Изъяснение книги Иова
- отец Даниил
- 12 апр. 2017 г.
- 50 мин. чтения
Ниже представлены звуковые изъяснения священником Даниилом Сысоевым Книги Иова, проходившие в 2005 году на Крутицком патриаршем подворье. Книга Иова - одна из самых древних и загадочных книг Библии. Ей посвящено множество богословских и философских исследований, до сих пор по ее поводу не утихают споры. За что страдает праведник, в чем заблуждаются обличающие его друзья, какую тайну открывает Иову Всевышний?
Беседы по текстам Священного Писания Ветхого и Нового Заветов регулярно проходят с 1996 года — за это время тысячи людей услышали православное толкование Священных текстов, многие обратились от иноверия к истинному евангельскому учению, хранимому Православной Церковью, многие осознали красоту и глубину богодухновенных текстов.
Человѣ́къ нѣ́кiй бя́ше во странѣ́ авситидíйстѣй, емýже и́мя и́овъ, и бѣ́ человѣ́къ о́нъ и́стиненъ, непорóченъ, прáведенъ, богочести́въ, удаля́яся от вся́кiя лукáвыя вéщи.
Бы́ша же емý сы́нове сéдмь и дщéри три́.
И бя́ху скóти егó, овéцъ сéдмь ты́сящъ, велблю́довъ три́ ты́сящы, супрýгъ волóвъ пя́ть сóтъ, и осли́цъ пасóмыхъ пя́ть сóтъ, и слýгъ мнóго зѣлó, и дѣлá вéлiя бя́ху емý на земли́: и бѣ́ человѣ́къ óный благорóднѣйшiй сýщихъ от востóкъ сóлнца.
Сходя́щеся же сы́нове егó дрýгъ ко дрýгу, творя́ху пи́ръ на кíйждо дéнь, споéмлюще вкýпѣ и три́ сестры́ своя́, я́сти и пи́ти съ ни́ми.
И егдá скончавáшеся днíе пи́ра, посылáше и́овъ и очищáше и́хъ, востая́ заýтра, и приношáше о ни́хъ жéртвы по числý и́хъ, и телцá еди́наго о грѣсѣ́ о душáхъ и́хъ. глагóлаше бо и́овъ: нéгли когдá сы́нове мои́ согрѣши́ша и въ мы́сли своéй злáя помы́слиша проти́ву Бóга? тáко ýбо творя́ше и́овъ вся́ дни́.
И бы́сть я́ко дéнь сéй, и сé, прiидóша áнгели Бóжiи предстáти предъ Гóсподемъ, и дiáволъ прiи́де съ ни́ми.
И речé Госпóдь дiáволу: откýду пришéлъ еси́? и отвѣщáвъ дiáволъ Гóсподеви, речé: обшéдъ зéмлю и прошéдъ поднебéсную, сé, éсмь.
И речé емý Госпóдь: вня́лъ ли еси́ мы́слiю твоéю на рабá моегó и́ова? занé нѣ́сть я́ко óнъ на земли́: человѣ́къ непорóченъ, и́стиненъ, богочести́въ, удаля́яся от вся́кiя лукáвыя вéщи.
Отвѣщá же дiáволъ и речé предъ Гóсподемъ:
едá тýне и́овъ чти́тъ Гóспода? не ты́ ли огради́лъ еси́ внѣ́шняя егó и внýтренняя дóму егó, и я́же внѣ́ всѣ́хъ сýщихъ егó о́крестъ? дѣлá же рукý егó благослови́лъ еси́ и скоты́ егó мнóги сотвори́лъ еси́ на земли́:
но посли́ рýку твою́ и косни́ся всѣ́хъ, я́же и́мать, áще не въ лицé тя благослови́тъ,
Тогдá речé Госпóдь дiáволу: сé, вся́, ели́ка сýть емý, даю́ въ рýку твою́, но самогó да не кóснешися. и изы́де дiáволъ от Гóспода.
И бы́сть я́ко дéнь сéй, сы́нове и́овлевы и дщéри егó пiя́ху винó въ домý брáта своегó старѣ́йшаго.
И сé, вѣ́стникъ прiи́де ко и́ову и речé емý: супрýзи волóвъ оря́ху, и осли́цы пася́хуся бли́зъ и́хъ:
и пришéдше плѣни́телiе плѣни́ша и́хъ и óтроки изби́ша мечéмъ, и спасóхся áзъ еди́нъ и прiидóхъ возвѣсти́ти тебѣ́.
Ещé семý глагóлющу, прiи́де и́нъ вѣ́стникъ и речé ко и́ову: óгнь спадé съ небесé и пожжé óвцы и пáстыри поядé подóбнѣ, спасóхся же áзъ еди́нъ и прiидóхъ возвѣсти́ти тебѣ́.
Ещé семý глагóлющу, прiи́де и́нъ вѣ́стникъ и речé ко и́ову: кóнницы сотвори́ша начáлства три́ и окружи́ша велблю́ды и плѣни́ша и́хъ и óтроки изби́ша мечьми́, спасóхся же áзъ еди́нъ и прiидóхъ возвѣсти́ти тебѣ́.
Ещé семý глагóлющу, и́нъ вѣ́стникъ прiи́де, глагóля и́ову: сынóмъ твои́мъ и дщéремъ твои́мъ ядýщымъ и пiю́щымъ у брáта своегó старѣ́йшаго,
внезáпу вѣ́тръ вели́къ нáйде от пусты́ни и коснýся четы́ремъ углóмъ хрáмины, и падé хрáмина на дѣ́ти твоя́, и скончáшася: спасóхся же áзъ еди́нъ и прiидóхъ возвѣсти́ти тебѣ́.
Тáко [услы́шавъ] и́овъ, востáвъ растерзá ри́зы своя́ и острижé власы́ главы́ своея́, [и посы́па пéрстiю главý свою́,] и пáдъ на зéмлю, поклони́ся [Гóсподеви]
и речé: сáмъ нáгъ изыдóхъ от чрéва мáтере моея́, нáгъ и отидý тáмо: Госпóдь дадé, Госпóдь отъя́тъ: я́ко Гóсподеви извóлися, тáко бы́сть: бýди и́мя Госпóдне благословéно [во вѣ́ки].
Во всѣ́хъ си́хъ приключи́вшихся емý ничтóже согрѣши́ и́овъ предъ Гóсподемъ, [нижé устнáма свои́ма,] и не дадé безýмiя Бóгу.
Бы́сть же я́ко дéнь сéй, и прiидóша áнгели Бóжiи предстáти предъ Гóсподемъ, и дiáволъ прiи́де посредѣ́ и́хъ предстáти предъ Гóсподемъ.
И речé Госпóдь дiáволу: откýду ты́ грядéши? тогдá речé дiáволъ предъ Гóсподемъ: прошéдъ поднебéсную и обшéдъ всю́ зéмлю, прiидóхъ.
И речé Госпóдь ко дiáволу: вня́лъ ли еси́ ýбо [мы́слiю твоéю] рабý моемý и́ову? я́ко нѣ́сть таковá от сýщихъ на земли́: человѣ́къ незлóбивъ, и́стиненъ, непорóченъ, богочести́въ, удаля́яся от вся́каго злá, ещé же придержи́тся незлóбiя: ты́ же рéклъ еси́ имѣ́нiя егó погуби́ти вотщé.
Отвѣщáвъ же дiáволъ Гóсподеви, речé: кóжу за кóжу, и вся́, ели́ка и́мать человѣ́къ, дáстъ за дýшу свою́:
обáче посли́ рýку твою́ и косни́ся костéмъ егó и плóти егó, áще не въ лицé тя благослови́тъ.
Речé же Госпóдь дiáволу: сé, предаю́ ти́ егó, тóкмо дýшу егó соблюди́.
Изы́де же дiáволъ от лицá Госпóдня и порази́ и́ова гнóемъ лю́тымъ от ногý дáже до главы́.
И взя́ [и́овъ] чрéпъ, да острогáетъ гнóй свóй, и тóй сѣдя́ше на гнóищи внѣ́ грáда.
Врéмени же мнóгу минýвшу, *речé къ немý женá егó: докóлѣ терпи́ши глагóля:
сé, пождý врéмя ещé мáло, чáя надéжди спасéнiя моегó?
сé бо, потреби́ся от земли́ пáмять твоя́, сы́нове твои́ и дщéри, моегó чрéва болѣ́зни и труды́, и́миже вотщé труди́хся съ болѣ́зньми:
ты́ же сáмъ въ гнои́ червéй сѣди́ши, обнощевáя внѣ́ безъ покрóва,
и áзъ скитáющися и служáщи, мѣ́сто от мѣ́ста преходя́щи, и дóмъ от дóму, ожидáющи сóлнца, когдá зáйдетъ, да почíю от трудóвъ мои́хъ и от болѣ́зней, я́же мя́ ны́нѣ обдержáтъ:
но рцы́ глагóлъ нѣ́кiй ко Гóсподу и умри́.
О́нъ же воззрѣ́въ речé къ нéй: вскýю я́ко еди́на от безýмныхъ жéнъ возглагóлала еси́? áще благáя прiя́хомъ от руки́ Госпóдни, злы́хъ ли не стерпи́мъ? во всѣ́хъ си́хъ приключи́вшихся емý, ничи́мже согрѣши́ и́овъ устнáма предъ Бóгомъ [и не дадé безýмiя Бóгу].
Услы́шавше же трié дрýзiе егó вся́ злáя нашéдшая нáнь, прiидóша кíйждо от своея́ страны́ къ немý: Елифáзъ Ѳемáнскiй цáрь, Валдáдъ Савхéйскiй власти́тель, Софáръ Минéйскiй цáрь: и прiидóша къ немý единодýшно утѣ́шити и посѣти́ти егó.
Уви́дѣвше же егó издалéча, не познáша, и возопи́вше глáсомъ вéлiимъ восплáкашася, растерзáвше кíйждо одéжду свою́ и посы́павше пéрстiю главы́ своя́:
сѣдѣ́ша при нéмъ сéдмь днíй и сéдмь нощéй, и никтóже от ни́хъ возглагóла къ немý словесé: ви́дяху бо я́зву лю́ту сýщу и вели́ку зѣлó.
Посéмъ отвéрзе и́овъ устá своя́ и прокля́ дéнь свóй,
глагóля:
да поги́бнетъ дéнь, въ óньже роди́хся, и нóщь óная, въ ню́же рѣ́ша: сé, мýжескъ пóлъ:
тá нóщь бýди тмá, и да не взы́щетъ ея́ Госпóдь свы́ше, нижé да прiи́детъ на ню́ свѣ́тъ,
и да прiи́метъ ю́ тмá и сѣ́нь смéртная, да прiи́детъ на ню́ сумрáкъ: прóклятъ бýди дéнь тóй
и нóщь óная: да пости́гнетъ ю́ тмá, да не бýдетъ во днéхъ лѣ́та, нижé да вчи́слится во днéхъ мéсяцей:
но нóщь óная да бýдетъ болѣ́знь, и да не прiи́детъ на ню́ весéлiе и рáдость,
но да прокленéтъ ю́ проклинáяй тóй дéнь, и́же и́мать одолѣ́ти вели́каго ки́та:
да помéркнутъ звѣ́зды тоя́ нóщи, да ожидáетъ и на свѣ́тъ да не прiи́детъ, и да не ви́дитъ денни́цы возсiявáющiя,
я́ко не затвори́ врáтъ чрéва мáтере моея́: отъя́ла бо бы́ болѣ́знь от óчiю моéю:
почтó бо во утрóбѣ не умрóхъ? изъ чрéва же изшéдъ, и áбiе не погибóхъ?
почтó же мя́ прiя́ша на колѣ́на? почтó же ссáхъ сосцá?
ны́нѣ ýбо уснýвъ умолчáлъ бы́хъ, уснýвъ же почи́лъ бы́хъ
со царьми́ и совѣ́тники земли́, и́же хваля́хуся орýжiи,
или́ со кня́зи, и́мже мнóго злáта, и́же напóлниша дóмы своя́ сребрá,
или́ я́коже и́звергъ излáзяй изъ ложéснъ мáтернихъ, или́ я́коже младéнцы, и́же не ви́дѣша свѣ́та:
тáмо нечести́вiи утоли́ша я́рость гнѣ́ва, тáмо почи́ша претруждéннiи тѣ́ломъ,
вкýпѣ же въ вѣ́цѣ сéмъ бы́вшiи не слы́шатъ глáса собирáющаго дáнь:
мáлъ и вели́къ тáмо éсть, и рáбъ не боя́йся господи́на своегó:
почтó бо дáнъ éсть сýщымъ въ гóрести свѣ́тъ и сýщымъ въ болѣ́знехъ душáмъ живóтъ,
и́же желáютъ смéрти и не получáютъ, и́щуще я́коже сокрóвища,
обрáдовани же бывáютъ, áще улучáтъ [смéрть]?
смéрть бо мýжу покóй, егóже пýть сокровéнъ éсть, затвори́ бо Бóгъ о́крестъ егó:
прéжде бо брáшенъ мои́хъ воздыхáнiе ми́ прихóдитъ, слезю́ же áзъ одержи́мь стрáхомъ,
стрáхъ бо, егóже ужасáхся, прiи́де ми́, и егóже боя́хся, срѣ́те мя́:
ни умири́хся, нижé умолчáхъ, нижé почи́хъ, и нáйде ми́ гнѣ́въ.
Отвѣщá же Елифáзъ Ѳемани́тинъ, глагóля:
едá мнóжицею глагóлано ти́ бы́сть въ трудѣ́? тя́жести же глагóлъ твои́хъ ктó стерпи́тъ?
áще бо ты́ научи́лъ еси́ мнóги и рýцѣ немощны́хъ утѣ́шилъ еси́,
немощны́я же воздви́глъ еси́ словесы́, колѣ́номъ же немощны́мъ си́лу обложи́лъ еси́.
Ны́нѣ же прiи́де на тя́ болѣ́знь и коснýся тебé, ты́ же возмути́лся еси́.
Едá стрáхъ твóй éсть не въ безýмiи, и надéжда твоя́ и злóба пути́ твоегó?
Помяни́ ýбо, ктó чи́стъ сы́й поги́бе? или́ когдá и́стиннiи вси́ изъ кóрене погибóша?
Я́коже ви́дѣхъ орю́щихъ неподóбная, сѣ́ющiи же я́ болѣ́зни пóжнутъ себѣ́,
от повелѣ́нiя Госпóдня поги́бнутъ, от Дýха же гнѣ́ва егó изчéзнутъ.
Си́ла львóва, глáсъ же льви́цы, весéлiе же змиéвъ угасé:
мраволéвъ поги́бе, занéже не имѣ́яше брáшна, ски́мни же львóвы остáвиша дрýгъ дрýгу.
А́ще же глагóлъ кíй и́стиненъ бѣ́ во словесѣ́хъ твои́хъ, ни кóеже бы́ от си́хъ тя́ срѣ́тило злó. не прiи́метъ ли ýхо моé преди́вныхъ от негó?
Стрáхомъ же и глáсомъ нощны́мъ, напáдающь стрáхъ на человѣ́ки,
ýжасъ же мя́ срѣ́те и трéпетъ, и зѣлó кóсти моя́ стрясé:
и дýхъ на лицé ми нáйде: устраши́шася же ми́ власи́ и плóти,
востáхъ и не разумѣ́хъ, ви́дѣхъ, и не бѣ́ обли́чiя предъ очи́ма мои́ма, но тóкмо дýхъ ти́хъ и глáсъ слы́шахъ:
чтó бо? едá чи́стъ бýдетъ человѣ́къ предъ Бóгомъ? или́ въ дѣ́лѣхъ свои́хъ безъ порóка мýжъ?
áще рабóмъ свои́мъ не вѣ́руетъ, и во áнгелѣхъ свои́хъ стрóпотно чтó усмотрѣ́,
живýщихъ же въ брéнныхъ хрáминахъ, от ни́хже и мы́ сáми от тогóжде брéнiя есмы́, порази́, я́коже мóлiе,
и от ýтра дáже до вéчера ктомý не сýть: занéже не могóша себѣ́ помощи́, погибóша:
дхнý бо на ня́, и изсхóша, и понéже не имѣ́яху премýдрости, погибóша.
Призови́ же, áще ктó тя услы́шитъ, или́ áще когó от святы́хъ áнгелъ ýзриши.
Безýмнаго бо убивáетъ гнѣ́въ, заблýждшаго же умерщвля́етъ рвéнiе.
А́зъ же ви́дѣхъ безýмныхъ укореня́ющихся, но áбiе поядéно бы́сть и́хъ жили́ще.
Далéче да бýдутъ сы́нове и́хъ от спасéнiя, и да сотрýтся при двéрехъ хýждшихъ, и не бýдетъ изъимáяй.
Я́же бо они́ собрáша, прáведницы поядя́тъ, сáми же от зóлъ не изъя́ти бýдутъ: измождéнна бýди крѣ́пость и́хъ.
Не и́мать бо от земли́ изы́ти трýдъ, ни от гóръ прозя́бнути болѣ́знь:
но человѣ́къ раждáется на трýдъ, птенцы́ же сýповы высóко паря́тъ.
Обáче же áзъ помолю́ся богови, Гóспода же всѣ́хъ Влады́ку призовý,
творя́щаго вéлiя и неизслѣ́димая, слáвная же и изря́дная, и́мже нѣ́сть числá:
даю́щаго дóждь на зéмлю, посылáющаго вóду на поднебéсную:
вознося́щаго смирéнныя на высотý и поги́бшыя воздвизáющаго во спасéнiе:
расточáющаго совѣ́ты лукáвыхъ, да не сотворя́тъ рýцѣ и́хъ и́стины.
Уловля́яй премýдрыхъ въ мýдрости и́хъ, совѣ́тъ же ковáрныхъ разори́.
Во дни́ обы́метъ и́хъ тмá, въ полýдне же да ося́жутъ я́коже въ нощи́,
и да поги́бнутъ на брáни: немощны́й же да изы́детъ изъ руки́ си́льнаго.
Бýди же немощнóму надéжда, непрáведнаго же устá да заградя́тся.
Блажéнъ же человѣ́къ, егóже обличи́ Бóгъ, наказáнiя же вседержи́телева не отвращáйся:
тóй бо болѣ́ти твори́тъ и пáки возставля́етъ: порази́, и рýцѣ егó изцѣля́тъ:
шести́жды от бѣ́дъ и́зметъ тя́, въ седмѣ́мъ же не кóснеттися злó:
во глáдѣ избáвитъ тя́ от смéрти, на брáни же изъ руки́ желѣ́за изрѣши́тъ тя́:
от бичá язы́ка скры́етъ тя́, и не убои́шися от зóлъ находя́щихъ:
непрáведнымъ и беззакóннымъ посмѣéшися, от ди́вiихъ же звѣрéй не убои́шися,
занé съ кáменiемъ ди́вiимъ завѣ́тъ твóй: звѣ́рiе бо ди́вiи примиря́тся тебѣ́.
Потóмъ уразумѣ́еши, я́ко въ ми́рѣ бýдетъ дóмъ твóй, жили́ще же хрáмины твоея́ не и́мать согрѣши́ти:
уразумѣ́еши же, я́ко мнóго сѣ́мя твоé, и чáда твоя́ бýдутъ я́ко вéсь злáкъ сéлный:
вни́деши же во грóбъ я́коже пшени́ца созрѣ́лая во врéмя пожáтая, или́ я́коже стóгъ гумнá во врéмя свезéнный.
Сé, сiя́ си́це изслѣ́дихомъ: сiя́ сýть, я́же слы́шахомъ: ты́ же разумѣ́й себѣ́, áще чтó сотвори́лъ еси́.
Отвѣщáвъ же и́овъ, речé:
áще бы ктó вѣ́ся извѣ́силъ гнѣ́въ мóй, болѣ́зни же моя́ взя́лъ бы на мѣ́рило вкýпѣ,
тó пескá морскáго тяжчáйшiи бы́ли бы: но, я́коже мни́тся, словесá моя́ злá сýть.
Стрѣ́лы бо Госпóдни въ тѣ́лѣ моéмъ сýть, и́хже я́рость испивáетъ крóвь мою́: егдá начнý глагóлати, бодýтъ мя́.
Чтó бо? едá вотщé возревéтъ ди́вiй осéлъ, рáзвѣ брáшна прося́? или́ возревéтъ глáсомъ вóлъ, въ я́слехъ имѣ́яй брáшно?
Снѣ́стся ли хлѣ́бъ безъ сóли? или́ éсть вкýсъ во тщи́хъ словесѣ́хъ?
Не мóжетъ бо утиши́тися душá моя́: смрáдъ бо зрю́ брáшна моя́, я́коже воню́ львóву.
А́ще бо дáлъ бы, да прiи́детъ прошéнiе моé, и надéжду мою́ дáлъ бы Госпóдь.
Начéнъ Госпóдь да уязвля́етъ мя́, до концá же да не убiéтъ мя́.
Бýди же ми́ грáдъ грóбъ, на егóже стѣнáхъ скакáхъ въ нéмъ: не пощажý: не солгáхъ бо во словесѣ́хъ святы́хъ Бóга моегó.
Кáя бо крѣ́пость моя́, я́ко терплю́? или́ кóе ми́ врéмя, я́ко терпи́тъ моя́ душá?
едá крѣ́пость кáменiя крѣ́пость моя́? или́ плóти моя́ сýть мѣ́дяны?
или́ не уповáхъ на негó? пóмощь же от менé отступи́,
отречéся от менé ми́лость, посѣщéнiе же Госпóдне презрѣ́ мя.
Не воззрѣ́ша на мя́ бли́жнiи мои́: я́коже потóкъ оскудѣвáяй, или́ я́коже вóлны преидóша мя́:
и́же менé боя́хуся, ны́нѣ нападóша на мя́:
я́коже снѣ́гъ или́ лéдъ смéрзлый, егдá истáетъ теплотѣ́ бы́вшей, не ктомý познавáется, чтó бѣ́:
тáко и áзъ остáвленъ éсмь от всѣ́хъ, погибóхъ же и бездóмокъ бы́хъ:
ви́дите пути́ Ѳемáнскiя, на стези́ Савóнскiя смотря́щiи,
и студá испóлнени бýдутъ на грáды и на имѣ́нiя надѣ́ющiися.
Ны́нѣ же и вы́ наидóсте на мя́ неми́лостивно: ýбо ви́дѣвше мóй стрýпъ убóйтеся.
Чтó бо? едá чтó у вáсъ проси́хъ, или́ вáшея крѣ́пости трéбую,
да спасéте мя́ от врагóвъ, или́ изъ руки́ си́льныхъ избáвите мя́?
Научи́те мя́, áзъ же умолчý: áще чтó погрѣши́хъ, скажи́те ми́.
Но, я́коже мни́тся, злá [сýть] мýжа и́стиннаго словесá, не от вáсъ бо крѣ́пости прошý:
нижé обличéнiе вáше словесы́ мя́ утоли́тъ, нижé бо вѣщáнiя вáшего словéсъ стерплю́.
Обáче я́ко на си́ра напáдаете, наскáчете же на дрýга вáшего.
Ны́нѣ же воззрѣ́въ на ли́ца вáша, не солжý.
Ся́дите ны́нѣ, и да не бýдетъ непрáведно, и пáки ко прáведному сни́дитеся.
И́бо нѣ́сть въ язы́цѣ моéмъ непрáвды, и гортáнь мóйне рáзуму ли поучáется?
Не искушéнiе ли житié человѣ́ку на земли́, и я́коже наéмника повседнéвнаго жи́знь егó?
или́ я́коже рáбъ боя́йся Гóспода своегó и улучи́въ сѣ́нь? или́ я́коже наéмникъ жды́й мзды́ своея́?
тáкожде и áзъ ждáхъ мéсяцы тщы́, нóщи же болѣ́зней даны́ ми́ сýть.
А́ще уснý, глагóлю: когдá дéнь? егдá же востáну, пáки: когдá вéчеръ? испóлненъ же бывáю болѣ́зней от вéчера до ýтра.
Мѣ́сится же моé тѣ́ло въ гнои́ червéй, обливáю же грýдiе земли́, гнóй стружá.
Житié же моé éсть скоря́е бесѣ́ды, поги́бе же во тщéй надéжди.
Помяни́ ýбо, я́ко дýхъ мóй живóтъ, и ктомý не возврати́тся óко моé ви́дѣти благáя.
Не ýзритъ менé óко ви́дящаго мя́: óчи твои́ на мнѣ́, и ктомý нѣ́смь,
я́коже о́блакъ очищéнъ от небесé: áще бо человѣ́къ сни́детъ во áдъ, ктомý не взы́детъ,
ни возврати́тся во свóй дóмъ, нижé и́мать егó познáти ктомý мѣ́сто егó.
У́бо нижé áзъ пощажý ýстъ мои́хъ, возглагóлю въ нýжди сы́й, отвéрзу устá моя́ гóрестiю души́ моея́ сотѣснéнъ.
Едá мóре éсмь, или́ змíй, я́ко учини́лъ еси́ на мя́ хранéнiе?
Рекóхъ, я́ко утѣ́шитъ мя́ óдръ мóй, произнесý же ко мнѣ́ на еди́нѣ слóво на лóжи моéмъ:
устрашáеши мя́ сóнiями и видѣ́нiями ужасáеши мя́:
свободи́ши от дýха моегó дýшу мою́, от смéрти же кóсти моя́.
Не поживý бо во вѣ́къ, да долготерплю́: отступи́ от менé, тщé бо житié моé.
Чтó бо éсть человѣ́къ, я́ко возвели́чилъ еси́ егó? или́ я́ко внимáеши умóмъ къ немý?
или́ посѣщéнiе твори́ши емý по вся́ко ýтро и въ покóи суди́ти егó и́маши?
Докóлѣ не остáвиши менé, нижé отпускáеши мя́, дóндеже поглощý сли́ны моя́ въ болѣ́зни?
А́ще áзъ согрѣши́хъ, чтó тебѣ́ возмогý содѣ́лати, свѣ́дый ýмъ человѣ́чь? почтó мя еси́ положи́лъ прекослóвна тебѣ́, и éсмь тебѣ́ брéменемъ?
почтó нѣ́си сотвори́лъ беззакóнiю моемý забвéнiя, и очищéнiя грѣхá моегó? ны́нѣ же въ зéмлю отидý, ýтренюяй же нѣ́смь ктомý.
Отвѣщáвъ же Валдáдъ Савхéйскiй, речé: докóлѣ глагóлати бýдеши сiя́?
дýхъ многоглагóливъ во устѣ́хъ твои́хъ.
Едá Госпóдь оби́дитъ судя́й? или́ вся́ сотвори́вый возмятéтъ прáвду?
А́ще сы́нове твои́ согрѣши́ша предъ ни́мъ, послá рýку на беззакóнiя и́хъ:
ты́ же ýтренюй ко Гóсподу вседержи́телю моля́ся:
áще чи́стъ еси́ и и́стиненъ, моли́тву твою́ услы́шитъ, устрóитъ же ти́ пáки житié прáвды:
бýдутъ ýбо пéрвая твоя́ мáла, послѣ́дняя же твоя́ безъ числá.
Вопроси́ бо рóда пéрваго, изслѣ́ди же по рóду отцéвъ:
вчерáшни бо есмы́ и не вѣ́мы, сѣ́нь бо éсть нáше житié на земли́:
не сíи ли научáтъ тя́ и возвѣстя́тъ ти́ и от сéрдца изнесýтъ словесá?
Едá произни́четъ рóгозъ безъ воды́, или́ растéтъ си́тникъ безъ напая́нiя?
ещé сýщу на кóрени, и не пóжнется ли? прéжде напая́нiя вся́кое бы́лiе не изсыхáетъ ли?
тáко ýбо бýдутъ послѣ́дняя всѣ́хъ забывáющихъ Гóспода: надéжда бо нечести́ваго поги́бнетъ:
не населéнъ бо бýдетъ дóмъ егó, паучи́на же сбýдется селéнiе егó.
А́ще подпрéтъ хрáмину свою́, не стáнетъ: éмшуся же емý за ню́, не пребýдетъ.
Влáжный бо éсть подъ сóлнцемъ, и от тлѣ́нiя егó лѣ́торасль егó изы́детъ:
на собрáнiи кáменiя спи́тъ, посредѣ́ же кремéнiя поживéтъ:
áще поглоти́тъ мѣ́сто, солжéтъ емý, не ви́дѣлъ еси́ таковáя,
я́ко превращéнiе нечести́ваго таковó, изъ земли́ же инáго произрасти́тъ.
Госпóдь бо не отри́нетъ незлóбиваго: вся́каго же дáра от нечести́ваго не прiи́метъ.
И́стиннымъ же устá испóлнитъ смѣ́ха, устнѣ́ же и́хъ исповѣ́данiя.
Врази́ же и́хъ облекýтся въ стýдъ: жили́ще же нечести́ваго не бýдетъ.
Отвѣщáвъ же и́овъ, речé:
вои́стинну вѣ́мъ, я́ко тáко éсть: кáко бо бýдетъ прáведенъ человѣ́къ у Гóспода?
áще бо восхóщетъ суди́тися съ ни́мъ, не послýшаетъ егó, да не преречéтъ ко еди́ному словеси́ егó от ты́сящи.
Премýдръ бо éсть мы́слiю, крѣ́покъ же и вели́къ: ктó жéстокъ бы́въ проти́ву егó, пребы́сть?
Обетшáяй гóры, и не вѣ́дятъ, превращáяй я́ гнѣ́вомъ:
трясы́й поднебéсную изъ основáнiй, столпи́ же ея́ колéблются:
глагóляй сóлнцу, и не восхóдитъ, звѣ́зды же печáтствуетъ:
простры́й еди́нъ нéбо и ходя́й но мóрю, я́ко по земли́:
творя́й плiáды и еспéра, и Арктýра и сокрóвища ю́жная:
творя́й вéлiя и неизслѣ́дованная, слáвная же и изря́дная, и́мже нѣ́сть числá.
А́ще прiи́детъ ко мнѣ́, не и́мамъ ви́дѣти: и áще мимои́детъ менé, никáко уразумѣ́хъ.
А́ще вóзметъ, ктó возврати́тъ? или́ ктó речéтъ емý: чтó сотвори́лъ еси́?
Сáмъ бо отвращáетъ гнѣ́въ, слякóшася подъ ни́мъ ки́ти поднебéснiи.
А́ще же мя́ услы́шитъ, или́ разсýдитъ глагóлы моя́?
А́ще бо и прáведенъ бýду, не услы́шитъ менé, судý егó помолю́ся:
áще же воззовý, и услы́шитъ мя́, не имý вѣ́ры, я́ко услы́ша глáсъ мóй.
Да не мглóю мя́ потреби́тъ, мнóга же ми́ сотрéнiя сотвори́ всýе,
не оставля́етъ бо мя́ отдохнýти, испóлни же мя́ гóрести.
Понéже си́ленъ éсть крѣ́постiю: ктó ýбо судý егó воспроти́вится?
А́ще бо бýду прáведенъ, устá моя́ нечéстiя сотворя́тъ: áще же бýду непорóченъ, стрóпотенъ бýду.
А́ще бо нечéстiе сотвори́хъ, не вѣ́мъ душéю моéю: обáче отъéмлется ми́ живóтъ.
Тѣ́мже рѣ́хъ: вели́ка и си́льна губи́тъ гнѣ́въ.
Я́ко лукáвiи смéртiю лю́тою поги́бнутъ, обáче прáведнымъ посмѣвáются.
Преданá éсть земля́ въ рýцѣ нечести́ваго, ли́ца судíй ея́ покрывáетъ: áще же не сáмъ éсть, ктó éсть?
Житié же моé éсть легчáе скоротéчца: отбѣгóша и не ви́дѣша.
Или́ éсть кораблéмъ слѣ́дъ пути́, или́ орлá летя́ща, и́щуща я́ди?
А́ще бо рекý: забýду глагóля, прини́кнувъ лицéмъ воздохнý,
трясýся всѣ́ми удесы́: вѣ́мъ бо, я́ко не безви́нна мя́ остáвиши.
А́ще же нечести́въ éсмь, почтó не умрóхъ?
А́ще бо измы́юся снѣ́гомъ и очи́щуся рукáми чи́стыми,
довóлно во сквéрнѣ омочи́лъ мя́ еси́, возгнушáся же мнóю одéжда моя́.
Нѣ́си бо человѣ́къ, я́коже áзъ, емýже противопрю́ся, да прiи́демъ вкýпѣ на сýдъ.
О, дабы́ ходáтай нáмъ бы́лъ, и обличáяй и разслýшаяй междý обѣ́ма.
Да отъи́метъ от менé жéзлъ, стрáхъ же егó да не смущáетъ менé:
и не убою́ся, но возглагóлю, и́бо тáко не вѣ́мъ сáмъ себé.
Труждáюся душéю моéю, стеня́ испущý на мя́ глагóлы моя́, возглагóлю гóрестiю души́ моея́ одержи́мь
и рекý ко Гóсподеви: не учи́ мя нечéствовати, и почтó ми си́це суди́лъ еси́?
или́ добрó ти éсть, áще вознепрáвдую, я́ко презрѣ́лъ еси́ дѣлá рукý твоéю, совѣ́ту же нечести́выхъ вня́лъ еси́?
или́ я́коже человѣ́къ ви́дитъ, ви́диши? или́ я́коже зри́тъ человѣ́къ, ýзриши?
или́ житié твоé человѣ́ческо éсть? или́ лѣ́та твоя́ я́ко днíе мýжа?
я́ко истязáлъ еси́ беззакóнiе моé и грѣхи́ моя́ изслѣ́дилъ еси́.
Вѣ́си бо, я́ко не нечéствовахъ: но ктó éсть изъимáяй изъ рукý твоéю?
Рýцѣ твои́ сотвори́стѣ мя́ и создáстѣ мя́: потóмъ же преложи́въ, порази́лъ мя́ еси́.
Помяни́, я́ко брéнiе мя́ создáлъ еси́, въ зéмлю же пáки возвращáеши мя́.
Или́ не я́коже млекó измелзи́лъ мя́ еси́, усыри́лъ же мя́ еси́ рáвно сы́ру?
Кóжею же и плóтiю мя́ облéклъ еси́, костьми́ же и жи́лами сши́лъ мя́ еси́:
живóтъ же и ми́лость положи́лъ еси́ у менé, посѣщéнiе же твоé сохрани́ мóй дýхъ.
Сiя́ имѣ́яй въ тебѣ́, вѣ́мъ, я́ко вся́ мóжеши, и невозмóжно тебѣ́ ничтóже.
А́ще бо согрѣшý, храни́ши мя́, от беззакóнiя же не безви́нна мя́ сотвори́лъ еси́.
А́ще бо нечести́въ бýду, лю́тѣ мнѣ́, áще же бýду прáведенъ, не могý возни́кнути: испóлненъ бо éсмь безчéстiя,
лови́мь бо éсмь áки лéвъ на убiéнiе: пáки же преложи́въ, лю́тѣ убивáеши мя́.
Обновля́яй на мя́ испытáнiе моé, гнѣ́ва бо вели́каго на мя́ употреби́лъ еси́ и навéлъ еси́ на мя́ искушéнiя.
Почтó ýбо мя́ изъ чрéва извéлъ еси́, и не умрóхъ, óко же менé не ви́дѣло бы,
и бы́хъ бы áки не бы́лъ? почтó ýбо изъ чрéва во грóбъ не снидóхъ?
или́ не мáло éсть врéмя жи́зни моея́? остáви менé почи́ти мáло,
прéжде дáже отидý, отню́дуже не возвращýся, въ зéмлю тéмну и мрáчну,
въ зéмлю тмы́ вѣ́чныя, идѣ́же нѣ́сть свѣ́та, нижé ви́дѣти животá человѣ́ческаго.
Отвѣщáвъ же Софáръ Минéйскiй, речé:
глагóляй мнóго, и противоуслы́шитъ: или́ многорѣ́чивъ мни́тся бы́ти прáведенъ? благословéнъ рождéнный от жены́ малолѣ́тенъ.
Не мнóгъ во словесѣ́хъ бýди: нѣ́сть бо противовѣщáяй ти́.
Не глагóли бо, я́ко чи́стъ éсмь дѣ́лы и безпорóченъ предъ ни́мъ:
но кáко Госпóдь возглагóлетъ къ тебѣ́ и отвéрзетъ устнѣ́ свои́ съ тобóю?
Потóмъ возвѣсти́тъ ти́ си́лу премýдрости, я́ко сугýбъ бýдетъ въ си́хъ, я́же проти́ву тебé: и тогдá уразумѣ́еши, я́ко достóйная тебѣ́ сбы́шася от Гóспода, и́миже согрѣши́лъ еси́,
Или́ слѣ́дъ Госпóдень обря́щеши? или́ въ послѣ́дняя дости́глъ еси́, я́же сотвори́ вседержи́тель?
Высóко нéбо, и чтó сотвори́ши? глубочáе же сýщихъ во áдѣ чтó вѣ́си?
не должáе ли мѣ́ры земны́я, или́ широты́ морскíя?
А́ще же преврати́тъ вся́, ктó речéтъ емý: чтó сотвори́лъ еси́?
Тóй бо вѣ́сть дѣлá беззакóнныхъ: ви́дѣвъ же нелѣ́пая, не прéзритъ.
Человѣ́къ же и́нако оби́луетъ словесы́: земны́й же рождéнный от жены́ рáвенъ ослý пусты́нному.
А́ще бо ты́ чи́сто положи́лъ еси́ сéрдце твоé, воздѣвáеши же рýцѣ твои́ къ немý,
áще беззакóнно чтó éсть въ рукý твоéю, далéче сотвори́ é от тебé, непрáвда же въ жили́щи твоéмъ да не всели́тся:
тáко бо ти́ возсiя́етъ лицé, я́коже водá чистá: совлечéшися же сквéрны, и не убои́шися,
и трудá забýдеши, я́коже волны́ мимошéдшiя, и не устраши́шися.
Моли́тва же твоя́, áки денни́ца, и пáче полýдне возсiя́етъ ти́ жи́знь:
уповáя же бýдеши, я́ко бýдетъ ти́ надéжда: от туги́ же и попечéнiя яви́тся ти́ ми́ръ:
упокóишися бо, и не бýдетъ боря́й тя́: премѣня́ющiися же мнóзи и́мутъ проси́ти тя́,
спасéнiе же остáвитъ и́хъ: надéжда бо и́хъ пáгуба, óчи же нечести́выхъ истáютъ.
Отвѣщáвъ же и́овъ, речé:
ýбо вы́ ли еди́ни естé человѣ́цы, или́ съ вáми скончáется премýдрость?
И у менé сéрдце éсть я́коже и у вáсъ.
Прáведенъ бо мýжъ и непорóченъ бы́сть въ поругáнiе:
во врéмя бо опредѣлéное уготóванъ бы́сть пáсти от ины́хъ, дóмы же егó опустошéны бы́ти беззакóнными. обáче никтóже да уповáетъ, лукáвъ сы́й, непови́ненъ бы́ти,
ели́цы разгнѣвля́ютъ Гóспода, áки и истязáнiя и́мъ не бýдетъ.
Но вопроси́ четверонóгихъ, áще ти́ рекýтъ, и пти́цъ небéсныхъ, áще ти́ возвѣстя́тъ:
повѣ́ждь земли́, áще ти́ скáжетъ, и исповѣ́дятъ ти́ ры́бы морскíя.
Ктó ýбо не разумѣ́ во всѣ́хъ си́хъ, я́ко рукá Госпóдня сотвори́ сiя́?
Не въ руцѣ́ ли егó душá всѣ́хъ живýщихъ и дýхъ вся́каго человѣ́ка?
У́хо бо словесá разсуждáетъ, гортáнь же брáшна вкушáетъ.
Во мнóзѣмъ врéмени премýдрость, во мнóзѣ же житiи́ вѣ́дѣнiе.
У негó премýдрость и си́ла, у тогó совѣ́тъ и рáзумъ.
А́ще низложи́тъ, ктó сози́ждетъ? áще затвори́тъ от человѣ́ковъ, ктó отвéрзетъ?
А́ще возбрани́тъ вóду, изсуши́тъ зéмлю: áще же пýститъ, погуби́тъ ю́ преврати́въ.
У негó держáва и крѣ́пость, у тогó вѣ́дѣнiе и рáзумъ.
Проводя́й совѣ́тники плѣнéны, судiи́ же земли́ ужаси́:
посаждáяй цари́ на престóлѣхъ и обвязýяй пóясомъ чрéсла и́хъ:
отпущáяй жерцы́ плѣ́нники, си́льныхъ же земли́ низврати́:
измѣня́яй устнѣ́ вѣ́рныхъ, рáзумъ же стáрцевъ уразумѣ́:
изливáяй безчéстiе на кня́зи, смирéнныя же изцѣли́:
открывáяй глубóкая от тмы́, изведé же на свѣ́тъ сѣ́нь смéртную:
прельщáяй язы́ки и погубля́яй и́хъ, низлагáяй язы́ки и наставля́яй и́хъ:
измѣня́яй сердцá князéй земны́хъ, прельсти́ же и́хъ на пути́, егóже не вѣ́дяху,
да ося́жутъ тмý, а не свѣ́тъ, да заблýдятъ же я́ко пiя́ный.
Сé, сiя́ ви́дѣ óко моé, и слы́ша ýхо моé,
и вѣ́мъ, ели́ка и вы́ вѣ́сте: и не неразýмнѣе éсмь вáсъ.
Но обáче и áзъ ко Гóсподу возглагóлю, обличý же предъ ни́мъ, áще восхóщетъ.
Вы́ бо естé врáчеве непрáведнiи и цѣли́теле злы́хъ вси́,
бýди же вáмъ онѣмѣ́ти, и сбýдется вáмъ въ премýдрость.
Слы́шите же обличéнiе ýстъ мои́хъ, судý же устéнъ мои́хъ вонми́те.
Не предъ Бóгомъ ли глагóлете и предъ ни́мъ вѣщáете лéсть?
или́ уклонитéся, вы́ же сáми судiи́ бýдите.
Добрó бо, áще изслѣ́дитъ вáсъ: áще бо вси́ творя́щiи приложитéся къ немý, обáче обличи́тъ вы́.
А́ще же и тáй ли́цамъ удивитéся,
не движéнiе ли егó смятéтъ вáсъ, боя́знь же от негó нападéтъ на вы́?
Оти́детъ же величáнiе вáше рáвно пéпелу, тѣ́ло же брéнно.
Умолчи́те, да возглагóлю и почíю от гнѣ́ва.
Взéмля плóти моя́ зубáми, дýшу же мою́ положý въ руцѣ́ моéй.
А́ще мя́ убiéтъ си́льный, понéже и начá, обáче возглагóлю и обличý предъ ни́мъ:
и сié ми́ сбýдется во спасéнiе: не вни́детъ бо предъ ни́мъ лéсть.
Послýшайте, послýшайте глагóлъ мои́хъ: возвѣщý бо вáмъ слы́шащымъ.
Сé, áзъ бли́зъ éсмь судá моегó, вѣ́мъ áзъ, я́ко прáведенъ явлю́ся.
Ктó бо éсть судя́йся со мнóю, да ны́нѣ умолчý и изчéзну?
Двóе же ми́ сотвори́ши, тогдá от лицá твоегó не скры́юся:
рýку от менé отими́, стрáхъ же твóй да не ужасáетъ мя́:
посéмъ призовéши, áзъ же тя́ послýшаю, или́ возглагóлеши, áзъ же ти́ дáмъ отвѣ́тъ.
Коли́цы сýть грѣси́ мои́ и беззакóнiя моя́? научи́ мя́, кáя сýть?
Почтó кры́ешися от менé? мни́ши же мя́ проти́вна сýща тебѣ́?
Или́ я́ко ли́стъ дви́жимь вѣ́тромъ убои́шися? или́ я́ко сѣ́ну носи́му вѣ́тромъ противля́ешимися?
Я́ко написáлъ еси́ на мя́ злáя, обложи́лъ же ми́ еси́ ю́ностныя грѣхи́:
положи́лъ же еси́ нóгу мою́ въ возбранéнiе: сохрани́лъ же еси́ дѣлá моя́ вся́: въ корéнiя же нóгъ мои́хъ пришéлъ еси́:
и́же обетшáютъ я́коже мѣ́хъ, или́ я́коже ри́за мóлiемъ изъядéна.
Человѣ́къ бо рождéнъ от жены́ малолѣ́тенъ и испóлнь гнѣ́ва:
или́ я́коже цвѣ́тъ процвѣты́й отпадé, отбѣжé же я́ко сѣ́нь, и не постои́тъ.
Не и о сéмъ ли слóво сотвори́лъ еси́, и семý сотвори́лъ еси́ вни́ти на сýдъ предъ тя́?
Ктó бо чи́стъ бýдетъ от сквéрны? никтóже,
áще и еди́нъ дéнь житié егó на земли́: изочтéни же мéсяцы егó от тебé, на врéмя положи́лъ еси́, и не престýпитъ.
Отступи́ от негó, да умóлкнетъ и изберéтъ житié я́коже наéмникъ.
Е́сть бо дрéву надéжда: áще бо посѣ́чено бýдетъ, пáки процвѣтéтъ, и лѣ́торасль егó не оскудѣ́етъ:
áще бо состарѣ́ется въ земли́ кóрень егó, на кáмени же скончáется стеблó егó,
от вони́ воды́ процвѣтéтъ, сотвори́тъ же жáтву, я́коже новосаждéнное.
Мýжъ же умéрый отъи́де, пáдъ же человѣ́къ, ктомý нѣ́сть.
Врéменемъ бо оскудѣвáетъ мóре, рѣкá же опустѣ́вши и́зсше:
человѣ́къ же уснýвъ не востáнетъ, дóндеже не бýдетъ нéбо сошвéно, и не возбудя́тся от снá своегó.
У́бо, о, дабы́ во áдѣ мя́ сохрани́лъ еси́, скры́лъ же мя́ бы еси́, дóндеже престáнетъ гнѣ́въ твóй, и вчини́ши ми́ врéмя, въ нéже пáмять сотвори́ши ми́.
А́ще бо ýмретъ человѣ́къ, жи́въ бýдетъ: скончáвъ дни́ житiя́ своегó, потерплю́, дóндеже пáки бýду.
Посéмъ воззовéши, áзъ же послýшаю тя́: дѣ́лъ же рукý твоéю не отвращáйся:
изчи́слилъ же еси́ начинáнiя моя́, и ничтóже тя́ мимои́детъ от грѣ́хъ мои́хъ:
запечатлѣ́лъ же ми́ еси́ беззакóнiя въ мѣшцѣ́, назнáменалъ же еси́, áще чтó невóлею преступи́хъ.
Обáче и горá пáдающи распадéтся, и кáмень обетшáетъ от мѣ́ста своегó:
кáменiе оглáдиша вóды, и потопи́ша вóды взнáкъ хóлмы земны́я, и ожидáнiе человѣ́ческо погуби́лъ еси́.
Отри́нулъ еси́ егó до концá, и отъи́де: измѣни́лъ еси́ емý лицé и испусти́лъ еси́.
Мнóгимъ же бы́вшымъ сынóмъ егó, не вѣ́сть: áще же и мáло и́хъ бýдетъ, не знáетъ:
но плóти егó болѣ́ша, душá же егó о себѣ́ сѣ́това.
Отвѣщáвъ же Елифáзъ Ѳемани́тинъ, речé:
едá премýдрый дáстъ отвѣ́тъ разýменъ на вѣ́тръ, и напóлни болѣ́знiю чрéво,
обличáя глагóлы, и́миже не подобáетъ, и словесы́, и́хже ни кáя пóльза?
Не и ты́ ли отри́нулъ еси́ стрáхъ? скончáлъ же еси́ глагóлы таковы́ предъ Гóсподемъ?
Пови́ненъ еси́ глагóломъ ýстъ твои́хъ, нижé разсуди́лъ еси́ глагóлы си́льныхъ.
Да обличáтъ тя́ устá твоя́, а не áзъ, и устнѣ́ твои́ на тя́ возсвидѣ́телствуютъ.
Чтó бо? едá пéрвый от человѣ́къ рождéнъ еси́? или́ прéжде холмóвъ сгусти́лся еси́?
или́ строéнiе Госпóдне слы́шалъ еси́? или́ въ совѣ́тника тя́ употреби́ Бóгъ? и на тя́ [еди́наго] ли прiи́де премýдрость?
чтó бо вѣ́си, егóже не вѣ́мы? или́ чтó разумѣ́еши ты́, егóже и мы́ [не разумѣ́емъ]?
И стáръ и дрéвенъ éсть въ нáсъ, стáршiй отцá твоегó дéньми.
Мáло, о ни́хже согрѣши́лъ еси́, уя́звленъ еси́, вельми́ вы́ше мѣ́ры возглагóлалъ еси́.
Чтó дéрзостно бы́сть сéрдце твоé? или́ чтó вознесóстѣся óчи твои́?
Я́ко я́рость изры́гнулъ еси́ предъ Гóсподемъ, изнéслъ же еси́ изо ýстъ таковá словесá?
Ктó бо сы́й человѣ́къ я́ко бýдетъ непорóченъ? или́ áки бýдущiй прáведникъ рождéнъ от жены́?
А́ще во святы́хъ не вѣ́ритъ, небо же нечи́сто предъ ни́мъ,
кольми́ пáче мéрзкiй и нечи́стый мýжъ, пiя́й непрáвды, я́коже питié.
Возвѣщý же ти́, послýшай менé: я́же ны́нѣ ви́дѣхъ, возвѣщý ти́,
я́же премýдрiи рекýтъ, и не утаи́ша отцы́ и́хъ,
и́мже еди́нымъ данá бы́сть земля́, и не нáйде иноплемéнникъ на ня́.
Всé житié нечести́ваго въ попечéнiи, лѣ́та же изочтéна данá си́льному,
стрáхъ же егó во ушесѣ́хъ егó: егдá мни́тъ ужé въ ми́рѣ бы́ти, тогдá прiи́детъ нáнь низвращéнiе:
да не вѣ́руетъ отврати́тися от тмы́, осуждéнъ бо ужé въ рýки желѣ́за,
учинéнъ же éсть въ брáшно нея́сытемъ: вѣ́сть же въ себѣ́, я́ко ждéтъ падéнiя, дéнь же тéменъ преврати́тъ егó,
бѣдá же и скóрбь объи́метъ егó, я́коже военачáлникъ напреди́ стоя́й пáдаетъ,
я́ко вознесé рýцѣ на Гóспода, предъ Гóсподемъ же вседержи́телемъ ожесточи́ вы́ю,
течé же проти́ву емý укори́зною въ тóлщи хребтá щитá своегó:
я́ко покры́ лицé своé тýкомъ свои́мъ и сотвори́ омéтъ на стéгнахъ: [хвалá же егó укори́зна].
Да всели́тся же во градѣ́хъ пусты́хъ, вни́детъ же въ дóмы ненаселéнныя: а я́же они́ уготóваша, инíи отнесýтъ.
Нижé обогати́тся, нижé остáнетъ имѣ́нiе егó, не и́мать положи́ти на зéмлю сѣ́ни,
нижé избѣжи́тъ тмы́: прозябéнiе егó да усуши́тъ вѣ́тръ, и да отпадéтъ цвѣ́тъ егó:
да не вѣ́ритъ, я́ко стерпи́тъ, тщéтная бо сбýдутся емý.
Посѣчéнiе егó прéжде часá растлѣ́етъ, и лѣ́торасль егó не обли́ственѣетъ:
да объимáнъ бýдетъ я́коже недозрѣ́лая я́года прéжде часá, да отпадéтъ же я́ко цвѣ́тъ мáсличiя.
Послýшество бо нечести́ваго смéрть, óгнь же пожжéтъ дóмы мздои́мцевъ:
во чрéвѣ же прiи́метъ болѣ́зни, сбýдется же емý тщетá,чрéво же егó понесéтъ лéсть.
И отвечал Иов и сказал:
слышал я много такого; жалкие утешители все вы!
Будет ли конец ветреным словам? и что побудило тебя так отвечать?
И я мог бы так же говорить, как вы, если бы душа ваша была на месте души моей; ополчался бы на вас словами и кивал бы на вас головою моею;
подкреплял бы вас языком моим и движением губ утешал бы.
Говорю ли я, не утоляется скорбь моя; перестаю ли, что отходит от меня?
Но ныне Он изнурил меня. Ты разрушил всю семью мою.
Ты покрыл меня морщинами во свидетельство против меня; восстает на меня изможденность моя, в лицо укоряет меня.
Гнев Его терзает и враждует против меня, скрежещет на меня зубами своими; неприятель мой острит на меня глаза свои.
Разинули на меня пасть свою; ругаясь бьют меня по щекам: все сговорились против меня.
Предал меня Бог беззаконнику и в руки нечестивым бросил меня.
Я был спокоен, но Он потряс меня; взял меня за шею и избил меня и поставил меня целью для Себя.
Окружили меня стрельцы Его; Он рассекает внутренности мои и не щадит, пролил на землю желчь мою,
пробивает во мне пролом за проломом, бежит на меня, как ратоборец.
Вретище сшил я на кожу мою и в прах положил голову мою.
Лицо мое побагровело от плача, и на веждах моих тень смерти,
при всем том, что нет хищения в руках моих, и молитва моя чиста.
Земля! не закрой моей крови, и да не будет места воплю моему.
И ныне вот на небесах Свидетель мой, и Заступник мой в вышних!
Многоречивые друзья мои! К Богу слезит око мое.
О, если бы человек мог иметь состязание с Богом, как сын человеческий с ближним своим!
Ибо летам моим приходит конец, и я отхожу в путь невозвратный.
Дыхание мое ослабело; дни мои угасают; гробы предо мною.
Если бы не насмешки их, то и среди споров их око мое пребывало бы спокойно.
Заступись, поручись Сам за меня пред Собою! иначе кто поручится за меня?
Ибо Ты закрыл сердце их от разумения, и потому не дашь восторжествовать им.
Кто обрекает друзей своих в добычу, у детей того глаза истают.
Он поставил меня притчею для народа и посмешищем для него.
Помутилось от горести око мое, и все члены мои, как тень.
Изумятся о сем праведные, и невинный вознегодует на лицемера.
Но праведник будет крепко держаться пути своего, и чистый руками будет больше и больше утверждаться.
Выслушайте, все вы, и подойдите; не найду я мудрого между вами.
Дни мои прошли; думы мои – достояние сердца моего – разбиты.
А они ночь хотят превратить в день, свет приблизить к лицу тьмы.
Если бы я и ожидать стал, то преисподняя – дом мой; во тьме постелю я постель мою;
гробу скажу: ты отец мой, червю: ты мать моя и сестра моя.
Где же после этого надежда моя? и ожидаемое мною кто увидит?
В преисподнюю сойдет она и будет покоиться со мною в прахе.
Отвѣщáвъ же Валдáдъ Савхéйскiй, речé:
докóлѣ не престáнеши? пожди́, да и мы́ возглагóлемъ.
И почтó áки четверонóжная умолчáхомъ предъ тобóю?
Пребы́сть ти́ гнѣ́въ. чтó бо? áще ты́ ýмреши, не населéнна ли бýдетъ поднебéсная? или́ превратя́тся гóры изъ основáнiй?
И свѣ́тъ нечести́выхъ угáснетъ, и не произы́детъ и́хъ плáмень:
свѣ́тъ егó тмá въ жили́щи, свѣти́лникъ же въ нéмъ угáснетъ:
да уловя́тъ мéншiи имѣ́нiя егó, погрѣши́тъ же егó совѣ́тъ:
ввéржена же бы́сть ногá егó въ прýгло, мрéжею да повiéтся:
да прiи́дутъ же нáнь прýгла, укрѣпи́тъ нáнь жáждущихъ:
скры́ся въ земли́ ýже егó, и я́тiе егó на стези́.
О́крестъ да погубя́тъ егó болѣ́зни: мнóзи же о́крестъ нóгъ егó объи́дутъ во глáдѣ тѣ́снѣмъ:
падéнiе же емý уготóвано вели́ко.
Поядéны же да бýдутъ плесны́ нóгъ егó, крáсная же егó да поя́стъ смéрть.
Оттóржено же бýди от житiя́ егó изцѣлéнiе, да и́метъ же егó бѣдá винóю цáрскою.
Да всели́тся въ хрáминѣ егó въ нощи́ егó, посы́пана да бýдутъ лѣ́потная егó жýпеломъ:
подъ ни́мъ корéнiя егó да изсóхнутъ, свы́ше же нападéтъ пожáтiе егó.
Пáмять егó да поги́бнетъ от земли́, и [не] бýдетъ и́мя егó на лицы́ внѣ́шнемъ:
да отри́нетъ егó от свѣ́та во тмý:
не бýдетъ знáемь въ лю́дехъ егó, нижé спасéнъ въ поднебéснѣй дóмъ егó:
но въ свои́хъ емý поживýтъ инíи, надъ ни́мъ воздохнýша послѣ́днiи, пéрвыхъ же объя́ чýдо.
Сíи сýть дóмове непрáведныхъ, сié же мѣ́сто невѣ́дущихъ Бóга.
Отвѣщáвъ же и́овъ, речé:
докóлѣ притрýдну творитé дýшу мою́ и низлагáете мя́ словесы́? уразумѣ́йте тóкмо, я́ко Госпóдь сотвори́ мя си́це.
Клевéщете на мя́, не стыдя́щеся менé належитé ми.
Бýди, я́ко вои́стинну áзъ прельсти́хся, и у менé водворя́ется погрѣшéнiе,
глагóлати словесá, я́же не подобáше, словесá же моя́ погрѣшáютъ, и не во врéмя:
бýди же, я́ко на мя́ величáетеся, наскакáете же ми́ поношéнiемъ:
разумѣ́йте ýбо, я́ко Госпóдь éсть и́же смятé мя и огрáду свою́ на мя́ вознесé.
Сé, смѣю́ся поношéнiю, не возглагóлю: возопiю́, и нигдѣ́же сýдъ.
О́крестъ ограждéнъ éсмь и не могý прейти́: предъ лицéмъ мои́мъ тмý положи́,
слáву же съ менé совлечé и отъя́ вѣнéцъ от главы́ моея́:
растерзá мя о́крестъ, и отидóхъ: посѣчé же я́ко дрéво надéжду мою́.
Лю́тѣ же гнѣ́ва употреби́ на мя́ и возмнѣ́ мя я́ко врагá.
Вкýпѣ же прiидóша искушéнiя егó на мя́, на путéхъ же мои́хъ обыдóша мя́ навѣ́тницы.
Брáтiя моя́ отступи́ша от менé, познáша чужди́хъ пáче менé, и дрýзiе мои́ неми́лостиви бы́ша:
не снабдѣ́ша мя́ бли́жнiи мои́, и вѣ́дящiи и́мя моé забы́ша мя́.
Сосѣ́ди дóму и рабы́ни моя́, [я́ко] иноплемéнникъ бы́хъ предъ ни́ми:
рабá моегó звáхъ, и не послýша, устá же моя́ моля́хуся:
и проси́хъ женý мою́, призывáхъ же ласкáя сы́ны подлóжницъ мои́хъ:
они́ же менé въ вѣ́къ отри́нуша, егдá востáну, на мя́ глагóлютъ.
Гнушáхуся менé ви́дящiи мя́, и и́хже люби́хъ, востáша на мя́.
Въ кóжи моéй согни́ша плóти моя́, кóсти же моя́ въ зубѣ́хъ содержáтся.
Поми́луйте мя́, поми́луйте мя́, о, дрýзiе! рукá бо Госпóдня коснýвшаяся ми́ éсть.
Почтó мя гóните я́коже и Госпóдь? от плóтей же мои́хъ не насыщáетеся?
Ктó бо дáлъ бы, да напи́шутся словесá моя́, и положáтся о́ная въ кни́зѣ во вѣ́къ?
и на дщи́цѣ желѣ́знѣ и óловѣ, или́ на кáменiихъ извая́ются?
Вѣ́мъ бо, я́ко присносýщенъ éсть, и́же и́мать искупи́ти мя́,
[и] на земли́ воскреси́ти кóжу мою́ терпя́щую сiя́, от Гóспода бо ми́ сiя́ соверши́шася,
я́же áзъ въ себѣ́ свѣ́мъ, я́же óчи мои́ ви́дѣста, а не и́нъ: вся́ же ми́ соверши́шася въ нѣ́дрѣ.
А́ще же и речéте: чтó речéмъ проти́ву емý? и кóрень словесé обря́щемъ въ нéмъ.
Убóйтеся же и вы́ от мечá: я́рость бо на беззакóнныя нáйдетъ, и тогдá уви́дятъ, гдѣ́ éсть и́хъ веществó.
Отвѣщáвъ же Софáръ Минéйскiй, речé:
не тáко мнѣ́хъ сiя́ тебѣ́ рещи́ проти́ву, и не разумѣ́ете пáче нéжели и áзъ.
Наказáнiе срамлéнiя моегó услы́шу, и дýхъ от рáзума отвѣщавáетъ ми́.
Едá си́хъ не уразумѣ́лъ еси́ от вѣ́ка, отнéлѣже положéнъ человѣ́къ бы́сть на земли́?
весéлiе бо нечести́выхъ падéнiе стрáшно, обрáдованiе же беззакóнныхъ пáгуба.
А́ще взы́дутъ на нéбо дáры егó, жéртва же егó облакóвъ кóснется:
егдá бо мни́тся ужé утверждéнъ бы́ти, тогдá въ конéцъ поги́бнетъ. ви́дѣвшiи же егó рекýтъ: гдѣ́ есть?
Я́коже сóнъ отлетѣ́вый не обря́щется, отлетѣ́ же áки мечтáнiе нощнóе.
О́ко призрѣ́, и не приложи́тъ, и ктомý не познáетъ егó мѣ́сто егó.
Сынóвъ егó да погубя́тъ мéншiи, и рýцѣ егó возжгýтъ болѣ́зни.
Кóсти егó напóлнишася грѣхóвъ ю́ности егó и съ ни́мъ на пéрсти уснýтъ.
А́ще услади́тся во устѣ́хъ егó злóба, скры́етъ ю́ подъ язы́комъ свои́мъ:
не пощади́тъ ея́, и не остáвитъ ея́, и соберéтъ ю́ посредѣ́ гортáни своегó,
и не возмóжетъ помощи́ себѣ́: жéлчь áспидовъ во чрéвѣ егó.
Богáтство непрáведно собирáемо изблюéтся, изъ хрáмины егó извлечéтъ егó áнгелъ.
Я́рость же змiéву да ссéтъ, да убiéтъ же егó язы́къ змiи́нъ.
Да не ýзритъ отдоéнiя скотóвъ, нижé прибы́тка мéда и мáсла крáвiя.
Вотщé и всýе труди́ся, богáтство, от негóже не вкýситъ, я́коже клóки не сожвáемы и не поглощáемы.
Мнóгихъ бо немощны́хъ дóмы сокруши́, жили́ще же разгрáби и не постáви.
Нѣ́сть спасéнiя имѣ́нiю егó, въ вожделѣ́нiи своéмъне спасéтся.
Нѣ́сть остáнка брáшну егó, сегó рáди не процвѣтýтъ емý благáя.
Егдá же мни́тъ ужé испóлнь бы́ти, оскорби́тся, вся́ка же бѣдá нáнь прiи́детъ.
А́ще кáко ли́бо испóлнитъ чрéво своé, напýститъ нáнь я́рость гнѣ́ва, одожди́тъ на негó болѣ́зни:
и не спасéтся от руки́ желѣ́за, да устрѣли́тъ егó лýкъ мѣ́дянъ,
и да прóйдетъ сквозѣ́ тѣ́ло егó стрѣлá: звѣ́зды же въ жили́щихъ егó: да прiи́дутъ нáнь стрáси,
и вся́ка тмá на нéмъ да пребýдетъ: да поя́стъ егó óгнь нераздежéный, да озлóбитъ же пришлéцъ дóмъ егó:
и да откры́етъ нéбо беззакóнiя егó, и земля́ да востáнетъ нáнь:
да извлечéтъ дóмъ егó пáгуба до концá, дéнь гнѣ́ва да прiи́детъ нáнь.
Сiя́ чáсть человѣ́ка нечести́ваго от Гóспода и стяжáнiе имѣ́нiй егó от надзирáтеля.
Отвѣщáвъ же и́овъ, речé:
послýшайте, послýшайте словéсъ мои́хъ, да не бýдетъ ми́ от вáсъ сié утѣшéнiе:
потерпи́те ми́, áзъ же возглагóлю, тáже не посмѣéтемися.
Чтó бо? едá человѣ́ческо ми́ обличéнiе? или́ почтó не возъярю́ся?
Воззрѣ́вшiи на мя́ удиви́теся, рýку полóжше на лани́тѣ.
А́ще бо воспомянý, ужаснýся: обдержáтъ бо плóть мою́ болѣ́зни.
Почтó нечести́вiи живýтъ, обетшáша же въ богáтствѣ?
Сѣ́мя и́хъ по души́, чáда же и́хъ предъ очи́ма.
Дóмове и́хъ оби́лнiи сýть, стрáхъ же нигдѣ́, рáны же от Гóспода нѣ́сть на ни́хъ.
Говя́до и́хъ не извéрже: спасéна же бы́сть и́хъ имýщая во чрéвѣ и не лиши́ся.
Пребывáютъ же я́ко óвцы вѣ́чныя, дѣ́ти же и́хъ предъигрáютъ,
взéмше псалти́рь и гýсли, и веселя́тся глáсомъ пѣ́сни.
Скончáша во благи́хъ житié своé, въ покóи же áдовѣ успóша.
Глагóлютъ же Гóсподеви: отступи́ от нáсъ, путíй твои́хъ вѣ́дѣти не хóщемъ:
чтó достóинъ, я́ко да порабóтаемъ емý? и кáя пóльза, я́ко да взы́щемъ егó?
Въ рукáхъ бо и́хъ бя́ху благáя, дѣ́лъ же нечести́выхъ не надзирáетъ.
Обáче же и нечести́выхъ свѣти́лникъ угáснетъ, нáйдетъ же и́мъ развращéнiе, болѣ́зни же и́хъ объи́мутъ от гнѣ́ва:
бýдутъ же áки плéвы предъ вѣ́тромъ, или́ я́коже прáхъ, егóже взя́ ви́хръ.
Да оскудѣ́ютъ сынóмъ имѣ́нiя егó: воздáстъ проти́ву емý, и уразумѣ́етъ.
Да ýзрятъ óчи егó своé убiéнiе, от Гóспода же да не спасéтся.
Я́ко вóля егó съ ни́мъ въ домý егó, и чи́сла мéсяцей егó раздѣли́шася.
Не Госпóдь ли éсть научáяй рáзуму и хи́трости? тóйже мýдрыхъ разсуждáетъ.
Тóй ýмретъ въ си́лѣ простоты́ своея́, всецѣ́лъ же благодýшествуяй и благоуспѣвáяй,
утрóба же егó испóлнена тýка, мóзгъ же егó разливáется.
О́въ же умирáетъ въ гóрести души́, не яды́й ничтóже блáга.
Вкýпѣ же на земли́ спя́тъ, гни́лость же и́хъ покры́.
Тѣ́мже вѣ́мъ вáсъ, я́ко дéрзостiю належитé ми,
я́ко речéте: гдѣ́ есть дóмъ кня́жь? и гдѣ́ есть покрóвъ селéнiй нечести́выхъ?
Вопроси́те мимоходя́щихъ путéмъ, и знáменiя и́хъ не чýжда сотвори́те.
Я́ко на дéнь пáгубы соблюдáется нечести́вый, и въ дéнь гнѣ́ва егó отведéнъ бýдетъ.
Ктó возвѣсти́тъ предъ лицéмъ егó пýть егó, и éже тóй сотвори́, ктó воздáстъ емý?
И тóй во грóбъ отнесéнъ бы́сть, и на гроби́щихъ побдѣ́.
Услади́ся емý дрóбное кáменiе потóка, и вслѣ́дъ егó вся́къ человѣ́къ отъи́детъ, и предъ ни́мъ безчи́сленнiи.
Кáко же мя́ утѣшáете сýетными? а éже бы мнѣ́ почи́ти от вáсъ, ничтóже.
Отвѣщáвъ же Елифáзъ Ѳемани́тинъ, речé:
не Госпóдь ли éсть научáяй рáзуму и хи́трости?
И́бо кóе попечéнiе Гóсподу, áще ты́ бы́лъ еси́ дѣ́лы непорóченъ? или́ [кáя] пóльза, я́ко прóстъ твори́ти бýдеши пýть твóй?
или́ опасéнiе имѣ́я от тебé обличи́тъ тя́ и вни́детъ съ тобóю въ сýдъ?
Едá злóба твоя́ éсть не мнóга? безчи́сленнiи же твои́ сýть грѣси́?
Въ залóгъ бо имáлъ еси́ от брáтiи твоея́ вотщé, одéжду же наги́хъ отнимáлъ еси́,
нижé водóю жáждущихъ напои́лъ еси́, но áлчущихъ лиши́лъ еси́ хлѣ́ба:
удивля́лся же еси́ нѣ́кихъ лицý и повергáлъ еси́ убóгихъ на земли́:
вдови́цы же отпусти́лъ еси́ тщы́ и сироты́ озлóбилъ еси́.
Сегó рáди обыдóша тя́ сѣ́ти, и поспѣши́ на тя́ рáть вели́ка:
свѣ́тъ тебѣ́ тмá бы́сть, уснýвшаго же водá тя покры́.
Едá на высóкихъ живы́й не призирáетъ? укори́зною же вознося́щихся смири́.
И рéклъ еси́: чтó разумѣ́ крѣ́пкiй? или́ во мрáцѣ разсýдитъ?
О́блакъ покрóвъ егó, и неуви́димь бýдетъ, и крýгъ небесé обхóдитъ.
Едá стезю́ дрéвнюю сохрани́ши, въ ню́же ходи́ша мýжiе непрáведни,
и́же я́ти бы́ша прéжде врéмене? рѣкá текýщая основáнiя и́хъ,
глагóлющiи: чтó сотвори́тъ нáмъ Госпóдь? или́ чтó нанесéтъ на ны́ вседержи́тель?
И́же испóлнилъ éсть дóмы и́хъ благи́ми: совѣ́тъ же нечести́выхъ далéче от негó.
Ви́дѣвше прáведницы возсмѣя́шася, непорóченъ же глумля́шеся и́мъ:
не поги́бе ли имѣ́нiе и́хъ, и остáнки и́хъ поя́стъ óгнь?
Бýди ýбо твéрдъ, áще претерпи́ши, потóмъ плóдъ твóй бýдетъ во благи́хъ.
Прiими́ же изъ ýстъ егó изрѣчéнiе и воспрiими́ словесá егó въ сéрдце твоé.
А́ще же обрати́шися и смири́ши себé предъ Гóсподемъ, и далéче сотвори́ши от жили́ща твоегó непрáвду,
и положéнъ бýдеши на пéрсти въ кáмени, и я́коже кáмень потóка офи́рска.
Бýдетъ ýбо тебѣ́ вседержи́тель помóщникъ от врáгъ, чи́ста же сотвори́тъ тя́ я́коже сребрó разжжéно,
потóмъ дерзновéнiе возъимѣ́еши предъ Бóгомъ, воззрѣ́въ вéсело на нéбо.
Помóльшуся же тебѣ́ къ немý, услы́шитъ тя́, дáстъ же ти́ обѣ́ты твоя́ воздáти,
устрóитъ же ти́ жили́ще прáвды, на путéхъ же твои́хъ бýдетъ свѣ́тъ:
я́ко смири́лъ еси́ себé, тогдá речéши: вознесéся, и пони́кша очи́ма спасéтъ,
избáвитъ непови́ннаго, и спасéшися чи́стыма рукáма твои́ма.
Отвѣщáвъ же и́овъ, речé:
вѣ́мъ ýбо, я́ко изъ руки́ моея́ обличéнiе моé éсть, и рукá егó тяжкá бы́сть пáче моегó воздыхáнiя.
Ктó ýбо увѣ́сть, я́ко обря́щу егó и прiидý ко кончи́нѣ?
И рекý мóй сýдъ, устá же моя́ испóлню обличéнiя,
уразумѣ́ю же изцѣлéнiя, я́же ми́ речéтъ, и ощущý, чтó ми возвѣсти́тъ.
И áще со мнóгою крѣ́постiю нáйдетъ на мя́, посéмъ же не воспрети́тъ ми́.
И́стина бо и обличéнiе от негó: да изведéтъ же въ конéцъ сýдъ мóй.
А́ще бо во пéрвыхъ пойдý, ктомý нѣ́смь: въ послѣ́днихъ же, кáко вѣ́мъ егó?
ошýюю творя́щу емý, и не разумѣ́хъ: обложи́тъ одеснýю, и не узрю́.
Вѣ́сть бо ужé пýть мóй, искуси́ же мя́ я́ко злáто.
Изы́ду же въ зáповѣдехъ егó, пути́ бо егó сохрани́хъ, и не уклоню́ся от зáповѣдiй егó
и не преступлю́, въ нѣ́дрѣхъ же мои́хъ сокры́хъ глагóлы егó.
А́ще же и сáмъ суди́лъ тáко, ктó есть рекíй проти́ву емý? сáмъ бо восхотѣ́ и сотвори́.
Сегó рáди о нéмъ трéпетенъ бы́хъ, наказýемь же попекóхся о нéмъ:
сегó рáди от лицá егó потщýся, поучýся и убою́ся от негó.
И Госпóдь умягчи́лъ сéрдце моé, и вседержи́тель потщáся о мнѣ́:
не вѣ́дѣхъ бо, я́ко нáйдетъ на мя́ тмá, предъ лицéмъ же мои́мъ покры́етъ мрáкъ.
Почтó же Гóспода утаи́шася часы́,
нечести́вiи же предѣ́лъ преидóша, стáдо съ пáстыремъ разгрáбивше?
Подъярéмника си́рыхъ отведóша и волá вдови́ча въ залóгъ взя́ша:
уклони́ша немощны́хъ от пути́ прáведнаго, вкýпѣ же скры́шася крóтцыи земли́:
изыдóша же, я́ко осли́ на селó, на мя́, изступи́вше своегó чи́на: слáдокъ бы́сть хлѣ́бъ и́мъ рáди ю́ныхъ.
Ни́ву прéжде врéмене не свою́ сýщу пожáша, немощнíи же виногрáдъ нечести́выхъ безъ мзды́ и безъ брáшна воздѣ́лаша:
наги́хъ мнóгихъ успи́ша безъ ри́зъ, одéжду же души́и́хъ отъя́ша:
кáплями гóрскими мóкнутъ, занéже не имѣ́яху покрóва, въ кáменiе облекóшася:
восхи́тиша сиротý от сосцá, пáдшаго же смири́ша:
нагíя же успи́ша непрáведно, от áлчущихъ же хлѣ́бъ отъя́ша:
въ тѣсни́нахъ непрáведно засѣдóша, пути́ же прáведнаго не вѣ́дѣша.
И́же изъ грáда и изъ домóвъ свои́хъ изгони́ми бывáху, душá же младéнцевъ стеня́ше вельми́: Бóгъ же почтó си́хъ посѣщéнiя не сотвори́?
На земли́ сýщымъ и́мъ, и не разумѣ́ша, пути́ же прáведнаго не вѣ́дѣша, ни по стезя́мъ егó ходи́ша.
Разумѣ́въ же и́хъ дѣлá, предадé и́хъ во тмý, и въ нощи́ бýдетъ я́ко тáть.
И óко прелюбодѣ́я сохрани́ тмý, глагóля: не ýзритъ мя́ óко: и покрывáло лицý наложи́.
Прокопá въ нощи́ хрáмины, во днéхъ же запечатлѣ́ша себé, не познáша свѣ́та:
я́ко áбiе заýтра и́мъ сѣ́нь смéрти, понéже познáетъ мятéжъ сѣ́ни смéртныя.
Легóкъ éсть на лицы́ воды́: проклятá бýди чáсть и́хъ на земли́, да явя́тся же садóвiя и́хъ на земли́ сýха:
рукоя́тiе бо си́рыхъ разгрáбиша.
Потóмъ воспомянéнъ бы́сть емý грѣ́хъ, и я́коже мглá росы́ изчезé: возданó же бýди емý, éже содѣ́я, сокрушéнъ же бýди вся́къ неправди́въ я́ко дрéво неизцѣ́льно:
неплóднѣй бо не добрó сотвори́ и жены́ не поми́лова.
Я́ростiю же низврати́ немощны́я: востáвъ ýбо не и́мать вѣ́ры я́ти о своéмъ житiи́.
Егдá же разболи́тся, да не надѣ́ется здрáвъ бы́ти, но падéтъ недýгомъ.
Мнóги бо озлóби высотá егó: увядé же я́ко злáкъ въ знóи, или́ я́коже клáсъ от стеблá сáмъ отпáдъ.
А́ще же ни́, ктó есть глагóляй лжý ми́ глагóлати, и положи́тъ ни во чтóже глагóлы моя́?
Отвѣщáвъ же Валдáдъ Савхéйскiй, речé:
чтó бо начáло, áще не стрáхъ от негó, и́же твори́тъ вся́ческая въ вы́шнихъ?
Да никтóже бо мни́тъ, я́ко éсть умедлéнiе вóинствомъ: и на когó не нáйдетъ навѣ́тъ от негó?
Кáко бо бýдетъ прáведенъ человѣ́къ предъ Бóгомъ? или́ ктó очи́ститъ себé рождéнный от жены́?
А́ще лунѣ́ повелѣвáетъ, и не сiя́етъ, звѣ́зды же нечи́сты сýть предъ ни́мъ,
кольми́ пáче человѣ́къ гнóй, и сы́нъ человѣ́ческiй чéрвь.
Отвѣщáвъ же и́овъ, речé:
комý прилѣжи́ши, или́ комý хóщеши помогáти? не семý ли, емýже мнóга крѣ́пость и емýже мы́шца крѣпкá éсть?
Комý совѣ́тъ дáлъ еси́? не емýже ли вся́ премýдрость? Когó поженéши? не емýже ли превéлiя си́ла?
Комý возвѣсти́лъ еси́ глагóлы? дыхáнiе же чié есть исходя́щее изъ тебé?
Едá исполи́ни родя́тся подъ водóю и сосѣ́дми ея́?
Нáгъ áдъ предъ ни́мъ, и нѣ́сть покрывáла пáгубѣ.
Простирáяй сѣ́веръ ни на чéмже, повѣ́шаяй зéмлю ни начéмже,
связýяй вóду на о́блацѣхъ свои́хъ, и не растóржеся о́блакъ подъ нéю:
держáй лицé престóла, простирáя надъ ни́мъ о́блакъ свóй:
повелѣ́нiе окружи́ на лицé воды́ дáже до скончáнiя свѣ́та со тмóю.
Столпи́ небéснiи прострóшася и ужасóшася от запрещéнiя егó.
Крѣ́постiю укроти́ мóре, и хи́тростiю егó низложéнъ бы́сть ки́тъ:
вереи́ же небéсныя убоя́шася егó: повелѣ́нiемъ же умертви́ змíа отстýпника.
Сé, сiя́ чáсти пути́ егó: и о кáпли слóва услы́шимъ въ нéмъ: си́лу же грóма егó ктó увѣ́да, когдá сотвори́тъ?
Ещé же приложи́въ и́овъ, речé въ при́тчахъ:
жи́въ Госпóдь, и́же ми́ си́це суди́, и вседержи́тель, и́же огорчи́ ми дýшу:
дóндеже ещé дыхáнiе моé éсть и Дýхъ Бóжiй сýщiй въ нóздрехъ мои́хъ,
не возглагóлютъ устнѣ́ мои́ беззакóнiя, нижé душá моя́ поучи́тся непрáвдѣ.
Не бýди мнѣ́ правди́выми нарещи́ вáсъ, дóндеже умрý: не измѣню́ бо незлóбiя моегó.
Прáвдѣ же внимáя, не остáвлю ея́, не свѣ́мъ бо себé злы́хъ содѣ́лавша.
Обáче же, дабы́ бы́ли врази́ мои́, я́коже низвращéнiе нечести́выхъ, и востаю́щiи на мя́, я́коже пáгуба пребеззакóнныхъ.
И кáя бо éсть надéжда нечести́вому, я́ко ожидáетъ? надѣ́яся на Гóспода спасéтся ли?
или́ мольбý егó услы́шитъ Бóгъ? или́ нашéдшей емý бѣдѣ́,
едá и́мать кóе дерзновéнiе предъ ни́мъ? или́ я́ко призвáвшу емý, услы́шитъ ли егó?
Сегó рáди возвѣщý вáмъ, чтó éсть въ руцѣ́ Госпóдни, и, éже éсть у вседержи́теля, не солжý.
Сé, вси́ вѣ́сте, я́ко тщéтная ко тщéтнымъ прилагáете.
Сiя́ чáсть человѣ́ка нечести́ваго от Гóспода: и жрéбiй си́льныхъ прiи́детъ от вседержи́теля на ня́.
А́ще мнóзи бýдутъ сы́нове и́хъ, на заколéнiе бýдутъ:áще же и возмужáютъ, ни́щы бýдутъ:
остáвшiися же емý смéртiю ýмрутъ, и вдови́цъ и́хъ никтóже поми́луетъ.
А́ще соберéтъ я́коже зéмлю сребрó, и я́коже брéнiе уготóвитъ злáто,
сiя́ вся́ прáведнiи одержáтъ, имѣ́нiя же егó и́стиннiи вóзмутъ:
бýдетъ же дóмъ егó я́ко мóлiе, и я́ко паучи́на, я́же снабдѣ́.
Богáтый ýснетъ и не приложи́тъ, óчи свои́ отвéрзе, и нѣ́сть.
Обыдóша егó я́коже водá болѣ́зни, нóщiю же я́тъ егó примрáкъ.
Вóзметъ же егó вáръ, и отъи́детъ, и возвѣ́етъ егó от мѣ́ста егó,
и вéржетъ на негó, и не пощади́тъ, изъ рукý егó бѣжáнiемъ побѣжи́тъ:
восплéщетъ нáнь рукáма свои́ма и съ шýмомъ вóзметъ егó от мѣ́ста своегó.
Е́сть бо сребрý мѣ́сто, отонýдуже и бывáетъ, и мѣ́сто злáту, отонýдуже очищáется.
Желѣ́зо бо изъ земли́ раждáется, мѣ́дь же рáвно кáменiю сѣчéтся.
Чи́нъ положи́ тмѣ́, и вся́ концы́ сáмъ испытýетъ, камы́къ тмы́ и сѣ́нь смéрти.
Пресѣчéнiе потóка от прáха: забывáющiи же пýть прáвый изнемогóша, от человѣ́къ подвигóшася.
Е́сть земля́, изъ нея́же изы́детъ хлѣ́бъ: подъ нéю обрати́ся я́ко óгнь.
Мѣ́сто сапфи́ра кáменiе ея́, и пéрсть злáто емý.
Стезя́, не познá ея́ пти́ца, и не узрѣ́ ю́ óко сýпово,
и не ходи́ша по нéй сы́нове величáвыхъ, и не прéйде по нéй лéвъ.
На несѣкóмѣ кáмени прострé рýку свою́, преврати́ же изъ корéнiя гóры:
брéги рѣ́къ растóрже, вся́кое же честнóе ви́дѣ óко моé:
глубины́ же рѣ́къ откры́ и показá си́лу свою́ на свѣ́тъ.
Премýдрость же откýду обрѣ́теся? и кóе мѣ́сто éсть вѣ́дѣнiя?
Не вѣ́сть человѣ́къ пути́ ея́, нижé обрѣ́теся въ человѣ́цѣхъ.
Бéздна речé: нѣ́сть во мнѣ́: и мóре речé: нѣ́сть со мнóю.
Не дáстся сокрóвище за ню́, и не извѣ́сится сребрó на измѣнéнiе ея́,
и не сравни́тся со злáтомъ Софи́рскимъ, со óниксомъ честны́мъ и сапфи́ромъ:
не рáвно бýдетъ éй злáто и кристáль, и измѣнéнiе ея́ сосýди злáти.
Превысóкая и би́серiе не помя́нутся, и притяжи́ премýдрость пáче внýтреннѣйшихъ:
не уравни́тся éй топáзiй еѳióпскiй, со злáтомъ чи́стымъ не сравни́тся.
Премýдрость же откýду обрѣ́теся? и кóе мѣ́сто éсть рáзуму?
Утаи́ся от вся́каго человѣ́ка, и от пти́цъ небéсныхъ скры́ся.
Пáгуба и смéрть рекóстѣ: слы́шахомъ ея́ слáву.
Бóгъ блáго познá ея́ пýть: сáмъ бо вѣ́сть мѣ́сто ея́.
И́бо сáмъ поднебéсную всю́ надзирáетъ, вѣ́дый, я́же на земли́, вся́, я́же сотвори́.
Вѣ́тровъ вѣ́съ и водѣ́ мѣ́ру егдá сотвори́лъ,
тáко ви́дяй сочтé, и пýть въ сотрясéнiи гласóвъ,
тогдá ви́дѣ ю́ и повѣ́да ю́, уготóвавъ изслѣ́ди
и речé человѣ́ку: сé, благочéстiе éсть премýдрость, а éже удаля́тися от злá éсть вѣ́дѣнiе.
Ещé же приложи́въ и́овъ, речé въ при́тчахъ:
ктó мя устрóитъ по мéсяцамъ прéжднихъ днíй, въ ни́хже мя́ Бóгъ храня́ше,
я́коже егдá свѣтя́шеся свѣти́лникъ егó надъ главóю моéю, егдá свѣ́томъ егó хождáхъ во тмѣ́,
егдá бѣ́хъ тя́жекъ въ путéхъ, егдá Бóгъ посѣщéнiе творя́ше дóму моемý,
егдá бѣ́хъ богáтъ зѣлó, о́крестъ же менé раби́,
егдá обливáхуся путié мои́ мáсломъ крáвiимъ, гóры же моя́ обливáхуся млекóмъ,
егдá исхождáхъ изýтра во грáдъ, на стóгнахъ же поставля́шеся ми́ престóлъ?
Ви́дяще мя́ ю́ноши скрывáшася, старѣ́йшины же вси́ воставáша:
вельмóжи же преставáху глагóлати, пéрстъ возлóжше на устá своя́.
Слы́шавшiи же блажи́ша мя́, и язы́къ и́хъ прильпé гортáни и́хъ:
я́ко ýхо слы́ша и ублажи́ мя, óко же ви́дѣвъ мя́ уклони́ся.
Спасóхъ бо убóгаго от руки́ си́льнаго, и сиротѣ́, емýже не бѣ́ помóщника, помогóхъ.
Благословéнiе погибáющаго на мя́ да прiи́детъ, устá же вдови́ча благослови́ша мя́.
Въ прáвду же облачáхся, одѣвáхся же въ сýдъ я́ко въ ри́зу.
О́ко бѣ́хъ слѣпы́мъ, ногá же хромы́мъ:
áзъ бы́хъ отéцъ немощны́мъ, рáспрю же, ея́же не вѣ́дяхъ, изслѣ́дихъ:
сотрóхъ же членóвныя непрáведныхъ, от среды́ же зубóвъ и́хъ граблéнiе изъя́хъ.
Рѣ́хъ же: вóзрастъ мóй состарѣ́ется я́коже стеблó фи́никово, мнóга лѣ́та поживý.
Кóрень развéрзеся при водѣ́, и росá пребýдетъ на жáтвѣ моéй.
Слáва моя́ нóва со мнóю, и лýкъ мóй въ руцѣ́ моéй пóйдетъ.
[Старѣ́йшины] слы́шавшiи мя́ внимáху, молчáху же о моéмъ совѣ́тѣ.
Къ моемý глагóлу не прилагáху, рáдовахуся же, егдá къ ни́мъ глагóлахъ:
я́коже земля́ жáждущая ожидáетъ дождя́, тáко сíи моегó глагóланiя.
А́ще возсмѣю́ся къ ни́мъ, не вѣ́риша: и свѣ́тъ лицá моегó не отпадáше.
Избрáхъ пýть и́хъ, и сѣдѣ́хъ кня́зь, и вселя́хся я́коже цáрь посредѣ́ хрáбрыхъ, áки утѣшáяй печáльныхъ.
Ны́нѣ же поругáшамися малѣ́йшiи: ны́нѣ учáтъ мя́ от чáсти, и́хже отцéвъ уничтожáхъ, и́хже не вмѣня́хъ достóйными псóвъ мои́хъ стáдъ.
Крѣ́пость же рýкъ и́хъ во чтó мнѣ́ бы́сть? у ни́хъ погибáше скончáнiе.
Въ скýдости и глáдѣ безплóденъ: и́же бѣжáху въ безвóдное вчерá сотѣснéнiе и бѣ́дность:
и́же обхождáху бы́лiе въ дéбрехъ, и́мже бы́лiе бя́ше брáшно, безчéстнiи же и похулéннiи, скýдни вся́каго блáга, и́же и корéнiе древéсъ жвáху от глáда вели́каго.
Востáша на мя́ тáтiе,
и́хже дóмове бѣ́ша пещéры кáменны:
от среды́ доброглáсныхъ возопiю́тъ, и́же подъ хврáстiемъ ди́вiимъ живя́ху:
безýмныхъ сы́нове и безчéстныхъ, и́мя и слáва угашéна на земли́.
Ны́нѣ же гýсли éсмь áзъ и́мъ, и менé въ при́тчу и́мутъ:
возгнушáлися же мнóю отступи́вше далéче, ни лицá моегó пощадѣ́ша от плюновéнiя.
Отвéрзъ бо тýлъ свóй уязви́ мя, и уздý устáмъ мои́мъ наложи́.
На деснýю отрáсли востáша, нóзѣ свои́ прострóша и путесотвори́ша на мя́ стези́ пáгубы своея́.
Сотрóшася стези́ моя́, совлекóша бо ми́ одéжду.
Стрѣлáми свои́ми устрѣли́ мя: сотвори́ ми, я́коже восхотѣ́: въ болѣ́знехъ скисóхся, обращáются же ми́ скóрби.
Оти́де ми́ надéжда я́коже вѣ́тръ, и я́коже о́блакъ спасéнiе моé.
И ны́нѣ на мя́ излiéтся душá моя́: и одержáтъ мя́ днíе печáлей:
нóщiю же кóсти моя́ смятóшася, жи́лы же моя́ разслабѣ́ша.
Мнóгою крѣ́постiю я́тся за ри́зу мою́: я́коже ожерéлiе ри́зы моея́ объя́ мя.
Вмѣня́еши же мя́ рáвна брéнiю, въ земли́ и пéпелѣ чáсть моя́.
Возопи́хъ же къ тебѣ́, и не услы́шалъ мя́ еси́: стáша же и смотри́ша на мя́.
Наидóша же на мя́ безъ ми́лости, рукóю крѣ́пкою уязви́лъ мя́ еси́:
вчини́лъ же мя́ еси́ въ болѣ́знехъ и отвéрглъ еси́ мя́ от спасéнiя.
Вѣ́мъ бо, я́ко смéрть мя́ сотрéтъ: дóмъ бо вся́кому смéртну земля́.
А́ще бы возмóжно бы́ло, сáмъ бы́хъ себé уби́лъ, или́ моли́лъ бы́хъ инóго, дабы́ ми́ тó сотвори́лъ.
А́зъ же о вся́цѣмъ немощнѣ́мъ восплáкахся, воздохнýхъ же ви́дѣвъ мýжа въ бѣдáхъ.
А́зъ же ждáхъ благи́хъ, и сé, срѣтóша мя́ пáче днíе зóлъ.
Чрéво моé воскипѣ́ и не умолчи́тъ: предвари́ша мя́ днíе нищеты́.
Стеня́ ходи́хъ безъ обуздáнiя, стоя́хъ же въ собóрѣ вопiя́.
Брáтъ бы́хъ Си́ринамъ, дрýгъ же пти́чiй.
Кóжа же моя́ помрачи́ся вельми́, и кóсти моя́ сгорѣ́ша от знóя.
Обрати́шася же въ плáчь гýсли моя́, пѣ́снь же моя́ въ рыдáнiе мнѣ́.
Завѣ́тъ положи́хъ очи́ма мои́ма, да не помы́шлю на дѣви́цу.
И чтó удѣли́ Бóгъ свы́ше, и наслѣ́дiе всеси́льнаго от вы́шнихъ?
Увы́, пáгуба неправди́вому и отчуждéнiе творя́щымъ беззакóнiе.
Не сáмъ ли ýзритъ пýть мóй и вся́ стопы́ моя́ изочтéтъ?
А́ще ходи́хъ съ посмѣя́тели, и áще потщáся ногá моя́ на лéсть,
стáхъ бо на мѣ́рилѣ прáведнѣ, ви́дѣ же Госпóдь незлóбiе моé.
А́ще уклони́ся ногá моя́ от пути́, áще и вслѣ́дъ óка моегó и́де сéрдце моé, и áще рукáма мои́ма прикоснýхся дарóвъ,
да посѣ́ю ýбо, а инíи да поядя́тъ, безъ кóрене же да бы́хъ бы́лъ на земли́.
А́ще вслѣ́дъ и́де сéрдце моé жены́ мýжа инáго, и áще присѣдя́й бы́хъ при двéрехъ ея́,
угóдна ýбо бýди и женá моя́ инóму мýжу, младéнцы же мои́ смирéни да бýдутъ:
я́рость бо гнѣ́ва не удержáна, éже оскверни́ти мýжа инáго женý:
óгнь бо éсть горя́й на вся́ страны́, идѣ́же нáйдетъ, изъ корéнiя погуби́тъ.
А́ще же презрѣ́хъ сýдъ рабá моегó или́ рабы́ни, пря́щымся и́мъ предо мнóю:
чтó бо сотворю́, áще испытáнiе сотвори́тъ ми́ Госпóдь? áще же и посѣщéнiе, кíй отвѣ́тъ сотворю́?
Едá не я́коже и áзъ бѣ́хъ во чрéвѣ, и тíи бы́ша? бѣ́хомъ же въ тóмже чрéвѣ.
Немощнíи же, áще когдá чесогó трéбоваху, не не получи́ша, вдови́ча же óка не презрѣ́хъ.
А́ще же и хлѣ́бъ мóй ядóхъ еди́нъ и си́рому не преподáхъ от негó:
понéже от ю́ности моея́ корми́хъ я́коже отéцъ, и от чрéва мáтере моея́ наставля́хъ:
áще же презрѣ́хъ нáга погибáюща и не облекóхъ егó:
немощнíи же áще не благослови́ша мя́, от стрижéнiя же áгнцевъ мои́хъ согрѣ́шася плещы́ и́хъ:
áще воздвигóхъ на сиротý рýку, надѣ́яся, я́ко мнóга пóмощь мнѣ́ éсть:
да отпадéтъ ýбо рáмо моé от состáва, мы́шца же моя́ от лáктя да сокруши́тся:
стрáхъ бо Госпóдень объя́ мя, и от тя́гости егó не стерплю́.
А́ще вчини́хъ злáто въ крѣ́пость мою́ и áще на кáменiя многоцѣ́нная надѣ́яхся,
áще же и возвесели́хся, мнóгу ми́ богáтству сýщу, áще же и на безчи́сленныхъ положи́хъ рýку мою́:
или́ не ви́димъ сóлнца возсiя́вшаго оскудѣвáюща, луны́ же умаля́ющiяся? не въ ни́хъ бо éсть:
и áще прельсти́ся о́тай сéрдце моé, áще и рýку мою́ положи́въ на устáхъ мои́хъ лобзáхъ:
и сié ми ýбо въ беззакóнiе превéлiе да вмѣни́тся, я́ко солгáхъ предъ Бóгомъ вы́шнимъ.
А́ще же обрáдовахся о падéнiи врáгъ мои́хъ, и речé сéрдце моé: блáгоже, блáгоже:
да услы́шитъ ýбо ýхо моé кля́тву мою́, озлослáвленъ же да бýду от людíй мои́хъ озлобля́емь.
А́ще же и мнóгажды рѣ́ша рабы́ни моя́: ктó ýбо дáлъ бы нáмъ от плóтей егó насы́титися, зѣлó мнѣ́ блáгу сýщу?
И внѣ́ не водворя́шеся стрáнникъ, двéрь же моя́ вся́кому приходя́щему отвéрста бѣ́.
А́ще же и согрѣшáя невóлею, скры́хъ грѣ́хъ мóй:
не посрами́хся бо нарóднаго мнóжества, éже не повѣ́дати предъ ни́ми: áще же и остáвихъ маломóщнаго изы́ти изъ двéрiй мои́хъ тщи́мъ нѣ́дромъ: [áще бы не убоя́лся].
Ктó дáстъ слýшающаго менé? руки́ же Госпóдни áще бы́хъ не убоя́лся, писáнiе же, éже имѣ́хъ на когó,
на плещáхъ возложи́въ áки вѣнéцъ, читáхъ,
и áще не раздрáвъ егó отдáхъ, ничтóже взéмъ от должникá:
áще на мя́ когдá земля́ возстенá, áще и бразды́ ея́ восплáкашася вкýпѣ:
áще и си́лу ея́ ядóхъ еди́нъ безъ цѣны́, или́ áще и дýшу господи́на земли́ взéмъ оскорби́хъ:
вмѣ́сто пшени́цы да взы́детъ ми́ кропи́ва, а вмѣ́сто ячмéня тéрнiе.
И умолчá и́овъ словесы́. Умолчáша же и трié дрýзiе егó ктомý прерѣковáти и́ову, бѣ́ бо и́овъ прáведенъ предъ ни́ми.
Разгнѣ́вася же Елiýсъ сы́нъ Варахiи́левъ вузи́тянинъ, от ýжичества Арáмска авситидíйскiя страны́, разгнѣ́вася же на и́ова зѣлó, занéже наречé себé прáведна предъ Бóгомъ,
и на трiéхъ же другóвъ разгнѣ́вася зѣлó, я́ко не возмогóша отвѣщáти проти́ву и́ову и суди́ша егó бы́ти нечести́ва.
Елiýсъ же терпя́ше дáти отвѣ́тъ и́ову, я́ко старѣ́йшiи егó сýть дéньми [дрýзiе егó].
И ви́дѣ Елiýсъ, я́ко нѣ́сть отвѣ́та во устѣ́хъ трiéхъ мужéй, и возъяри́ся гнѣ́вомъ свои́мъ.
Отвѣщáвъ же Елiýсъ сы́нъ Варахiи́левъ вузи́тянинъ, речé: юнѣ́йшiй ýбо éсмь лѣ́ты, вы́ же естé старѣ́йшiи: тѣ́мже молчáхъ, убоя́вся возвѣсти́ти вáмъ хи́трость мою́:
рѣ́хъ же: врéмя éсть глагóлющее, и во мнóзѣхъ лѣ́тѣхъ вѣ́дятъ премýдрость,
но дýхъ éсть въ человѣ́цѣхъ, дыхáнiе же вседержи́телево éсть научáющее:
не многолѣ́тнiи сýть премýдри, нижé стáрiи вѣ́дятъ сýдъ:
тѣ́мже рѣ́хъ: послýшайте менé, и возвѣщý вáмъ, я́же вѣ́мъ, внуши́те глагóлы моя́:
рекý бо вáмъ послýшающымъ, дóндеже испытáете словесá, и дáже вáсъ уразумѣ́ю,
и сé, не бѣ́ и́ова обличáяй, отвѣщáяй проти́вно глагóломъ егó от вáсъ:
да не речéте: обрѣтóхомъ премýдрость, Гóсподеви приложи́вшеся:
человѣ́ку же попусти́сте глагóлати таковáя словесá:
ужаснýшася, не отвѣщáша ктомý, обетшáша от ни́хъ словесá:
терпѣ́хъ, не глагóлахъ бо, я́ко стáша, не отвѣщáша, я́ко да отвѣщáю и áзъ чáсть.
Отвѣщá же Елiýсъ, глагóля:
пáки возглагóлю, испóлненъ бо éсмь словéсъ: убивáетъ бо мя́ дýхъ чрéва:
чрéво же моé я́ко мѣ́хъ мстá вря́ща завя́занъ, или́ я́коже мѣ́хъ ковáческiй растóргнутый:
возглагóлю, да почíю, отвéрзъ устá:
человѣ́ка бо не постыждýся, но нижé брéннаго посрамлю́ся:
не вѣ́мъ бо чуди́тися лицý: áще же ни́, тó и менé мóлiе изъядя́тъ.
Но послýшай, и́ове, словéсъ мои́хъ и бесѣ́ду мою́ внуши́:
сé бо, отверзóхъ устá моя́, и возглагóла язы́къ мóй:
чи́сто сéрдце моé во словесѣ́хъ, рáзумъ же устнý моéю чи́стая уразумѣ́етъ:
Дýхъ Бóжiй сотвори́вый мя́, дыхáнiе же вседержи́телево поучáющее мя́:
áще мóжеши, дáждь ми́ отвѣ́тъ къ си́мъ: потерпи́, стáни проти́ву менé, и áзъ проти́ву тебé.
От брéнiя сотворéнъ еси́ ты́, я́коже и áзъ: от тогóжде сотворéнiя есмы́:
не стрáхъ мóй тя́ смятéтъ, нижé рукá моя́ тяжкá бýдетъ на тя́.
Обáче рéклъ еси́ во ýшы мои́, и глáсъ глагóлъ твои́хъ услы́шахъ, занéже глагóлеши:
чи́стъ éсмь áзъ, не согрѣшáя, непорóченъ же éсмь, и́бо не беззакóнновахъ:
зазóръ же на мя́ обрѣ́те и мни́тъ мя́, я́ко проти́вника себѣ́:
вложи́ же нóгу мою́ въ дрéво и надсмотря́лъ пути́ моя́ вся́.
Кáко бо глагóлеши, я́ко прáвъ éсмь, и не послýша менé? Вѣ́ченъ бо éсть, и́же надъ земны́ми.
Глагóлеши бо: чесó рáди прáвды моея́ не услы́ша вся́ко слóво?
Еди́ною бо возглагóлетъ Госпóдь, вторóе же во снѣ́, или́ въ поучéнiи нощнѣ́мъ,
или́, я́ко егдá напáдаетъ стрáхъ лю́тъ на человѣ́ки, во дремáнiихъ на лóжи:
тогдá откры́етъ ýмъ человѣ́ческiй, видѣ́ньми стрáха тацѣ́ми и́хъ устраши́тъ,
да возврати́тъ человѣ́ка от непрáвды, тѣ́ло же егóот падéнiя избáви,
пощадѣ́ же дýшу егó от смéрти, éже не пáсти емý на брáни.
Пáки же обличи́ егó болѣ́знiю на лóжи и мнóжество костéй егó разслáби:
вся́каго же брáшна пшени́чна не возмóжетъ прiя́ти, а душá егó я́ди хóщетъ,
дóндеже согнiю́тъ плóти егó, и покáжетъ кóсти егó тóщя:
прибли́жися же на смéрть душá егó, и живóтъ егó во áдѣ.
А́ще бýдетъ ты́сяща áнгелъ смертонóсныхъ, еди́нъ от ни́хъ не уязви́тъ егó: áще помы́слитъ сéрдцемъ обрати́тися ко Гóсподу, повѣ́сть же человѣ́ку свóй зазóръ, и безýмiе своé покáжетъ,
застýпитъ é, éже не впáсти емý въ смéрть, обнови́тъ же тѣ́ло егó я́коже поваплéнiе на стѣнѣ́, кóсти же егó испóлнитъ мóзга:
умягчи́тъ же егó плóть я́коже младéнца, и устрóитъ егó возмужáвша въ человѣ́цѣхъ.
Помóлится же ко Гóсподу и прiя́тъ и́мъ бýдетъ, вни́детъ же лицéмъ весéлымъ со исповѣ́данiемъ, воздáстъ же человѣ́комъ прáвду свою́.
Посéмъ тогдá зáзритъ человѣ́къ сáмъ себѣ́, глагóля: яковáя содѣвáхъ? и не по достóинству истязá мя, о ни́хже согрѣши́хъ:
спаси́ дýшу мою́, éже не вни́ти во истлѣ́нiе, и жи́знь моя́ свѣ́тъ ýзритъ.
Сé, сiя́ вся́ твори́тъ крѣ́пкiй [Бóгъ] пути́ три́ съ мýжемъ:
но избáви дýшу мою́ от смéрти, да живóтъ мóй во свѣ́тѣ хвáлитъ егó.
Внимáй, и́ове, и послýшай менé, премолчи́, и áзъ возглагóлю:
и áще тебѣ́ сýть словесá, отвѣщáй ми́: глагóли, хощý бо оправди́тися тебѣ́:
áще же ни́, ты́ послýшай менé, умолчи́, и научý тя премýдрости.
Отвѣщáвъ же Елiýсъ, речé:
послýшайте менé, премýдрiи: свѣ́дущiи, внуши́те [дóброе],
я́ко ýхо словесá искушáетъ, гортáнь же вкушáетъ брáшна.
Сýдъ изберéмъ себѣ́, уразумѣ́емъ посредѣ́ себé, чтó лýчшее.
Я́ко речé и́овъ: прáведенъ éсмь, Госпóдь отъя́тъ ми́ сýдъ,
солгá же судý моемý: наси́льна стрѣлá моя́ безъ непрáвды.
Ктó мýжъ, я́коже и́овъ, пiя́й поругáнiе, я́коже вóду,
не согрѣшáя, нижé нечéствовавъ, нижé приобщи́вся къ творя́щымъ беззакóнiя, éже ходи́ти съ нечести́выми?
Не рцы́ бо, я́ко нѣ́сть посѣщéнiя мýжеви, и посѣщéнiя емý от Гóспода.
Тѣ́мже, разуми́вiи сéрдцемъ, послýшайте менé, не бýди ми́ предъ Гóсподемъ нечéствовати и предъ вседержи́телемъ возмути́ти прáвду:
но воздаéтъ человѣ́кови, я́коже твори́тъ кíйждо и́хъ, и на стези́ мýжестѣй обря́щетъ и́.
Мни́ши же Гóспода нелѣ́пая сотвори́ти, или́ вседержи́тель смятéтъ сýдъ, и́же сотвори́ зéмлю?
Ктó же éсть творя́й поднебéсную и я́же въ нéй вся́ческая?
А́ще бо восхóщетъ запрети́ти и дýхъ у себé удержáти,
ýмретъ вся́ка плóть вкýпѣ, вся́къ же человѣ́къ въ зéмлю пóйдетъ, отню́дуже и сóзданъ бы́сть.
А́ще же не увѣщáешися, послýшай си́хъ, внуши́ глáсъ глагóлъ.
Ви́ждь ты́ ненави́дящаго беззакóнная и губя́щаго лукáвыя, сýща, вѣ́чна, прáведна.
Нечести́въ éсть глагóляй царéви, закóнъ преступáеши, нечести́вѣйше, князéмъ:
и́же не постыдѣ́ся лицá честнáго, нижé вѣ́сть чéсть возложи́ти си́льнымъ, удиви́тися ли́цамъ и́хъ.
Тщé же и́мъ сбýдется, éже возопи́ти и моли́ти мýжа: занé употреби́ша беззакóнно, безчéстяще немощны́хъ.
Тóй бо зри́тель éсть дѣ́лъ человѣ́ческихъ, утаи́ся же от негó ничтóже от тѣ́хъ, я́же творя́тъ:
нижé бýдетъ мѣ́сто укры́тися творя́щымъ беззакóнная:
я́ко не на мýжа положи́тъ ещé.
Госпóдь бо всѣ́хъ ви́дитъ, постизáяй неизслѣ́дная, слáвная же и изря́дная, и́мже нѣ́сть числá,
свѣ́дый и́хъ дѣлá, и обрати́тъ нóщь, и смиря́тся.
Угаси́ же нечести́выя, ви́дими же предъ ни́мъ:
я́ко уклони́шася от закóна Бóжiя, оправдáнiй же егó не познáша,
éже вознести́ къ немý вóпль ни́щихъ, и вóпль убóгихъ услы́шитъ.
И тóй тишинý подáстъ, и ктó осýдитъ? и сокры́етъ лицé, и ктó ýзритъ егó? и на язы́къ, и на человѣ́ка вкýпѣ,
и́же поставля́етъ царéмъ человѣ́ка лицемѣ́ра за стропти́вость людíй.
Я́ко къ крѣ́пкому глагóляй: взя́хъ, не отимý вмѣ́сто залóга:
безъ менé узрю́, ты́ покажи́ ми: áще непрáвду содѣ́лахъ, не и́мамъ приложи́ти.
Едá от тебé истя́жетъ ю́, я́ко ты́ отри́неши, я́ко ты́ изберéши, а не áзъ ли? и чтó разумѣ́еши? глагóли.
Тѣ́мже смы́сленнiи сéрдцемъ рекýтъ сiя́, мýжъ же премýдръ услы́ша глагóлъ мóй.
И́овъ же не въ рáзумѣ глагóлаше, словесá же егó не въ хи́трости.
Обáче навы́кни, и́ове, не дáждь ещé отвѣ́та, я́коже немýдрiи:
да не приложи́мъ на грѣхи́ нáшя: беззакóнiе же на нáсъ вмѣни́тся, мнóгая глагóлющихъ словесá на Гóспода.
Отвѣщáвъ же ещé Елiýсъ, речé:
чтó сié мни́лъ еси́ на судѣ́? ты́ ктó еси́, я́ко рéклъ еси́: прáвъ éсмь предъ Гóсподемъ?
Или́ речéши: чтó сотворю́ согрѣши́въ?
А́зъ же ти́ дáмъ отвѣ́тъ и трiéмъ другóмъ твои́мъ.
Воззри́ на нéбо и ви́ждь: смотри́ же на о́блаки, кóль высóки сýть от тебé.
А́ще согрѣши́лъ еси́, чтó сотвори́ши? áще же и мнóго беззакóнновалъ еси́, чтó мóжеши сотвори́ти?
Понéже ýбо прáведенъ еси́, чтó дáси емý? или́ чтó изъ руки́ твоея́ вóзметъ?
Мýжеви подóбному тебѣ́ нечéстiе твоé, и сы́ну человѣ́ческому прáвда твоя́.
От мнóжества оклеветáемiи воззовýтъ, возопiю́тъ от мы́шцы мнóгихъ:
и не речé: гдѣ́ éсть Бóгъ сотвори́вый мя́, устроя́яй стражбы́ нощны́я,
отдѣля́яй мя́ от четверонóгихъ земны́хъ и от небéсныхъ пти́цъ?
тáмо воззовýтъ, и не и́маши услы́шати, и от досáды злы́хъ.
Безмѣ́стная бо ви́дѣти не хóщетъ Госпóдь: сáмъ бо вседержи́тель зри́тель éсть творя́щихъ беззакóнная, и спасéтъ мя́.
Суди́ся же предъ ни́мъ, áще мóжеши похвали́ти егó, я́коже éсть и ны́нѣ.
Я́ко нѣ́сть посѣщáяй гнѣ́вомъ свои́мъ, и не познá прегрѣшéнiя коегóлибо зѣлó.
И́овъ же всýе отверзáетъ устá своя́, невѣ́дѣнiемъ словесá отягощáетъ.
Приложи́въ же ещé Елiýсъ, речé:
пожди́ ми мáло ещé, да тя́ научý: ещé бо у менé éсть слóво.
Прiи́мъ хи́трость мою́ отдалéча, дѣ́лы же мои́ми прáведная рекý вои́стинну:
и не непрáведны глагóлы безъ прáвды уразумѣ́еши.
Ви́ждь же, я́ко Госпóдь не отри́нетъ незлóбиваго:
си́ленъ крѣ́постiю сердцá нечести́выхъ не оживи́тъ и сýдъ ни́щымъ дáстъ,
не отъи́метъ от правди́ваго очéсъ свои́хъ, и со цари́ на престóлѣ посади́тъ и́хъ на побѣ́ду, и вознесýтся.
Свя́заннiи въ ручны́хъ ýзахъ я́ти бýдутъ ýжами нищеты́,
и возвѣсти́тъ и́мъ дѣлá и́хъ и прегрѣшéнiе и́хъ, я́ко укрѣпя́тся:
но правди́ваго услы́шитъ, и речé, я́ко обратя́тся от непрáвды.
А́ще услы́шатъ и порабóтаютъ, скончáютъ дни́ своя́ во благи́хъ и лѣ́та своя́ въ благолѣ́потѣ:
нечести́выхъ же не спасéтъ, занé не хотѣ́ша познáти Гóспода и занéже учи́ми не послушли́ви бѣ́ша.
И лицемѣ́ри сéрдцемъ возмутя́тъ я́рость: не возопiю́тъ, я́ко связá и́хъ:
да ýмретъ ýбо въ ю́ности душá и́хъ, житié же и́хъ уязвля́емо áнгелы,
занéже оскорби́ша недýжна и нéмощна, сýдъ же крóткихъ изложи́тъ.
Ещé же истóргну тя́ от ýстъ врáжiихъ: бéздна, проли́тiе подъ нéю, и сни́де трапéза твоя́ испóлнена тýка.
Не оскудѣ́етъ же от прáведныхъ сýдъ:
я́рость же на нечести́выя бýдетъ, нечéстiя рáди дарóвъ и́хъ, и́хже прiимáху на непрáвдѣ.
Да не уклони́тъ тя́ вóлею ýмъ от мольбы́ въ бѣдѣ́ сýщихъ немощны́хъ и всѣ́хъ содержáщихъ крѣ́пость.
Не привлецы́ нóщи, éже взы́ти лю́демъ вмѣ́сто и́хъ:
но сохрани́ся, да не содѣ́еши злá: си́хъ бо рáди изъя́тъ еси́ от нищеты́.
Сé, крѣ́пкiй удержи́тъ крѣ́постiю своéю: ктó бо éсть, я́коже тóй, си́ленъ?
и ктó éсть испытýяй дѣ́лъ егó? или́ ктó рекíй: содѣ́я непрáвду?
Помяни́, я́ко вéлiя дѣлá егó сýть, и́миже владѣ́ша мýжiе.
Вся́къ человѣ́къ ви́дитъ въ себѣ́, ели́цы уязвля́еми сýть человѣ́цы.
Сé, крѣ́пкiй вели́кiй, и не увѣ́мы: числó лѣ́тъ егó безконéчное:
изочтéнны же емý сýть кáпли дождéвныя, и излiю́тся дождéмъ во о́блакъ:
потекýтъ обетшáнiя, осѣни́ша же о́блацы надъ премнóгими людьми́:
врéмя постáви скотý, вѣ́дятъ же лóжа чи́нъ.
О всѣ́хъ си́хъ не диви́тлитися ýмъ, и не измѣня́етлися ти́ сéрдце от тѣ́ла?
И áще уразумѣ́етъ простéртiе о́блака, рáвенство ски́нiи егó:
сé, простирáетъ на ню́ свѣ́тъ и корéнiя морскáя покры́:
тѣ́ми бо сýдитъ лю́демъ, дáстъ пи́щу могýщему.
На рукý покры́ свѣ́тъ и заповѣ́да о нéмъ срѣтáющему:
возвѣсти́тъ о нéмъ дрýгу своемý Госпóдь, стяжáнiе, и о непрáвдѣ.
И от си́хъ возмятéся сéрдце моé и оттóржеся от мѣ́ста своегó.
Послýшай слýха во гнѣ́вѣ я́рости Госпóдни, и поучéнiе изо ýстъ егó изы́детъ.
Подъ всѣ́мъ нéбомъ начáлство егó, и свѣ́тъ егó на крилý земли́.
Вслѣ́дъ егó возопiéтъ глáсомъ, возгреми́тъ глáсомъ вели́чiя своегó, и не измѣни́тъ и́хъ, я́ко услы́шитъ глáсъ егó.
Возгреми́тъ крѣ́пкiй глáсомъ свои́мъ ди́вная: сотвори́ бо вéлiя, и́хже не вѣ́дахомъ.
Повелѣвáяй снѣ́гу: бýди на земли́, и бýря дождя́, и бýря дождéвъ могýтства егó.
Въ руцѣ́ вся́каго человѣ́ка знáменаетъ, да познáетъ вся́къ человѣ́къ свою́ нéмощь.
Внидóша же звѣ́рiе подъ крóвъ и умолкóша на лóжи.
Изъ храни́лищъ внýтреннихъ нахóдятъ болѣ́зни, и от внѣ́шнихъ стрáнъ стýдень.
И от дыхáнiя крѣ́пка дáстъ лéдъ: управля́етъ же вóду, я́коже хóщетъ,
и избрáнное устроя́етъ о́блакъ: разженéтъ о́блакъ свѣ́тъ егó,
и сáмъ окрéстная преврати́тъ, я́коже хóщетъ, въ дѣлá и́хъ: вся́, ели́ка заповѣ́сть и́мъ, сiя́ чиноположéна сýть от негó на земли́,
áще въ наказáнiе, áще на зéмлю свою́, áще на ми́лость обря́щетъ и́.
Внуши́ сiя́, и́ове: стáни учáйся си́лѣ Госпóдни.
Вѣ́мы, я́ко Госпóдь положи́ дѣлá своя́, свѣ́тъ сотвори́въ изъ тмы́.
Вѣ́сть же разли́чiе облакóвъ и вéлiя падéнiя злы́хъ.
Твоя́ же одéжда теплá, почивáетъ же на земли́ от ю́га.
Утверждéнiя съ ни́мъ въ дрéвности, крѣпкá я́коже видѣ́нiе сли́тiя.
Чесó рáди, научи́ мя, чтó речéмъ емý? и престáнемъ мнóга глагóлюще.
Едá кни́га, или́ книгóчiа ми́ предстои́тъ? да стоя́щь сотворю́ человѣ́ку молчáти.
Не всѣ́мъ же ви́димь свѣ́тъ: свѣ́тлый éсть въ дрéвностехъ, я́коже éже от негó на о́блацѣхъ.
От сѣ́вера о́блацы златозáрни: въ си́хъ вéлiя слáва и чéсть вседержи́телева.
И не обрѣтáемъ инóго подóбна крѣ́пости егó: и́же сýдитъ прáведно, мни́ши ли, я́ко не слы́шитъ тóй?
Тѣ́мже убоя́тся егó человѣ́цы: убоя́тся же егó и премýдрiи сéрдцемъ.
Престáвшу же Елiýсу от бесѣ́ды, речé Госпóдьи́ову сквозѣ́ бýрю и о́блаки:
ктó сéй скрывáяй от менé совѣ́тъ, содержáй же глагóлы въ сéрдцы, менé же ли мни́тся утаи́ти?
Препоя́ши я́ко мýжъ чрéсла твоя́: вопрошý же тя́, ты́ же ми́ отвѣщáй.
Гдѣ́ бы́лъ еси́, егдá основáхъ зéмлю? возвѣсти́ ми, áще вѣ́си рáзумъ.
Ктó положи́ мѣ́ры ея́, áще вѣ́си? или́ ктó наведы́й вéрвь на ню́?
На чéмже столпи́ ея́ утверждéни сýть? ктóже éсть положи́вый кáмень краеугóлный на нéй?
Егдá [сотворéны] бы́ша звѣ́зды, восхвали́ша мя́ глáсомъ вéлiимъ вси́ áнгели мои́.
Загради́хъ же мóре враты́, егдá изливáшеся изъ чрéва мáтере своея́ исходя́щее:
положи́хъ же емý о́блакъ во одѣя́нiе, мглóю же пови́хъ é:
и положи́хъ емý предѣ́лы, обложи́въ затвóры и вратá:
рѣ́хъ же емý: до сегó дóйдеши и не прéйдеши, но въ тебѣ́ сокрушáтся вóлны твоя́.
Или́ при тебѣ́ состáвихъ свѣ́тъ ýтреннiй, денни́ца же вѣ́сть чи́нъ свóй,
я́тися кри́лъ земли́, оттрясти́ нечести́выя от нея́?
Или́ ты́, брéнiе взéмъ, от земли́ создáлъ еси́ живóтно, и глагóливаго сегó посади́лъ еси́ на земли́?
Отя́лъ же ли еси́ от нечести́выхъ свѣ́тъ, мы́шцу же гóрдыхъ сокруши́лъ ли еси́?
Пришéлъ же ли еси́ на истóчники мóря, во слѣдáхъ же бéздны ходи́лъ ли еси́?
Отверзáются же ли тебѣ́ стрáхомъ вратá смéртная, врáтницы же áдовы ви́дѣвше тя́ убоя́шася ли?
Навы́клъ же ли еси́ широты́ поднебéсныя? Повѣ́ждь ýбо ми́, коли́ка éсть?
Въ кóей же земли́ вселя́ется свѣ́тъ, тмѣ́ же кóе éсть мѣ́сто?
А́ще ýбо введéши мя́ въ предѣ́лы и́хъ, áще же ли и вѣ́си стези́ и́хъ?
Вѣ́мъ ýбо, я́ко тогдá рождéнъ еси́, числó же лѣ́тъ твои́хъ мнóго.
Пришéлъ же ли еси́ въ сокрóвища снѣ́жная, и сокрóвища грáдная ви́дѣлъ ли еси́?
подлежáтъ же ли тебѣ́ въ чáсъ врагóвъ, въ дéнь брáней и рáти?
Откýду же исхóдитъ слáна, или́ разсыпáется ю́гъ на поднебéсную?
Ктó же уготóва дождю́ вéлiю пролiя́нiе, и пýть мóлнiи и грóма,
одожди́ти на зéмлю, на нéйже нѣ́сть мýжа, пусты́ню, идѣ́же человѣ́ка нѣ́сть въ нéй,
насы́тити непроходи́му и ненаселéну, и прозя́бнути исхóдъ злáка?
Ктó есть дождю́ отéцъ? ктó же éсть роди́вый кáпли рóсныя?
Изъ чiегó чрéва исхóдитъ лéдъ? Слáну же на небеси́ ктó роди́лъ,
я́же нисхóдитъ я́ко водá текýщая? Лицé нечести́ва ктó устраши́?
Разумѣ́лъ же ли еси́ соýзъ плiáдъ, и ограждéнiе орióново отвéрзлъ ли еси́?
Или́ отвéрзеши знáменiя небéсная во врéмя своé? и вечéрнюю звѣздý за власы́ ея́ привлечéши ли?
Вѣ́си же ли премѣнéнiя небéсная, или́ бывáющая вкýпѣ подъ небесéмъ?
Призовéши же ли о́блакъ глáсомъ? и трéпетомъ воды́ вели́кiя послýшаетъ ли тя́?
Пóслеши же ли мóлнiи, и пóйдутъ? рекýтъ же ли ти́: чтó есть?
Ктó же дáлъ éсть женáмъ ткáнiя мýдрость, или́ испещрéнiя хи́трость?
Ктó же изчисля́яй о́блаки премýдростiю, нéбо же на зéмлю преклони́лъ,
разлiя́ся же я́ко земля́ прáхъ, спая́хъ же é, áки кáменемъ, на четы́ри ýглы?
Улови́ши же ли львáмъ я́дь, и дýшы змиéвъ насы́тиши ли?
убоя́шася бо на лóжахъ свои́хъ и сѣдя́тъ въ дéбрехъ уловля́юще.
Ктó же врáну уготóва пи́щу? пти́чищи бо егó ко Гóсподу воззвáша, облетáюще брáшна и́щуще.
А́ще уразумѣ́лъ еси́ врéмя рождéнiя кóзъ живýщихъ на горáхъ кáменныхъ? усмотри́лъ же ли еси́ болѣ́знь при рождéнiи елéней?
изчи́слилъ же ли еси́ мéсяцы и́хъ испóлнены рождéнiя и́хъ, болѣ́зни же и́хъ разрѣши́лъ ли еси́?
Вскорми́лъ же ли еси́ дѣ́тищы и́хъ внѣ́ стрáха, болѣ́зни же и́хъ отслéши ли?
извéргнутъ чáда своя́, умнóжатся въ порождéнiи, изы́дутъ и не возвратя́тся къ ни́мъ.
Ктó же éсть пусти́вый ослá ди́вiяго свобóдна, ýзы же егó ктó разрѣши́лъ?
Положи́хъ же жили́ще егó пусты́ню и селéнiя егó слáность:
смѣя́йся мнóгу нарóду грáда, стужáнiя же дáнническаго не слы́шай,
усмóтритъ на горáхъ пáжить себѣ́ и вслѣ́дъ вся́каго злáка и́щетъ.
Похóщетъ же ли ти́ единорóгъ рабóтати, или́ поспáти при я́слехъ твои́хъ?
привя́жеши ли ремéнiемъ и́го егó, и провлечéтъ ти́ бразды́ на пóли?
надѣ́ешилися нáнь, я́ко мнóга крѣ́пость егó? попýстиши же ли емý дѣлá твоя́?
повѣ́риши же ли, я́ко воздáстъ ти́ сѣ́мя? внесéтъ же ли ти́ въ гумнó?
Крилó веселя́щихся неелáсса, áще зачнéтъ Аси́да и нéсса?
я́ко остáвитъ на земли́ я́ица своя́, и на пéрсти согрѣ́етъ,
и забы́, я́ко ногá разбiéтъ, и звѣ́рiе сéлнiи поперýтъ:
ожесточи́ся на чáда своя́, áки бы не ея́, вотщé труди́ся безъ стрáха,
я́ко сокры́ Бóгъ éй премýдрость и не удѣли́ éй въ рáзумѣ:
во врéмя же на высотý вознесéтъ, посмѣéтся коню́ и сѣдя́щему на нéмъ.
Или́ ты́ обложи́лъ еси́ коня́ си́лою, и облéклъ же ли еси́ вы́ю егó въ стрáхъ?
обложи́лъ же ли еси́ егó всеорýжiемъ, слáву же пéрсей егó дéрзостiю?
копы́томъ копáя на пóли игрáетъ и исхóдитъ на пóле съ крѣ́постiю:
срѣтáя стрѣ́лы посмѣявáется и не отврати́тся от желѣ́за:
надъ ни́мъ игрáетъ лýкъ и мéчь,
и гнѣ́вомъ потреби́тъ зéмлю и не и́мать вѣ́ры я́ти, дóндеже вострýбитъ трубá:
трубѣ́ же воструби́вшей глагóлетъ, блáгоже: издалéча же обоня́етъ рáть, со скакáнiемъ и ржáнiемъ.
И твоéю ли хи́тростiю стои́тъ я́стребъ, распростéръ крилѣ́ недви́жимь, зря́ на ю́гъ?
Твои́мъ же ли повелѣ́нiемъ вознóсится орéлъ, нея́сыть же на гнѣздѣ́ своéмъ сѣдя́ вселя́ется,
на версѣ́ кáмене и въ сокровéнѣ?
тáмо же сы́й и́щетъ брáшна, издалéча óчи егó наблюдáютъ,
пти́чищи же егó валя́ются въ крóви: идѣ́же áще бýдутъ мертвечи́ны, áбiе обрѣтáются.
И отвѣщá Госпóдь Бóгъ ко и́ову и речé:
едá сýдъ со всеси́льнымъ укланя́ется? обличáяй же Бóга отвѣщáти и́мать емý.
Отвѣщáвъ же и́овъ, речé Гóсподеви:
почтó ещé áзъ прю́ся, наказýемь и обличáемь от Гóспода, слы́шай таковáя ничтóже сы́й? áзъ же кíй отвѣ́тъ дáмъ къ си́мъ? рýку положý на устѣ́хъ мои́хъ:
еди́ною глагóлахъ, втори́цею же не приложý.
Пáки же отвѣщáвъ Госпóдь, речé ко и́ову изъ о́блака:
ни́, но препоя́ши я́ко мýжъ чрéсла твоя́: вопрошý же тя́, ты́ же ми́ отвѣщáй.
Не отвергáй судá моегó: мни́ши ли мя́ инáко тебѣ́ сотвóрша, рáзвѣ да яви́шися правди́въ?
Едá мы́шца ти́ éсть на Гóспода, или́ глáсомъ на негó греми́ши?
Прiими́ же высотý и си́лу, въ слáву же и въ чéсть облецы́ся:
пусти́ же áнгелы гнѣ́вомъ и вся́каго укори́теля смири́,
величáва же угаси́ и согнóй нечести́выя áбiе:
скры́й же въ зéмлю внѣ́ вкýпѣ и ли́ца и́хъ безчéстiя испóлни.
Исповѣ́мъ, я́ко мóжетъ десни́ца твоя́ спасти́.
Но ýбо сé, звѣ́рiе у тебé, травý áки волóве ядя́тъ:
сé ýбо, крѣ́пость егó на чрéслѣхъ, си́ла же егó на пýпѣ чрéва:
постáви о́шибъ я́ко кипари́съ, жи́лы же егó [я́ко ýже] сплетéны сýть,
рéбра егó рéбра мѣ́дяна, хребéтъ же егó желѣ́зо слiя́но.
Сíесть начáло создáнiя Госпóдня: сотворéнъ порýганъ бы́ти áнгелы егó:
возшéдъ же на гóру стреми́нную, сотвори́ рáдость четверонóгимъ въ тáртарѣ:
подъ вся́кимъ дрéвомъ спи́тъ, при рóгозѣ и трóстiи и Ситóвiи:
осѣня́ютъ же надъ ни́мъ древесá вели́ка съ лѣ́торасльми и вѣ́тви напóльныя:
áще бýдетъ наводнéнiе, не ощути́тъ: уповáетъ, я́ко вни́детъ Иордáнъ во устá егó:
во óко своé вóзметъ егó, ожесточи́вся продирáвитъ нóздри.
Извлечéши ли змíа ýдицею, или́ обложи́ши уздý о ноздрéхъ егó?
или́ вдѣ́жеши колцé въ нóздри егó? ши́ломъ же проверти́ши ли устнѣ́ егó?
возглагóлетъ же ли ти́ съ молéнiемъ, [или́] съ прошéнiемъ крóтко?
сотвори́тъ же ли завѣ́тъ съ тобóю? пóймеши же ли егó рабá вѣ́чна?
поигрáеши же ли съ ни́мъ, я́коже со пти́цею, или́ свя́жеши егó я́ко врáбiя дѣ́тищу?
питáются ли же и́мъ язы́цы, и раздѣля́ютъ ли егó Финикíйстiи нарóди?
вся́ же плáвающая собрáвшеся не подъи́мутъ кóжи еди́ныя о́шиба егó, и корабли́ ры́барей главы́ егó.
Возложи́ши же ли нáнь рýку, воспомянýвъ брáнь бывáющую на тѣ́лѣ егó? и ктомý да не бýдетъ.
Не ви́дѣлъ ли еси́ егó, и глагóлемымъ не удиви́лся ли еси́? не убоя́лся ли еси́, я́ко уготóвася ми́?
Ктó бо éсть противля́яйся мнѣ́, или́ ктó противостáнетъ ми́ и стерпи́тъ,
áще вся́ поднебéсная моя́ éсть?
Не умолчý егó рáди и слóвомъ си́лы поми́лую рáвнаго емý.
Ктó откры́етъ лицé облечéнiя егó, въ согбéнiе же пéрсей егó ктó вни́детъ?
Двéри лицá егó ктó отвéрзетъ? о́крестъ зубóвъ егó стрáхъ,
утрóба егó щиты́ мѣ́дяны, сою́зъ же егó я́коже смири́тъ кáмень,
еди́нъ ко другóму прилипáютъ, дýхъ же не прóйдетъ егó:
я́ко мýжъ брáту своемý прилѣпи́тся, содержáтся и не оттóргнутся.
Въ чхáнiи егó возблистáетъ свѣ́тъ: óчи же егó видѣ́нiе денни́цы.
Изъ ýстъ егó исхóдятъ áки свѣщы́ горя́щыя, и размéщутся áки и́скры óгненныя:
изъ ноздрéй егó исхóдитъ ды́мъ пéщи горя́щiя огнéмъ ýглiя:
душá же егó я́ко ýглiе, и я́ко плáмы изъ я́стъ егó исхóдитъ..
На вы́и же егó водворя́ется си́ла, предъ ни́мъ течéтъ пáгуба.
Плóти же тѣлесé егó сольпнýшася: Лiéтъ нáнь, и не подви́жится.
Сéрдце егó ожестѣ́ áки кáмень, стои́тъ же áки нáковальня неподви́жна.
Обрáщшуся же емý, стрáхъ звѣрéмъ четверонóгимъ по земли́ скáчущымъ.
А́ще сря́щутъ егó кóпiя, ничтóже сотворя́тъ емý, копié вонзéно и броня́:
вмѣня́етъ бо желѣ́зо áки плéвы, мѣ́дь же áки дрéво гни́ло:
не уязви́тъ егó лýкъ мѣ́дянъ, мни́тъ бо каменомéтную прáщу áки сѣ́но:
áки стéблiе вмѣни́шася емý млáтове, ругáетжеся трýсу огненóсному.
Лóже егó остни́ óстрiи, вся́ко же злáто морскóе подъ ни́мъ, я́коже брéнiе безчи́сленно.
Возжизáетъ бéздну, я́коже пéщь мѣ́дяну: мни́тъ же мóре я́ко мировáрницу
и тáртаръ бéздны я́коже плѣ́нника: вмѣни́лъ бéздну въ прохождéнiе.
Ничтóже éсть на земли́ подóбно емý сотворéно, порýгано бы́ти áнгелы мои́ми:
всé высóкое зри́тъ: сáмъ же цáрь всѣ́мъ сýщымъ въ водáхъ.
Отвѣщáвъ же и́овъ, речé ко Гóсподу:
вѣ́мъ, я́ко вся́ мóжеши, невозмóжно же тебѣ́ ничтóже.
Ктó есть тая́й от тебé совѣ́тъ, щадя́й же словесá и от тебé мни́тся утаи́ти? ктó же возвѣсти́тъ ми́, и́хже не вѣ́дѣхъ, вéлiя и ди́вная, и́хже не знáхъ?
Послýшай же менé, Гóсподи, да и áзъ возглагóлю: вопрошý же тя́, ты́ же мя́ научи́:
слýхомъ ýбо ýха слы́шахъ тя́ пéрвѣе, ны́нѣ же óко моé ви́дѣ тя́:
тѣ́мже укори́хъ себé сáмъ, и истáяхъ, и мню́ себé зéмлю и пéпелъ.
Бы́сть же егдá изглагóла Госпóдь вся́ глагóлы сiя́ и́ову, речé Госпóдь ко Елифáзу Ѳемани́тину: согрѣши́лъ еси́ ты́ и óба дрýзiе твои́: не глагóласте бо предо мнóю ничтóже и́стинно, я́коже рáбъ мои́ и́овъ:
ны́нѣ же возми́те сéдмь телцéвъ и сéдмь овнóвъ и иди́те ко рабý моемý и́ову, и сотвори́тъ жéртву о вáсъ: и́овъ же рáбъ мóй помóлится о вáсъ, понéже тóчiю лицé егó прiимý: áще бо не егó рáди, погуби́лъ бы́хъ ýбо вáсъ: не глагóласте бо и́стины на рабá моегó и́ова.
Оти́де же Елифáзъ Ѳемани́тинъ и Валдáдъ Савхéйскiй и Софáръ Минéйскiй и сотвори́ша, я́коже повелѣ́ и́мъ Госпóдь. И отпусти́ грѣхи́ и́мъ и́ова рáди.
Госпóдь же возрасти́ и́ова: моля́щуся же емý и о друзѣ́хъ свои́хъ, отпусти́ и́мъ грѣхи́ и́хъ, и дадé Госпóдь сугýбая, ели́ка бя́ху прéжде и́ову во усугублéнiе.
Услы́шаша же вси́ брáтiя егó и сестры́ егó вся́ случи́вшаяся емý, и прiидóша къ немý, и вси́ ели́цы знáху егó пéрвѣе: я́дше же и пи́вше у негó, утѣ́шиша егó и диви́шася о всѣ́хъ, я́же наведé нáнь Бóгъ: дадé же емý кíйждо áгницу еди́ну и четы́ре дрáхмы злáта назнáменована.
Госпóдь же благослови́ послѣ́дняя и́овля, нéже прéжняя: бя́ху же скóти егó, овéцъ четыренáдесять ты́сящъ, велблю́довъ шéсть ты́сящъ, супрýгъ волóвъ ты́сяща, осли́цъ стáдныхъ ты́сяща.
Роди́шажеся емý сы́нове сéдмь и дщéри три́:
и наречé пéрвую ýбо дéнь, вторýю же кассíю, трéтiю же Амалѳéевъ рóгъ:
и не обрѣтóшася подóбны въ лѣ́потѣ дщéремъ и́овлевымъ въ поднебéснѣй: дадé же и́мъ отéцъ наслѣ́дiе въ брáтiи и́хъ.
Поживé же и́овъ по я́звѣ лѣ́тъ стó сéдмьдесятъ, всѣ́хъ же лѣ́тъ поживé двѣ́сти четы́редесять óсмь. И ви́дѣ и́овъ сы́ны своя́ и сы́ны сынóвъ свои́хъ, дáже до четвéртаго рóда.
И скончáся и́овъ стáръ и испóлнь днíй.
Пи́сано же éсть пáки востáти емý, съ ни́миже Госпóдь возстáвитъ и́.
Тáко толкýется от Си́рскiя кни́ги: въ земли́ ýбо живы́й авситидíйстѣй, на предѣ́лѣхъ Идумéи и Аравíи: прéжде же бя́ше и́мя емý Иовáвъ:
взéмъ же женý Арáвляныню, роди́ сы́на, емýже и́мя еннóнъ: бѣ́ же тóй отцá ýбо Зарéѳа, Исáвовыхъ сынóвъ сы́нъ, мáтере же Восóрры, я́коже бы́ти емý пя́тому от Авраáма.
И сíи цáрiе цáрствовавшiи во Едóмѣ, éюже и тóй обладáше странóю: пéрвый Валáкъ сы́нъ Веóровъ, и и́мя грáду егó Деннавá: по Валáцѣ же Иовáвъ, нарицáемый и́овъ: по сéмъ Ассóмъ бы́вшiй вóждь от Ѳеманитидíйскiя страны́: по сéмъ Адáдъ, сы́нъ Варáдовъ, и́же изсѣчé Мадiáма на пóли Моáвли, и и́мя грáду егó геѳéмъ.
Пришéдшiи же къ немý дрýзiе, Елифáзъ [сы́нъ Софáнь] от сынóвъ Исáвовыхъ, цáрь Ѳеманíйскiй, Валдáдъ [сы́нъ Амнóна Ховáрскаго] Савхéйскiй власти́тель, Софáръ Минéйскiй цáрь.
Comments