáвивый тя́ Бóгъ Изрáилевъ: освяти́те уничижáющаго дýшу свою́, гнушáемаго от язы́къ рабóвъ кня́жескихъ: цáрiе ýзрятъ егó, и востáнутъ кня́зи и поклóнятся емý Гóспода рáди, я́ко вѣ́ренъ éсть святы́й Изрáилевъ, и избрáхъ тя́.
Тáко глагóлетъ Госпóдь: во врéмя прiя́тно послýшахъ тебé и въ дéнь спасéнiя помогóхъ ти́, и сотвори́хъ тя́ и дáхъ тя́ въ завѣ́тъ вѣ́чный язы́ковъ, éже устрóити зéмлю и наслѣ́дити наслѣ́дiя пусты́ни,
глагóлюща сýщымъ во ýзахъ: изыди́те, и сýщымъ во тмѣ́: откры́йтеся. На всѣ́хъ путéхъ пасти́ся бýдутъ, и на всѣ́хъ стезя́хъ пáжить и́хъ:
не взáлчутъ, нижé вжáждутъ, нижé порази́тъ и́хъ знóй, нижé сóлнце, но ми́луяй и́хъ утѣ́шитъ и́хъ и сквозѣ́ истóчники водны́я проведéтъ и́хъ.
И положý вся́ку гóру въ пýть и вся́ку стезю́ въ пáству и́мъ.
Сé, сíи издалéча прiи́дутъ, сíи от сѣ́вера и от мóря, инíи же от земли́ пéрсскiя.
Рáдуйтеся, небесá, и весели́ся, землé, да отры́гнутъ гóры весéлiе и хóлми прáвду, я́ко поми́лова Бóгъ лю́ди своя́ и смирéнныя людíй свои́хъ утѣ́ши.
Речé же Сióнъ: остáви мя́ Госпóдь, и Бóгъ забы́ мя.
Едá забýдетъ женá отрочá своé, éже не поми́ловати исчáдiя чрéва своегó? áще же и забýдетъ си́хъ женá, но áзъ не забýду тебé, глагóлетъ Госпóдь.
Сé, на рукáхъ мои́хъ написáхъ стѣ́ны твоя́, и предо мнóю еси́ при́сно,
и вскóрѣ возгради́шися, от ни́хже разори́лся еси́, и опустоши́вшiи тя́ изы́дутъ изъ тебé.
Возведи́ о́крестъ óчи твои́ и ви́ждь вся́, сé, собрáшася и прiидóша къ тебѣ́, живý áзъ, глагóлетъ Госпóдь: я́ко всѣ́ми и́ми áки въ красотý облечéшися и обложи́ши себé и́ми я́ко ýтварiю невѣ́ста.
Понéже пустáя твоя́ и разсы́паная и пáдшая ны́нѣ утѣснѣ́ютъ от обитáющихъ, и удаля́тся от тебé поглощáющiи тя́.
Рекýтъ бо во ýшы твои́ сы́нове твои́, и́хже бы́лъ погуби́лъ еси́: тѣ́сно ми́ мѣ́сто, сотвори́ ми мѣ́сто, да вселю́ся.
И речéши въ сéрдцы своéмъ: ктó мнѣ́ породи́ си́хъ? áзъ же безчáдна и вдовá, си́хъ же ктó воспитá мнѣ́? áзъ же остáхся еди́на, сíи же мнѣ́ гдѣ́ бы́ша?
Тáко глагóлетъ Госпóдь Госпóдь: сé, воздвизáю на язы́ки рýку мою́ и на óстровы воздви́гну знáменiе моé, и приведýтъ сы́ны твоя́ въ лóнѣ и дщéри твоя́ на плещáхъ вóзмутъ.
И бýдутъ цáрiе корми́телiе твои́, и княги́ни и́хъ корми́лицы твоя́: до лицá земли́ поклóнятся тебѣ́ и прáхъ нóгъ твои́хъ обли́жутъ, и увѣ́си, я́ко áзъ Госпóдь Бóгъ, и не посрáмятся терпя́щiи мя́.
Едá вóзметъ ктó от исполи́на коры́сти? и áще ктó плѣни́тъ непрáведнѣ, спасéтлися?
Занé тáко глагóлетъ Госпóдь: áще ктó плѣни́тъ исполи́на, вóзметъ коры́сти: взéмляй же от крѣ́пкаго спасéтся: áзъ же прю́ твою́ разсуждý и áзъ сы́ны твоя́ избáвлю:
и оскорби́вшiи тебé снѣдя́тъ плóть свою́ и испiю́тъ я́ко винó нóво крóвь свою́, и упiю́тся: и увѣ́сть вся́ка плóть, я́ко áзъ Госпóдь избáвивый тя́ и заступáяй крѣ́пость Иáковлю.
Тáко глагóлетъ Госпóдь: кáя кни́га отпущéнiя мáтере вáшея, éюже отпусти́хъ ю́? или́ кóему заимодáвцу продáхъ вы́? сé, грѣхми́ вáшими продáстеся, и беззакóнiй рáди вáшихъ отпусти́хъ мáтерь вáшу.
Чтó я́ко прiидóхъ, и не бя́ше человѣ́ка? звáхъ, и не бѣ́ послýшающаго? едá не мóжетъ рукá моя́ избáвити, или́ не могý изъя́ти? сé, запрещéнiемъ мои́мъ опустошý мóре и положý рѣ́ки пýсты, и и́зсхнутъ ры́бы и́хъ не сýщей водѣ́ и ýмрутъ жáждею:
облекý нéбо во тмý и положý áки врéтище одéжду егó.
Госпóдь Госпóдь даéтъ мнѣ́ язы́къ научéнiя, éже разумѣ́ти, егдá подобáетъ рещи́ слóво: положи́ мя ýтро ýтро, приложи́ ми ýхо, éже слы́шати,
и наказáнiе Госпóдне отверзáетъ ýшы мои́: áзъ же не проти́влюся, ни противоглагóлю.
Плещы́ мои́ вдáхъ на рáны и лани́тѣ мои́ на заушéнiя, лицá же моегó не отврати́хъ от студá заплевáнiй,
и Госпóдь Госпóдь помóщникъ ми́ бы́сть: сегó рáди не усрами́хся, но положи́хъ лицé своé áки твéрдый кáмень и разумѣ́хъ, я́ко не постыждýся:
занé приближáется оправдáвый мя́. Ктó пря́йся со мнóю? да сопротивостáнетъ мнѣ́ кýпно. И ктó судя́йся со мнóю? да прибли́жится ко мнѣ́.
Сé, Госпóдь Госпóдь помóжетъ ми́: ктó озлóбитъ мя́? Сé, вси́ вы́ я́ко ри́за обетшáете, и я́ко мóлiе изъя́стъ вы́.
Ктó въ вáсъ боя́йся Гóспода? да послýшаетъ глáса óтрока егó. Ходя́щiи во тмѣ́, и нѣ́сть и́мъ свѣ́та, надѣ́йтеся на и́мя Госпóдне и утверди́теся о Бóзѣ.
Сé, вси́ вы́ óгнь раждизáете укрѣпля́ете плáмень: ходи́те свѣ́томъ огня́ вáшего и плáменемъ, егóже разжегóсте. Менé рáди бы́ша сiя́ вáмъ, въ печáли ýспнете.
Послýшайте менé, гоня́щiи прáвду и взыскáющiи Гóспода, воззри́те на твéрдый кáмень, егóже изсѣкóсте {Евр.: изъ негóже изсѣ́чени бы́сте.}, и въ юдóль потóка, ю́же ископáсте {Евр.: изъ нея́же искóпани бы́сте.}.
Воззри́те на Авраáма отцá вáшего и на Сáрру породи́вшую вы́: я́ко еди́нъ бѣ́, и призвáхъ егó, и благослови́хъ егó, и возлюби́хъ егó, и умнóжихъ егó.
И тебé ны́нѣ утѣ́шу, Сióне, и утѣ́шихъ вся́ пусты́ни егó, и постáвлю пусты́ню егó я́ко рáй, и я́же ко зáпадомъ егó áки рáй Госпóдень: рáдость и весéлiе обря́щутъ въ нéмъ, исповѣ́данiе и глáсъ хвалéнiя.
Послýшайте менé, лю́дiе мои́, послýшайте, и цáрiе, ко мнѣ́ внуши́те: я́ко закóнъ от менé изы́детъ, и сýдъ мóй во свѣ́тъ язы́комъ.
Приближáется скóро прáвда моя́, и изы́детъ я́ко свѣ́тъ спасéнiе моé, и на мы́шцу мою́ язы́цы надѣ́ятися бýдутъ: менé óстрови ожидáти и на мы́шцу мою́ уповáти бýдутъ.
Воздви́гните на нéбо óчи вáши и воззри́те на зéмлю дóлу, понéже нéбо я́ко ды́мъ утверди́ся, и земля́ я́ко ри́за обетшáетъ, живýщiи же на земли́ я́коже сiя́ изóмрутъ, спасéнiе же моé во вѣ́къ бýдетъ, и прáвда моя́ не оскудѣ́етъ.
Послýшайте менé, вѣ́дящiи сýдъ, лю́дiе мои́, и́мже закóнъ мóй въ сéрдцы вáшемъ, не бóйтеся укорéнiя человѣ́ча и похулéнiю и́хъ не покаря́йтеся.
Я́коже бо ри́за снѣдéна бýдетъ врéменемъ, и я́ко сукнó изъя́стся мольми́, прáвда же моя́ во вѣ́ки бýдетъ и спасéнiе моé въ рóды родóвъ.
Востáни, востáни, Иерусали́ме, и облецы́ся во крѣ́пость мы́шцы твоея́, востáни я́ко въ начáлѣ днé, я́ко рóдъ вѣ́ка: не ты́ ли еси́ побѣди́лъ гóрдаго и растóргнулъ змíа?
Не ты́ и еси́ опустошáяй мóре, вóду бéздны мнóгу? положи́вый глубины́ морскíя пýть прохóда изъя́тымъ и избáвленымъ?
Гóсподемъ бо возвратя́тся и прiи́дутъ въ Сióнъ съ рáдостiю и со весéлiемъ вѣ́чнымъ: на главѣ́ бо и́хъ весéлiе и хвалá, и рáдость прiи́метъ я́: отбѣжé болѣ́знь и печáль и воздыхáнiе.
А́зъ éсмь, áзъ éсмь утѣшáяй тя́: разумѣ́й, ктó сы́й убоя́лся еси́ человѣ́ка смéртна и сы́на человѣ́ча, и́же я́ко травá изсхóша,
и забы́лъ еси́ Бóга создáвшаго тя́, сотвóршаго нéбо и основáвшаго зéмлю: и боя́лся еси́ при́сно во вся́ дни́ лицá я́рости стужáющаго тебѣ́: кáко бо восхотѣ́ взя́ти тя́, и ны́нѣ гдѣ́ я́рость стужáющаго тебѣ́?
Внегдá бо спасти́ся тебѣ́, не стáнетъ, нижé умéдлитъ:
я́ко áзъ Бóгъ твóй, возмущáяй мóре и творя́й шýмъ волнáмъ егó: Госпóдь Саваóѳъ и́мя мнѣ́.
Положý словесá моя́ во устá твоя́ и подъ сѣ́нiю руки́ моея́ покры́ю тя́, éюже постáвихъ нéбо и основáхъ зéмлю: и речéтъ Сióну: лю́дiе мои́ естé вы́.
Востáни, востáни, воскрéсни́, Иерусали́ме, испи́вый чáшу я́рости от руки́ Госпóдни: чáшу бо падéнiя, фiáлъ я́рости испи́лъ и истощи́лъ еси́,
и не бы́сть утѣшáяй тебé от всѣ́хъ чáдъ твои́хъ, я́же роди́лъ еси́, и не бы́сть подъе́млющаго руки́ твоея́, нижé от всѣ́хъ сынóвъ твои́хъ, и́хже вознéслъ еси́.
Двá сiя́ проти́вна тебѣ́, ктó сожалѣ́етъ тебѣ́? падéнiе и сокрушéнiе, глáдъ и мéчь, ктó утѣ́шитъ тя́?
Сы́нове твои́ обнищáвшiи, сѣдя́ще на краи́ вся́каго исхóда, я́ко свéкла недоварéная, испóлнени я́рости Госпóдни, разслáблени Гóсподемъ Бóгомъ.
Сегó рáди слы́ши, смирéнный и упи́выйся не винóмъ:
тáко глагóлетъ Госпóдь Бóгъ судя́й лю́демъ свои́мъ: сé, взя́хъ от руки́ твоея́ чáшу падéнiя, фiáлъ я́рости моея́, и не приложи́ши ксемý пи́ти ея́:
и вложý ю́ въ рýцѣ преоби́дѣвшихъ тя́ и смири́вшихъ тя́, и́же рекóша души́ твоéй: преклони́ся, да минéмъ: и положи́лъ еси́ рáвно земли́ плещы́ твоя́ отвнѣ́ мимоходя́щымъ.
Востáни, востáни, Сióне, облецы́ся во крѣ́пость твою́, Сióне, и ты́ облецы́ся во слáву твою́, Иерусали́ме, грáде святы́й, ктомý не приложи́тъ проити́ сквозѣ́ тя́ необрѣ́занный и нечи́стый.
Истряси́ прáхъ и востáни, ся́ди, Иерусали́ме, совлецы́ ýзу вы́и твоея́, плѣнéная дщи́ Сióня.
Я́ко сiя́ глагóлетъ Госпóдь: тýне прóдани бы́сте, и не сребрóмъ избáвитеся.
Тáко глагóлетъ Госпóдь: во Еги́петъ снидóша лю́дiе мои́ прéжде, éже пришéлцемъ бы́ти тáмо, и во Ассирíю нýждею отведóшася.
И ны́нѣ чтó здѣ́ естé? сiя́ глагóлетъ Госпóдь: я́ко взя́шася лю́дiе мои́ тýне, чуди́теся и плáчитеся. Тáко глагóлетъ Госпóдь: вáсъ рáди при́сно и́мя моé хýлится во язы́цѣхъ.
Сегó рáди познáютъ лю́дiе мои́ и́мя моé въ тóй дéнь, я́ко áзъ éсмь сáмъ глагóляй, тý éсмь.
Кóль красны́ на горáхъ нóги благовѣствýющихъ ми́ръ, благовѣствýющихъ благáя, я́ко слы́шано сотворю́ спасéнiе твоé, глагóля: Сióне, воцари́тся Бóгъ твóй.
Я́ко глáсъ храня́щихъ тя́ вознесéся, и глáсомъ вкýпѣ возрáдуются: я́ко óчи ко очесéмъ воззря́тъ, егдá поми́луетъ Госпóдь Сióна.
Да отры́гнутъ весéлiе вкýпѣ пусты́ни Иерусали́мскiя, я́ко поми́лова Госпóдь людíй свои́хъ и избáви Иерусали́ма:
и откры́етъ Госпóдь мы́шцу свою́ святýю предъ всѣ́ми язы́ки, и ýзрятъ вси́ концы́ земли́ спасéнiе, éже от Бóга нáшего.
Отступи́те, отступи́те, изыди́те отсю́ду и нечистотѣ́ не прикасáйтеся, изыди́те от среды́ егó, отлучи́теся, нося́щiи сосýды Госпóдни:
я́ко не съ мятéжемъ изы́дете, нижé убѣжáнiемъ пóйдете: пóйдетъ бо предъ вáми Госпóдь, и собирáяй вы́ Госпóдь Бóгъ Изрáилевъ.
Сé, уразумѣ́етъ óтрокъ мóй и вознесéтся и прослáвится зѣлó.
Я́коже ужáснутся о тебѣ́ мнóзи, тáко обезслáвится от человѣ́къ ви́дъ твóй, и слáва твоя́ от сынóвъ человѣ́ческихъ.
Тáко удивя́тся язы́цы мнóзи о нéмъ, и заградя́тъ цáрiе устá своя́: я́ко, и́мже не возвѣсти́ся о нéмъ, ýзрятъ, и и́же не слы́шаша, уразумѣ́ютъ.
Гóсподи, ктó вѣ́рова слýху нáшему, и мы́шца Госпóдня комý откры́ся?
Возвѣсти́хомъ, я́ко отрочá предъ ни́мъ я́ко кóрень въ земли́ жáждущей, нѣ́сть ви́да емý, нижé слáвы: и ви́дѣхомъ егó, и не имя́ше ви́да, ни добрóты:
но ви́дъ егó безчéстенъ, умáленъ пáче всѣ́хъ сынóвъ человѣ́ческихъ: человѣ́къ въ я́звѣ сы́й и вѣ́дый терпѣ́ти болѣ́знь, я́ко отврати́ся лицé егó, безчéстно бы́сть, и не вмѣни́ся.
Сéй грѣхи́ нáшя нóситъ и о нáсъ болѣ́знуетъ, и мы́ вмѣни́хомъ егó бы́ти въ трудѣ́ и въ я́звѣ от Бóга и во озлоблéнiи.
Тóй же я́звенъ бы́сть за грѣхи́ нáшя и мýченъ бы́сть за беззакóнiя нáша, наказáнiе ми́ра нáшего на нéмъ, я́звою егó мы́ исцѣлѣ́хомъ.
Вси́ я́ко óвцы заблуди́хомъ: человѣ́къ от пути́ своегó заблуди́, и Госпóдь предадé егó грѣ́хъ рáди нáшихъ.
И тóй, занé озлóбленъ бы́сть, не отверзáетъ ýстъ свои́хъ: я́ко овчá на заколéнiе ведéся, и я́ко áгнецъ предъ стригýщимъ егó безглáсенъ, тáко не отверзáетъ ýстъ свои́хъ.
Во смирéнiи егó сýдъ егó взя́тся: рóдъ же егó ктó исповѣ́сть? я́ко взéмлется от земли́ живóтъ егó, рáди беззакóнiй людíй мои́хъ ведéся на смéрть.
И дáмъ лукáвыя вмѣ́сто погребéнiя егó и богáтыя вмѣ́сто смéрти егó: я́ко беззакóнiя не сотвори́, нижé обрѣ́теся лéсть во устѣ́хъ егó.
И Госпóдь хóщетъ очи́стити егó от я́звы: áще дáстся о грѣсѣ́, душá вáша ýзритъ сѣ́мя долгоживóтное.
И хóщетъ Госпóдь рукóю своéю отъя́ти болѣ́знь от души́ егó, яви́ти емý свѣ́тъ и создáти рáзумомъ, оправдáти прáведнаго блáго служáща мнóгимъ, и грѣхи́ и́хъ тóй понесéтъ.
Сегó рáди тóй наслѣ́дитъ мнóгихъ и крѣ́пкихъ раздѣли́тъ коры́сти, занé преданá бы́сть на смéрть душá егó, и со беззакóнными вмѣни́ся, и тóй грѣхи́ мнóгихъ вознесé и за беззакóнiя и́хъ прéданъ бы́сть.
Возвесели́ся, неплóды, нераждáющая, возгласи́ и возопíй, нечревоболѣ́вшая, я́ко мнóга чáда пусты́я пáче, нéжели имýщiя мýжа.
Речé бо Госпóдь: разшири́ мѣ́сто кýщи твоея́ и покрóвовъ твои́хъ, водрузи́, не пощади́, продолжи́ ýжя твоя́ и кóлiе твоé укрѣпи́,
ещé на дéсно и на лѣ́во простри́: и сѣ́мя твоé язы́ки наслѣ́дитъ, и грáды опустѣ́вшыя насели́ши.
Не бóйся, я́ко посрáмлена еси́, нижé устыди́ся, я́ко укорéна еси́: понéже срамотý вѣ́чную забýдеши и укори́зны вдовствá твоегó не помянéши ктомý.
Я́ко Госпóдь творя́й тя́, Госпóдь Саваóѳъ и́мя емý: и избáвивый тя́, святы́й Бóгъ Изрáилевъ, всéй земли́ прозовéтся.
Не я́ко женý остáвлену и малодýшну призвá тя Госпóдь, нижé я́ко женý изъ ю́ности возненави́дѣну, речé Бóгъ твóй.
На врéмя мáло остáвихъ тя́, а съ ми́лостiю вели́кою поми́лую тя́:
во я́рости мáлѣ отврати́хъ лицé моé от тебé, но ми́лостiю вѣ́чною поми́лую тя́, речé избáвивый тя́ Госпóдь.
От воды́, я́же при нóи, сié ми́ éсть, я́коже кля́хся емý во врéмя óно на зéмлю, не разгнѣ́ватися о тебѣ́ ктомý, нижé во прещéнiи твоéмъ
гóры престáвити, и хóлми твои́ не предви́гнутся: тáко нижé, я́же от менé къ тебѣ́, ми́лость оскудѣ́етъ, нижé завѣ́тъ ми́ра твоегó престáвится: речé бо ми́лостивъ къ тебѣ́ Госпóдь.
Смирéнная и колéблемая не имѣ́ла еси́ утѣшéнiя: сé, áзъ уготовля́ю тебѣ́ áнѳраксъ кáмень твóй и на основáнiе твоé сапфи́ръ:
и положý забрáла твоя́ Иáсписъ, и вратá твоя́ кáменiе кристáлла, и ограждéнiе твоé кáменiе избрáнное,
и вся́ сы́ны твоя́ научéны Бóгомъ, и во мнóзѣ ми́рѣ чáда твоя́.
И прáвдою возгради́шися: удали́ся от непрáведнаго, и не убои́шися, и трéпетъ не прибли́жится тебѣ́.
Сé, пришéлцы прiи́дутъ къ тебѣ́ мнóю и вселя́тся у тебé и къ тебѣ́ прибѣ́гнутъ.
Сé, áзъ создáхъ тя́, не я́коже кузнéцъ раздувáяй ýглiе и износя́ сосýдъ на дѣ́ло: áзъ же создáхъ тя́ не на пáгубу, éже истли́ти.
Вся́къ сосýдъ содѣ́ланъ на тя́ не благопоспѣшý, и вся́къ глáсъ, и́же на тя́ востáнетъ на прю́, одолѣ́еши и́мъ всѣ́мъ: пови́ннiи же твои́ бýдутъ въ нéмъ. Е́сть наслѣ́дiе служáщымъ Гóсподеви, и вы́ бýдете мнѣ́ прáведни, глагóлетъ Госпóдь.
Жáждущiи, иди́те на вóду, и ели́цы не и́мате сребрá, шéдше купи́те, и яди́те [и пíйте] безъ сребрá и цѣны́ винó и тýкъ.
Вскýю цѣнитé сребрó не въ хлѣ́бы, и трýдъ вáшъ не въ сы́тость? Послýшайте менé, и снѣ́сте благáя, и наслади́тся во благи́хъ душá вáша.
Внемли́те уши́ма вáшима и послѣ́дуйте путéмъ мои́мъ: послýшайте менé, и живá бýдетъ во благи́хъ душá вáша, и завѣщáю вáмъ завѣ́тъ вѣ́ченъ, преподóбная дави́дова вѣ́рная.
Сé, свидѣ́телство во язы́цѣхъ дáхъ егó, кня́зя и повели́теля язы́комъ.
Сé, язы́цы, и́же не вѣ́дяху тебé, призовýтъ тя́, и лю́дiе, и́же не познáша тебé, ко тебѣ́ прибѣ́гнутъ рáди Гóспода Бóга твоегó, святáго Изрáилева, я́ко прослáви тя́.
Взыщи́те Гóспода, и внегдá обрѣсти́ вáмъ тогó, призови́те: егдá же прибли́жится къ вáмъ,
да остáвитъ нечести́вый пути́ своя́, и мýжъ беззакóненъ совѣ́ты своя́, и да обрати́тся ко Гóсподу, и поми́лованъ бýдетъ, я́ко попремнóгу остáвитъ грѣ́хи вáшя.
Не сýть бо совѣ́ти мои́ я́коже совѣ́ти вáши, нижé я́коже путié вáши путié мои́, глагóлетъ Госпóдь.
Но я́коже отстои́тъ нéбо от земли́, тáко отстои́тъ пýть мóй от путíй вáшихъ, и помышлéнiя вáша от мы́сли моея́.
Я́коже бо áще сни́детъ дóждь или́ снѣ́гъ съ небесé, и не возврати́тся, дóндеже напои́тъ зéмлю, и роди́тъ, и прозя́бнетъ, и дáстъ сѣ́мя сѣ́ющему и хлѣ́бъ въ снѣ́дь:
тáко бýдетъ глагóлъ мóй, и́же áще изы́детъ изъ ýстъ мои́хъ, не возврати́тся ко мнѣ́ тóщь, дóндеже соверши́тъ [вся́], ели́ка восхотѣ́хъ, и поспѣшý пути́ твоя́ и зáповѣди моя́.
Со весéлiемъ бо изы́дете и съ рáдостiю научитéся: гóры бо и хóлми возскáчутъ ждýще вáсъ съ рáдостiю, и вся́ древесá сéлная восплéщутъ вѣ́твьми:
и вмѣ́сто дрáчiя взы́детъ кипари́съ, и вмѣ́сто кропи́вы взы́детъ мирси́на: и бýдетъ Госпóдь во и́мя и во знáменiе вѣ́чное, и не оскудѣ́етъ.
Сiя́ глагóлетъ Госпóдь: сохрани́те сýдъ и сотвори́те прáвду, прибли́жися бо спасéнiе моé прiити́ и ми́лость моя́ откры́тися.
Блажéнъ мýжъ творя́й сiя́, и человѣ́къ держáйся и́хъ, и храня́й суббóты не оскверня́ти, и блюды́й рýцѣ свои́ не твори́ти непрáвды.
Да не глагóлетъ иноплемéнникъ приложи́выйся ко Гóсподеви: едá отлучи́тъ мя́ Госпóдь от людíй свои́хъ? и да не глагóлетъ кáженикъ, я́ко áзъ éсмь дрéво сýхо.
Сiя́ глагóлетъ Госпóдь кáженикомъ: ели́цы сохраня́тъ суббóты моя́ и изберýтъ, я́же áзъ хощý, и содержáтъ завѣ́тъ мóй,
дáмъ и́мъ въ домý моéмъ и во огрáдѣ моéй мѣ́сто имени́то, лýчшее от сынóвъ и дщéрей, и́мя вѣ́чно дáмъ и́мъ, и не оскудѣ́етъ:
и иноплемéнникомъ приложи́вшымся Гóсподеви рабóтати емý и люби́ти и́мя Госпóдне, éже бы́ти емý въ рабы́ и рабы́ни, и вся́ снабдя́щыя суббóты моя́ не оскверня́ти и держáщыя завѣ́тъ мóй,
введý я́ въ гóру святýю мою́ и возвеселю́ я́ въ домý моли́твы моея́: всесожжéнiя и́хъ и жéртвы и́хъ бýдутъ прiя́тны на трéбницѣ моéмъ: дóмъ бо мóй дóмъ моли́твы наречéтся всѣ́мъ язы́комъ,
глагóлетъ Госпóдь, собирáяй разсѣ́яныя Изрáилевы, я́ко соберý къ немý собóръ.
Вси́ звѣ́рiе ди́вiи, прiиди́те, яди́те, вси́ звѣ́рiе дубрáвнiи.
Ви́дите, я́ко вси́ ослѣпóша, не разумѣ́ша смы́слити, вси́ пси́ нѣмíи не возмóгутъ лáяти, ви́дяще сны́ на лóжи, лю́бяще дремáти,
и пси́ безстýднiи душéю, не вѣ́дяще сы́тости: и сýть лукáви, не вѣ́дяще смы́сла, вси́ путéмъ свои́мъ послѣ́доваша, кíйждо уклони́шася въ лихои́мство своé, от пéрваго и до послѣ́дняго.
Прiиди́те, да вóзмемъ винó и напóлнимся пiя́нства, и бýдетъ я́ко днéсь, тáко и заýтра, и мнóго мнóжае.
Comments